Kultura 2008-10-27 21:40

Gernikako Azokan barazkien saria jaso du Adela Andikoetxea urduliztarrak

Erabiltzailearen aurpegia Ukberri Adela Andikoetxea Urdulizko baserritarrak barazkien saria irabazi egin du gaur, urriko azken astelehenean ospatu den Gernikako azokan. Busturialdeko Udalak jakinarazi duenez, 300 saltoki baino gehiago izan dira bertan, euria egin arren batu diren 100.000 lagunei baserrietako eta mahastietako produkturik gozoenak eskaintzen. Andikoetxeak Merkurio plazan batu du saria 13:00ak aldera, BBKko ordezkarien eskutik. Ekitaldiaren bitartean, Abiadura Handiko Trenaren aurkako bi lagun oholtzaren gainean izan dira, EAko Miguel Angel Aranaz alkatea, hainbat zinegotzi eta BBKko kideen atzean "AHT gelditu!" eta "AHTrik ez!" lelopeko ikurrak erakutsiz, aurrean beste 50 bat lagunek kontzentrazioa egin dutela. Protestak alde batera utzita, urduliztarra ez da izan saritutako bakarra. Adibidez, Arabako Asparren udalerriko La Leze markakoek irabazi dute 4.000 euroengatik enkantean saldu den gaztaren saria. Argibide gehiagorako, http://gernika-lumo.hitza.info. Argazkian, barazkien postu bat Algortako San Lorentzo azokan, Andikoetxearentzat lehenengo azoka izan dena.
  Kultura 2008-10-22 14:30

Espainian aipamen berezia jaso du Urdulizen sortutako artisautza bildumak

Erabiltzailearen aurpegia Ukberri Slow Naturala bildumak epaimahairen aipamen berezia jaso du Espainiako Artisautzako Sari Nazionalean, Bizkaiko Foru Aldundiak jakinarazi duenez. Urdulizko Igeltzera industrialdean dagoen Muebles Arene enpresako Alberto Gorostizak; Ana Aldana zur zizelkari urduliztarrak; Bilboko Telar, Artesania Textil tailerreko Soledad Santistebanek; eta Blanka Gomez de Segura zeramikari arabarrak egin dute bilduma. Bihar, ostegunean, Madrilgo Industria, Turismo eta Merkataritza Ministerioko ekitaldi aretoan emango zaie saria. Aldi berean eta leku berean, aukeratutako produktu guztien erakusketa inauguratuko dute. Aldundiko Berrikuntza eta Ekonomi Sustapen Sailaren finantzaketari esker, Urdulizko kultur aretoan 2007an egindako artisautza produktuen azterketari eta diseinuari buruzko ikastaroan du jatorria bildumak, foru iturriek zehaztu dutenez. Epaimahaiak aipamen berezia Slow Naturala bildumari ematea erabaki du, lehengo kutxatzar tradizionala, gres-baxera bat eta lihozko mahai-zapiak erreproduzitzeko diseinua egoki erabili dutelako. Argazkian, urtarrilean Urdulizko ikastaroan landutako hainbat produktu aurkeztu zituen Izaskun Artetxe Berrikuntza diputatuak, Soledad Santisteban (ezkerrean) bertan zela.
  Kultura 2008-10-21 23:45

