Kultura 2009-09-17 09:40

Haur euskaldunentzako asteburu pasa antolatu du Aralarren Plentziako Udalak

Erabiltzailearen aurpegia Ukberri Urriaren 2tik 4rako asteburuan, 6 eta 10 urte arteko haurrentzako irteera antolatu du Plentziako Udalak. Aralarreko Ingurumen Hezkuntza Eskolara joango dira, Nafarroa Garaiko Larraun aranean dagoen Astizko aterpetxera, alegia. Horrenbestez, aipatu ostiralean abiatuko dira Charter supermerkatutik, 18:30ak aldera; eta igandean egongo dira bueltan, 16:30ean. Plentzian erroldatuta dauden neska-mutilek 85 euro ordaindu beharko dituzte eta hamar euro gehiago kanpotarrek. Tokiak mugatuak dira. Beraz, ahalik eta lasterren eman beharko da izena. Horretarako fitxak bihar (irailak 18) arte egongo dira eskuragarri Goñi Portal kultur aretoan. Ekintza aurrera eramateko, gutxienez 20 lagunek izena eman beharko dute. Antolatzaileek zehaztu dutenez, telefonoz apuntatzerik ez dago. Goñi Portalen aurkeztuta egin beharko dute asteburu pasan joan nahi dutenek. Bestalde, euskaldunak izan beharko dute parte hartu nahi duten umeek, "ekintza honen helburua astialdian euskarazko gune bat izatea baita". Argazkian, Mendukilo kobazuloa bisitatu ohi dute Astizera asteburu pasan joaten diren umeek / © Gipuzkoa.net
  Kirolak 2009-09-17 09:32

Artziniega "goitik" ezagutuko dute Matrako mendi taldekoek

Erabiltzailearen aurpegia Ukberri Joseba Sanchez "Matrako" oroitzen duen mendi taldeko lagunak Arabako Artziniega herrira joango dira irailaren 27an, igandearekin, inguruko bidexka eta mendiak (pdf) zeharkatzeko asmoz. Txangoa goizeko 9etan hasteko asmoa daukate. Horretarako, Plentziako metro geltokian jarri dute hitzordua. Ibilaldian parte hartzeko, Goñi Portal kultur etxean izena eman daiteke, hilaren 25a baino lehen. Ordutegia 10:00etatik 13:00etara eta 17:00etatik 19:00etara da, eta telefono zenbakia 946 775 541. Salneurriari dagokionez, 5 euro ordaindu beharko dituzte matrakokideek. Argazkian, Matrako Mendi Taldeko hainbat lagun Txindokin (Gipuzkoa).
  Kultura 2009-09-05 15:03

Rallya abiatuko da bihar Plentziatik

Erabiltzailearen aurpegia Ukberri Antolintxu eta Madalentxuri ostegunean agur egin zieten arren, oraindik ekitaldirik badago Plentzian. Gaur bertan, itsas zabaleko arrainketa (kazako arrantza) txapelketa, pintura lehiaketa eta motorzaleen topaketa egingo dituzte. Biharko, berriz, rallya antolatu dute Plentzia Classic elkarteko kideek euren lagun Jose Luis Etxaberi omenaldia egiteko, "bere ibilbide pertsonala zein kirol arlokoa aintzatesteko asmoz. Horrenbestez, 25 auto-gidarik parte hartuko dute ibilaldian, 11:30ean Eleiz plazatik abiatuta. Besteak beste, Urduliz, Butroe, Andraka gaina eta Gorliz zeharkatuko dituzte kotxeek, 12:00ak aldera irtendako lekuan izateko. Horretaz gain, rally auto klasikoen erakusketa (Seat 600, Mini 1400, Bmw 2002 eta Simca Rally III bana, eta Porsche bi -911 SC eta 944 turbo-, besteak beste), diploma eta oparien banaketa, eta luncha egongo dira. Argazkian, urtean behin antzinako ibilgailuen topaketa antolatzen du Plentzia Classic elkarteak.
  Politika 2009-08-28 00:22

