Jendartea 2006-03-01 23:05

Krutxeta kaleko lanei ekingo die berriro Gorlizko Udalak

Erabiltzailearen aurpegia Ukberri Krutxeta bidea urbanizatzeko lanei amaiera emango die azkenean Gorlizko Udalak. Obra horiek burutzeke geratu ziren, "arazo ekonomikoak eta lurzoruaren eskuragarritasunaren inguruko zenbait zirkustantzia zirela medio", Patxo Igartua alkateak adierazitakoaren arabera. Obrei bukaera eman aldera, zenbait jarduera bideratuko dira: galtzadako maila egokitu eta espaloiak egitea, bertarako sarbideak atontzeko lanak amaitzea... Halaber, ibilgailuentzako eta oinezkoentzako bideak ere jasotzen dira proiektuan, baita hornidura-sareak eta behar diren fabrikako lanak ere. “Oso proiektu garrantzitsua da, azkenean, udarako gauzatuta ikusiko duguna. Uztailerako herritarrek kale horretaz gozatzea espero dut”, adierazi du tokiko agintariak. Gorlizko Udalak 336.498,62 euro bideratu ditu horretara.
  Jendartea 2006-02-27 22:07

Saharako bandera jaso dute Gorlizko udaletxean

Erabiltzailearen aurpegia Ukberri Saharar Errepublika Demokratikoaren (SEAD) aldarrikapenaren 30. urteurrenarekin bat eginez, bandera sahararra jaso dute ikurrinarekin batera Gorlizko udaletxean. Blanca Fernandez Gizarte Ekintza zinegotziak azaldutakoaren arabera, "gizartearekiko duen kezka adierazi du berriro ere marinel-herriak, saharar herriarekiko elkartasuna izatean. Oraingo honetan, Marokoko okupazio indarrek sahararren giza eskubideak nabarmen urratzen ari direlako". Aipatu ekimena Euskal Fondoak bultzatu du, Fronte Polisarioak EAEn duen ordezkaritza eta Eusko Legebiltzarreko "Bakea saharar herriarentzat" azpitaldearekin batera. Euskal erakunde publikoetan Saharako bandera jasotzea proposatu zuten, "marokoar agintariei presioa egiteko, nazioarteko legezkotasuna errespetatu eta bertan autodeterminazio erreferenduma egiten utz dezaten".
  Kultura 2006-02-23 23:10

Mielotxin, Zaldiko eta Ziripotek bisitatuko dute larunbatean Gorliz

Erabiltzailearen aurpegia Ukberri Inauteriak ostiral honetan hasiko dira Gorlizen. Goizeko 11etan ikastetxeko desfilea egingo da herriko kaleetatik eta, horretam, eskola-umeak, irakasleak, zuzendariak, aita-amak... joango dira mozorrotuak. Arratsaldean, berriz, inauteri-ludoteka izango da kultur etxean, 17:30etik 19:00etara, 5 eta 12 urte bitarteko neska-mutilentzat. Hurrengo egunean, larunbat arratsaldean, Lantz-eko Inauteriak izango dira, 18:00etan hasita, Aratz dantza taldearen eskutik. Hortaz, aurten ere, Mielotxinek (erraldoia), Zaldikok, Ziripotek (lodikotea), perretzaileek eta txatxoek hartuko dute Gorlizko kale nagusia, zarataka eta dantza eginez. Ondoren, txokolanea banatuko dute elizako plazan.
  Jendartea 2006-02-13 22:05

Ostegunean lan baldintzei buruzko bideo foruma eskainiko du Itzubaltzeta gaztetxeak

