Politika 2014-12-17 02:04

Juan Carlos Martinez izango da Leioako sozialisten alkategaia

Erabiltzailearen aurpegia Ukberri Juan Carlos Martinez Llamazares 44 urteko zinegotzia, abokatua eta tokiko sozialisten zuzendaritzako kidea hautagai aurkeztuko du Leioako PSE-EEk, 2015eko maiatzaren 24ko udal hauteskundeetarako. Alderdiak bart aurkeztu du alkategaia herriko etxean eta bertan Martinezek berak alderdikideei azaldu dienez, hautagaitza "nire bizitzaren erronka nagusitzat" jo duela, "proiektuak ilusioa sortzen" dio. Gainera, azpimarratu duenez, Udal Gobernurako "itzelezko giza taldea" izango du, "partaide izan daitekeen alderdi politikorik onenarekin konprometitua". Bizkaiko PSE-EEren aburuz, Martinez "oso lotuta dago elkartasun proiektuekin eta justizia sozialarekin". Berak azaldu duenez, Caritasekin kolaboratu du Norabide ekimenean, gizarte bazterketa pairatzeko arriskuan daudenak heziketan eta enpleguan laguntzeko. 1996tik da PSE-EEko kidea eta 2008tik zinegotzia Leioan. Argazkian, Juan Carlos Martinez gaurko hizketaldian / © Bizkaiko PSE-EE.
  Politika 2014-12-16 18:37

Torturaren aurkako astea abiatuko dute gaur Itzubaltzetan

Erabiltzailearen aurpegia Ukberri Itzubaltzeta / Romoko Ernai eta Sortu erakundeek torturaren aurkako astea antolatu dute gaurtik eta igandera arte. Gaur, arratsaldeko 7:30ean, Julen Arzuaga herriko kultur etxean mintzatuko da. Arzuaga bada, besteak beste, EH BIlduren legebiltzarkidea Eusko Legebiltzarrean, Euskal Herriko Giza Eskubideen Behatokiko abokatua, "La maza y la cantera. Juventud vasca, represion y solidaridad" liburuaren egilea eta Euskal Memoria elkartearen kidea. Gaurko ekitaldian, "Tortura askapen prozesuaren aurkako tresna" izeneko solasaldia emango du. Bestalde, datorren igandean, abenduaren 21a, Ricard Salom-ek zuzendutako "120 horas. La tortura contra Euskal Herria", 45 minutuko dokumentala proiektatuko dute Branka herriko tabernan arratsaldeko 7:30etik aurrera. Argazkian, Julen Arzuaga / public domain Etengabe.
  Politika 2014-12-16 18:12

Espetxe politika "kriminala" salatuko dute iluntzean

Erabiltzailearen aurpegia Ukberri Gaur, astearte iluntzean, Sortuk deituta, "Espetxe politika kriminalari Stop. Presoak etxera" lelopean, hainbat mobilizazio izango da eskualdean. Espainiako Auzitegi Goreneko Zigor Aretoko 15 epaileek mahai gainean dute gaur eguerditik Kepa Pikabea presoak egindako eskaera, Frantziako espetxeetan bete duen espetxe zigorra Espainian jarri dioten zigorrari kentzeko. Hori agindu zuen 2008an Europako zuzentarau batek, baina Espainiak aurten txertatu du bere ordenamendu juridikoan, euskal presoak ez kaleratzeko diseinatuta dirudien hainbat salbuespen gaineratuta. Gauzak horrela, Auzitegi Nazionaleko Lehen eta Bigarren atalek orain arte epai kontrajarriak eman dituzte zenbait helegiteri erantzunez eta gaur Pikabearen inguruko erabakia doktrina ezarri eta beste 55 euskal presorentzat aplikagarria izango da. Epaileek 14:30ean eten dute saioa eta 17:00etan dira jarraitzekoak. Sorturen aburuz, "Europatik datorren araua urratu edo ez" erabaki beharko du Auzitegi Gorenaren osoko bilkurak. Argazkian, euskal presoen aldeko mobilizazio bat Sopelan, artxiboko irudian.
  Jendartea 2014-12-16 11:35

