Politika 2008-02-17 20:54

LAB ilegalizazioen jomugan jarri du Carlos Iturgaizek

Erabiltzailearen aurpegia Ukberri Carlos Iturgaiz eurodiputatuak (argazkian, ezkerrean) LAB sindikatuaren ilegalizazioa eskatu du Areetako Andres Isasi musika eskolan PPk egindako Espainiako Hauteskundeetarako hautagaien aurkezpenean. 200 bat lagunen aurrean goizeko 12etan egindako ekitaldian Areetan bizi den Portugaleteko semeak sindikatu abertzaleari "ETAren espaziontzi inudea" izatea leporatu dio. Iturgaizen aburuz, Garzon epaileak diseinatutako ETAren organigraman LAB egon badago eta Estatuko abokatuari eta Fiskaltzari eskatu die bere kontra egin dezaten. Era berean, pasa den osteguneko greban eta hilaren 10ean Bilbon eragotzitako manifestazioan izandako "triskantzak" leporatu dizkio LABi: "bere egoitzak ETArenak dira, terrorearen sindikatu politikoa da, haien aurka jardun behar da". Iturgaizek, Bizkaiko zerrenda ixten duena, ziurtatu zuen Zapaterok hauteskundeak irabaztekotan ETArekin berriz negoziatuko duela. Igancio Astarloa, Antonio Basagoiti Bizkaiko PPren presidentea, Ascension Pastor senatarigaia eta Marisa Arrue Getxoko PPren burua eta Kongresurako bigarren hautagaiak ere parte hartu dute ekitaldian. Iturgaizen adierazpenak (gazteleraz, mp3) hemen entzun daitezke.
  Politika 2008-02-16 22:45

Sopelako udaletxea hartu du "salbuespen egoeraren" aurkako protestak

Erabiltzailearen aurpegia Ukberri Motxilaz eta lozakuz hornituta, Sopelako 25 bat auzokidek elizateko udaletxean sartu eta bertan itxialdia egiteari ekin diote gaur arratsaldeko 5etatik aurrera. Herritarren asmoa ilegalizazioak, torturak, iruzurrak eta, oro har, "salbuespen egoera" salatu eta Euskal Herriaren eskubideen alde agertzea da. Ekimenean parte hartzen ari direnen artean Sopelako Eusko Abertzale Ekintzako hiru zinegotzi daude. Guillermo Vio hautetsi ekintzaileak Imanol Garai alkatea eta beste lau zinegotzi jelkideak formalki protestara gehitzera gonbidatu zituen atzo Udalbatzan, baina hauek ez dira agertu. Itxialdia bihar eguerdiko 1a arte iraundu du, ordu horretarako eskualde manifestazioa antolatu baitute Udaletxe plazatik bertatik. Argazkian, itxialdikoek udaletxeko fatxadan jarritako pankarta.
  Politika 2008-02-15 22:41