Erabiltzailearen aurpegia Ukberri

"Se entera o no se entera la clase obrera?" titulupean, bideo foruma izango da ostegun honetan Itzubaltzeta gaztetxean, arratsaldeko 7etan. Horretarako, 1985ean ekoiztu zen "La batalla de Euskalduna" 36 minutuko laburmetraia proiektatuko da. Horrezkero, eztabaida zabalduko da. Filmean kontatzen da Euskalduna ontzioletako langileen borroka, Madrilgo Gobernu "sozialistak" enpresa itxi ez zezan. Garai haietan, Europako Batasunak klub komunitarioan sartzeko Espainiako Estatua behartu zuen ontziolen ekoizpena erdira murrizten eta sektore gehienetan langileen eskubideak sano murrizten. Gaur egun, Abenduaren 14ko greba arrakastatsua ekarri zuen "Gazteriarentzako Lan Kontratua" Ipar Euskal Herrian ezarri dute eta zerbitzuen sektorean lan baldintzen behin-behinekotasuna ekarriko lukeen Bolkestein araua eztabaidagai dago Europako Batasuneko Kontseiluan, Espainia eta beste estatu batzuen oniritziarekin. Bestalde, Aldi Baterako Lan Enpresek (ABLE) hor jarraitzen dute... Argazkian, Euskaldunako langile bat ontziolako gatazkan / Diez palabras.

  Kultura 2006-02-13 22:03

Ipuin kontaketa eta zinema egongo dira asteburuan Gorlizen

Erabiltzailearen aurpegia Ukberri Gorlizko Kultur Etxeak ekitaldi bi antolatu ditu asteburu honetarako herriko gaztetxoentzat, dohainik. Larunbat honetan, otsailak 18, “Marilo betilo” ipuin kontaketa saioa eskainiko du Behi Bi’s izeneko taldeak, ikastetxean bertan. 3 eta 8 urte bitarteko umeei zuzendutako emanaldia, 18:30ean hasiko da. Hurrengo egunean, igandean, ume eta gazteek zine emanaldia izango dute ohiko lekuan, hau da, Gorlizko udal erakusgelan, Eloisa Artaza kaleko 3. zenbakian. Arratsaldeko bostetatik aurrera, “Valiant” filmea (argazkian) proiektatuko dute bertan.
  Jendartea 2006-02-10 21:54

Gorlizen 25 kilo elikagai eta konpresa batu dituzte Saharara eramateko

Erabiltzailearen aurpegia Ukberri Gorlizko Udalak deituta, aipatu herrian Sahararen alde egin den atun lata, azukre eta konpresa bilketan 25 kilogramo jaso dira guztira, udaletxean eta kultur etxean. Larunbat honetan, otsailak 11, aterako da II. Euskal Karabana Bilboko Botika Zaharretik. Bertan, 40 ibilgailu baino gehiagok ekingo dio bideari Alacanteraino (Herrialde Katalanak), gero ferryan Oranera (Aljeria) eta handik basamortutik Tinduferaino (Aljeria). Lehenago Botika Zaharrean jaialditxoa egingo da, goizez, eta bertan ikusgai egongo dira 40 ibilgailu horiek goizeko 11etatik aurrera. Udal arduradun gorliztarrek adierazi dutenez, "saharar herritarrei ahalik eta elikagai gehien eramatea da karabanaren helburua, errefuxiatuen kanpamenduetan pairatzen duten elikagai falta asetzeko". Argazkian, 2002ko karabana Alacanteko portuan / Lasonet.com.
  Jendartea 2006-01-17 14:01

"Elikatu itxaropen bat" Sahararekin elkartasun kanpaina abiatu da Gorlizen

Erabiltzailearen aurpegia Ukberri Gorlizko Udalak abian jarri du "Elikatu itxaropen bat" herri saharauirekiko elkartasun kanpainaren bigarren edizioa eta datorren otsailaren 15era arte atuna, azukrea eta beste elikagai asko bilduko ditu Tindouf-eko errefuxiatu kanpamenduetara bidaltzeko, Blanca Fernandez Gizarte Ekintzako zinegotziak jakinarazi duenez. Fernandezek Gorlizko bizilagunei deitu die kanpainan parte hartzeko eta gogoratu die elikagaiak kultur etxeko zein udaletxeko atarietan utzi ahal izango direla. Gainera, nahi duten herritarrek laguntza ekonomikoa emateko aukera ere izango dute Caja Laboraleko 3035-0080-94-0800054177 kontu korrontearen bidez. Bertan metatuko dirua bigarren eskuko kamioiak erosteko erabiliko da.
  Jendartea 2005-12-29 10:09

