Kirolak 2008-05-20 20:21

Gorliz 2008ko triatloi denboralditik kanpo gelditu da

Erabiltzailearen aurpegia Ukberri Araba, Bizkaia eta Gipuzkoako triatloiko aurtengo denboraldia ekainaren 1ean hasiko da Gorlizko ohiko proba egin gabe. Izan ere, antolakuntzatik azaldu dutenez, denboraldia "aste bateko atzerapenarekin" abiatuko da, Gorlizko eta Hondarribiako probak "bertan behera gelditu baitira". Aurretik, igande honetan ospatu behar zen Gorlizko Badia VI Triatloirako baimena ez du eman Emma Calzada Gorlizko alkate independenteak. Araba, Bizkaia eta Gipuzkoako Triatloi Federazioak publiko egin duen gutunean Calzadak probarako hilabete bat falta zela jakinarazi zuen "zoritxarrez eta udalerrian, hondartzako zonaldean, parkingean, pasealekuan eta Eloisa Artaza kalean bereziki, burutzen ari diren herri lanak direla eta aurkitzen garen egoeragatik" Udalaren aldetik "ezinezkoa" zela triatloia bermatzea. Dena den, Uribe Kostak harrera egingo die triatloilariei, uztailaren 19an proba berezia jokatuko baita Plentzian: "Euskadiko Akuatloi Txapelketa" izenekoa. Argazkian Virginia Berasategik irabazi zuen iazko Gorlizko Badia Triatloiaren emakumezko proba / Jon Alegria Uzkudun.
  Hezkuntza 2008-05-20 20:02

EHUren "jarrera errepresiboa" salatu du PATek

Erabiltzailearen aurpegia Ukberri Gaurko egunean Leioa eta Erandioko campusean jazotako istilu larriak azken hilabeteetan EHUk hartu duen "norabide errepresiboaren azken katebegia besterik ez da", Presoen Aldeko Taldeen (PAT) iritziz. "Perez UPVko errektoregai bakarraren jarrera beste behin ere agerian gelditu da: errepresioaren eta ikasleon kriminalizazioaren bitartez, ikasleon hitza isilaraztea beste helbururik ez du. Eta horretarako ez du inolako erreparorik ikasleak egurtzeko orduan", gaineratu dutenez. Hartara, "kolore ezberdineko txakurrek unibertsitatetik alde egiteko" exijitu eta, ostegun honetako (maiatzak 22) Errektoretzarako hauteskundeen harira, Perez Iglesiasi "ostikoa emateko" IAk deitutako abstentzio aktiboaren aldeko deia luzatu die EHUko ikasle, irakasle eta langile guztiei PATek. Istiluen argazki gehiago ikusteko sakatu hemen.
  Hezkuntza 2008-05-20 19:30

Istiluen errua errektoreari egotzi dio IAk

Erabiltzailearen aurpegia Ukberri Ikasle Abertzaleek Juan Ignacio Perez Iglesias EHUko errektoreari egotzi diote gaur Leioa eta Erandioko campusean gertatutako istiluen errua, "errektoregoko ateak itxi" dizkielako. "Ekimen mobilizatzaile, parte hartzaile eta baketsua izan nahi zuena, hots, errektoregora ehunka ikasle sartu eta Iñakori (Perez Iglesias) mezu bat helaraztea, istilu gune bilakatu dute. Honen ondorioz, errektoretzako atea bertan behera erortzeaz gain hainbat ikasle zauritu (2 ospitalizatuak) eta hiru atxilotu izan dira. Gertatutakoaren erantzukizun osoa UPVrena eta bere gidari den Juan Ignacio Perezena da, ez soilik bere zaintzapeko guarden jarrera oldarkorragatik, ez eta, polizia autonomikoaren eskuartze merkeagatik, baizik eta hiru urte luzez ikasleon hitzari muzin egin eta beronen indarrezko isilarazteak ikasleon artean eragindako egonezin eta haserreagatik", adierazi dute zabaldutako prentsa oharraren bitartez. Prentsaurreko eta manifestazioaren argazki gehiago ikusteko sakatu hemen.
  Hezkuntza 2008-05-20 19:04

