Azken 15 egunotan 161.099 pertsonek hartu dute parte ekimenean belarriprest zein ahobizi roletan. Aurtengo Euskaraldia "benetako Euskaraldia" izan dela azpimarratu du Urkijok, herritarrek modu hausnartuan egin baitute ariketa, beren helburuak lortzera bideratuta. Bingen Zupiria Eusko jaurlaritzako bozeramaileak eta Kike Amonarriz Euskaltzaleen Topaguneko lehendakariak urteotan euskararen normalizazioaren mesedetan eman diren aurrerapausoetan egin dute azpimarra.
Amonarrizek azaldu duenez, lau urteotan eman diren urratsei esker jendartean inoiz baino argiago ulertu eta txertatu dira Belarriprest eta Ahobizi rolak: "Urrats garrantzisuak eman ditugu rolen legitimiazioan". Halaber, txapa eramatearen garrantzia azpimarratu du Amonarrizek, euskaraz egiteko aukerak bistaratze aldera; izan ere, aurreko urteetan baino jende gutxiagok jantzi omen du bereizgarria. Txapak ikusterakoan babestuta sentitzen garela eta estres linguistikoa murrizten dela diote Euskaraldiaren ikerketek.
Gauzak horrela, eguneroko bizimoduan eta gizartean errotuta dauden ohiturak aldatzeko helburua duen ekimenarekin aurrera jarraitzeko dei egin die Euskaraldian parte hartu duten herritar eta erakundeei, bihartik aurrera ere hizkuntza-ohiturak aldatzen jarraitzeko.
