Euskal preso eta iheslarien etxeratzearen aldeko mendi igoerak egingo dituzte zapatuan

Aurreikuspena zen urriaren 3n gauzatzea egitasmoa, baina, eguraldi kaskarraren ondorioz, bertan behera utzi zuten euskal presoen eskubideen aldeko ekimena. Hala, zapatu honetan, maiatzaren 8an, berreskuratuko dituzte mendi-igoerak; guztira, Euskal Herriko 650 tontorretara igotzeko deia egin du Sarek, tartean, Uribe Kostako Munarrikolanda, Ermua, Unbe eta Kurkudi.

Euskal Herri osoko 650 menditara aldi berean igotzeko deialdia egin du Sare mugimenduak, preso, erbesteratu eta iheslariak etxera itzultzearen aldeko Izan Bidea ekimenaren barruan. Hain zuzen ere, Algorta, Barrika, Berango, Sopela eta Urdulizko herritarrei Munarrikolandara igotzera deitu diete; Gorliz, Lemoiz eta Plentziakoei Ermua igotzera; Erandiokoei Unbera; eta, azkenik, Itzubaltzeta-Areeta eta Leioakoei Kurkudira.

Euskal Herriak dituen biztanle adina kilometro ibiltzea da Izan Bidea ekimenaren erronka: 3.127.326. Uribe Kostan, berbarako, oinezko martxak egin ziren ekainaren 21ean. "Orain, gure aldarrikapenak mendien tontorretara eramateko erronka ezarri diogu geure buruari", azaldu du Sarek.

"Kilometroak eta urratsak batzen ari gara, helburu argi batekin: euskal presoen arazoari konponbidea ematea, eta bizikidetza eta bakea lortzeko aurrerantz joatea", dio Sarek, "gizartearen aktibazioa erakundeen lanarekin uztartuz egoera honi behin betiko irtenbidea eman dakiokeela uste dugu". Presoak Euskal Herrira ekartzeko gizartearen eta erakundeen kontsentsua dagoela azpimarratu du elkarteak.

Ekimenean parte hartzeko izena eman beharko da 650tontor.sare.eus atarian (herria eta gailurra hautatu behar dira). “Ekimen polita eta esanguratsua da, erakusteko prest gaudela urratsak emateko, aldapan gora edo aldapan behera, baina guztiok batera, euskal presoen eskubideen urraketa desager dadin”, Sarek berri eman duenez.

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun