Jendartea 2014-12-20 21:37

Kalean ere fracking-ari ezezkoa eman diote sopeloztarrek

Erabiltzailearen aurpegia Ukberri 400 lagun baino gehiago elkartu dira gaur Sopelako Udalak fracking-aren kontra antolatutako kalejiran. Jai-giroan, Sopelako auzokideak, Udal Gobernuko ordezkariak eta fracking-aren kontrako mugimenduko kideak elkartu dira, "Sopela fracking gabeko herria" leloa argi eta garbi aldarrikatzeko asmoz. Era berean, Espainiako Gobernuari eta Eusko Jaurlaritzari haustura hidraulikoarekin lotutako baimen guztiak bertan behera utzi ditzatela eskatu die Udalak. Sopelak Espainiako Gobernuaren lehenengo jakinarazpena jaso zuen azaroan, Geminis baimen-eremuan (Bizkaian) egin nahi dituzten proba sismikoen harira. Argazkian, sopeloztarrak udalerriko kaleetan manifestatu dira goizean / © Sopelako Udala.
  Kultura 2014-12-20 15:31

Zortzi buru eta txapel bakarra

Erabiltzailearen aurpegia Ukberri Bizkaiko Bertsolari Txapelketako finala jokatuko da gaur Bilboko Miribilla auzoko Bilbao Arenan, 4.000 bat bertsozale baino gehiagoren aurrean. Arratsaldeko 5:30etik aurrera, Uribe Kostak dituen txapeldunetako hiruk (Fredi Paya eta Jone Uria algortarrak zein Etxahun Lekue larrabetzuarra) Bizkaiko txapela janzteko merituak egin beharko dituzte. Lehian, baina ez dira bakarrik egongo, Oihana Bartra bilbotarra eta antzina Itzubaltzetako bertso eskolako irakaslea, Arkaitz Estiballes egungo txapelduna, Iratxe Ibarra bere 8. finalean, Onintza Enbeita eta Xabat Galletebeitia lehen aldiz oholtza handira igoko dena, guztiak ere bere onena ematen saiatuko direla. Norgehiagoka horretan nagusituko denari Kristina Mardaras Sedrun emakume bertsolari antzindariak jantziko dio txapela. Argazkian, finalistak, Kristina Mardaras eta Asier Ibaibarriaga Bizkaiko Bertsozale Elkarteko presidentea / © BBE.
  Politika 2014-12-19 18:44

Presoen aldeko sare herritarra aurkeztuko dute bihar Erandion

Erabiltzailearen aurpegia Ukberri Larunbat honetan, abenduak 20, Erandioko Sare aurkezteko eta antolatzen hasteko batzar irekia egingo dute. Hitzordua 12:00etan izango da, Altzagako postetxe zaharrean. Algortan ere euskal preso politikoen eskubideen aldeko sare herritarra ehuntzen hasi dira. Hilaren 2an egin zuten beraien batzar irekia. Beraien jardueraren adibide bezala, bihar bertan, 11:00etatik 14:00etara, sarekide egiteko aukera emango dute Telletxen; baita kamisetak saldu eta informazioa banatu ere. Sare herritarreko kideek azaroaren bukaeran iragarri bezala, urtarrilaren 10ean izango da presoak euskal herriratzearen aldeko manifestazioa. "Euskal Herrira now, orain, maintenant, ahora" lelopean egingo da martxa Bilbon, 17:30ean; eta bi lekutatik abiatuko da batera: udaletxetik eta Casillatik. Etxerat elkarteak, bere aldetik, jakinarazi du jada egun horretan espetxeetara bidaiarik ez dutela egingo eta presoen senideak Bilbon izango direla. Argazkian, euskal presoek pairatzen duten sakabanaketa eta urruntze politika salatzeko asmoz, Astrabuduako Josu Murueta plazan egindako elkarretaratzea.
  Jendartea 2014-12-19 18:22

Frackingaren kontrako mobilizazioa bihar Sopelan

Erabiltzailearen aurpegia Ukberri Sopelako Udalak Espainiar Gobernuaren lehenengo jakinarazpena jaso zuen azaroan, Geminis baimen-eremuan (Bizkaian) egin nahi dituzten proba sismikoen harira. Bada, EH Bilduk zuzendutako tokiko erakundeak iragarritako ekimenen artean, larunbat honetan, abenduak 20, fracking-aren kontrako kalejira egingo dute aipatu udalerrian, 12:30ean udaletxeko plazatik abiatuta. Horrela, presio hidraulikoa baliatuz lurzoruko arrokak hautsiz gasa ateratzeko aipatu teknika "ez dugula onartuko" gogorarazi nahi dute Udaletik. Argazkian, ekaineko udal batzarrean onartu bezala, frackingaren kontrako seinalea jarri zuen abenduaren 12an tokiko erakundeak, Loiola Ander Deuna kalean, BI-634 errepidearen gaineko pasabidearen aurrean / © Sopelako Udala.
  Jendartea 2014-12-19 13:21