Gaurko etxe-gabetzea gelditzera deitu dute Algortan

Erabiltzailearen aurpegia Ukberri PAH Sendiak bere bitakoraren eta sare sozialen bidez zabaldu duenez, gaur, asteartea, abenduak 15, Algortako Konporte kaleko 28. zenbakiko (San Inazio ikastetxearen aurrean) familia bat bere etxetik kaleratuko dute. Hori dela eta, aipatu plataformak kontzentrazioa deitu du gaur goizerako, 11:00etan, etxebizitzaren aurrean, "kaleratzea gelditzeko asmoz". Gogoratu, ekainaren 24an beste sendi bat kanporatu zutela Algortako Aldapa kaleko 23. atariko etxetik. Orduan, Ertzaintzak identifikatutako 14 lagunen epaiketaren harira, Auzokideok plataformak ohar bidez plazaratu zuenez, ondoko etxe-gabetzeak ez dira kasu isolatuak: "pitinka-pitinka baino gelditu barik" gertatzen ari dira. Argazkian, ekainaren 24ko etxe-gabetzea / © Getxotik_aske.
  Kirolak 2014-12-15 03:18

Maider Briongos bigarren lotu da Squah Master txapelketan

Erabiltzailearen aurpegia Ukberri Maider Briongos Ibarrondo squash jokalari erandioztarra bigarren sailkatu da pasa den larunbatean jokatutako Hego Euskal Herriko Squah Master txapelketan. Briongos, egungo Hego Euskal Herriko txapelduna, 0 eta 3 galdu zuen finalean Laura Saezen aurka, Bilboko San Inazio auzoko kiroldegian. Erandioztarra Sestaoko Benedikta squash taldean aritzen da eta Saez, berriz, Arrasateko AKE Squash taldean. Gizonezkoen lehiari dagokionez, nafarrek erabat kontrolpean izan zuten txapelketa, finala bi talde iruindarren artean jokatu zutela: Oberena ordezkatzen, David Marinek irabazi zuen master titulua, 3 eta 1 nagusituta. Bere aurkaria Liam Kane izan zen, Amaya kirol taldeko partaidea. Argazkian, Maider Briongos San Inazion, Benedikta taldeko Jokin Esparzarekin batera / © Benedikta squash taldea.
  Kultura 2014-12-13 16:32

Ahobilkiak sariak banatuko ditu gaur Algortako Bertsolari Eskolak

Erabiltzailearen aurpegia Ukberri Gaur, larunbata, hilak 13, estreinaldiko aldiz Ahobilkiak sariak banatuko dizkie eskualdeko hainbat eragileri Algortako Bertsolari Eskolak. Ekimena bertso-urtea bukatzear dela gogoratzeko Gabon aurretik ospatzen ohi duten Ahobi Galaren baitan izango da, Algortako Fadurako kafetegiaren bigarren solairuan. Hitzordua arratseko 6etan jarri dute. Bertan, honako hau izango da bertsozaleak topatuko duena: ALBE osatzen duten taldeen bertso-saioa, bertso eskolako gazteek prestaturiko ikuskizuna, aipatutako Ahobilkiak ematea, 2014 urteak eman duenari argazki-errepasoa, agurra eta lunch-a. Halere, gaurko hitzorduak ez die amaiera emango aurten Uribe Kostan izaten den bertso saio sortari. Besteak beste, hurrengo ostiralean, hilak 19, bertso poteoan arituko dira Andoni Egaña eta Odei Barroso Sopelan zehar, Oxabi erromeria taldearen doinuak girotuta. Irteera udal pilotalekuan jarri dute Aitxu! euskara taldeak eta ALBEk, 20:00etan. Hilaren 26an, berriz, izen handia hartu duen Bertso Jira izango da Erandioko Altzaga auzoan, bertan Sustrai Colinak eta Nerea Elustondok abestuko dutela, Gibelurdinek jarritako musikari kasu eginez edo ez. La Plaza tabernatik irtengo dira 20:30ean, ALBEk eta Berbots! Erandion Euskaraz-ek zabaldu legez. Argazkian, ALBEko hainbat kide artxiboko irudian / © 365egun.eu.
  Jendartea 2014-12-13 15:19

Feminismoa josten dabiltza Uribe Kostako dozenaka emakume Ondarroan

Erabiltzailearen aurpegia Ukberri Goizeko 9ak aldera hasi da Ondarroako kofradian Emakume Abertzaleen VI. Topaketa Feminista, Euskal Herria feminista eraikitzeko estrategia hausnartu eta moldatzeko asmoz. Jendetsua dela onartu du antolakuntzak eta aurretik izena emanda zeudenei lagun asko batu zaie, 600 inguru zuzenean topaketa jarraitzen ari diren Berria.eus, Topatu.info eta Argia.eus-i kasu eginez. Hortaz, gatza da zehaztea zenbat emakume uribekostar diren gaur Ondarroan. Datu gisa, "30 baino gehiago" ziren ostegunean inskribatutakoak, Lur Moragues Saitua Algortako Bilgune Feministako kideak jakinarazi zuenez. Horrezkero, ongi etorria eta gero, eguneko helburuak zehazteko laburpen lanari ekin dio Iraitz Agirre BFko kideak. Ondoren, Etxe Lilan eta institutuan 14 lantaldetan antolatuta ekin diote aldaketa feministarako gakoak identifikatzeari, sistema eta koiuntura sozioekonomikoa kontuan hartuta. Bazkal aurretik komunean jarri dituzte sortutako ideiak. Argazkian, topaketaren goizeko irudi bat / cc-by-sa Topatu.info.
  Gazteok 2014-12-13 14:38