Euskara lagunartean erabiltzen irakatsiko diete gazteei Urdulizen

Erabiltzailearen aurpegia Ukberri Uribe Kostako Mankomunitateko Euskara Zerbitzuaren bitartez, "Lagunarteko hizkerarekin jolasean" izeneko ikastaroa eskainiko die 15 eta 22 urte bitarteko gazteei Urdulizko Udalak. Horren bitartez, neska-mutilak hizkuntzarekin jolastea eta euskararekin ondo pasatzea lortu nahi dute, tokiko arduradunek azaldu dutenez; eta horretarako zenbait eduki landuko dira, hala nola, haserretzearekin, adarra jotzearekin eta ligatzearekin zerikusia duten esamoldeak. Halaber, saioetatik kanpo erregistro kolokiala euskaraz erabil dezaten bideak (lehiaketak, web orria...) jarriko dizkiete. Eskolak azaroaren 14an, 21ean eta 28an izango dira, 18:00etatik 20:00etara, kultur etxean. Gutxienez 10 lagunek eman beharko dute izena eta gazte urduliztarrek lehentasuna izango dute. Izena emateko epea urriaren 31n bukatuko da. Horretarako, inskripzio orria (doc) euskera2[abildua]uribekosta.org helbidera edo Uribe Kostako Zerbitzu Mankomunitatera (Gatzarriñe 2-4 / Sopela) bidali beharko dute gazteek. Informazio gehiagorako: 946 762 674 (Iratxe). Argazkian, hainbat lagun aurtengo Aixerrotako Paella Egunean.
  Jendartea 2008-10-08 23:43

Emakumeei "zalantzak argitzen" laguntzeko ikastaroak antolatu ditu berriro Mankomunitateak

Erabiltzailearen aurpegia Ukberri Uribe Kostako Mankomunitateko Drogamenpekotasunari Aurrea Hartzeko eta Berdintasun zerbitzuek "Feminitatearen labirintoa" deritzon ikastaroak antolatu dituzte berriro. Saioak astearteetan izango dira, 17:00etatik 19:00etara, Urdulizko Kultur Etxean, urriaren 14tik aurrera. Parte hartu nahi duten guztiek 946 762 674 (Rakel Delgado) telefono zenbakira deitzea besterik ez dute edo ondoko e-posta helbidera idatzi: preven[abildua]uribekosta.org. Haurtzaindegi zerbitzua ere egongo da dohainik, aurretik eskatzen bada. Ekimenaren bitartez, "azken hamarkadetan emakumeen rolean gertatutako aldaketek dakartzaten kontraesan, zalantza eta erronka berriak taldean argitu" nahi dituzte, "aukerak bilatzeko bideak eskaintzeaz gain, leku berriak bilatzen dituzten emakume eta gizonen etorkizuna eraikitzea erraztuz; horrela eginez osasun eta asebetetze-maila altuagoak lortuko dira", tokiko iturriek adierazi dutenez. Besteak beste, familia eta lana, jabekuntza eta sexualitatea edukiko dituzte hizpide. Argazkian, hainbat lagun Urdulizko Emakumeen Etxean.
  Kultura 2008-10-08 23:27

Udazkeneko Euskararen Eguna ospatuko dute larunbatean Urdulizen

Erabiltzailearen aurpegia Ukberri Larunbat honetan, urriak 11, Udazkeneko Euskararen Eguna ospatuko dute Urdulizen, udal iturriek jakinarazi dutenez. Gauzak horrela, 11:30etik 13:30era, herri kirol eta talo tailerrak izango dituzte 4 eta 12 urte bitarteko neska-mutilek. Arratsaldean, berriz, Erdizka Lauetan taldeak eskainiko du dantzaldia, 18:00etan hasi eta 19:30ean bukatuta. Goizeko tailerrak pilotaleku berrian izango dira (euria bada, Iparralde kiroldegian). Eta dantzaldia Iparralde kiroldegian. Bitartean, datorren asteartean, hilak 14, jarraituko dute Urdulizen, Euskaraz Olgetan ekimenarekin. Egun horretan, "Bizi sano astea" lelopean, kirol jarduerak edukiko dituzte euskaraz bertoko neska-mutilek, 17:30etik 19:30era. Jolasak pilotaleku berrian izango dira eta, euria egitekotan, Iparralde kiroldegian. Argazkian, ume eta helduak batera dantzan.
  Kultura 2008-09-12 19:40

Urdulizko jaiak reggae doinuetara eramango ditu gaur gauean Kakarraldo Sunsplash Jaialdiak