EAEren aldeko konpromisorik ez du hartu nahi izan Sopelako Udalbatzak

Erabiltzailearen aurpegia Ukberri Eusko Abertzale Ekintzak, Ezker Batuak, Berdeek eta Eusko Alkartasunak eskatuta, ez ohiko osoko bilkura egin dute, gaur iluntzean, Sopelako udaletxean, EAEren jarduera eteteko Baltasar Garzon Espainiako Auzitegi Nazionaleko epaileak hartutako erabakia eztabaidatzeko. Alabaina, ekintzaileek alderdi ekologistaren babesa baino ez dute jaso, EB eta EA abstenitu eta EAJk, PSE-EEk eta PPk aurka bozkatu duten bitartean. Jelkideak "ilegalizazioen aurka" agertu bai, baina ez dute inolako konpromisorik hartu nahi izan. "Hitzez aurka egotea ez da nahikoa, idatziz nahi dugu zuon aldekotasuna", aurpegiratu die Guillermo Vio EAEko bozeramaileak Imanol Garai alkateari eta udal gobernua osatzen duten EAJko zinegotziei. Ekintzaileak kenduta, gauzak "argi" izan dituen zinegotzi bakarra Berta Rodriguez PPko hautetsia izan da: EAEk aurkeztutako mozioarekin egin bezala, EAJk horri aurkeztutako emendakinari ere kontra egin dio. Akabuan, "bat egiten dugunez, bihar hasiko dugun itxialdian parte hartzera gonbidatzen zaituztet", bota die jelkideei Guillermo Vio ekintzaileen buruak. Baita "bidegabekeria" horren kontra protestan jarraituko dutela baieztatu ere. Horrenbestez, bihar eguerdian itxiko dira udaletxean, igandera arte. Bestalde, EAE eta EHAKren "de facto"-ko ilegalizazioaren aurka, Plentziako herrigunean denda eta tabernen %30 bat egin zuen atzoko greba deialdiarekin. Mobilizazioetan, berriz, 65 bat lagun elkartu ziren Astillero plazan (argazkian) eta 40 inguru Pirulin, tokiko ezker abertzaleak emandako datuen arabera.
  Politika 2008-02-15 21:07

PSOEren "politika errepresiboa" arbuiatzeagatik euskal herritarrak zoriondu ditu ezker abertzaleak

Erabiltzailearen aurpegia Ukberri "Euskal Herriko kaleetan duintasun eta konpromesuz beteriko jendarte erantzun zabala eta tinkoa" ikusi ahal izan zen atzo, ezker abertzaleak greba orokorrari buruzko balorazioan nabarmendu duenaren arabera. Gara.net-ek zabaldu duenez, Bilboko hotel batean egindako prentsaurrekoan, "herri honekiko sentimendua eta konpromezua agertu duten pertsona guztiei" zorionak eman dizkiete Tasio Erkizia eta Iñaki Olaldek , ondoan Joserra Etxebarria eta ezker abertzaleko beste hiru lagun ondoan izan dituztela. Ezker abertzaleko eledunen iritziz, PSOEren arazoa dagoeneko ez da bakarrik ezker abertzalea edo proiektu independentista, "Euskal Herrian gero eta sektore gehiago baitira egungo egoera gainditu eta herri hau proiektu politiko guztiak gauzatu daitezen bermatuko duen marko demokratiko batera eramateko beharra ikusten dutenak". Izan ere, atzoko grebak "ezker abertzaleaz haratagoko sustengua" jaso zuela adierazi dute, "injustizia halakoez nazkatuta dauden herritar zintzoak" batu baitzitzaizkion protestari. Segik ere, atzoko egunaz balorazioa zabaldu du. Argazkian, Erkizia eta Etxebarria Itziar Aizpuruarekin batera, pasa den igandean Bilbon.
  Politika 2008-02-15 19:59

Torturaren Aurkako Egunean udaltzainek izandako jarrera "harroputza" salatu du Leioako ezker abertzaleak

Erabiltzailearen aurpegia Ukberri Torturaren Aurkako Eguna zela eta, herenegun (otsailak 13), erakusketa jarri zuten Leioako Boulevardean bertoko ezker abertzaleko kideek. Torturak antzezten zituzten panpinez eta azalpen panelez osatuta zegoen hori. "Bat-batean, udaltzainak inguratu eta erakusketa kendu behar genituela esan ziguten, alkatearen agindua zela. Beste argudioen artean, erakusketak kalea oztopatzen zuela adierazi zuten", azaldu dutenez. Hori "gezurra" izateaz gain, "gai politikoetan esku sartzen" ari zirela erantzun zieten tokiko poliziei ezker abertzalekoek. Hots, "beraien egitekoa gainditzen" ari zirela. Salatu dutenez, "uneoro, jarrera harroputza erakutsi zuten" udaltzainek. Azkenean, erakusketa kendu behar izan zuten. Argazkian, Leioako ezker abertzaleko kideak udaletxeko eskailera pean prentsaurrekoa ematen aurreko batean / Gaztesarea.
  Kultura 2008-02-15 19:25

