Kultura 2008-05-17 18:22

Bost neska eta mutil bat lehiatuko dira arratsaldean Ipar Uribeko txapelagatik

Erabiltzailearen aurpegia Ukberri Itxaso Paya egungo txapelduna, Jone Uria, Arrate Illaro, Olatz eta Miren Ibarluzea (argazkian, Fikako kanporaketa irabazi ondoren) eta Peru Vidal norgehiagokan arituko dira arratsaldean Ipar Uribeko VII. Bertsolari Txapelketa irabazteko. Hitzordua 18:00etan izango da, Areetako Andres Isasi musika eskolan, Aitzol de Castro leioaztarrak gaiak jarriko dituela. Pasa den astean Fikan egindako kanporaketan Miren Ibarluzea baino ez zen sailkatu, atzean Ekaitz Larrazabal "Katxo" bezalako faborito bat gelditu dela. Horrela, puntuak puntu, bost emakume eta mutil bakarra izango dira kantari Areetan. "Historikotzat" jo du Itxaso Paya txapeldunak gertaturikoa. Izan ere, 1994an eta 1997an, Uribe Kostako txapelketetan ez zen neskarik izan parte hartzaileen artean. 2000n, berriz, Miren Loizagak eta Goizalde Atxutegik hartu zuten parte, azken honek kanporaketa bat irabazi egin zuela. 2002an, Miren Loizaga eta Miren Ibarluzea izan ziren finalean. 2004an Ibarluzea baino ez zen sartu finalean eta 2006an, jauzi handia eginez, Itxaso Payak txapela janzteaz gain, beste hiru neskek hartu zuten bere lekua finalean. Gaurkoan, ordea, bost izango dira, txapelketara sartu ziren zazpi nesketatik. Mutilek, berriz, ordezkari bakarra izango dute, Peru Vidal, 13 parte hartu badute ere.
  Kultura 2008-05-16 22:49

Belgikako dantzariak arituko dira bihar Getxoko Sanisidroetan

Erabiltzailearen aurpegia Ukberri Larunbat honetan, maiatzak 17, udaletxean egingo die harrera Koldo Iturbe Kultur zinegotziak Itxas Argia dantza talde getxoztarrak antolatzen duen Herrien Jaialdian parte hartuko duten bi taldeei, Itxas Argia berari eta La Compagnie Folklorique Fanny Thibout et les Tiesses di Hoye talde belgikarrari, hain zuzen. 11:00etatik aurrera, erakustaldi txiki bat egingo dute bertan talde bietako dantzari eta musikariek. Getxoko Sanisidroetan egin ohi du Herrien Jaialdia Itxas Argiak. Ekitaldia 21:00etan hasiko da jaialdia, Andra Mariko udal kiroldegian, eta sarrera dohakoa izango da. Argazkian, iaz Danimarkako eta Aragoiko (argazkian / Ilanda.eu) dantza taldeekin batera aritu zen Itxas Argia.
  Politika 2008-05-16 21:16

Anjel Figueroa askatzeko neurriak hartzea eskatu diete Jaurlaritzako Osasun arduradunei

Erabiltzailearen aurpegia Ukberri Anjel kalera! herri ekimenak deituta, 20 lagun inguruk egin dute elkarretaratzea, gaur eguerdian, Algortako Bidezabal kaleko anbulatorioaren aurrean. Protesta horren bidez, Anjel Figueroa preso gaixo algortarra askatzeko aldarria bere egin dezatela eta, bide horretan, eskura dituzten baliabide guztiak erabil ditzatela eskatu diete Eusko Jaurlaritzako Osasun Sailari eta horren buru den Gabriel Inclani. "Jakin badakigu, Anjel askatzeko azken erabakia Langraiz espetxeko tratamendu batzordearena dela, horren kide den kartzelako medikua tartean dela. Baina, ez dugu ahaztu behar, Lakua dela Araba, Bizkaia eta Gipuzkoan osasun eskuduntza duena eta erantzunkizunik baduela preso gaixo algortarraren osasun egoeran", azaldu dutenez. Gurutzetako (Barakaldo, Bizkaia) ospitalean egin ziote ebakuntza 2007an Figueroari eta bertan ere pasatu behar izaten du kontsulta. Epilepsia krisialdiak dituenean, berriz, Txagorritxun (Gasteiz, Araba) artatzen dute. "Zehazki Langraizen beharrean etxean behar duela dioen txosten medikua behar du Anjelek", aldarrikatu dute. Argazki gehiago daude ikusgai hemen.
  Politika 2008-05-16 19:35

