Herriko kaleetan manifestazioa egin eta lau plazatan prentsaurreko bana egin zuten atzo, eguaztenean, ehunka lagunek. Mobilizazio horretan, mugimendu feministako kideek emakumeei ezartzen dizkieten "edertasun ereduak" gaitzetsi zituzten: "zelakoak izan behar dugun, gure gorputzek eta janzkerek zelakoak izan behar duten esan, besteen apetak asetzeko sortu garela saltzen zaigu zuzenean edota zeharka".
Era berean, emakumeak beldurrez ibiltzera "ohitu" dituztela salatu zuten; "gure autonomia sustatu beharrean, babestu eta zaindu beharreko izaki bihurtzen gaituzte, eta, ondorioz, non eta norekin gauden, zelan gabiltzan kontrolatzea dakar, guraso, bikotekide zein lagunen kontrolpean bizitzea". Horren aurrean, ausartak izan gura ez dutela ohartarazi zuten, libreak baizik.
Horren guztiaren aurrean, emakumeei elkartu, saretu eta autodefentsa feminista praktikatzeko deia egin zieten, "beldur eta lotsen zamak astindu eta autoestimua lantzera". Horrez gainera, gizonezkoei borroka horretan bidelagun izateko eskatu zieten. Era berean, gonbidatu zituzten euren esparruetan "eginkor" jarduteko, emakumeen kontrako egiturazko zapalkuntza eta indarkeriaz ohartzen eta zelan irauli lantzen ere.
