Bizkaiko Fiskaltzak Erandioko kutsadura aztertzeko ikerketa-eginbideak zabalduko ditu

Befesa lantegiko isurketa baten irduia. © ERANDIOKO AUZOKIDEOK-ERANDIO BIZIRIK

Erandioko Auzokideok-Erandio Bizirik elkarteak Befesa lantegiak egiten dituen isurketa kutsatzaileak salatu ditu Bizkaiko Probintzia Fiskaltzan, Altzagan eta Arriagako gertaera toxikoak iker ditzaten. Deitoratu dutenez, asteotako isuriek osasun publikoarentzako larrialdi-mailak gainditu dituzte.

Erandio eta inguruko udalerrietako biztanleak beraien etxeetako leiho eta ateak ixtera behartuta daude, Befesa lantegitik ateratzen diren keen eraginez. Erandioko auzoetako elkarteek hainbatetan salatu dutenez, batzuetan, isuriak kontrolik gabe ateratzen dira lantegi horretatik, eta, orduan, ezin daiteke ezta kalera atera.

Orain arte, Erandioko zenbait elkartek hainbat salaketa eta ekintza egin dituzte bizi duten egoera salatzeko, eta diotena irudiakaz, testigantzakaz eta neurketakaz frogatu ere egin dute. Oraingoan, Erandioko Auzokideok-Erandio Bizirik auzo-elkartetik Ingurumen Fiskaltzari erregu egin diote, batez ere, Arriaga eta Altzagan egon ohi diren gertaera toxikoak azter ditzaten. "Gure ustez, osasun publikoaren eta ingurumenaren aurkako delituak izan daitezke", azpimarratu dute.

"Norbaitek, nolabait, egoera hori geldiarazteaz gain, neurriak ere jarri behar ditu mahai gainean, osasun publikoari etengabe kalte egin ez diezaion, gero eta handiagoa baita ekintza politiko eta instituzionalik ezaren aurrean", adierazi dute. Bestalde, auzo-elkarteak "egoera horien jarraipena, kontrola eta salaketa" egiten jarraituko dutela iragarri dute.

Isuri toxikoen handitzea

Azken asteotan, Befesa lantegitik atera diren isuriek osasun publikoarentzako larrialdi-maila izan dute Arriaga eta Altzaga auzoetan, Airearen Kalitatearen Estatuko Indizearen arabera. Erandioko Auzokideok-Erandio Bizirik elkartetik azaldu dutenez, herritarrek egindako neurketetan PM 2,5 partikulen balioek 500 mikrogramoak gainditu dituzte jendea bizi den eremuetan. Neurketa horiek fidagarriak direla arrazoitu dute, Eusko Jaurlaritzak Erandion duen neurgailu ofizialagaz konparazio-testak egin dituztelako.

Gaineratu dutenez, Goikoan instalatutako unitate kromatografoak ez ditu emisio horiek neurtzen, ez baitago kokatuta isurketen norabide nagusiaren arabera.

Horretaz gain, Eusko Jaurlaritzak kutsadurari buruz egin duen azken txostenean adierazten denez, oro har, EAEko airearen kalitatea hobetu egin da, Erandion nabarmen okertu den bitartean.

Befesa Aluminio S.L. altzairu-hautsak, gatz-zepak eta aluminio-hondakinak birziklatzen eta horiekaz lotutako beste industria-zerbitzu batzuetan espezializatutako konpainia da. Auzotarrek adierazi dutenez, enpresa errentagarria da eta etekin handiak lortzen ditu, beraz, "instalazioak egokitu behar ditu, gertaera toxiko horiek saihesteko".

 

 
Erlazionatuak

Erandioko kutsadura-arazoa ez dela bukatu salatu dute Altzagan

Erandio

Zapatuan, urriaren 30ean, ehunka erandioztar atera ziren Altzagako kaleetara Erandion kutsaduragaz amai dezaten exijitzeko. Josu Murueta eta Anton ...
Erandioko airea, Madrilekoa edo Bartzelonakoa baino kutsatuagoa

Erandio

Aire Zaintzaileak ekimenak ezagutzera eman dituen datuen arabera, espainiar Estatuan neurtu dituzten 28 udalerrietatik Erandio da aire kutsatuena d...
Irakurle agurgarria:

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda. Horretarako, jarri gugaz harremanetan administrazioa@hiruka.eus helbidera mezu bat idatziz edo beheko botoiari sakatuz.


Izan zaitez HIRUKAlagun