Juantxo del Vigo Berdeen zinegotzi sopeloztarra Saharara joango da astelehenean

Erabiltzailearen aurpegia Ukberri Juantxo del Vigo Sopelako Berdeen zinegotzia Saharara joango da datozen egunotan, astelehenetik asteazkenera, Fronte Polisarioren 35. urteurreneko ekimenetan parte hartzera. Izan ere, datorren asteartean, hilak 20, 35 urte beteko dira 10 egun lehenago jaiotako Polisarioak Espainiako Armadaren aurka arma bidez altxatu zela Janga-ko kuartela erasotuz. Berdeek jakinarazi dutenez, Del Vigok Tifariti lurralde askean maiatzaren 20an egingo diren omenezko ekimenetan zein elkartasuneko nazioarteko konferentzian parte hartu eta Saharako agintariekin bilduko da. Besteak beste, Berdeen elkartasuna eta 1991an NBEk autodeterminazio erreferenduma oinarri hartuta egin zuen planaren aldekotasuna adieraziko die Saharako Errepublikako lehenengo ministroari eta Fronte Polisarioko idazkari nagusiari.
  Kultura 2008-05-16 18:40

"La ruleta" antzezlana eskainiko du iluntzean Itzubaltzeta gaztetxeak

Erabiltzailearen aurpegia Ukberri Gaur hasi eta hilabete baten epean, hiru antzezlan eskainiko ditu Itzubaltzeta / Romoko Itzubaltzeta gaztetxeak. Izan ere, orain arte antzerki emanaldiak hilero eraman ditu aurrera zentro sozialak, baina ikusleek egindako harrera bikainari esker, maiztasun hori bikoiztea deliberatu egin dute antolatzaileek. Horrela, gaur iluntzeko 9etan, "La ruleta" Zaragata konpainiaren gaztelerazko antzezlana eskainiko dute. Bi aste beranduago, maiatzaren 30ean, berriz, euskarazko "Zetazeak" antzeztuko du Antzerkiolatik sortutako izen bereko konpainiak. Sanjuanak bitarteko programazioari amaiera emateko, berriz, La Calvario konpainiak dantza eta antzerkia bilduko ditu "Ariketa" lanean, ekainaren 20an. Argazkian, Miren Gaztañaga aktoreak "Ariketa" lanean jardungo du.
  Politika 2008-05-16 13:45

Israelen aurkako ekimena burutu dute Leioako campusean

Erabiltzailearen aurpegia Ukberri Atzo, maiatzak 15, palestinarren "hondamendia" (Nakba arabieraz) eragin zuen Israel Estatu sionistaren sorreraren 60. urteurrena salatu zuten, Leioa eta Erandioko campusean, hainbat erakundetan (Komite Internazionalistak, Unibertsitate Kritikoaren Aldeko Asanblada eta Kamaradak) ibiltzen diren ikasleak. Horretarako, israeldar soldaduek jarri ohi duten kontrolgunea edo check-point-a irudikatu zuten neska-mutilek (argazkian). "Honela, Israeldar estatu sionistaren sarrasakia salatu nahi izan dugu, eta bide batez, nazioartean Israeldar estatua deslegitimatzeko martxan dagoen boikot akademiko, kultural eta ekonomiko kanpainarako deialdia luzatzen dugu. Sionismorik ez! Palestina askatu!", adierazi zutenez. Bestalde, Algortako Telletxe plazan, 20 bat auzokidek egin zuten elkarretaratzea arratsaldez, Kamaradak eta Askapena erakundeek deituta. Parte hartzaileen artean, LAB, EAE eta Koska irratiko kideak izan ziren. Algortako argazkiak.
  Ekonomia 2008-05-16 00:04

