Plentziako Udalak 2023rako 5,5 milioi euroko aurrekontua onartu zuen atzo, hilaren 26an, egindako osoko bilkuran. Bertan iragarritako neurrien artean, Arpillaoko eraikinaren egungo egoera aztertzeko txosten bat kontratatuko dutela adierazi zuen. Horren balioa 18.000 eurokoa dela zehazteaz gain, gobernu-taldeak ez zuen baztertu bestelako kreditu-aldaketak egitea eraikinean konponketa puntualak egiteko, bi urtez itxita egon diren aparkalekua edo lokalak zabaltzeko helburuagaz.
Udalak 2020ko abenduan eraikinaren itxiera "segurtasun arrazoiengatik" agindu zuenetik, polemika piztu da udalerrian. Izan ere, horren eraginez lokalak egun batetik bestera itxi zizkieten bai Arpillaoko lokaletan egoitza duten bost elkarteei –Arkote Arraun Taldea, Danontzat Gaztetxea, Plentzia Piraguismo Taldea, Plentzia Traineru Baltza eta AMBAR Elkartea–, baita bertako aparkalekuko 293 esleipendunei ere.
Ordutik, elkarteek hainbat mobilizazio egin dituzte Udalaren ekintza eta gardentasun falta salatzeko; are gehiago, taldeak Arpillaoko Elkarteak Bizirik izeneko plataforman osatu, txosten independente bat egin eta Arartekoarengana jo zuten. Azterlan horretan, besteak beste, ondorioztatu zuten Gaztetxearen lokala "egoera onean" dagoela, eta "iragazketa-arazo puntualak" baino ez dituela, beraz, ez zuten beharrezkotzat jo hori zigilatzea. Era berean, aparkalekuko 293 plazaren emakidadunak ere batu egin ziren eta salaketa jarri zioten Udalari, "administrazio isiltasunagatik".
Bere aldetik, Udalak adierazi du ezin izan duela aurretik eraikinean jardun, aparkalekuko esleipendunek abiatutako eta oraindik irekita dagoen prozesu judizialagatik, El Correo komunikabideak batu duenez. Era berean, gobernu-taldeak adierazi zuen eraikina birgaitzea "herritarren eskaria" dela, baina iazko maiatzekan onartutako funtsean ezin izan zutela jaso.