Istilu larriak izan dira Leioako campusean

Erabiltzailearen aurpegia Ukberri Ostegun honetako (maiatzak 22) hauteskundeetarako programa aurkeztu behar zuen gaur, Leioa eta Erandioko campuseko areto nagusian, egungo EHUko errektore eta hautagai bakarra Juan Ignacio Perez Iglesiasek. Hala ere, 10:00etako bigarren deialdian quorum nahikoa egon ez eta bertan behera utzi behar izan dute Klaustroko batzarra. Ordu horretarako, prentsaurrekoa deitua zuten Ikasle Abertzaleek, kafetegi nagusi parean, "Bologna Prozesua gelditzeko", abstentziorako deia egiteko asmoz. Horretaz gain, urtarrilaren 30ean izandako istiluetan Ertzaintzak identifikatutako hamar ikasleetatik seik epaitegiko deia jaso dutela salatu du IAk. Agerraldia bukatuta, manifestazioan abiatu dira dozenaka ikasle errektoregora bidean, "Geurea da hitza! Bologna gelditu beharko duzue!" lelopeko pankarta atzean. Bada, bertara helduta, kristalezko ateak apurtuz, eraikin barrura sartu dira. Barruan zeuden segurtasun guardiak, berriz, agudo oldartu zaizkie. Behin, Brigara Mugikorreko dozena bat ertzain baino gehiago bertan zirela, hiru gazte atxilotuak eraman dituzte. Istiluen argazki gehiago ikusteko sakatu hemen.
  Politika 2008-05-19 23:59

Atentatua gaitzesteko "ausardia" eskatu dio ezker abertzaleari Getxoko EAk

Erabiltzailearen aurpegia Ukberri Getxo udalerriko Eusko Alkartasunak (EA) bart ETAk Abrako Erret Itsas Klubaren aurka egindako atentatua "gogorki" gaitzetsi du eta kaltetutako auzotarrei elkartasuna adierazi die. Helarazitako prentsa oharrean adierazi duenez, "euskal jendarteari amonal eta sufrimendu gehiago emateko baino ez da gai ETA". "Agian, Ibarretxe lehendakaria Espainiako Gobernuko presidentearekin batzartzea bezalako ekimenak kontuan hartu beharko lituzke bihotzgabe koadrila honek", gaineratu du EAk. Biharko bilerak "soilki prozedura demokratiko eta baketsuak erabiliz, bizi dugun enkistamendu politikoa desblokeatzea" du helburu, euskal sozialdemokraten ustez. Euren iritziz, hori da "errezeta bakarra". Horri helduz, "bestelako aldarrikapenetarako erakusten duen ausardia eduki eta, behin betikoz, getxoztarrak kaltetzen dituen atentatua gaitzestea" eskatu dio ezker abertzaleari Eusko Alkartasunak. Argazkian, Joserra Bilbao azken udal hauteskundeetan Getxoko EAren hautagaia (eskuinean), Lander Solozabal Bizarra Lepoaneko presidentearekin izandako batzar batean.
  Kultura 2008-05-19 23:28

Algorta eta Itzubaltzetako Mintza Eguna prestatzera deitu ditu berbalagunak Egizuk

Erabiltzailearen aurpegia Ukberri Egizu Getxo Euskaldun! elkarteko kideak buru belarri dabiltza ekainaren 14ko Mintza Eguna prestatzen. "Lana banatzeko momentua iritsi da. Euskal Herriko hainbat lekutatik 300 lagun baino gehiago etorriko zaizkigu jai egun honetara. Horregatik zure laguntza behar dugu", adierazi dutenez. Gauzak horrela, astearte honetarako, maiatzak 20, lan taldeak osatzeko bilera deitu dute, 20:00etan, Algortako Aldai kulturgunean (Itxasgane). Bertan azalpen guztiak eman eta lana banatuko dute. Izan ere, Mintza Eguneko hamaiketakoa ere denon artean egingo dute. "Horretarako 50 patata tortilla behar ditugu. Tortilla bat edo gehiago egiten animatzen bazara, deitu edo idatzi egiguzu", aipatu dutenez. Argazkian, Rozio Luces Egizuko dinamizatzailea aurreko prentsaurreko batean.
  Kirolak 2008-05-19 23:11

Hamargarren urteurrena ospatzeko hainbat jarduera antolatu ditu Munarrikolanda mendi taldeak