Ertzaintzak presoen aldeko banderatxoak kendu ditu Plentzian

Erabiltzailearen aurpegia Ukberri Plentzia, Gorliz eta Lemoizko ezker abertzaleak salatu duenez, euskal errepresaliatu politikoen aldeko aldarrikapenak ezabatzen ibili da gaur Ertzaintza, aipatu lehen itsas hiribilduko San Antolin jaiak hasteko egun bat falta dela. Zehaztu dutenez, presoen eskubideen eta amnistiaren aldeko zein "Non dago Jon?" irakur zitekeen banderatxoak kendu ditu polizia autonomikoak, Gaminiz parkean. "Horretaz gain, txosna gunetik ibili dira, txosnen muntaia kontrolatzen", ezker abertzaleak gaineratu duenez. Bitartean, Euskadiko Udalen Elkarteak (Eudel) eta Eusko Jaurlaritzako Herrizaingo Sailak "terrorismoa goratzen edota biktimen oroimena eta duintasuna mintzen duten manifestazio mota guztiak saihesteko asmo argia" agertu dute gaur. Argazkian, Algortako Portu Zaharreko jaietan ere presoen aldeko aldarrikapenak ezabatu zituen Ertzaintzak / Koska irratia.
  Kultura 2009-08-27 10:12

Gazteen herri bazkariak emango die hasiera bihar Plentziako San Antolin jaiei

Erabiltzailearen aurpegia Ukberri Ostiral honetan, abuztuak 28, hasiko dira Plentziako jairik handienak, San Antolinak alegia. Bihar bertan, festak hasi aurretik indarrak hartzeko aukera edukiko dute herriko gazteek; 14:00etan, Astillero plazan egingo baita eurentzako herri bazkaria. Txupinazoa ere bertan botako dute: koadrila guztiak batuta daudela, eta Antolintxu eta Madalentxuri harrera egin ostean, Andra Marira egingo dute igoera, 18:00ak aldera. 20:30erako, berriz, Bizargorri taldearen dantzaldia prestatu dute. Eta bi ordu eta erdi beranduago, ohiko koadrilen kontzentrazioa egingo dute, Gau jai Zuria ospatzeko asmoz. Lagun taldeak zuriz jantzi ohi dira, gauari dotorezia puntua emanez. Antolintxu eta Madalentxuri ostegunean agur esango dieten arren, datorren asteko larunbat eta igandean egongo da zer ikusi: motorzaleen eta rally ibilgailu klasikoen topaketak izango dira, hurrenez hurren. Argazkian, koadrilen play-backa Astillero plazan, aurreko jai batzuetan.
  Gazteok 2009-08-12 23:05

Bizkaiko gazteen jaialdi alternatiboa hartuko du etzi Plentziako hondartzak

Erabiltzailearen aurpegia Ukberri Euskal Herriko Gazte Mugimenduak abiatutako "Ekin dezagun batera! Bota hordagoa sistemari!" lelopeko dinamikari jarraikiz, eta elkarrekin bat egiteko asmoz jai alternatiboa prestatu dute ostiral honetarako Bizkaiko gazteek. Horretarako, Plentziako hondartzan jarri dute hitzordua, arratsaldeko 7etatik aurrera. Bertan, bideo emanaldia, parrillada eta "hainbat sorpresa" prestatu dituzte antolatzaileek. Izan ere, Bizkaiko Gazte Mugimenduaren esanetan, "udak aurrera darrai eta gazte mugimenduak 'Bota hordagoa sistemari! Ekin dezagun batera!' lelopean abiatutako dinamika berriaren baitan bira txikia egingo du hainbat herritan. Bariku honetan, abuztuak 14, batuko gara gazte bizkaitarrak Plentziako hondartzan arratseko 19etan. Gazte!! Abuztuaren 14an Plentzian dugu elkargune. Bota hordagoa sistemari! Topatu gaitezen! Argazkian, Letaman gaztetxean egindako aurkezpena / Gaztesarea.
  Gazteok 2009-08-12 19:38