Erabiltzailearen aurpegia Ukberri Kakarraldo Sunsplash Jaialdiaren bigarren edizioa ospatuko da gaur gauean 22:00etatik aurrera, Urdulizko Elortza auzoan. Urdulizko Jai Batzordeak eta Itzubaltzeta / Romoko Brixton Records-ek antolatutako reggae musikaldiak amaierako norabidean jarriko ditu Andra Mari jaiak, igandean bukatuko direnak. Aurten, inoiz baino indartsuago dator urtero-urtero herrira musika beltza eta munduko doinuak ekartzeko asmoz iaz sortutako ekimena. Besteak beste, Chalwa Band eta Mr. Shoe talde urduliztarrekin batera, A.J. Franklin (Erresuma Batua), Alberto Tarin & Jazzin Reggae Band eta Souls of Fire (Portugal) bandek joko dute Elortza inguruko landetako agertokian; baita Dave Barker jamaikarrak ere. Aurretik, Dj-ak lagundutako skate eta graffiti erakusketa ere egingo dute, 18:00etatik aurrera, Kakarraldo Sunsplash Jailadiaren osagarri. Argazkian, Dave Barker eta Alberto Tarin & Jazzin Reggae Band elkarrekin kontzertu batean / Jazzin Reggae.
  Kultura 2008-09-02 23:46

Jamaikako doinuek alaituko dituzte Urdulizko Andra Mariak

Erabiltzailearen aurpegia Ukberri Bigarren urtez, Kakarraldo Sunsplash Jaialdia ospatuko dute, ostiral honetan hasi eta hilaren 14ra arte luzatuko diren Urdulizko Andra Mari jaietan. Aurten, gainera, inoiz baino indartsuago dator urtero-urtero herrira musika beltza eta munduko doinuak ekartzeko asmoz iaz sortutako ekimena. Besteak beste, Chalwa Band eta Mr. Shoe talde urduliztarrekin batera, A.J. Franklin (Erresuma Batua), Alberto Tarin & Jazzin Reggae Band eta Souls of Fire (Portugal) bandek joko dute Elortza inguruko landetako agertokian; baita Dave Barker jamaikarrak ere. Hala ere, hilaren 12ra arte (23:30ean) itxaron beharko dute reggae musika zaleek ekitaldiaz gozatu ahal izateko. Egun berean, Dj-ak lagundutako skate eta graffiti erakusketa ere egingo dute, 18:00etan, Kakarraldo Sunsplash Jailadiaren osagarri. Bitartean, ostiralean hasita, aspertzeko momentu bat bera ere ez da izango Urdulizko Andra Mari jaietan. Argazkian, Dave Barker eta Alberto Tarin & Jazzin Reggae Band elkarrekin kontzertu batean / Jazzin Reggae.
  Kultura 2008-09-02 21:35

Neska-mutilentzako irakurketa lehiaketa antolatu du Urdulizko Kultur Etxeak

Erabiltzailearen aurpegia Ukberri Urdulizko Kultur Etxeak irakurketa lehiaketa antolatu du 6 eta 14 bitarteko liburutegiko irakurle guztientzat. "Irakurriz Jolastu" izenburuko ekimenak abenduaren 30era arte iraungo du. Lehiaketan parte hartu nahi duten guztiak liburutegian bere datuak eman beharko ditu. Horrenbestez, hiru maila bereiztu dituzte: gorria, 6 urtetik aurrerakoentzat; berdea, 9 urtetik gorakoentzat; eta horia, 12 urte baino gehiago duten neska-mutilentzat. Parte hartzaileek, emango zaien zerrendatik, gutxienez, 4 liburu irakurri beharko dituzte. Maileguan eskatutako liburuarekin batera, fitxa bat emango da. Mailegu hau ezin izango da 15 egun baino luzeagoa izan; egun horiek pasa eta gero, parte hartzaileek liburua eta fitxa behar den moduan beteta bueltako dute. Maila bakoitzeko sari bat egongo da. Saria liburuak edota material didaktikoa erosteko 100 euroko bale bat izango da, bertan adierazten dan liburudendan trukea egiteko. Argazkian, Urdulizko kultur etxeko eraikina.
  Jendartea 2008-06-17 22:17