Leioako Behargintzatik 2.463 lagun igaro dira sortu zenetik

Erabiltzailearen aurpegia Ukberri Leioako Behargintzak emandako datuen arabera, 2.463 pertsona pasa dira zerbitzu horretatik lanpostu baten bila, bere sorreratik hona. Horietatik %57 emakumeak izan ziren eta %43 gizonezkoak. "Datu hauek azken urteetako joera islatzen dute, hau da, Leioak bizi izan duen hazkunde positiboa. Azken hileko erroldaren arabera udalerriak 30.000 biztanle pasa ditu jada, hauetatik %5a etorkinek osatzen dutelarik. Bestalde, datu hauek autoenpleguaren aldeko apostua indartzen ari dela erakusten digute", adierazi dute Udaletik. Behargintzako erabiltzailearen profila 25 eta 44 urte bitarteko emakumearena da. Sexuen arteko ezberdintasun hori 45 urtetik gora ere nabaria da, "langabetu gehiago baitaude emakumeen artean gizonezkoen artean baino". "Dena dela, joera hau urteekin aldatzen doa, hau da, 25 urte baino gutxiago duten erabiltzaileen artean gizonak dira langabetu gehiago dituztenak", azaldu dute tokiko iturriek. Argazkian, Eneko Arruebarrena alkate leioaztarra.
  Kirolak 2008-05-15 23:37

Ekainaren 21ean ateak zabalik jardunaldia egingo du Barrika Piragua Taldeak

Erabiltzailearen aurpegia Ukberri Kirol hori ezagutzen ez duten pertsonek arraunean ikasi dezaten, ateak zabalik jardunaldia antolatu du ekainaren 21erako, larunbatarekin, Barrika Piragua Taldeak. Ekimenean esku hartzeko ezinbestekoa da igeri egiten jakitea, zehaztu dutenez. "Esan gabe doa, primeran pasatzen duten bitartean kirol berri bat ezagutu nahi dutenei zuzenduta dagoela", gaineratu dute. Klub barrikoztarreko prestatzaileek koordinatuko dute jarduera, eta parte hartzea erabakitzen dutenek taldekideen laguntza izango dute. Izena eman nahi dutenek 600 902 125 telefono zenbakira deitu beharko dute edo blogbpt[abildua]telefonica.net helbide elektronikora idatzi. Bestalde, igande honetan, hilak 18, Lekeition izango den Bizkaiko Ikasleen Lehiaketan esku hartuko du Barrika Piragua Taldeak. Txapelketa klub barrizkoztarrak eta bertoko Piraguismo Dzanga-k antolatu dute. Halaber, maiatzaren 31n, Donostian izango den Euskal Autonomia Erkidegoko txapelketan ere esku hartuko dute.
  Jendartea 2008-05-15 15:12

Erandioko ertzain-etxe erraldoiaren kontrako bizikletada izango da etzi

Erabiltzailearen aurpegia Ukberri Larunbat honetan, maiatzak 17, Erandioko Superkuartelaren Aurkako IX. Bizikletadan parte hartzera deitu du Amarratsak kolektiboak. 11:00ak aldera, eskulekuak heldu eta pedalak astintzen hasiko dira Erandioko metro geltokiaren aurrean batutako lagunak. Hortik, bertako ertzain-etxearen aurrean igaro ondoren, Getxorantz abiatuko dira. Izan ere, Astrabudua, Leioa, Lamiako, Itzubaltzeta / Romo, Neguri, Berango eta Algorta zeharkatu ondoren, Txorimalo gaztetxean izango dute prest txistorra eta sagardoa. Arratsaldean, berriz, kontzertua egingo dute, 20:00etan, Itzubaltzeta gaztetxean Bizi Hil eta Tunel 483 taldeen eskutik. Egunotan, Amarratsak Astea ospatzen dabiltza: hain zuzen ere, gaur edukiko dute azkenengo hitzaldia, 19:30ean, Txorimalon bertan. Cesar Manzanosek emango du, "Alternativas al modelo policial" izenburupean. Argazkian, superkuartelaren aurkako martxaren artxiboko irudia.
  Kultura 2008-05-14 23:15