Erabiltzailearen aurpegia Ukberri Hamargarren urteurrena dela eta, aste honetarako hainbat jarduera antolatu ditu Sopelako Munarrikolanda mendi taldeak. Horrenbestez, ostegun eta ostiralean, dokumental bana proiektatuko dute udalerriko kultur aretoan, 19:30etik aurrera: Luis Alejosen "La mer de grace" eta Jon Ander Iriarte eta Alfonso Marinen "Trecking de los cerros-cumbles del Huascaran (Peru)", hurrenez hurren. Larunbatean, berriz, 6 urtetik gorako umeentzako jarduerak (tirolina, eskaladarako hasierakoak, norabidetze lasterketa...) izango dira, 10:00etatik aurrera, Iturrieta parkeko eskalada-murruan. Azkenik, igandean, mendian postontzia berria ipintzeko ibilaldia egin eta bazkari batekin (15:00) emango diete amaiera ospakizunei. Argazkian, Munarrikolandako mendizaleek igaz Autzara (Nafarroa) egindako irteera.
  Jendartea 2008-05-19 22:46

Emakumeen arteko topaketa egingo dute larunbatean Urdulizen

Erabiltzailearen aurpegia Ukberri Emakunderen ekimenez, emakumeen topaketa egingo dute larunbatean, maiatzak 24, kultur etxea zen Urdulizko eliza ondoko eraikinean, hau da, egungo Emakumeen Etxean. Uribe Kostako Zerbitzu Mankomunitatearen laguntzaz, besteak beste, Plentziako Araldi, Barrikako Emakumeen Ahotsa, Berangoko Emakumeen Kultur Elkartea eta Urdulizko Inola andrazkoen taldeak dabiltza jardunaldia antolatzen. Hain zuzen ere, Izaskun Moyua Emakundeko zuzendariak eta Juan Olea Urdulizko alkate eta Mankomunitateko presidenteak parte hartuko dute 9:30etik 18:00etara luzatuko den saioan. Parte hartzeko maiatzaren 22ra bitartean izena eman behar dela jakinarazi dute tokiko arduradunek. Horretarako 946 762 674 telefono zenbakia eta berdintasuna[abildua]uribekosta.org e.posta helbidea jarri dituzte eskura. Dohainiko ludoteka eta haurtzaindegi zerbitzuak izango dira. Argazkian, hainbat lagun Urdulizko Emakumeen Etxean.
  Kirolak 2008-05-19 22:27

Tenis Kopa irabazi dute Barrikako Abaroa taldeko haurrek

Erabiltzailearen aurpegia Ukberri Asteburu honetan jokatu dira Barrikako udal pistetan Tenis Kopako finalak haur eta kimu mailetan. Barrikako Abaroa Tenis Kirol Taldeko gaztetxuenek Begoñalde gainditu zuten, 2 eta 1. Asis Dominguez, Gorka Quemada eta Adrian Amor jokalariek "partida bikaina" egin zuten, udal iturriek jakinarazi dutenez. Kimuei dagokienez, Abaroakoek ezin izan zuten Gorostiza taldearen jokua moteldu eta kanpotarrak nagusitu ziren, 3 eta 0. Hortaz, Gorostizak eraman du aurtengo Liga. Dena den, Alberto Vidal Barrika taldeko entrenatzailearen aburuz “hiru jokalariek, Iñigo Arzuaga, Mikel Lopez eta Ivan March, oso ondo jokatu dute. Baina bereziki Mikel Lopez beste guztien gainetik nabarmendu da, beste kirolariek baino lau urte gutxiago izan arren. Beste bi taldekideek partidua irabazteko ahalegin guztiak egin dute ere”, azpimarratu du. Horregatik, Barrikako Tenis Klubak jokalari guztiak zoriondu ditu Kopa finaletara heltzeagatik, “urtean zehar ikasitako guztia erakutsiz”.
  Hezkuntza 2008-05-19 21:46