Larunbatean zozketatuko dituzte Urdulizko Elortza auzoko 60 BOEak

Erabiltzailearen aurpegia Ukberri Urdulizko Udalak abenduaren 19ko osoko bilkuran erabaki zuen, Sociedad Urduliz Urbanismo SAk Elortza auzoko 42 eremuan eraiki dituen babes ofizialeko 60 etxebizitza adjudikatzeko oinarriak (pdf) hasiera batean onestea. Aipatutako sozietatea tokiko erakundeak berak sortu zuen "herritarren artean etxebizitza publikoa bultzatzeko". Bada, jardunbide guztia gauzatu eta eskatzaileen behin betiko zerrenda (pdf) eskuan, larunbat honetan, ekainak 21, egingo dute aipatu 60 BOEen zozketa. Ekitaldia Iparralde kiroldegian izango da, goizeko 11etan. Argazkian, Urduliz urrunetik ikusia.
  Kultura 2008-05-25 14:09

Urdulizko Andramarietarako kartel lehiaketa deitu dute

Erabiltzailearen aurpegia Ukberri Andra Mari jaiak iragarriko duen kartela hautatzeko lehiaketa antolatu du Urdulizko Kultur Etxeak. Lanak postaz zein zuzenean entregatu ahal izango dira Urdulizko kultur etxean (Aita Gotzon, 16 - 48610 Urduliz), ekainaren 14ko 14:00ak arte. Irabazleak 400 euro jasoko ditu. Bestalde, ekainaren 17tik 30era bitartean, kultur etxean egingo den erakusketan herritarrek aukeratzen duten lanaren egileak 100 eurotako saria lortuko du. Eta beste saririk jaso ez duen urduliztar baten obrarik onenaren egileak, beste horrenbeste. Hilaren 27an, 13:00etan, emango dute ezagutzera epaimahaiaren erabakia. Argazkian, inguruko herri gehienetan burutzen dira jaietako kartela aukeratzeko lehiaketak, tartean Algortako Saninazioetarako.
  Jendartea 2008-05-19 22:46

Emakumeen arteko topaketa egingo dute larunbatean Urdulizen

Erabiltzailearen aurpegia Ukberri Emakunderen ekimenez, emakumeen topaketa egingo dute larunbatean, maiatzak 24, kultur etxea zen Urdulizko eliza ondoko eraikinean, hau da, egungo Emakumeen Etxean. Uribe Kostako Zerbitzu Mankomunitatearen laguntzaz, besteak beste, Plentziako Araldi, Barrikako Emakumeen Ahotsa, Berangoko Emakumeen Kultur Elkartea eta Urdulizko Inola andrazkoen taldeak dabiltza jardunaldia antolatzen. Hain zuzen ere, Izaskun Moyua Emakundeko zuzendariak eta Juan Olea Urdulizko alkate eta Mankomunitateko presidenteak parte hartuko dute 9:30etik 18:00etara luzatuko den saioan. Parte hartzeko maiatzaren 22ra bitartean izena eman behar dela jakinarazi dute tokiko arduradunek. Horretarako 946 762 674 telefono zenbakia eta berdintasuna[abildua]uribekosta.org e.posta helbidea jarri dituzte eskura. Dohainiko ludoteka eta haurtzaindegi zerbitzuak izango dira. Argazkian, hainbat lagun Urdulizko Emakumeen Etxean.
  Jendartea 2008-05-07 21:30