Gorlizko udaltzainek ia 900 salaketa jaso zituzten 2004an

Erabiltzailearen aurpegia Ukberri Gorlizko Udaltzaingoak berriki jakinarazitakoaren arabera, 2004ko urtean 873 izan ziren jasotako salaketak. Horietatik 35 kasu kaleetan zein errepideetan utzitako kotxeen espedienteak izan ziren. Bestalde, Udaltzaingoak azpimarratu du 2003an baino 13 istripu gutxiago gertatu zirela iaz. Azkenik, udaldean bi hondartzain gehiago kontratatu zirela nabarmendu du Gorlizko tokiko Poliziak.
  Kultura 2005-12-28 22:22

Bizkaiko Txistularien Gabonetako Kontzertua izango da etzi Gorlizen

Erabiltzailearen aurpegia Ukberri Gorlizko Andramari elizak hartuko du etzi, abenduak 30, Bizkaiko Txistularien Gabonetako Kontzertuaren VI. edizioa. Gainera, 2002an egon ondoren hau izango da bigarren aldia ekimen musikal hau Gorlizen burutuko dela. "2002an esperientzia ona izanda bueltatzea erabaki dugu" jakinarazi dute Bizkaiko Txistulari Elkarteko kideek. Gauzak horrela, ostiralean 20:15ean, Bizkaiko Txistularien Elkarteko kideekin batera Barakaldoko Udal Bandaren metal eta perkutsio boskotea, Barakaldoko Musika Eskolaren hari-laukotea eta Scherzo ahots-taldeak jardungo dute. Besteak beste, “Puer Natus In Betlehem” eta “Goazen, Goazen” joko dute. Kontzertuan Gorlizko Zuentzat Kultur Taldeak lagundu du. Argazkia: Txistulari aldizkaria.
  Kirolak 2005-12-17 19:41

Hamar urte egingo ditu bihar Gorlizko hondartzako zaldi lasterketak

Erabiltzailearen aurpegia Ukberri Igande honetan, abenduak 18, egingo da Gorlizko X. Zaldi Lasterketa. 11:00etan Eliz plazatik hondartzaraino jaitsiko dira parte hartzaile guztiak. Marea behera egiten hasi bezain laster, ibilbidea markatuko dute antolatzaileek eta 11:30ak aldera hasiko da proba. Beti bezala, bi lasterketa izango dira: bata odol garbiko zaldiena eta bestea arraza gurutzatutakoena. Lehenengoan 600, 300, 150 eta 75 euro eta trofeo bana jasoko dute, hurrenez hurren, lehenengo lau sailkatuak. Bigarrenean, berriz, 500, 250, 125 eta 60 euro eta trofeoa izango dira sariak. Urtean zehar Kantauriko kostaldeko hondartzetan egiten diren zaldi lasterketen artean, garrantzitsuenetarikoa bilakatu da Gorliz Kirol Elkarteak antolatutakoa. Argazkia: Euskaraz.net.
  Kultura 2005-12-16 21:38

Gabonetako maratoia egingo du asteburu honetan Gorliz irratiak

Erabiltzailearen aurpegia Ukberri Gabonak gertu direla, ohiturari eutsiz, 24 orduz jarraian emitituko du asteburu honetan Gorliz irratiak (FM 107.8). Abenduaren 17ko eguerdian emango zaio hasiera irratsaioari, hurrengo egunean, ordu berean amaitzeko. Denbora guzti horretan, bertara deitzeko aukera izango dute entzuleek. Gainera, guztiek izango dute oparia irabazteko aukera, Gorliz, Uribe Kosta edo Gorliz irratiari (irratsaiak, aurkezleak, diala...) buruzko galderari ondo erantzuten badiote. Behin baino ezin izango da deitu, hedabideko arduradunek ohartarazi dutenez. Aipatu sariak igandean, 12:00etatik 13:00etara banatuko dituzte irratiko egoitzan, Taberne kaleko 1. atarian. Hori gutxi balitz, "sekulako" gabon otzara (argazkian) zozketatuko dute maratoian zehar jasotako dei guztien artean.
  Jendartea 2005-10-23 18:37

