Batetik, Udalak iragarri du irailaren 2ra bitartean ospatuko dituzten festetan, 688 756 072 telefonoa eman dute, erasorik izanez gero eguneko 24 orduetan arreta emateko. Horregaz batera, etxera bakarrik ez bueltatzeko laguntza-zerbitzua ere egongo da gauero Ontziola plazatik abiatuta; hau izango da horren ordutegia: abuztuak 28, 29 eta irailak 1, 2: 00:00etan eta 04:00etan; eta abuztuak 30 eta 31, 00:00etan eta 06:00etan. Halaber, jaietan zehar puntu morea ere egongo da udaletxearen ondoan.
Bestetik, herriko kaleetako higienea mantentzeko helburuagaz, Udalak jaietarako berariaz jarri dituen komunak adierazteko hainbat mapa jarri ditu hormetan eta etxebizitzen atarietan.
Azkenik, gogoratu dute lehiaketa gastronomikoetan, Play Back txapelketan eta mozorro-lehiaketan garrantzitsua dela herria garbi mantentzea. Hori dela eta, garbiketa guneak jarriko dituzte udaletxearen aldamenean eta Labastureko frontoiaren atzealdean; adiz, edukiontzi horira bota beharko diren hondakinak uzteko gunea futbito zelaian egongo da.