Berdintasun politikez jardungo dute hilaren 16an Urdulizen

Erabiltzailearen aurpegia Ukberri “Uribe Kostaren etorkizuna: berdintasun eta iraunkortasunerako lurraldea” lelopean, azaroaren 9an eta 10ean burutu ziren eskualdeko emakumeen arteko topaketak. Oraingoan, berriz, jardunaldi horietan lortutako emaitzak aurkeztuko dituzte, maiatzaren 16an, aipatu udalerriko kultur etxeko ekitaldi aretoan (Aita Gotzon, 16) egingo den ekitaldia. Saioa goizez izango da, 11:00etatik 13:00etara. Bertan egongo dira azaroko hausnarketa jardunaldietan parte hartutako andrak, Uribe Kostako Mankomunitateko arduradun eta teknikariak eta Isabel Velazquez arkitektoak. "Berdintasun eta iraunkortasunerako zeharkako politikak udalerri mailan garatzearen beharraz" ohartaraztea izango da ekitaldiaren helburua, mankomunitateko iturriek adierazi dutenez. Argazkian, azaroko jardunaldietan batutako lagunak.
  Jendartea 2008-04-15 19:41

Urduliztar bat atxilotu dute emakumea jo eta ertzainak sukaldeko labanaz mehatxatzea egotzita

Erabiltzailearen aurpegia Ukberri Atzo arratsaldeko lau t'erdiak aldera, Urdulizko baserri batean erasoa gertatzen ari zela ohartarazi zioten Ertzaintzari, Eusko Jaurlaritzako Herrizaingo Sailak jakinarazitakoaren arabera. Antza denez, gizonezko batek ondoko etxebizitzaren jabea, emakumezkoa, jo eta mehatxatu zuen makila batez. Gertakariaren berri izan zuenean, patruila-auto bat bertara abiatu zen, eta, baserrira heltzen ari zela, furgoneta batekin topo egin zuen aurrez aurre. Ibilgailu horrek polizia autoari pasatzen uzten ez zionez, ertzainek larrialdi zerbitzuan zihoazela esan zioten gidariari, eta bidea libre uzteko eskatu zioten, polizia iturriek gaineratu dutenez. Gidariak ezetz esan zien, anbulantzia bat bidean zetorrela eta zauritutako emakumezko bat artatu behar zuela azaldu bazioten ere. Jarrera horren aurrean, ertzainetako bat autotik jaitsi eta, furgonetara hurreratzen ari zela, gidariak sukaldeko labana batez mehatxu egin zion.
  Jendartea 2008-03-21 12:50

Asteartea izango dute erreklamatzeko azken eguna Elortza auzoko 60 BOEetako bat eskuratzeko baztertuak izan direnek

Erabiltzailearen aurpegia Ukberri Elortza aldeko babes ofizialeko 60 etxebizitza esleitzeko oinarriak otsailaren 17an onartu zituen behin betiko Urdulizko Udalak eta Bizkaiko Aldizkari Ofizialean (BAO) eman ziren argitara martxoaren 5ean, 49. zenbakian. Horiek horrela, aipatutako oinarriekin bat, orain jendaurrean jarri dituzte tokiko etxebizitza eskatzaileen erregistroan izena eman dutenen behin-behineko zerrenda (pdf). Hori udaletxeko eta Urdulizko Hirigintza sozietate anonimoko iragarki oholean egongo da ikusgai, hamar egun baliodunetan zehar. BAOn hilaren 5ean argitaratu zirela kontutan hartuta, 25era arte, beraz. Gauzak horrela, asteartera arte izango dute erreklamazioak aurkezteko aukera baztertutako eskatzaileek, "horretarako arrazoia bidegabea dela uste badute", tokiko iturriek adierazi dutenez. Erreklamaziook idatziz aurkeztu beharko dira sozietatearen bulegoetan eta, idazkiokin batera, azaltzen diren arrazoiak oinarritzeko beharrezkotzat jotzen diren proba agiri guztiak erantsiko dira. Argazkian, Urduliz urrunetik ikusia.
  Jendartea 2008-03-01 14:32