Ertzaintzak bertan behera utzi ditu Gorlizen agertu den pantera bilatzeko lanak

Erabiltzailearen aurpegia Ukberri Atzo arratsaldean Gorlizeko hainbat bizilagunek pantera bat ikusi zuten ospitale inguruan eta Ertzaintzak abisua jaso ostean, bilatze-lanei ekin zien. Gaur goizean, berriz hasi dira txakurrekin eta eskupetak eskuan. Goiz osoa bila ibili ondoren, 16:00ak inguruan bertan behera utzi dituzte bilaketa lanak eta ez dute pantera aurkitu. Aurretik ere lehoinabar baten bila ibilita dago Ertzaintza. 2003ko apirilean Lemoizeko Urizar auzoko bizilagunek pantera bat inguru horietan zebilela salatu zuten eta agenteek hainbat egun igaro zituzten bila. Azkenean, ez zuten animalia topatu eta orduan ere bertan behera utzi zituzten bilatze-lanak. Argazkia: ventorfox.no.sapo.pt/.
  Kultura 2005-10-08 18:40

Perretxikoak ikusi eta dastatzeko aukera egongo da bihar Gorlizen

Erabiltzailearen aurpegia Ukberri Bizkaiko Mikologia Federazioak antolatuta, IV. Perretxiko Erakusketa egingo dute igande honetan, 10:00etatik aurrera, Gorlizko Iberre auzoko San Pedro plazan. Besteak beste, aurreko egunetan basoetan hartutako perretxikoak, denak ondo sailkatuak jendeak ezagutu ditzan, egongo dira ikusgai goiz osoan zehar. Aldi berean, IV. Gazteen Perretxiko Lehiaketa ospatuko da bertan. Txapelketa horretan, perretxikoak sailkatzeko trebetasuna erakutsi beharko dute neska-mutilek. Azkenik, basoetako jaki gozo horiekin egindako pintxoak dastatzeko aukera egongo da Bizkaiko Foru Aldundiaren eta Gorlizko Kultur Etxearen laguntzaz antolatutako jardunaldietan. (Argazkian, Cantarellus cibarius perretxiko ale batzuk / www.picoseuropa.net).
  Kirolak 2005-10-06 15:27

Urriaren 16ra arte Gorlizen egongo da ikusgai "Skate Uribe Kostan" argazki erakusketa

Erabiltzailearen aurpegia Ukberri Abendura bitartean, Uribe Kostako herrietan barrena ibiliko da UK Uribe Kostako Aldizkariak ekoiztutako "SK8UKN, Skate Uribe Kostan" erakusketa fotografikoa. Algortan, Sopelan eta Urdulizen ikusi ahal izan da jada. Orain Gorlizko kultur etxean egongo da urriaren 16ra arte. Hortik aurrera, berriz, Plentziako (urriaren 17tik 30era) kultur etxean; Leioako Kultur Leioa aretoan (azaroaren 7tik 20ra) eta Erandioko udaletxean egongo dira ikusgai Carlos Terrerosek egindako 18 argazkiak. (Irudian, Borja Saez skaterrari Erandion ateratako argazkia / Egilea: © Carlos Terrero).
  Ekonomia 2005-09-23 16:30

Sagastikoetxen eraikiko den merkataritza-guneko tramitazioa onartu du Gorlizko udalbatzak

Erabiltzailearen aurpegia Ukberri Eztabaida handien artean Gorlizko Udalbatzak Sagastikoetxe inguruko plan partziala aldatzeko behin-behineko erabakia onartu du. Bertan, Gorlizko Udalak eta enpresak egindako akordioa betetzen bada, Eroskik 2.700 metro kuadroko merkataritza-gunea jarriko du. EAJ eta PPk babestutako aldaketaren arabera, eta sor daitezkeen alegazioek horrela bermatzen badute, Sagastikoetxeko 2.700 metro kuadro lur industriala izatetik merkataritza-erabilpena izatera pasatuko dira. Horietatik 2.000 metro merkataritza-gunea egiteko erabiliko lirateke, beste 400 metrok biltegiak hartuko lituzkete eta, azkenik, kafetegia edo jatetxea bezalako zerbitzuek hartuko lituzkete falta diren 300 metroak. Kontran bozkatu duten Gorlizko Talde Independentea eta Eusko Alkartasunak ez dute afera "hain argi" ikusten. Talde independentearen arabera, metro kopurua aldatzen da "txostenetik txostenera" eta dagoeneko hiru zenbaki ezberdin aurkeztu zaizkie: 2.400, 2.000 eta 2.700 metro kuadro. Bestalde, salatu dute udal aldizkarian "gezurra" esaten dela Eroskik 24 gorliztarri lanpostua emango diela argitaratzen denean. Argazkian, Patxo Igartua Gorlizko alkatea.
  Kirolak 2005-09-09 13:30