Preso irlandarren hil arteko gose greba ikusi ahal izango da gaur Plentzian

Erabiltzailearen aurpegia Ukberri Plentziako Germantxin gazte kultur elkarteak antolatuta, gaur, asteazkenarekin, arratsaldeko 7etan "Hunger" filma ikusi ahal izango da Goñi Portal kultur etxean. Ondoren, zine-foruma egingo dute Mitxel Sarasketa preso ohiarekin. Ekimena abuztuko asteazkenetan Germantxin burutzen ari den zikloaren barruan kokatzen da. "Hunger" 1981an Irlandako Sei Konterrietako Long Kesh espetxean hamar preso errepublikanoek hil arte burutu zuten gose grebaren inguruko filma da. 2008an Cannesko zinemaldian Urrezko Kamera saria jaso zuen Un Certain Regard sailean; Donostiako zinemaldian ere pasatu zen Zabaltegi sailean. Jatorrizko bertsioa euskarazko azpidatziekin eman zuten bertan. Bobby Sands (Michael Fassbender) da filmaren figura zentrala. Berak gidatu zuen preso errepublikanoen estatus politikoaren aldeko gose greba, eta horren ondorioz hil zen 1981ko maiatzaren 5ean. Filmak Sands hil aurreko sei aste hartzen ditu kartzelarien jazarpena, borrokan diharduten presoen egoera, IRAk kartzelarien aurkako ekintzak eta heriotzaren arteko gose greba azaltzeko.
  Kultura 2009-08-01 23:10

Kortsarioen jaialdia hartuko du Plentziak igandean

Erabiltzailearen aurpegia Ukberri Bihar, igandearekin, kortsarioek, itsas-lapurrek eta piratek Plentziako hiri-bildua bereganatuko dute bigarren urtez. Izan ere, Korsaria estropada eta jaialdiaren bigarren edizioa ospatuko dute bihar, Plentzian itsas-lapurren historia ezezagunak bazterrean geldi ez daitezen. Bajoelagua Factory taldeak iaz abiatutako Matxin pirataren kondaira berria aitzakiatzat hartuta, plentziarrak goizeko 11:30etik aurrera itsasoratuko dira Arkoteren arrapaletik. Dagoeneko, webgunearen bitartez, 100 bat itsasmutil eta itsasneska engaiatu da eskifaiaren batean, iaz baino hogei bat gehiago. Bihar ere, piratez mozorrotutakoek bere txalupa eramaten edo alokairukoak bukatu arte, Plentziako itsasadarreko Herri Jaitsieran izena emateko aukera izango da 10:30etik aurrera. Lehorretik ikuskizun ederra izango da ordu t'erdiz. Gainera, ondoren, hainbat jolas egingo dituzte sariak banatu aurretik. gainera, iazko ohiturari jarraituz, itsaslapurrek hiri-bildutik tabernaz taberna arituko dira arrandiaz eta altxorra xahutuz. Argazkian, iazko edizioaren irudi bat. / © Bajoelagua Factory.
  Kirolak 2009-07-14 23:34

Araba, Bizkaia eta Gipuzkoako Akuatloi Txapelketa Plentzian jokatuko da igandean

Erabiltzailearen aurpegia Ukberri Igande honetan, uztailak 19, Plentzia Hiribilduko Akuatloia ospatuko da, era berean Euskadiko txapelketa izango dena. Eguerdiko 13:00etatik aurrera, dozenaka kirolarik hartuko dute parte, esprint distantzian, antolatzaileek 100 atleten muga jarri dutela. Oraingoz, 53 kirolzale eman dute izena, 44 gizonezkoak eta 9 emakumezkoak. Irteera, helmuga eta boxak, Jai-Alai frontoiaren aurrean kokatuko dira, Plazatxoa plazan, eta bertan materialaren azterketa egingo da 12:00ak eta 12:45ak bitartean. Lehen oinezko lasterketak bi kilometro t'erdiko ibilbidea izango du Gazteluondo parkean zehar. Lehen trantsizioaren ondoren, akuatletek kilometro batez igeriketa saioari aurre egin beharko diote, Plentziako itsasadarrean joan-etorria eginez. Bigarren trantsizioaren ondoren, eta helmugara iritsi aurretik, beste bi kilometro t'erdiko oinezko lasterketa osotu beharko dute, ibilbidea lehen atalaren berdina izango delarik. Proba Plentziako Euskoman Triatloi Taldeak eta Euskadiko Triatloi Federazioak antolatu dute. Argazkian, 2007ko edizioaren irudi bat / Euskoman.
  Kirolak 2009-07-11 23:13

