Aurreko astean, Leioa Bizigarri herritarren koordinakundea aurkeztu zuten lau plataformek iragarri zuten euren helburuen artean auzoetako arazo eta aldarrikapenak modu bateratuan azaltzea zela. Zeregin horretarako lehen hitzordua domekan ezarri dute, plataforma guztien arteko mobilizazioa handi bategaz.
Iragarri dutenez, 11:00etan Leioako lau abiapuntutik aterako dira, eguerdian Boulevarden bukatzeko. Batetik, Domingotarren komentu zaharraren inguruko lurretan egin gura duten kiroldegi pribatuaren aurkako SOS Kurkudi plataforma San Bartolometik abiatuko da; bestetik, hainbat protesta burutu dituzten Las Vegas auzoko bizilagunek Iparragirre zeharkaletik bertatik hasiko dute martxa; horiekaz batera, Lamiako eta Txopoeta auzoetarako hainbat aldarrikapen egin dituen plataformako kideak metro-geltoki ondoko lamiaren estatuatik abiatuko dira; eta, azkenik, Avanzada bere osotasunean lurperatzeko eskatzen duen Barrios Conectados plataformak ere bere eskaria eramango du mobilizazio horretara.
Leioa Bizigarri aurkeztu zutenean bere osatzaileek euren helburua honela adierazi zuten: "Arreta-deia izan gura dugu alderdien udal-kudeaketak benetan kontuan har ditzan herritarren elkarteak, auzoetako arazoen eta premien ezagutza eta bizipen hurbilenaren eramaile garen aldetik, eta auzotarrok ere Leioari zuzenean eragiten dioten erabakien parte izan gaitezen".