Gaur ere gau osoan ibiliko da metroa

Erabiltzailearen aurpegia Ukberri Joan den ostiralean bezala, gaur, abenduak 19, gau osoan ibiliko dira trenak, Metro Bilbao garraio enpresak jakinarazi duenez. "Gabonen aurreko bi ostiraletan, pertsona asko elkartu egiten da eta momentu ona da autoa bere lekuan utzi eta garraio publikoa erabiltzeko", tokiko arduradunek azaldu dutenez. Izan ere, data hauetan ohikoak izaten dira enpresa edo koadrila bazkari zein bazkariak. Zerbitzu horrekin ostiralean goizean goiz hasi eta igandeko 23:00ak arte izaten den garraio-eskari etengabea ase nahi dute. Bestalde, Metro Bilbaok tren-zerbitzu berezia emango du astelehenean, abenduak 22, Bilboko Santo Tomas azoka tradizionala dela-eta. Hilaren 24ko eta 31ko gauetan (Gabon Gaua eta Gabon Zaharra) ere gauza bera egingo dute, ordutegiak Gabonetako jaietara egokituz. Argazkian, bidaiariak metro geltoki batean, artxiboko irudian.
  Kultura 2014-12-19 12:59

Olentzerok Negurin hasiko du igandean eskualdeko ibilbidea

Erabiltzailearen aurpegia Ukberri Hamabi hilabetez itxaroten egon ostean, gau berezia izango da asteazkenekoa (abenduak 24) Euskal Herriko haur guztientzat; baita hain txiki ez direnentzat ere. Bapo afaldu eta gero, lozorroan sartu eta, eguna argitzean, orduan hasiko dira arineketak eta komeriak. Hala ere, afaldu aurretik, abestu eta jolasteko aukerarik ez zaie faltako txikienei. Izan ere, bazter guztiak irribarrez eta algaraz gainezka izango dira, Olentzeroren bisitarekin. Uribe Kosta eta Erandion, ohi denez, Neguri-Gobelara egingo du igandean lehenengo bisita ikazkinak; eta asteartean Barrikan, Erandiogoikoan, Itzubaltzeta / Romon... izango dugu. Azken herri horretan haurren gutunak jasotzen. Hala ere, asteazkeneko Eguberri egunera arte itxaron beharko dute neska-mutilek euren opariak zabaltzeko. Egun horretan, aipatu toki guztietara bueltatzeaz gain, falta zaizkion eskualdeko herriak bisitatuko ditu Olentzerok. Opor hauetan neska-mutilek izango dituzte, bakoitzak bere herrian, puzgarriak eta jolasak, antzerkia, kirol ikuskizunak... Argazkian, Olentzero Areetan barrena, aurreko batean / © Getxoko Udala.
  Politika 2014-12-18 20:57

Gazte Danbadaren haritik kartzela zigorra eskatu dute Mikel Moreno algortarrarentzat

Erabiltzailearen aurpegia Ukberri Fiskaltzak eta AVTk 18 hilabeteko espetxe zigorra eskatu dute Periko Solabarria 84 urteko ezker abertzaleko militante historikoa eta Iraitz Salegi Topatu.info agerkariko kazetariaretzat. Ernai gazte antolakundeko zazpi kideri, berriz, bi urtekoa, tartean Mikel Moreno algortarra dela. Gazte Danbadan "terrorismoa goratzea" leporatzen zaie guztiei, 2013ko martxoaren 30ean espetxean gertatutako Xabier Lopez Peña preso politikoaren heriotzaren harira. Oraingoan, baina, Ernairen webgunean Lopez Peña goraipatu izana ez da aipatzen, Morenok berak UKBERRI.NETi adierazi dionez. Gogoratu, hasiera batean, Aitor Ortuondo Ekostat Informatica SL Gorlizko enpresako langilea galdekatzea agindu zuela Velascok. Baina, azkenean, magistratuak atzera egin eta onartu zuen Ortuondo ez zuela ardurarik izan Ernai gazte antolakundearen webgunean eta, beraz, "terrorismoa goratze" delitua leporatzeari utzi zion. Epaiketa noiz hasiko zain daude orain besteak. Argazkian, Gazte Danbadaren ekitaldi nagusia Urduñan / cc-by-sa Ernai.
  Politika 2014-12-18 14:13