Hiru gazte atxilotu dituzte Urdulizko auto bat lapurtu dutelakoan

Erabiltzailearen aurpegia Ukberri Pasa den ostegunean Urdulizen lapurtutako autoaren ustezko ebasleak atxilotu dituela jakinarazi du gaur goizean Herrizaingo Sailak. Ertzaintzak emandako bertsioaren arabera, hiru gazte atxiki zituen atzo goizeko 7ak aldera "Bilbotik hurbil", lapurtutako autoan zihoazela. Balizko gaizkileak 29 urteko CD.C., 20 urteko F.M. eta 19 urte dituen N.B. dira, hirurak mutilak. Herrizaingo sailaren arabera, ertzain batek autoa "era irregularrean" zebilen eta "gehiegizko zama era nabarmenean" zeramala salatu zuen eta handik gutxira Mirafloreseko errotondan gelditu zuen patruila-auto batek. Identifikazioak egiterakoan abiaratze sisteman norbaitek eskua sartu izanaren arrastroak zeudela ikusi zuten ertzainek eta autoaren datuak eskatuta Urdulizen lapurtutakoa zela jakin izan zuten. Bestalde, gehiegizko zama aluminiozko 30 bat xafla dira. Ertzaintzaren arabera, atxilotuek aitortu dute xaflak lapurtu izana baina ez dute esan non eskuratu zituzten.
  Kirolak 2008-01-22 15:37

Luxuzko pilota partidak hartuko ditu ostiralean Urdulizko Iparralde frontoiak

Erabiltzailearen aurpegia Ukberri Ostiral honetan, urtarrilak 25, goi mailako esku pilota ekitaldia eskainiko du Urdulizko Iparralde kiroldegiak, udal iturriek jakinarazi dutenez. Lehenik eta behin, bigarren mailako txapelketako bikote bi arituko dira, 22:00etatik aurrera. Del Rey eta Merino I pilotariek Uriarte eta Galarza VI.aren aurka neurtuko dituzte indarrak. Partida hori bukatuta, eskuz binakako txapelketa nagusiari helduko zaio txanda. Izan ere, Iparralde aukeratu dute laugarren jardunaldiari hasiera emateko. Horrenbestez, Olaizola II eta Mendiluze II.ak osatutako bikotea Xala eta Pascualekin lehiatuko da. Azkeneko norgehiagoka galdu eta gero iritsiko dira Urdulizera azken biak: Kokak eta Beginok hirugarren jardunaldiko ezustekoa eman zuten atzo Tolosan. Asegarceko bikoteak 22-15 irabazi zuen Xalaren eta Pascualen aurka. Ezustekoa handiagoa izan zen, kontuan hartuta Xala eta Pascual 9-1 aurreratu direla. Dagoeneko ostiralerako sarrerak salgai daude Urdulizko Txiki eta Txibirri tabernan. Neurketa ETBk zuzenean eskainiko du. Argazkian, Eulaterekin batera igazko txapela irabazi zuen Xalak (ezkerrean) Olaizola I eta Belokiren kontrako finalean / Dosparedes.
  Jendartea 2008-01-10 12:53

Urdulizko Elortza auzoko 60 BOEak zozketatzeko oinarriak onartu dituzte behin-behinean

Erabiltzailearen aurpegia Ukberri Urdulizko Udalak abenduaren 19ko osoko bilkuran erabaki zuen, Sociedad Urduliz Urbanismo SAk Elortza auzoko 42 eremuan eraiki dituen babes ofizialeko 60 etxebizitza adjudikatzeko oinarriak (pdf) hasiera batean onestea. Aipatutako sozietatea tokiko erakundeak berak sortu du herritarren artean etxebizitza publikoa bultzatzeko. Dagoeneko martxoak 19ra arte eduki zuten Urdulizko etxebizitza publikoen eskatzaileek udal erregistroan izena eman eta aipatu etxebizitzak banatzeko zozketan parte hartzeko aukera. Argazkian, Urduliz urrunetik ikusia.
  Jendartea 2008-01-10 12:19

