Bostehun pertsona inguru bildu dira gaur arrastian Algortako Satistegi plazan, 23 urteko bizilagun baten hilketa gaitzesteko. Elkarretaratzea amaitzean, alkateak eta hainbat ordezkarik lau kandela piztu dituzte plazan, erasoak izan ziren tokitik oso gertu, joan den zapatuan labankadaz hil zuten gaztearen oroimenez.
Getxoko Udaleko Bozeramaileen Batzordeak aho batez onartu zuen, astelehenean, gertatutakoa "erabat gaitzesteko" testua, eta gertaera hori "xenofobia, arrazakeria eta gorrotoa sustatzeko aitzakia gisa" ez erabiltzea eskatu zuen. Ildo horretan ere agertu dira egunotan udalerriko talde kristau eta gizarte eragileak.
Horiez gain, besteak beste, Getxoko Etorkinen Plataformak ere bat egin du gaur egindako elkarretaratzeagaz, eta gertatutakoa gaitzetsi du. Doluminak helarazi dizkiote gaztearen familiari eta adierazi dute "kezkaz eta nahigabetzez" bete diela hilketaren ondorengo justifikazio gabeko etorkinak seinalatzeak. "Delinkuentzia inportatuaz hitz egiten duten talde oportunistak salatu nahi ditugu, gure herrian gorrotoa eta liskarra sortuz eta egunero eraikitzeko borrokatzen dugun gizarte-kohesioa hausten saiatzen direnak", adierazi dute, eta elkarbizitza eta errespetua sustatzen jarraitzeko deia egin dute.
Zapatuan, Algortan jazotako 23 urteko gizonaren hilketa gaitzesteko elkarretaratze isila egin dute Satistegi plazan, #Getxo|n pic.twitter.com/A8G7zSDjUE
— Hiruka (@HirukaEus) May 28, 2024