Emakumeen arraun ligako lehen bandera Gipuzkoara joan da

Erabiltzailearen aurpegia Ukberri Ez da posible izan, lehenengoan, gutxienez. Gaur abiatu da Euskotren Liga, inoiz burutu den lehenengo emakumeen traineru estropaden liga eta Bizkaiko eskifaia ia osoa osatzen duten Arkoteko emakumeek ezin izan dute bandera etxera eraman. Ane Ibarra, Libe Soroa, Olatz Ortega, Mertxe Becerra, Naia Linaza, Izarra Arrizabalaga, Saioa Fernandez eta Rebecca Cornerrek, Deustu, Santurtzi eta Elantxobeko tripulazio kideekin batera Gipuzkoak Galiziako Groven Telefonicako bandera zelan irabazi duen ikusi behar izan dute. Faboritoak etxeko emakumeak ziren, baina lau segundoengatik Getaria eta Tolosako arraunlariak nagusitu zaizkie. Hirugarren sailkatu dira bizkaitarrak, azken postua katalanentzat utziz. Dena den, gaurkoa ez da aukera bakarra izango eta oraindik beste 7 estropada burutuko dituzte Ligan zehar: bihar, esate baterako, Pontevedran; uztailaren 25ean, Gaztelako Pedreñan; hurrengo egunean Arkoteren etxean, Plentzian; abuztuaren 1ean, Zumaian; abuztuaren 2an, Algortan; eta abuztuaren 15ean eta 16an, Zarautzen. Bandera guztiak zuzenean emango dituzte ETB1 telebistak eta eitb.com webguneak.
  Gazteok 2009-07-10 20:59

Txipioko jaia ospatzen ari dira gaur gazteen bultzadaz

Erabiltzailearen aurpegia Ukberri Goizeko 10etatik aurrera bere aurtengo jai aroa zabaldu du gaur Plentziak, Plentzia eta Gorlizko Gazte Asanbladari esker. Izan ere, Plentziako Udalarentzat gaur Gatzamine auzoko San Cristobalen omenezko eguna bada ere, gazteek Txipioko jaia antolatu dute gaur, "Gazteok batu, gaztetxea lortu!" lelopean eta padurarekin gogoratuz. Esan bezala, buruhandiak izan dira gaur goiztiarrenak Plentziako metro geltokiaren ondoan. Ondoren ume eta gaztetxoen txanda iritsi da, jolasak lagun. Bitartean, koadrilen eta bestelako taldeen ohore jokoan egon da, paellarik goxoena nork aurkeztuko zuen argitze aldera. Beti legez, aurreikusita baino beranduago abiatu da herri bazkaria eta bazkalosteko garaian gaztetxearen oka jolasari eman diote paso. Kirol gogorragoetan aritzea ere izan da, Kakarraldo Rugby Taldeak antolatutako Seven txapelketa dela medio. 20:00etan triki-kalejira izango da, zintzurra bustitzeko beste aukera bat, alegia. Gaua hasteko, berriz, Itziarren Semeak, Emon eta DJ Kulo arituko dira oholtzan 22:30etik aurrera, eta kontzertua amaitzean, goizeko 3:30ak aldera, kulero eta galtzontzilo lasterketa irtengo da. Argazkian, iaz Leioako jaietan ere egin zuten kulero eta galtzontzilo lasterketa. Argazki gehiago ikusteko, sakatu hemen.
  Kirolak 2009-07-04 22:42