Aitxu! euskara taldeak erromeria antolatu du biharko Sopelan

Erabiltzailearen aurpegia Ukberri Sopelako Aitxu! euskara taldeak erromeria herrikoia antolatu du larunbat honetarako, otsailak 16, arratsaldeko 7etatik aurrera, Udaletxeko plazan. Udal sopeloztarreko iturriek jakinarazi dutenez, "musikak eta pintxo eta sagardo dastaketak euskaraz mintzatzeko giro paregabea eskainiko dute". Ekitaldi horren bidez udalerrian euskararen erabilera sustatu nahi dute. Bestalde, otsailaren 26an, asteartearekin, Patxi Iza aktore, mimo eta bertsolariak "Euskal ahozko ohitura" solasaldi-mahaingurua eskainiko du udaletxeko hallean. Saioa arratsaldeko 6etatik aurrera izango da, Helduen Hezkuntza Zentroak antolatuta. Argazkian, Aitxu! taldeak azaroaren 8an Larrabasterran egindako erromeriaren irudi bat.
  Jendartea 2008-02-15 19:01

Zuhaitzak landatzen ibili dira Gobela ikastolako neska-mutilak

Erabiltzailearen aurpegia Ukberri Gobela ikastolako Lehen Hezkuntzako goi zikloko ikasleek zuhaitzak landatzen eman dute gaurko goiza, Gobela errekaren eskumako ertzean, Leioako etorbidea eta Karmen arteko zatian. Ekimena ibai bazterrak babesteko Uraren Euskal Agentzia aurrera eramaten ari den ekitaldien artean kokatzen da. Landatutako zuhaitzak lizarrak, haltzak eta sahatsak dira. Aldi berean, kaltegarria izaten ari den banbu japoniarra haztea ekiditeko ekintza esperimentala ere burutu dute. Besteak beste, "ibaien egoera hobetzeko bakoitzak konpromiso txikia hartzea eta, horiez gozatzeko, neska-mutilek ingurumena babes dezatela sustatzea" dira ekimenaren bidez lortu nahi izan dituzten helburuetako batzuk, tokiko udal iturrien arabera. Argazkian, mutiko bat zuhaitza landatzen.
  Gazteok 2008-02-15 17:54

Bi talde valentziarrek joko dute iluntzean Txorimalon

Erabiltzailearen aurpegia Ukberri Gaur iluntzerako kontzertua antolatu dute Getxoko Txorimalo gaztetxean. Bi euroren truke Valentziatik etorritako bi musika talde entzuteko aukera edukiko dute bertara hurbiltzen direnek: Negramagia thrashcore boskotea eta 33 d'envit punk rock laukotea, hurrenez hurren. Saioa 20:30etan hasiko da. Alabaina, gaurkoa ez da bi talde horiek Uribe Kosta eskualdean emango duten kontzertu bakarra izango. Izan ere, bihar, larunbatarekin, Itzubaltzeta / Romo aldera egingo dute salto, "Billares" ezizenez ezaguna den Anaiak tabernan aritzeko. Bertan, izango dira arratsaldeko 8etatik aurrera. Bestalde, larunbatean ere Pagasarrira mendi irteera antolatu du Itzubaltzeta gaztetxeak; eskupilota eta pala txapelketen ostean, koadrilen arteko olinpiaden bigarren proba puntuagarria alegia. Horrenbestez, goizeko 8etan jarri dute irteteko ordua gaztetxean. Gainera, ez da autorik eraman beharko, garraio publikoz joango baitira. Argazkian, Negramagia taldea.
  Politika 2008-02-15 17:45

Patrick de la Sota enpresario jeltzaleari azken agurra emango diote iluntzean Areetan