Getxon ere eskatuko dute Leioako alkate ohia Metro Bilbaotik kentzea

Erabiltzailearen aurpegia Ukberri Metro Bilbao garraio enpresako administrazio batzordean ordezkaritza daukaten erakunde publiko guztietan, Leioako alkate izandako Eneko Arruebarrena "berehala" kargugabetzea eskatuko du PPk, Pinosolon egindako kudeaketaren harira. Dagoeneko Eusko Legebiltzarrean aurkeztu dute ekimena. Beste horrenbeste egingo dute datozen egunetan Bizkaiko Batzar Nagusietan zein Bilbo, Santurtzi eta Getxoko udaletan; azken horretan zinegotzia ere baden Javier Ruiz Bizkaiko popularren idazkari orokorrak asteartean iragarri zuenez. Leioako kiroldegi berriko "harri bat ere jarri gabe leioaztar guztiei 3,5 euroko galera ekartzea" egotzi zion PPkoak Arruebarrenari. Izan ere, Pinosoloko proiektuari buruzko ikerketa batzordeak “ustelkeria zantzu garbiak" azaleratu ditu orain gutxi, oposizioko alderdi guztiek salatu dutenez. Eneko Arruebarrena alkate ohia eta Jon Loizaga Kirol zinegotzi ohia —biak ala biak EAJkoak— lotzen ditu izan omen diren irregulartasunekin. Hori horrela, popularren ustez, Metro Bilbaoko zuzendariak "ez du berme nahikorik eskaintzen, horren garrantzitsua den sozietate baten kudeaketa egiteko". Argazkian, Jesús Isasi alderdiko Azpiegitura bozeramailearekin batera eman zuen prentsaurrekoa Ruizek / © EAEko PP.
  Politika 2014-12-18 11:42

Josu Muguruzari buruzko dokumentala ikusgai gaur Algortan

Erabiltzailearen aurpegia Ukberri Gaur, osteguna, Lander Iruinek eta Markel Andiak zuzendutako Josu Muguruzaren bizitzari eta ibilbide militanteari buruzko "Zohardia" dokumentala proiektatuko dute, Algorta-Getxoko Sortuk eta Abian Kultur Elkarteak antolatutako emanaldian. Hitzordua 19:00etan jarri dute Bidebarri kaleko 2. zenbakiko herriko tabernan. Ostean, Iñaki O'Shea ezker abertzaleko militante historikoarekin mahaingurua izango da. Egun GITE-IPESen lanean dihardu aipatu lagunak. 1989ko azaroaren 20ean, Madrilgo Alcala hotelean bere alderdiko beste kide batzuekin parlamentuko lana prestatzen ari zela, armaturiko bi lagunek tiro egin zioten eta hil egin zuten Josu Muguruza HBko diputatua. 25 urte bete dira aurten. Heriotza, Euskal Herrian greba orokorrerako deialdia sorrarazi zuen. Bost urte lehenago Santiago Brouardekin gertatu bezala, erahilketa egiteko aukeraturiko eguna ez zen kasualitatea izan. Francisco Franco eta Primo de Riveraren heriotzak gertaturiko egun bera izan zen. Argazkian, omenaldia Brouard eta Muguruzari 2012an Bilbon / cc-by-nc Txeng Meng.
  Kultura 2014-12-17 13:54

Itzubaltzeta, Sopela eta Plentzian ezagutuko dute Hiruka aste honetan

Erabiltzailearen aurpegia Ukberri Lemoiz, Barrika, Urduliz, Berango eta Gorliztik igaro ostean, aste honetan jarraituko dute HIRUKA aurkezten Uribe Kostako euskarazko komunikazio-talde berriaren sustatzaileek. Bihar, abenduak 18 (osteguna), Itzubaltzeta / Romoko eta Sopelako Kurtzio kultur etxeetan izango dira batzar irekiak, 19:30ean. Ostiralean, hilak 19, berriz, beste horrenbeste egingo dute Plentziako Goñi Portalen, 19:00etan. Gabonetako oporraldiaren ostean, urtarrilean berrartuko dituzte batzar irekiak; azkenak, Leioan, Astrabuduan, Algortan eta Altzagan. Aipatu aurkezpen-bilera guztietan proiektuaren nondik norakoak argitzeaz gain, bazkide edo laguntzaile nola egin ere azalduko da.