Okupazio Egunean murgiltzen ari da Txorimalo gaztetxea

Erabiltzailearen aurpegia Ukberri Larunbat honetan, hilak 13, Okupazio Eguna ospatzen dabil Getxoko Txorimalo gaztetxeak. Goizeko 11etan ekin diete ospakizuna eta aldarrikapena uztartzen dituen eguneko ekimenei, Abian kultur elkartetik abiatu den poteo musikatua dela medio. Ondoren, Getxoko Udalak Tangora etxean duen Gazte Informazio Bulegoaren aurrean elkarretaratzea egin dute, Udal Gobernu jeltzaleak darabilen politika salatzeko. Horrenbestez, 14:30ean bazkaria egingo dute Txorimalo gaztetxean bertan, txartela hiru eurotan eskuratu daitekeela. Egitarauarekin jarraituz, 4ak aldera, bingo eta zozketa izango dira, bi ordu beranduago okupazio mugimenduko beteranoek beren esperientziak eta eskarmentua azalduko dituztela. Azkenik, gauez, Meraki eta Striknina taldeek emango dute kontzertua 21:00etatik aurrera, sarrera atean bertan eskuratu ahal izango dela, 3 eurotan. Eta ondoren gaupasa egingo dute DJ Play-ren eskutik. "Txupito" bereziak izango dira gau osoan zehar. Egun osoko txartela bost eurotan lor daiteke. Argazkian, hainbat ume Txorimalo gaztetxeko urteurrenetako bat ospatzeko jolasetan.
  Politika 2014-12-12 19:01

Kataluniako independentzia berbagai Algortan

Erabiltzailearen aurpegia Ukberri Gaur, ostirala, abenduak 12, Ricard de Vargas Golarons idazle, historiagile eta zinema gidoilari anarkista katalanak hitzaldia emango du Algortako Eztabaida gune antiautoritarioan (Villamonte plaza, A4). Hitzordua 19:30ean jarri dute. Vargasen solasaldia "Anarkismoa eta nazio askapena. Kataluniako prozesua ikuspegi libertariotik" du izena. Izan ere, Vargas ezaguna da 70. hamarkadan MIL Askapenerako Mugimendu Iberiarreko kidea izateagatik. Talde armatu autonomoaren ostean, OLLA Borroka Armatuaren Erakundean ere militatu zuen. Idazlea erabat ados dago Kataluniaren independentziarekin eta bere ustez, "abiatu den prozesuak ez du atzera bueltarik", gaur "Berria" egunkariak argitaratu duen elkarrizketan aitortu duenez. Argazkia: © CNT Alacant.
  Jendartea 2014-12-12 18:41

Frackingaren kontrako lehenengo seinalea jarri du Sopelako Udalak

Erabiltzailearen aurpegia Ukberri Presio hidraulikoa baliatuz lurzoruko arrokak hautsiz gasa ateratzeko "fracking" izeneko teknikaren kontrako lehenengo seinalea jarri du gaur Sopelako Udalak. Aipatu ikurra Loiola Ander Deuna kalean ipini dute, BI-634 errepidearen gaineko pasabidearen aurrean. Hurrengo astean, Sopelako Udalak beste seinale bat jarriko du, kasu honetan Barrika eta Sopela udalerrien arteko mugan, Ander Deuna baselizaren alboan. Modu honetan, auzokideek, bisitariek eta gainontzeko erakundeek jakingo dute Sopela “fracking gabeko udalerria” dela. Tokiko erakundeak gogoratu duenez, ekaineko osoko bilkurak adostu zuen aipatu seinaleak Sopelan jartzea, Udal Gobernuaren mozio bat onartu ostean. Gainera, Hidrocarburos de Euskadi enpresa publikoari eskatu zion fracking-arekin lotutako baimen guztiak bertan behera uztea. Azaroan, Sopelako Udalak Espainiar Gobernuaren lehenengo jakinarazpena jaso zuen. Horri erantzunez, Sopelako Udalak deialdi bi egin ditu hurrengo asterako: lehenik eta behin, asteartean, abenduak 16, hitzaldia izango da David Cobos Fracking Ez Bizkaia taldeko kidearen eskutik, 19:00etan Kurtzio kultur etxean. Argazkian, gaur jarritako seinalea / © Sopelako Udala.