Erabiltzailearen aurpegia Ukberri Patrick de la Sota Mac Mahon industrial ezaguna eta Sabino Arana Fundazioaren sortzaile eta lehenengo presidentea agurtuko dute senide, lagun eta alderdikideek gaur iluntzeko 19:00etan Areetako Mesedetako Amaren elizan egingo den hiletan. Enpresarioa atzoko greba egunean hil zen, goizeko ordu txikietan, Areetan. 78 urte zituen eta fundazio jeltzaleaz gain, besteak beste, Bilboko Merkataritza Ganberako eta Bilboko Itsas Museoaren Fundazioko presidentea, Erandioko Franco Española de Cables enpresaren gerentea eta Irlandaren kontsula ere izandakoa zen. Juan Maria Atutxa egungo Sabino Arana Fundazioaren presidenteak komunikatu baten bidez atzo zabaldu zuenez, fundazio horren "ezinbesteko zutabea" izan zen De la Sota eta "pedigri demokratikodun gizona eta maila bikaineko abertzalea" zela gogoan hartu zuen. Argazkia: Bilboko Merkataritza Ganbera.
  Iritzia 2008-02-15 16:44

Fredi Paya: "kontuz"

Erabiltzailearen aurpegia Ukberri Ezker abertzaleko militanteen balioak dira politikan sinesten jarraitzeko dudan arrazoi bakarra. Ikusi gura nuke ustelkeria kasu, azpikontrata eta entxufismoa baskongadetako negozio borobil bihurtu duten bizkarroiez gidatutako alderdia. Zer izango zen Batasunak jardun behar duen baldintzetan bizi beharko balu? Pozgarria da berbak baliorik ez, faltsukeria iparrorratz eta dirua edozeren gainetik jartzen dutenen gizartean guztion eskubideen alde dena emateko prest dagoen jendea ikustea. Gure aberastasun materialari elegantzia pertsonal horrekin uko egiten dioten euskaldunak ezagutzea. Asko militantzia erabat baketsua egiteagatik atxilotu, torturatu eta kartzelatzen dituzte. Euskadi Ta Askatasunaren ekintzarik kondenatzen ez dutelako, deitoratu arren, PPk frankismoa, PSOEk GAL eta EAJk Ertzaintzaren jipoi, tortura eta heriotzak salatzen ez dituzten era berean. Argazkia: Koska irratia.
  Jendartea 2008-02-15 13:40

Diabetesari buruz berba egingo diete gaur emakumeei Erandion

Erabiltzailearen aurpegia Ukberri Erandioko Udaleko Osasun Publiko eta Kontsumo Sailak Altzagan eta Astrabuduan egingo du kontsumoari buruzko jardunaldien, 13. edizioa. Aurtengo edizioan honako gai hauek jorratuko dituzte: diabetes mellitusa, dieta mediterraneoak emakumearentzat dituen onurak eta ‘digestio arazoen tratamendu dietetikoa. Hitzaldiak Astrabuduako Josu Murueta kultur etxean eta Erandioko Emakumeen Elkarte Soziokulturalaren Altzagako lokal berrietan izango dira, arratsaldeko 17:30etik 19:00etara. HEZI nutrizio zentroko adituak izango dira hitzaldiak emango dituztenak. Egutegiari dagokionez, diabetes mellitas gaixotasunaren inguruko saioa gaur bertan izango ds Altzagan eta hilaren 22an Astrabuduan. Argazkian, Mikel Arieta-Araunabeña alkatea kontsumoari buruzko erakusketan.
  Jendartea 2008-02-15 12:42

Guatemalako hainbat ikastetxe eta emakume lagundu ditu Berangoko Udalak

Erabiltzailearen aurpegia Ukberri Emandako laguntzagatik herritar guztiei eskerrak emateko asmoz, 2007an gauzatutako hainbat lankidetza eta elkartasun egitasmoen laburpentxoa egin du Maria Isabel Landa Berangoko alkateak. Besteak beste, “Berangotik Guatemalara” proiektuaren barruan, bulego-altzariak, bi informatika-ekipo, ikus-entzunezko materiala eta azaroaren 25erako informazioari buruzko eskuorriak igorri zizkioten REDNOVI emakumeenganako indarkeriaren aurkako sareari. Horretaz gain, San Antonio Aguas Calientes udalerriko Hermano Pedro bigarren hezkuntzako herri ikastetxerako 100 idazmahai berri, telebista bat eta DVD aparailu bat eman zituen udal erakundeak. Baita instalazioak hobetzeko materiala ere. Azkenik, Guatemalako herri horretako lehen hezkuntzako Ikastetxe mistora tailerretan erabiltzeko materiala eman zuten. Argazkian, lankide boluntario bat Guatemalan / UNEX.
  Kirolak 2008-02-15 12:07