Leioako bost ikastetxetako ikasleak alkate eta zinegotziekin batuko dira bihar

Erabiltzailearen aurpegia Ukberri San Bartolome, Txomin Aresti-Mendibile, Lamiako, Artatza eta Altzaga ikastetxeetako ikasleek, Leioako Udalak klima aldaketaren aurrean izandako jarrera eta egindako ekintzak aztertuko dituzte bihar, Gizarte-Hezkuntzako Foroan. Batzar hori goizeko 10etan hasiko da udaletxeko Osoko Bilkura gelan eta bertan, ikasleez gain udal ordezkariak ere izango dira, tartean Eneko Arruebarrena alkatea (argazkian), Txus Bilbao, Ingurumen Saileko arduraduna eta Daniel Herrera Hezkuntza Saileko zinegotzia. Aipatu bilkuran ikasleek Agenda 21en barruan egindako ingurugiro azterketa aurkeztuko dute eta euren proposamen zein eskariak helaraziko dizkiete tokiko mandatariei. Alde biek euren iritziak plazaratu ostean klima aldaketaren kontrako irtenbideak eta ekintza berriak aurrera ateratzeko eztabaidari ekingo diote.
  Politika 2008-05-19 21:01

Fernando Etxegarai plentziarra aske geratuko da

Erabiltzailearen aurpegia Ukberri Fernando Etxegarai Gaztearena "Pinki" plentziarra "une batetik bestera" aske geratuko dela jakinarazi du Askatasunak, epaileak onartu egin duelako defentsaren helegitea. Epaileak dio Espainiako Zigor Kode berria ezarrita, Etxegarairi 20 urteko kartzela zigorra dagokiola, ez gehiagokoa. Ia 21 urte egin ditu espetxean. Preso politikoa urtarrilaren 4an atera zen Pontevedrako A Lamako espetxetik, zigor osoa beteta. Bada, bi hilabete eta erdi kalean eman ondoren, plentziarra bilatu eta atxilotzeko agindua eman zuen Espainiako Auzitegi Nazionaleko 1. atalak, aske jartzea erabaki zuen sekzio berbera alegia. Etxegarairi Parot doktrina gisa ezagutzen den 197/2006 jurisprudentzia ezarri (zigor murrizketak kontuan ez hartzea), eta beste lau urte eta hiru hilabete preso egin behar dituela jakinarazi zioten. Gauzak horrela, maiatzaren 6an atxilotu zuten berriro eta, Basauriko espetxean eduki ondoren, berriro eraman zuten A Lamara. Piztu! Plentzia, Gorliz eta Lemoizko ezker abertzalearen ahotsa izeneko bitakorako kideek jakinarazi dutenez, Loiuko aireportuan egingo diote lehenengo harrera, 22:00ak aldera. Argazkian, atxiloketaren egun berean 80 bat auzokidek egin zuten manifestazioa Plentzian.
  Politika 2008-05-19 20:51

Azkarateren arabera, "ETA bere lekuan jartzeko" joango da Ibarretxe Moncloara

Erabiltzailearen aurpegia Ukberri Miren Azkarate bozeramaileak irakurritako adierazpenaren bidez gaitzetsi du Eusko Jaurlaritzak bart ETAk Abrako Erret Itsas Klubaren aurka egindako atentatua. Jaurlaritzako eledunaren hitzetan, "argi daukagu ETAren indarkeriak ezin duela erakundeen eta alderdien arteko eztabaida politikoa baldintzatu ezta ezabatu ere". Horrenbestez, arazo politikoak konpontzea "ordezkari politikoen esku" dagoela esan du. "Inoiz baino gehiago politika" egin behar dela deritzo, eta "posible diren akordioak" behar direla aldarrikatu du. "Hain zuzen, horretara doa bihar Ibarretxe Madrilera", aipatu du Azkaratek. Jose Luis Rodriguez Zapatero Espainiako Gobernuko presidentearekin batuko da Jaurlaritzako lehendakaria. Bitartean, dagoeneko zabalik dago Abrako Erret Itsas Klub ondoko pasealekua, eraikinerako sarrera oraindik ere itxita dagoen arren. Javier Chavarri itsas klubeko presidenteak ziurtatu du bost edo sei hilez itxita egongo dela, atentatuaren ostean konponketa lanak egiten dituzten bitartean. Argazkian, Ertzaintzak gauean jarritako segurtasun eremua. Argazki gehiago ikusteko sakatu hemen.
  Politika 2008-05-19 17:00

