Jon Ezkurdiaren kontrako epaiketa astelehenean, hilak 15, hasiko da, eta egun horretan deklaratuko du akusatuak. Auzia hilaren 24ra arte iraungo du, eta bariku honetan, hilak 12, epaimahaia osatuko dute.
Hasiera batean, polizia-probak hilaren 19an eta 22an aurkeztuko dituzte; 23an txostenak; eta, azkenik, 24an epaia jakinaraziko dute. Gainontzeko hiru egunetan lekukoen testigantzak jasoko dituzte.
Aktore getxoztarraren hilketa
Ministerio Publikoaren arabera, Jon Ezkurdiak hil egin zuen Koldo Losada senarra, biok bizi ziren etxebizitzan, Bilboko Lersundi kaleko 16. zenbakian, 2014ko azaroaren 19an. Fiskaltzaren arabera, bat-batean, senarra "hiltzeko asmoz", eta hura "erdi-lo zegoela aprobetxatuta", hainbat kolpe eman zizkion buruan objektu bategaz, defendatzeko edo ihes egiteko aukerarik eman gabe.
Kolpe horien ondorioz, biktimak hainbat lesio izan zituen buruan, eta garuneko hemorragia traumatiko baten ondorioz, hil egin zen.