Alex Txikon alpinista bizkaitarrak, "Mundu bat Motxilan filmaren proiekzioan egongo da, eta, ondore, solasaldia egingo du bertaratzen direnakaz.
Gaur, hilaren 26an, manifestazioa egingo dute Itzubaltzeta/Romoko Lope de Vega kaleko udal-eraikina eraistearen kontra. Romo Plataformak antolatuta, 19:30ean elkartuko dira bertan. Era berean, aldarrikapen horri babesa adierazteko sinadurak batu eta udal-arduradunei bidali dizkietela azaldu dute ekintzaileek.
Aterpe Leioa Gazteguneak Zer sortuko duzu? komiki tailerra antolatu du maiatzeko eguenetan egiteko. Arratsaldeetan izango da 17:00etatik 19:00etara. Ekintza hori 12 eta 30 urte bitarteko gazteentzat dago zuzenduta. Izena emateko eta informazioa eskuratzeko deitu 944 055 850 telefono zenbakira, edo idatzi gazte@leioa.net helbide elektronikora.
Lilagunek sexu-aniztasunaz berba egiteko tailerra antolatu du, maiatzaren 17an ospatzen den Homofobia, Transfobia eta Bifobiaren Aurkako Nazioarteko Egunaren testuinguruan. Saio bi egingo dituzte, hilaren 20an eta 27an, eta, horietan, hainbat sexualitatez arituko dira, Nahia Rojo sexologoa eta psikologoa eta Izaskun Aranbarri sexologo eta LGTB+ militantea. Besteak beste, sexualitateen adierazpen, emozio, interakzio erotiko, gorputz eta plazerei buruzko hausnarketa egingo dute, eta ohiko sinesmenak eta aurreiritziak ere aztertuko dituzte.
Aurten ere, euskaldunak elkartu eta giro lasaian gai zehatz batzuei buruz aritzeko Berbodromoak antolatuko dituzte. Saioak modu bitara egingo dira oraingoan, maiatzaren 26an eta 27an, online eta aurrez aurre, hurrenez hurren. Lehenengo saioa Zoom bidez egingo dute, lauko taldetan batuta; hurrengo egunean, aldiz, saio bi egingo dituzte, Fadurako kiroldegian eta Romo eskolako patioan, lauko taldetan banatuta ere, baina, kasu horretan, aurrez aurre.