Elkarrekin Podemosen ustez, udal-gobernuak –PSE-EEk ez du bat egin esandakoagaz– atzo eman zituen azalpenak "berandu" iritsi ziren, eta, gainera, ondarearen aurka egindako legezkontrakotasunaren errugabetzea adierazi zuten; izan ere, talde moreak azpimarratu duenez, komunikatuan behin eta berriz aipatzen da legezkotasuna lehengoratzea, proiektua aldatuz eta jauregia berreraikiz, "eta hori, oraintxe bertan desiragarria izan arren, ez du jatorrizko eraikinaren galera konpontzen". Gainera, salatu du udal-gobernuak ez duela inoiz deitoratu ondarea galtzeak dakarren larritasuna. "Ondare hori gehiago txikituko da EAJk, PSE-EEk eta PPk HAPOa onartu ondoren", azpimarratu du.
Horrez gainera, eraikina bota zuen kooperatibak azpiegitura eraisteko emandako aitzakia nahikoa ez dela deitoratu du: "Bere eginbeharra horma horiek zutik mantentzea zen. Berreraikitzeko konpromiso hutsak ez du eragindako kaltea konpontzen".
Horregatik guztiagatik, Elkarrekin Podemosek udal-gobernuari eskatu dio auzia justiziaren aurrera eraman dezala, baita udalerriko ondare babestuaren aurkako delitu penal gisa ere, eta zigor eredugarria sor dezala.
