Milizianoen eta gudarien bizitzaren nondik norakoen berri izateko parada izango dute interesatuek domekan, abuztuaren 16an, Sopelan eta Berangon. Izan ere, Burdin Hesiaren aztarnak ezagutzeko antzeztutako bisita gidatuak antolatu dituzte zeregin horretarako. Goizeko 09:30ean jarri dute hitzordua, Larrabasterrako Urko aparkalekuan eta, antolatzaileek iragarri dutenez, egitasmoak ordu bi eta erdi iraungo du. Bisitak Sopela eta Berangoko Burdin Hesiaren aztarnak erakutsiko ditu, Frentes de Euzkadi elkarteko kideen laguntzagaz. Horiek, garaiko pertsonaien paperak interpretatuko dituzte, gerturatuko diren denen gozamenerako eta historia beren-beregi ezagutzeko. Hala, Areneburuko metrailadore-gune eta Urkomendiko gotorlekuak bisitatuko dituzte, besteak beste. Hala ere, horretan parte hartu gura duenak aldez aurretik izena eman beharko da; taldeak murriztuak izango dira, 20 pertsonakoak, COVID-19aren protokoloak bermatzeko.
Bestelako bisitak
Sopela eta Berangokoa Jata-Ondok proposatutako bigarren txangoa izango da; joan den uztailaren 12an Urdulizeko aztarnak ezagutzeko aukera egon zen eta irailaren 6an Gamiz-Fika ingurura egingo dute salto.