Sahararako elikagaiak batuko dituzte urtarrilean zehar Urdulizen

Erabiltzailearen aurpegia Ukberri Urtarrilean zehar Saharara bidaltzeko jakiak eta konpresak batuko ditu Urdulizko Udalak. Zehazki, konpresez gain, atun oliotan, azukrea, arroza eta dilistak izango dira batuko direnak, basamortuko baldintzetan pisu gutxien eta elikagai gehien dituzten jakiak direlako, era berean erraz kontserbatzen dira ongi. Hortaz, astelehenetik ostiralera, 9:30etik 13:30era, udaletxean eman ahal izango dira aipatutako produktuak. Horretaz gain, beharrezkoak dira ekarpen ekonomikoak, beraz, nahi duenak bere donazioa egin dezake horretarako beren-beregi zabaldu den kontu korrontean. Interesa daukaten guztiek udaletxean topatuko dute horren gaineko informazioa. Ekimena Tindufera abiatuko den Sahararen aldeko IV. Euskal Karabanaren "Piztu itxaropena" izeneko kanpainaren barruan kokatzen da, Sahararen Aldeko Euskal Elkarteak antolatuta. Karabana otsailean abiatuko da. Argazkian, elikagaiak eramateko Euskal Karabanak erabiltzen duen kamioietako bat.
  Kultura 2007-12-21 15:41

Deabru Beltzak konpainiak “Gabon Kontuk” lana aurkeztuko du bihar Urdulizen

Erabiltzailearen aurpegia Ukberri Urdulizko kultur etxeak Deabru Beltzak euskal konpainiaren “Gabon kontuk” txotxongilo lana hartuko du larunbat honetan, abenduak 22, 12:00etan. Umeei zuzenduta dago bereziki obra hori, eta Olentzero du protagonista nagusi. Gabonak baino egun batzuk lehenago Olentzeroren etxean gertatzen den guztia ikusten duten ume talde baten istorioa kontatzen du antzezlanak. Han ikazkinaren kexak eta errebindikazioak entzuten dituzte neska-mutilek. Gaztetxo horien laguntzaz eta Mari Domingi eta Txoropito Txotxongilorekin egoera kontrolatzeko gai izango da. Bestalde, Gabon gauean berriro ere bisitatuko du Urduliz Olentzero, eta idiek tiratutako gurdi batean egingo du, opariz gainezka gainera. Beraz, menditik bere astotxoan jaitsiko den ikazkin maitagarri horri harrera egin nahi dioten guztiek hitzordua daukate hilaren 24an, 18:00etan, herriko futbol zelai zaharreko aparkalekuan. Hori izango da Olentzerok udalerriko zenbait kaleetatik gurdiz egingo duen ibilbidearen hasiera. Argazkian, umetxoa Olentzerori eskutitza ematen.
  Kirolak 2007-12-11 15:27

Nabarnizera joan da Urdulizko zaldi-proben sari nagusia

Erabiltzailearen aurpegia Ukberri Julen Beaskoa nabarniztarraren zaldiak irabazi zuen atzo Urdulizko Iparralde Lehiaketaren finala eta Beaskoak lehenengo saria jaso du. Iparralde probalekuan hilaren 7tik aurrera egindako zaldi-probetan Beaskoarena atera da garaile atzo egindako 64,97 iltzeei esker eta, hortaz, manta, garaikurra eta 700 euro jaso ditu bere jabeak. Ondoren ibili ziren Goiherriko Javi Ugarteren zaldia 60,355 iltzeekin eta Asteasuko Olarrea jatetxeak babestutako zaldia 60rekin. Bien jabeek garaikurra bana eskuratu dute eta baita, hurrenez hurren, 620 eta 550 euro ere. Laugarren lekuan gelditu da urduliztarrarik onena, Errotatxuko zaldia. Ondoren, Aulestiko Koba, Fikako Izaro Garcia, Laukizeko Aurrekoetxea, Bermeoko Janire Alegria eta Gatikako Bilbao Elkartea sailkatu dira, haien animaliei esker. Sailkapen horiek puntuagarriak dira Euskadi eta Bizkaiko txapelketarako.

Nabarmenak

Zorion agurrak