Arkote azkena izan da San Miguel Ligako lehen banderan

Erabiltzailearen aurpegia Ukberri Bilboko Telefonica banderaren XI. edizioarekin estreinatu da gaur arratsaldean TKE San Miguel arraun liga eta lehenengo bandera atzerrira joan da, Kastro kantabriarrek eraman baitute. Kastrokoek 20 minutu eta 14 segundotan bete dituzte traineruek erlojuaren kontra egin beharreko hiru itsas miliako bidea, lau luzeetan eta hiru ziabogetan azkarren ibili direla. Gaurko garaipenarekin kantabriarrek Orioren marka berdindu dute, hiru bandera eskuratuz. Bigarren San Pedro sailkatu da, bost segundotara. Ondoren, Hondarribia eta Pedreña denbora berean (20'28"), Orio (20'30"), Zarautz (20'34"), Urdaibai (20'35"), Zumaia (20.36), Tiran (20'38"), Kaiku (20'46") eta Samertolameu (20'56") gelditu dira. Arkoteri, 21 minutu eta 16 segundorekin, egokitu zaio azken postua betetzea. Dena den, Plentzitarrakoek ez dute asko itxaron beharko errebantxa jokatzeko. izan ere, bihar bertan, igandearekin, Portugaleteko La Navalen mendeurreneko bandera jokatuko da eguerdian, Ibaizabalen, Areetako kaiaren aurrean. Argazkian, Arkoteko gizonak 2007ko Kontxako estropadan / cc Mikel Catania.
  Kultura 2009-07-02 13:59

Fakirren mundua ezagutzeko aukera egongo da ostiralean Plentzian

Erabiltzailearen aurpegia Ukberri Ostiral honetan, uztailak 3, "Gran espectaculo mundial del fakir Ha Sint' O" antzezlana egongo da ikusgai, 20:00etan, Plentziako Goñi Portal kultur aretoan. Teatro en Huida konpainiak egina, lan horretan fakirren, zirkuaren eta ilusionismoaren mundura hurbiltzeko parada izango da. Ha Sint' O fakirra izateaz gain, aizto jaurtitzailea, magoa eta su listukaria ere bada eta Plentziara bere ikuskizun ausarta eramango duela iragarri du. Ohiko saioetan, aiztoak jaurtitzerakoan Jessica bere laguntzaile erakargarria arriskuan jartzen du, baita neska desagerrarazi ere, bere kutxa misteriotsuetan sartuz. Gainera, laguntzailea osorik zein zatika ezkutatzen badu eskarmentua fakirrak. Baina, aurretik idatzi bezala, ikuskizuna benetan harrigarria egiten duten gauzak burutzen ditu Ha Sint' Ok: bere sablea boluntarioen eztarrietan sartzen ohi du; baita ihesaldi teknika berrienak erakutsi ere. Sarrera doakoa da. Bitartean, irailaren 4ra arte, Goñi Portal astelehenetik ostiralera baino ez da zabalik egongo; goizez bakarrik, 9:00etatik 14:00ak arte. Argazkian, Ha Sint' O fakirraren antzezlanaren pasarteetako bat.
  Jendartea 2009-07-01 14:25

Ezinduei bainua hartzen lagunduko diete Ereaga eta Plentziako hondartzetan

Erabiltzailearen aurpegia Ukberri Seigarren urtez jarraian, “Hondartza Denontzat” programa jarri du abian Bizkaiko Foru Aldundiaren Ingurumen Sailak. Bidaideak elkarteak eta Heldu federazioak sustatuta, "herritar guztiei hondartzaz gozatzeko aukera ematea eta ezintasuna edo mugikortasun urria dutenei eskubide hori bermatzea" da ekimenaren helburua, foru iturriek zehaztu dutenez. Horretarako, Bilbao Bizkaia Kutxaren zein Getxo, Plentzia, Zierbena, Lekeitio eta Ibarrangeluko udalen laguntza du. Egitasmoa abuztuaren 31ra arte egongo da erabilgarri, asteko egun guztietan, etenik gabe, 11:00etatik 18:30era, La Arena (Zierbena), Ereaga (Algorta), Plentzia, Isuntza (Lekeitio) eta Laida (Ibarrangelu) hondartzetan. Aldundiaren arabera, "kokapena, irisgarritasuna eta demografia izan dira arrazoiak hondartza horiek aukeratzeko zerbitzu hau emateko orduan". Edizio honetan, 4.500 bat pertsonari eman ahal izango zaie laguntza: nagusiki, ezintasuna duten pertsonak eta adinekoak izango dira. Hori dela eta, hareatzetan erabiltzeko berezia den ekipamendu tekniko oso bat jarriko da kolektibo horien eskura, baita programa behar bezala gauzatzen dela ziurtatzeko behar diren azpiegiturak eta laguntza pertsonalerako zerbitzuak ere. Argazkian, lagun bat begiraleek lagunduta, bainua hartu ostean / Bidaideak.
  Kultura 2009-05-27 21:13

