Herri harresi bat irudikatzeagatik, 9 algortar epaituko dituzte Madrilen

Mikel Moreno eta beste zazpi gazteren kontrako epaiketaren harira deklaratu beharko dute Madrilen Algortako bederatzi lagunek.

Bihar, martitzenean, hasiko da Algortako 9 gizon-emakumeren eta beste 41 lagunen kontrako epaiketa, Alcala de Henaresen (Madril). Fiskalak bosna hilabeteko espetxe zigorra eskatzen du horientzat denentzat, desordenak egitea egotzita.

Urduñan 2013an egin zen Gazte Danbada jaialdiaren harira, 2015ean epaitu zuten Mikel Moreno algortarra, Espainiako Auzitegi Nazionalean. Beragaz batera, Iraitz Salegi Topatu.info-ko kazetaria eta Ernaiko gazte erakundeko beste sei kide deklaratu behar izan zuten. Terrorismoari gorazarre egitea egotzita, 18 eta 24 hilabete arteko espetxe zigor bana eskatu zuten Fiskaltzak eta AVTren akusazio partikularrak; hala ere, den-denak absolbitu egin zituzten.

Epaiketa egunaren aurretik, Gasteizko Herri Harresian hiru gazte espetxeratu zituzten. Kartzelatze horiek eta "gazteriaren kriminalizazioa" salatzeko, epaiketaren egunean bertan, auzipetutako zazpi gazteek epaiketa eten zuten, espetxeratuen argazkiak soinean zituztela.

Gazteek herri harresia irudikatu zuten, publikoaren babesagaz. Horrela, auzipetuak altxatu eta "euskal gazteria aurrera" oihukatu zuten, besteak beste. Elkartasuna adieraztera joandakoek ere altxatu eta oihuka eta txaloka hasi ziren. Horren ondorioz, Angela Murillo epailearen aginduz, bertan ziren guztiak identifikatu zituzten; guztira, 50 lagun.

Hiru urteren ostean, Alcala de Henareseko epaitegietan epaituko dituzte denak. Bihar, urtarrilaren 9an hasiko da epaiketa eta 15ean amaitzea espero dute. Gizon-emakume bakoitzari bost hilabeteko espetxe zigorra eskatzen diote.

Erlazionatuak

"Peyejo" eta beste zazpi auzipetuak absolbitu egin ditu Auzitegi Nazionalak

Getxo

Espainiako Auzitegi Nazionalak absolbitu egin ditu "terrorismoa goratzea" egotzita epaitutako Mikel Moreno “Peyejo” gazte algortarra, I...
Mikel Morenoren kontrako epaiketa eten du epaileak

Getxo

Mikel Moreno eta beste zazpi gazteren aurkako epaiketan, Maialen Etxebarria gazte auzipetuak defentsaren galderak erantzun ostean, akusatuek kamise...
Gazte Danbadaren haritik kartzela zigorra eskatu dute Mikel Moreno algortarrarentzat

Erabiltzailearen aurpegia Getxo

Fiskaltzak eta AVTk 18 hilabeteko espetxe zigorra eskatu dute Periko Solabarria 84 urteko ezker abertzaleko militante historikoa eta Iraitz Salegi ...