Itsas kirolek hartuko dute asteburuan Plentzia

Erabiltzailearen aurpegia Ukberri Larunbat goizean bertan emango zaie hasiera kirol ekitaldiei Plentziako itsasadarrean: 11:30etik aurrera, Jai Alai pilotalekua eta errota arteko joan-etorria egin beharko dute batelek. Izan ere, Bizkaiko ligako bigarren jardunaldia jokatuko da bertan, kategoria guztietako 80 bat ontzik parte hartuko dutela. Biharamunean, berriz, piraguen Bizkaiko Neguko Txapelketa izango da, Plentzia Piraguismo Klubak antolatuta. Horrenbestez, igandean, 15:00etatik aurrera, kategoria guztietako piraguistak lehiatuko dira, Butroi itsasadarrean barrena, Jai Alai pilotalekuan hasi eta bukatzeko. Talde bizkaitarrak ez ezik, Barrikakoa eta Plentziakoa tartean, piraguista gipuzkoarrak ere nor baino gehiago ikusteko aukera egongo da. Azkenik, etzi ere, Arkote Arraun Taldearen gaineko mahaingurua egongo da, 12:00etatik aurrera, Goñi Portal kultur etxean. Argazkian, Barrika Piragua Taldeko lagunak.
  Hezkuntza 2008-02-15 11:17

Asteartean abiatuko dituzte ikasleentzako aholkularitza saioak Barrikan

Erabiltzailearen aurpegia Ukberri Otsailaren 19an eta 21ean, "Aukera-tu" izeneko ikasleei zuzenduriko aholkularitza zerbitzua abian jarriko du Barrikako Udalak. Horren bitartez, 14 eta 18 urte bitarteko gazteek ikasketei buruzko zalantzak galdetzeko aukera izango dute, tokiko iturriek zehaztu dutenez. Lehenengo saioa, asteartekoa, unibertsitateko karrerei buruzkoa izango da eta; ostegunekoa, berriz, Batxilergoari eta Erdi eta Goi Mailako ikasketen gainekoa. Saioetan esku hartzeko kultur etxean hitzordua eskatu beharko da. Argazkian, hainbat gazte ikasketa aretoan azterketak prestatzen.
  Jendartea 2008-02-15 10:04

Iruñeako abortuaren aldeko manifestaziora joatera deitu ditu uribekostarrak Algortako Bilgune Feministak

Erabiltzailearen aurpegia Ukberri Azken aldian izandako prozesu judizialen, kliniken erregistroen, Nafarroako Gobernuak legea ez betetzearen eta beste hainbat gertakarien ondorioz, abortatzeko eskubidearen alde kalera ateratzeko beharra ikusi dute Euskal Herriko mugimendu feministako hainbat taldek. Hori dela eta, larunbat honetan, otsailak 16, manifestazioa egingo dute, 17:30ean, Iruñeako autobus geltoki zaharretik abiatuta. Horrenbestez, Algortako Bilgune Feministak Uribe Kosta eskualdeko herritar guztiak deitu ditu mobilizazioan parte hartzeara, "emakumeon eskubidea den aborturako aukera ozen aldarrikatzeko". Besteak beste, Bilboko San Nikolas elizaren paretik aterako dira autobusak bihar bertan, 15:00etan. Izena emateko 944 155 483 telefono zenbakira deitzea besterik ez dago. Argazkian, azaroaren 25ean, Algortako Bilgune Feministak deituta, emakumeen aurkako indarkeriaren kontra egindako elkarretaratzea.