Eutsi Romo auzo-plataformak deituta, elkarretaratze bi egin zituzten atzo, eguenean, Getxon, joan den otsailean izandako protesten harira deklaratu behar izan duten bizilagun bien alde. Hilabete horretan hasi ziren Lope de Vega kaleko eraikinak eraisten, bertan belaunaldien arteko zentro bat eraikitzeko asmoz. Lehenengo protesta goizean izan zen, Getxoko epaitegien aurrean; bigarrena, berriz, Itzubaltzeta/Romoko Santa Eugenia plazan. Horietan, deklaratu behar izan duten auzokideei elkartasuna adierazteaz gainera, herria defendatzea delitua ez dela aldarrikatu zuten.
Bizkaiko Foru Aldundiak eta Getxoko Udalak Lope de Vegako eraikinen orubean belaunaldien arteko zentroa eraikitzeko akordioa berretsi zutenetik protesta ugari egin dituzte auzokideek. Izan ere, Ibar Nagusien Etxea elkarteak azpiegitura horietan egiten zituen bere jarduerak eta, eraikinok babesteko asmoz, askotariko ekimenak egin dituzte elkarteko kideek eta inguruko bizilagunek azken urteotan.
Tentsio handiena otsailean bizi izan zen; polizia-dispositibo handi batek auzoa hartu zuen, eraikinak hesitu, langileek horiek hustu eta botatzeko lanak bermatu ahal izateko. Hainbat egunez protestak izan ziren, eta ertzainen eta auzokideen arteko oldarraldiak jazo ziren.
Auzokideak proiektuaren kontra egon arren, belaunaldien arteko zentroa eraikitzeko obrak aurrera doaz; asmoa zen 2024ean irekitzea, baina El Correo egunkariak foru-iturriak aipatuta iragarri duenez, 2025eko erdialdera arte atzeratuko da, "hartu behar izan diren kautelazko neurriengatik".
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun
