Beste egun batez "obrak gelditu" dituztela aldarrikatu dute Tosuko ekintzaileek

Gaur goizeko 07:30ak aldera, Ertzaintzak beste operazio bat abiatu du, Getxoko Tosu landaren kontrola berrartzeko. Hasiera batean, hiru polizia-furgoneta hurreratu dira; gerora, beste bi hurbildu eta hasierakoek alde egin dute. Ondoren, bi horiek ordezkatu dituzte beste bi furgoneta. Azkenean, bi horiei beste bi gehitu zaizkie. Horren aurrean, nahasmena sortu da herri-ortu okupatuan zeuden denen artean; hala ere, azkenean bertan gelditu diren lau furgonetek Tosutik alde egin dute, bertan erresistentzia aktibo pasiboan zeudenak kanporatu barik.

#tosu landan ertzainen mugimendu handia: lau furgonetek alde egin dute. "tosutik ez dira pasako" oihuak bitartean pic.twitter.com/wMg2NMUHEB

— Hiruka (@HirukaEus) 2017(e)ko urriak 23

Uneoro giroa lasaia izan da, eta apurka-apurka jendea hurbiltzen hasi da landara. Bitartean, Ibarbengoako metro-geltokiko aparkalekua eraikitzeko bertaratu diren beharginek ez dituzte makinak martxan jarri, "ingurua behar bezala hesitu arte lanean jarriko ez" direlakoan, azaldu dutenez.

ETSk agindu arte #tosu landan lanean hasiko ez direla diote beharginek pic.twitter.com/ZiMoWnMBcS

— Hiruka (@HirukaEus) 2017(e)ko urriak 23

Erresistentziagaz jarraitzeko lantaldeak egingo dituzte #tosu landan pic.twitter.com/6Q5Jf4S1Hk

— Hiruka (@HirukaEus) 2017(e)ko urriak 23

Eguerdiko 11:30ak aldera Tosun bildutako ekintzaileek bilera egin dute, eta datozen orduetan zer egingo duten adostu dute. Horrez gainera, manifestazio jendetsu bat egitea erabaki dute, datorren azaroaren 11n, 12:30ean, Algortako Telletxe plazatik abiatuta.

Tosu Betirako: "Beste garaipentxo bat lortu dugu"

Argazki-galeria