Joan den eguenean, hilak 11, egin zuten Mikel Moreno "Peyejo" gazte algortarraren, Ernaiko beste 6 kideen eta Topatuko kazetariaren aurkako epaiketaren 2. saioa Espainiako Auzitegi Nazionalean. Gertukoek jakinarazi zutenez, epaiketa hasi bezain laster, auzipetu bakoitza salaren punta banatan jarri zuten; halaber, epaileak publikoari aretora sartzea galarazi zion. Prentsak ere arazoak izan zituen zuzeneko jarraipena egiteko, goizean prentsa aretoko pantailan beste epaiketa bat emititzen ari zirelako. Epaiketari gaur emango diote amaiera, 15:30ean. Bertan, defentsak frogatzat aurkeztutako bideoak ikusi eta aztertuko dituztela jakinarazi du Topatu.infok; era berean, gura duenak alegazioak aurkeztu ahalko dituela azaldu dute.
Auzipetu denek deklaratu zuten hilaren 11n. Arrastian, ostera, Ertzainek eta Guardia Zibilek euren bertsioak azaldu zituzten. Topatu.infok argitaratu zuenez, horiek Gazte Danbadako ekitaldian esandako esaldiakaz "ez direla ondo gogoratzen" errepikatu zuten behin eta berriro. Era berean, Guardia Zibilen txostenak sarean ikusitako hainbat bideotan oinarritzen direla azaldu zuten; “Ernaiko kideen akusazioetan ere ez dute ekitaldiaren arduradun zirela edo Gazte Danbadako komunikazioa euren gain zegoela erakusteko froga zehatzik aurkeztu. Ustezko loturak eginaz ateratako ondorioak soilik”, gaineratu zuten.
"Terrorismoari gorazarre" egitea leporatuta epaituko dituzte eta fiskaltzak eta AVTren akusazio partikularrak 18 eta 24 hilabete arteko espetxe zigorra eta 10 eta 12 urte bitarteko inhabilitazioa eskatu dute haietako bakoitzarentzat. Publikoa ezin izan zen sartu epaitegira, eta bertaratutako kazetariek prentsa gelatik irten behar izan zuten, epaiketaren audiorik jarri ez zutelako.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.