Leioa Bizigarri herri-koordinakundeak egindako deiagaz bat eginez, 650 herritar inguruk parte hartu zuten atzo Leioako kaleetan egin zituzten mobilizazioetan. Udalerriko lau auzo-elkartek eta eragilek osatzen duten mugimenduak euren aldarrikapenak mezu bateratuan helarazteko helburua daukatela azpimarratu zuten: "Bat egin dugu gure auzoetako arazoei erantzunik eman ez zaielako, gardentasun faltagatik eta Leioako udal-gobernuak herritarren proposamenak entzuteko borondaterik ezaren aurrean".
Leioako lau puntu ezberdinetatik abiatu ziren mobilizazioen helmuga Boulevardeko pirulian zen arren, Hauteskunde Batzordearen erabakiz deialdiak Sakoneta kiroldegira eramatera behartu zituzten. Bertan, Las Vegas auzo-elkartea, Barrios Conectados, Lamiako Txopoeta Bizirik eta SOS Kurkudi elkarteetako kideak batu ziren eta Leioa Bizigarri herri-koordinakundearen helburuak zerrendatu zituzten, beste behin: "Arreta-deia izan gura dugu alderdien udal-kudeaketak benetan kontuan har ditzan herritarren elkarteak, auzoetako arazoen eta premien ezagutza eta bizipen hurbilenaren eramaile garen aldetik, eta auzotarrok ere Leioari zuzenean eragiten dioten erabakien parte izan gaitezen", azaldu zuten batutako leioaztarren aurrean.
Mobilizazioak aurrera egin zuen eta Sabino Arana kaletik, Udondoko Boulevardra joan ziren, gero, Luis Bilbaio kaletik Avanzara bideratzeko eta berriz ere Sakoneta kiroldegian bukatzeko.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun
