Zure ustez, Avanzada errepidearen fisionomia egokia al da egunero-egunero hartzen duen trafiko kopuru horretarako? Zeintzuk gabezia ditu?
Oro har, ardatz horren fisionomia ez da egokia, mugimendu fluxu guztiak kotxez egiteko diseinatua dagoelako. Hori du gabezia nagusia. Trafiko-arazoak daude, besteak beste, ardatz horretan garraio publikoa hutsaren hurrengoa delako, eta ez dagoelako, esaterako, bizikleta-ardatz duin bat.
Zeintzuk neurri har daitezke gaur-gaurkoz mugikortasunaren arazo horri amaiera emateko? Epe motzean neurriak aplikatzeko aukerarik badago azpiegitura handirik eraiki gabe?
Azkenaldia bogan daude autobideen eraldaketa proiektuak. Alegia, ulertzea azpiegiturak ezin direla soilik izan kotxeak ahalik eta azkarren/erosoen joateko, eta ardatz horiek multimodalak izan behar direla hobe funtziona dezaten. Epe motzera, lurralde antolaketa bera birpentsatu behar da, hau da, funtzio ezberdinak lurraldean non eta nola kokatzen ditugun. Ez du zentzurik lurralde antolakuntza mailan hartutako erabaki txarrak mugikortasun politikekin konpontzen saiatzea.
Bizkaiko Foru Aldundiak, bere aldetik, itsasadarraren azpiko tunela proiektatu du neurri gisa. Hala ere, azken txostenek diote arazoa konpondu baino, horrek trafikoa hirukoiztea eragingo lukeela. Zer iritzi diozu horri?
Eskari induzituaren fenomenoa gauza frogatua da: trafikoa arintzeko bide-azpiegitura berriak egiten jarraitzeak trafikoa igo besterik ez du egiten. Lewis Munfordek esaten zuen: “Trafikoa hobetzeko erreiak gehitzea zera da, obesitatea sendatzeko gerrikoa askatzea bezala”. Obra horrek eskari bati erantzun ahal dio, baina eskaria sortu ere egingo du, zalantzarik ez dut.
Nola eragin dezake Bilboko metropoliaren etorkizuneko garapenak Avanzadako eta, ondorioz, Uribe Kostako trafikoan? Plangintza urbanistikoan, aldez aurretik aztertzen al da mugikortasunaren inpaktua?
Lurralde antolamenduan eta hirigintzan beti aztertzen da mugikortasuna; analisi horiek kontuan hartzen diren beste gauza bat da. Egin beharreko galdera zera da: ze hazkunde mota nahi dugu? Kanpora begirako hazkunde bat ala barrura begirakoa?
Gure eguneroko beharrak elkarren artean urruti izango dituen lurralde bat ala gertuko mugikortasuna bultzatzen duena? Kotxea izatea ia derrigorrezko egiten duen eredu bat ala garraio publikoa elikatzen duen bat? Galdera horiek erantzuten hasi beharko ginateke errail gehiago deblauki eskatu aurretik.
