Gaur, domekan, meza berezia egingo dute Algortako Bariko San Nikolas parrokian, 2017an hil ziren EAJko alderdikideen eta alderdizaleen alde, EAJren Algortako Uri Buru Batzarrak iragarri duenez. Elizkizuna goizeko 12:00etan hasiko da.
Urte berrian bete-betean sartuta gaudela, urtarrileko egitarauan murgilduta dago egunotan Getxoko Ingurumen Aretoa. Hala, hilaren akabura bitartean, askotariko jarduerak egongo dira aukeran. Saio denak doakoak izango dira.
Hilaren 15etik 27ra bitartean, trenari lotutako seilu erakusketa egongo da ikusgai Plentziako Goñi Portal kultur etxean. Udalak azaldu duenez, 12 bildumatako zigiluak egongo dira ikusgai, "trenari buruzko gai interesgarriak jorratuz", hala nola trenaren historia, burdin-bideak, tren-ibiltaria eta lokomotorra ONCEren kupoietan.