Eusko Jaurlaritzak ondare kultural izendatu du Plentziako hirigune historikoa

Erabiltzailearen aurpegia Ukberri Kultura Sailaren proposamena aintzat harturik, Eusko Jaurlaritzako Gobernu Bilerak ondasun kultural izendatu zuen atzo Plentziako hirigune historikoa, monumentu multzo izendatuz. Izendapen horren helburua, Plentziaren kasuan, hiriguneak gaur egun duen antolaketa eta eraketa babestea da. Izan ere, itsas hiribildu bizkaitarreko hirigune historikoan daude, besteak beste, Santa Maria Magdalenako eliza, kultur etxea, hainbat kale eta zeharkale, eta Plentzia ibairaino iristen diren geroagoko zabalguneak nabarmentzen dira. Monumentu multzo izendatzeak, eraikinen multzoan aldaketak eragin ditzakeen interbentzioak galaraziko ditu, baldin eta interbentzio hauek gauzatzeko baimenik ematen ez bada. Argazkian, eliza / Carlos M. Gonzalez.
  Kultura 2009-05-22 18:30

Antzinako ibilgailuez beteko dute igandean Plentzia

Erabiltzailearen aurpegia Ukberri Igande honetan, maiatzak 24, antzinako ibilgailuen bigarren topaketa egingo dute Plentzian. Orotara, Euskal Herritik zein kanpotik heldutako 200 bat auto eta motozikleta hartuko ditu jardunaldiak. Goizeko 10etan parte-hartzaileei harrera egin eta ibilgailuen erakusketa izango da, Astillero plazan. Ondoren, 11:30ean hasita, 12 kilometroko ibilaldia egingo dute auto eta motozikletek, inguruko udalerrietan barrena: Astillero plazatik irtenda Urdulizera abiatuko dira, Gatikarantz, Maruritik igarota, Lemoizera joko dute . Bertatik, Gorliz zeharkatuz, berriro bueltatuko dira Plentziara. Ibilaldia bukatuta sari banaketa ere egongo da: urrunetik datorren ibilgailuarentzat, ondoen zainduta dagoenarentzat eta zaharrenarentzat, hurrenez hurren. Itsas hiribilduko Udalaren laguntzaz, Plentzia Classic elkarteak antolatu du topaketa. Jardunaldian, 25 urte baino gehiago dauzkan edozein ibilgailuren jabeek parte hartu dezakete. Argazkian, iaz egin zuten lehenengo topaketa / Plentzia Classic.
  Jendartea 2009-05-15 19:37

Turistentzako harrera bulegoa zabaldu dute Plentzian

Erabiltzailearen aurpegia Ukberri Plentziako Udalak gaur goizean inauguratu du bisitariei informazioa emateko bulego berria. Erribera kalean kokatutako guneak itsas hiribilduaren "kutsu turistikoa bultzatzea" du helburu, tokiko iturriek adierazi dutenez. Orotara, ehun metro koadroko azalera dauka lokalak. Barruan jarritako ukipen-pantailaren bitartez, udalerriaren historia, bere itsas tradizioa eta gune turistikoei buruzko datuak izango dituzte eskura turistek. Horretaz gain, batez ere bulegoa itxita dagoenean, informazio guzti hori sakeleko telefonoan jasotzeko aukera ere emango dute. "Nahikoa da bluetooth bidez konektatzea, ehun metroko itzulinguruan, jatetxeak, taxi geltokiak, irekitako botikak edota Udaltzaingoaren telefono zenbakia jakiteko", azaldu dutenez. Argazkian, Plentziako udaletxea.
  Gazteok 2009-04-23 22:07