Mountain Bike lasterketa izango da igandean Gorlizen

Erabiltzailearen aurpegia Ukberri Gorlizko Mendibike elkarteak Mountain Bike Martxaren hamalaugarren edizioa antolatu du igande honetarako, irteera eta helmuga Uribe Kostako herrian bertan izango delarik. Hurrenez hurren, 9:30ean emango zaie hasiera lasterketa luzeari (48 kilometro) eta laburrari (33 kilometro). Ondoren, 5 kilometroko "Martxa Txikia" egingo dute. Larunbatean, kiroldegian eman ahal izango da izena, 11:00etatik 13:00etara. Baita lasterketa hasi baino ordu erdi lehenagora arte ere. Txirrindulari federatuek zein "Martxa Txikia" egingo dutenek 10 euro ordaindu beharko dute; federatuak ez daudenek, berriz, 13 euro. Gorlizera 150 txirindulari baino gahiago joatea espero dute antolatzaileek. (Argazkian, 2004ko Mendibike Eguneko irudiak / Mendibike).
  Kirolak 2005-09-08 22:29

Gorlizko Udal Golf Eskolak bihar zabalduko ditu bere ateak berriro ere

Erabiltzailearen aurpegia Ukberri Gorlizko golf eskola publikoa zabalik egongo da berriz bihartik aurrera bertan berrikuntza ugari egin ostean, bertako udalak prentsa ohar baten bidez jakinarazi duenez. Patxo Igartua (argazkian) alkatearen hitzetan, "dudarik gabe, gune honen berrikuntzak herriari etorkizunerako hobekuntza elementuak ekarriko dizkio". Ildo berean, zerbitzu eta moldaketa horien areagotzeak "herriko golf zale guztiei erantzuna ematea" dakar, aldi berean 35 jokalari ibili ahal izango baitira golfean.
  Jendartea 2005-09-02 21:29

Gorlizko zortzi etxetan eta jatetxe batean lapurtu zuena atxilotu duela dio Ertzaintzak

Erabiltzailearen aurpegia Ukberri Ertzaintzak 29 urteko gazte bat atxilotu zuen herenegun goizean Bilbo Zaharrean, Gorlizko zortzi etxebizitzatan eta taberna batean maiatzean izandako lapurretetan zerikusia duelakoan. Herrizaingo Sailak prentsa oharrez adierazi duenez, atea indarrez ireki ostean atxilotua egun batzuetan uda pasatzeko etxe batean bizi izan zen eta bertan gorde zituen ostutako hainbat gauza. Plentziatik jasotako salaketa batetik lortu omen zuten informazio hori.
  Jendartea 2005-08-26 15:48

Urezarantzako emakumeen bazkaria bihar, larunbata, ospatuko da

Erabiltzailearen aurpegia Ukberri Zortzigarren urtez, Faoko eguna pasatu eta aste batera Gorlizko Urezarantza auzoko andrak batuko dira bihar, abuztuak 27, bazkaltzeko. Sotena baserriko Luci Etxebarriak antolatutako bazkaria urtero legez auzoko Kilimanjaro garagardotegian izango da, eta 50 emakume baino gehiago espero dituzte bertan.
  Kultura 2005-07-21 23:02

Euskararen Eguna ospatuko da bihar Gorlizen

Erabiltzailearen aurpegia Ukberri Gorlizko Udalak eta Uribe Kostako Mankomunitateko Euskara Zerbitzuak antolatuta, Euskararen Egunaren bigarren edizioa ospatuko da ostiral honetan aipatu herriko Iberrebarri plazan. Egun osoan zehar, hainbat jarduera egongo dira bereziki gazteei zuzenduak. Izan ere, eskolatik kanpo euskara bultzatzea du helburu ekimenak. Ehun neska-mutil baino gehiago parte hartzea espero dute antolatzaileek.

Nabarmenak

Zorion agurrak