Balzaren aburuz, Areetako lehergailua Getxon topatutakoaren "antzekoa" da

Erabiltzailearen aurpegia Ukberri Javier Balza Herrizaingo Sailaren arduradunak Areetan bertan egin dituen lehenengo balorazioen arabera, bertako atentatuan 60 bat lehergailu kilo erabili dira, baina ez ditu osagaiak zehaztu. Balzaren arabera, "oso lehergailu eraginkorra" izan da Areetan erabilitakoa, batez ere eraikinera zuzenduta egoteagatik. Aurretik osagaiak zehazterik ez dituela esan arren lehergailuaren osaketa Getxoko estrata batean urtarrilaren 31an aurkitu zutenaren "antzekoa" dela esan du Herrizaingo sailburuak. Gainera, azaldu duenez, oraindik aztertzen ari dira aztarnak eta ontzia zelangoa zen ezin dute esan oraingoz. Getxokoan kasuan, Heineken markako garagardo kupel bat izan zen eta barruan 30 kilo zeuden. "Baliteke amonala edo amosala izatea, eta hari detonatzailea ere gehitu diote" esan zuten ertzainek aurkitzean. Argazki gehiago ikusteko sakatu hemen.
  Politika 2008-05-19 15:51

Getxoko Udalak Areetako atentatua gaitzetsi du Estatuko Segurtasun Indarrak babestu gabe

Erabiltzailearen aurpegia Ukberri Areetako atentatuari "gaitzespen osoa" eta "erabateko arbuioa" agertu dizkio Getxoko Udaleko Bozeramaileen Batzordeak, ekintzak sortu dizkion "nazka eta gogaitasunaren" eraginez. EAJ, PP, PSE-EE eta EBko eledunak goizeko 9:30ean batu dira udaletxean eta "ETAri behin betiko eta berehala desagertzeko" eskaera egiten duen testu komuna adostu ondoren bisita egin dute Abrako Erret Itsas Klubean. Gaur bezalako aurreko testuekin alderatuta aipatzekoa da gaurko idazkian ez dela Espainiako Segurtasun Indarrei zein Ertzaintzari babesa eskaintzen, gutxienez agerian. Izan ere, Gasteizko Legebiltzarrean EAJ, EA, EB, EHAK eta Aralarrek Espainiako Gobernuak torturen aurka neurri eraginkorrik hartzen ez duela berriki salatu dute eta udalerrian ere, behin baino gehiagotan Eusko Abertzale Ekintzako kideek EAJri leporatu diote bere "menpeko" Poliziak, Ertzaintza, torturaren bidez eskuratu dituela Lidon kasuan edota Galdakaoko kale erasoen auzian dauden froga bakarrak, gazteen autoinkulpazioak, alegia. Argazkian, Imanol Landa alkatea, eskuman, Javier Balzari adi. Argazki gehiago ikusteko sakatu hemen.
  Politika 2008-05-19 12:49

Bonba-auto batek eztanda egin du Areetan, Abrako Erret Itsas Klubean

Erabiltzailearen aurpegia Ukberri Kalte material handiak eragin ditu bart Areetako itsas pasealekuan eztanda egin duen furgonetak, zauriturik sortu ez badu ere. 23:45ean edo 23:55ean, informazio iturri ezberdinen arabera, ETAren izenean hitz egiten duela esan duen gizonezko batek eman dio Bizkaiko DYA elkarteari bonbaren eta bere kokapenaren berri eta baita ordu bateko epea eztanda egin arte. Ertzaintzak Abrako Erret Itsas Klubean zegoen kide bakarra kanpora atera eta inguruko bi kilometroko pasealekua itxi egin du eta goizeko 0:50ak aldera eztanda egin du autoak, leherketa Uribe Kosta eta Ezkerraldeko hainbat lekutan entzun ahal izan dela. Babes Zibila, suhiltzaileak, medikuak eta abar gerturatu dira baina klubeko egoitzan sua amatatzeaz gain ez dute lan handirik izan, eztandak eraikin horren azpiegitura gogor kolpatu eta pasealekuan zuloa handia egin arren, inguruetan argindar zerbitzua eten eta beirak baino ez ditu apurtu, etxe eta denda batzuetan. Horren ondorioz, ez da zauriturik egon. Argazki gehiago ikusteko sakatu hemen.