Erandioko gaztetxea hustu dute udaltzainek

Erabiltzailearen aurpegia Ukberri Erandioko Gazte Asanbladak gaurko eguerdian iragarri du gaztetxea sortu egin duela "aspaldi erabili barik" dagoen Altzagako Tartanga kaleko 30. zenbakiko lokal publikoan, antzinako CIPEAn". Era berean, gazte asanbladako neska-mutilek ostiral honetan, apirilak 24, metro geltokitik 20:30ean abiatutako kalejira baten ostean ziren herriari gaztetxearen ateak irekitzekoak, baina udaltzainek Tartangako lokaletik atera egin ditu dagoeneko UKBERRI.NETi lekukoek adierazi diotenez. Azken bi urteotan Erandioko Gazte Asanbladak nauteriak, gazte egunak, etxebizitzaren aldeko ekimenak, ikastaroak, kontzertuak eta enparauak antolatu ditu, baina, haien ustez, "gure proiektuekin aurrera jarraitu ahal izateko ezinbestekoa egiten zitzaigun guk gestionatuko dugun leku fisikoa eskuratzea".
  Ekonomia 2009-04-23 20:43

Haur eskola eraikitzeko udalerriko langabetuak kontratatu nahi ditu Plentziako Udalak

Erabiltzailearen aurpegia Ukberri Espainiako Gobernuari eskatutako 720.000 euroak itsas hiribilduan haur eskola eraikitzeko erabiliko ditu Plentziako Udalak. Zerbitzu berria Lehen Hezkuntzako ikastetxe publikoan jarri nahi dute, eraikin berri bat altxatuz. Bada, Madrilgo exekutiboak onartutako tokiko inbertsiorako estatuko fondoak "langabezia arintzeko helburua" ere badaukanez, proiektua agintzen zaion enpresari bertoko biztanleak kontratatzea eskatuko dio tokiko erakundeak. Hala ere, udal iturriek zehaztu dutenez, "Plentziako Uri Udalak interesdunen datuak emango dizkio adjudikaturiko enpresari. Enpresaren erantzukizuna izango da aurkeztutako interesdunen aukeraketa eta kontratazioa, Plentziako Uri Udalak informazioa hartu-eman besterik ezin du egin". Eskaerak aurkezteko epea maiatzaren 25era arte egongo da zabalik. Interesdunek udal webgunean (www.plentzia.org/Informazio Instituzionala/Inprimakiak eta Zerbitzuak) dute eskuragarri eskaera orria. Hori bete eta udaletxean aurkeztu beharko dute hurrengo agiriekin batera: DNIaren fotokopia, INEMen txartelaren fotokopia, Lan Bizitza, eta curriculuma (aukerakoa). Argazkian, Plentziako udaletxea.
  Jendartea 2009-04-04 20:08

Gurutzetako ospitalean artatu behar izan dituzte atzo Plentzian atxilotutako ustezko bi lapur

Erabiltzailearen aurpegia Ukberri Plentziako Udaltzaingoak 23 eta 24 urteko bi gizonezko atxilotu zituen atzo, ostirala, itsas hiribilduan, aparkatuta zegoen ibilgailu bateko kristala hautsi eta barruan ostu zutelakoan. Eusko Jaurlaritzaren Herrizaingo Sailak zabaldutakoaren arabera, antza alkoholaren eraginpean zeuden biak, eta Getxoko ertzain-etxera eraman zituzten beharrezko izapideak egiteko. Ondoren, gizonezkoak ondoezik sentitu ziren eta Gurutzetako ospitalera eraman behar izan zituzten; gainera, ertzain batek atxilotuetako bat suspertu behar izan zuen, arnasa hartzeko zailtasunak baitzituen, bertsio ofizialaren arabera. Komisariara zeramatzatela atxilotuetako batek agenteen kontra jarrera oldarkorra erakutsi zuela ere aipatu du Herrizaingo Sailak. Gauerdi aldera, ospitalean artatuak izan ostean, biak ertzain-etxera eraman zituzten berriro. Gaur, larunbata, bi atxilotuak epailearen esku jarri dituzte. Aurrekariak dituzte biek jabetzaren kontrako delituengatik.

Nabarmenak

Zorion agurrak