Enpresa-batzordeen ohar bateratuan adierazi dutenez, industrian gertatzen ari diren itxierak eta kaleratzeak ez dira kontu berria: "Azken urteotan, gure lurraldean industria-enpresen etengabeko itxierari aurre egiten ari gara. Horren ondorioz, industriak gero eta pisu txikiagoa du Euskal Herrian, eta turismo eta zerbitzu-herrialde bihurtzen ari gara".
Horregatik, nabarmendu dute garaia dela "erakunde publikoek eta, bereziki, Eusko Jaurlaritzak erantzukizuna bere gain hartzeko eta desindustrializazio hori geldiarazteko baliabide guztiak jartzeko". Halaber, politika industrialen beharra azpimarratu dute, "etorkizuneko industriaren aldeko apustua eginez, jasangarria izango dena eta kalitatezko enplegua bermatuko duena".
Gainera, argi salatu dituzte egun industriaren kaltean hartzen diren erabakiak: "Ezin da jarraitu multinazionalei dirua oparitzeko politikekin, alfonbra gorria jartzearekin eta kontrol mota bat edo bere politiken gaineko erabaki-ahalmena ez edukitzearekin. Egitateak nahi ditugu, eta, horretarako, enplegua eta gure eskualdeen etorkizuna defendatzea beharrezkoa da".
