Mugak Zabalduz Karabanako 300 gizon-emakumeak talde bitan banatu ziren eguen goizean Pozzalo eta Cataniako portuetara joateko. Lehenengoek Sizilia hegoaldean dagoen Pozzaloko portuko “hotspot”-era (puntu beroa, ingelesez) gerturatu ziren. Bertan, Italiara heldutako 231 migratzaile hartzeko edukiera duen barneratze-zentroa dago, baina gaur egun 401 pertsona daude bertan, erabat pilatuta. Horietatik denetatik, 101 dira adin txikikoak eta senideen babes bakoak.
Pozzaloko barneratze-zentro horretan 72 ordura arte egon daitezke atxikita Italiara heldutako pertsona migratzaileak. Denbora tarte horretan, modu librean mugi daitezke egunez, baina gauean euren geletara bueltatu behar dira. Nino Trillo Mugak Zabalduz Karabanako Madrilgo kideak zentroko arduradunagaz berba egiteko aukera izan zuen, eta, azaldu zuenez, bertan atxikita daudenak 130 geletan pilatuta daude, nahastuta. Azpiegitura horrek 231 pertsona hartzeko gehienezko edukiera du, baina 401 pertsona daude gaur egun. Gainera, Trillok deitoratu duenez, inoiz 800 pertsona hartu dituzte bertan. Logelek ez dute komunik, eta horiek itxita daude gauez, familientzako geletan izan ezik. Modu berean, bertan dagoen mediku-zerbitzua nahikoa ez dela salatu du: mediku bakarra dago zentroan.
Pozzaloko portuko hotspotean 400 gizon-emakume daude atxikita gaur egun. Eurei elkartasuna adierazteko oihuak egin dituzte ekintzaileek portuko kanpoaldean #mugakzabalduz @HirukaEus @Hodei_Torres #AbriendoFronteras #CaravanaAbriendoFronteras #mugakzabalduzkarabana #nonUnadiMeno pic.twitter.com/vY7eoiGhkQ
— Iker Rincon (@irincon_) 2018(e)ko uztailaren 19(a)
Pozzaloko ekintzaren argazki-galeria (HODEI TORRES eta IKER RINCON)
Bitartean, Catanian, bigarren taldeak portu irekien eta seguruen aldeko nazioarteko kanpaina aurkeztu zuen prentsaurrekoan. Mineoko CARA atxikitze-zentroko 50 gizon-emakume hurbildu ziren aurkezpenera, gehien-gehienak gizonezkoak.
Karabanako talde bat Pozzalon zegoen bitartean, gainontzekoak elkarretaratzea egin dute Cataniako portuan. Bertara hurbildu dira Mineoko CARAko hainbat migratzaile #mugakzabalduz @HirukaEus #AbriendoFronteras #CaravanaAbriendoFronteras #mugakzabalduzkarabana #nonUnadiMeno pic.twitter.com/ZMKzekS9Wm
— Iker Rincon (@irincon_) 2018(e)ko uztailaren 19(a)
Portu batean zein bestean, Mediterraneo itsasoan hildako pertsona migratzaileak omentzeko eta hilketa horiek salatzeko ekintza bana egin zituzten. Horretarako, Catanian gelditu zen taldea lurrera bota zen erdi biluzik, gorputzak pintura gorriz beteta. Pozzalokoak, aldiz, itsasoan murgildu ziren, gorputz bizigabeak ur gainean irudikatzeko, “ekintza horien bitartez, Europar Batasuneko gobernuen politika kriminalek pertsona migratzaileak hil egiten dituztela irudikatu gura izan dugu”, azaldu du ekintzaileetako batek.
"Ez dira hil, hil egin dituzte", "hilketa gehiagorik ez Mediterraneoan" oihuak gorriz margotutako ekintzaileen artean #mugakzabalduz @HirukaEus @Hodei_Torres #AbriendoFronteras #CaravanaAbriendoFronteras #mugakzabalduzkarabana #nonUnadiMeno pic.twitter.com/U89uC5G0Cm
— Iker Rincon (@irincon_) 2018(e)ko uztailaren 19(a)
Denera, 1.103 pertsona hil dira aurten Libia eta Italia arteko bidea gurutzatu guran. Horren aurrean, Mugak Zabalduz Karabanak askotan eskatu die gobernuei Europara sartzeko bide legal eta seguruak martxan jartzeko, heriotzak ekidin ahal izateko.
Arrastian, berriz, Karabanako kideek militarizazioaren eta mugen itxieraren kontrako manifestazioan parte hartu zuten Catanian. Protestaldia Frontex Europako mugen kontrolerako agentziaren egoitzan amaitu zen. Bertan, pertsona migratzaileek Europara ailegatzeko pairatzen dituzten arazoak irudikatzeko antzerkia egin zuten, "Mugari ez, Frontexi ez" goiburuaren pean.
Aldarrikapenez eta salaketez beteta, Frontexaren kontrako manifestazio jendetsuan "No frontex liberta di movimento" #mugakzabalduzUK18 #AbriendoFronteras #CaravanaAbriendoFronteras #mugakzabalduzkarabana #frontexno #catania @HirukaEus @Hodei_Torres pic.twitter.com/1oEdL8DC7R
— Iker Rincon (@irincon_) 2018(e)ko uztailaren 19(a)
Manifestazioaren argazki-galeria (HODEI TORRES eta IKER RINCON)