Bihar hasiko dira Getxoko Sanisidroak

Erabiltzailearen aurpegia Ukberri Aurreko asteburuan hainbat ekitaldi egon ziren arren, ostegun honetan, maiatzak 15, emango zaie hasiera Getxoko San Isidro jaiei. Aurten udalerri osoan da jai eguna biharkoa eta, hori aprobetxatuz, igandera bitartean, ekitaldiz beteriko lau egun prestatu ditu jai batzordeak. Horrenbestez, ordu erdi lehenago, Malakate plazatik abiatuko den txistulari, buruhaundi eta hankapaluen kalejirari jarraipena emanez, 19:30ean irakurriko dute bertsoz jantzitako pregoia Geroa ikastola eta Andra Mari ikastetxeko neska-mutilek. Hala ere, aurretik meza, luntxa eta aurreskua (12:00); idi probak (17:00); eta haurrentzako jarduerak (12:30) egongo dira. Lehen aipatu pregoi irakurketa kiroldegi atzeko parkingean egingo dute, ospakizun gehienak bezala. Izan ere, iaz txiki gelditu zitzaien eliza ondoko landa, jaiak antolatzearen ardura hartuta berri zeukaten lagunei. Bada, orain urte bete lan txukuna egin bazuten, aurtengoan ez dira etxeko lanak egin barik gelditu. Izatez arrakastatsuak diren ohiko ekitaldiak mantentzeaz gain, egitaraua osatu eta indartu egin dute; batez ere kontzertuei dagokionez. Besteak beste, EH Sukarrak joko du aurten Getxoko San Isidroetan. Argazkian, Agurrako txistulariak iazko jaietan.
  Kultura 2008-05-14 21:47

Mikel Markezek kontzertua emango du ostiralean Algortan

Erabiltzailearen aurpegia Ukberri Ostiral honetan, maiatzak 16, “Zure begiek” izenburuko bere azken lana aurkeztuko du Mikel Markezek, Algortako Getxo Antzokian. Diskoan bere musika jardueraren bi hamarkada bildu ditu kantautoreak. Horretarako, bere kanta ospetsuenetariko batzuen jatorrizko bertsioak masterizatu ditu eta beste konposizio batzuk berriro grabatu ditu. “Zure begiek”, Markezen kanta ezagunenetariko batek eman dio izena Elkarrek argitaratu duen bildumari. Lan horretan oreretarraren musika ekoizpenaren abesti onenak jaso dira, 1988an bere jarduera hasi zuenetik. “Zure begiek” kantarekin hasten da diskoa, harizko instrumentuen laguntzaz hobetuta. Horrezaz gain, beste zenbait kantu sartu dira, jatorrizko bertsioan eta masterizatuak. Horien artean “Zertarako mugak jarri”, “Gizartearen eraikuntza” eta “Imajinatzen zaitut” aipatu behar dira. Etziko kontzertua 20:00etatik aurrera izango da eta sarrerak salgai daude jada. Argazkian, gaur eman dute kontzertua aurkezteko prentsaurrekoa Anjel Valdes Elkar diskoetxeko arduradunak, Koldo Iturbe Kultur zinegotziak eta Mikel Markez berak.
  Kultura 2008-05-14 16:08

Iñaki Rodrigo getxoztarrak egin du aurtengo Leioako Sanjuanetako kartela

Erabiltzailearen aurpegia Ukberri Leioako San Juan jaietako aurtengo kartel lehiaketa Iñaki Rodrigo getxoztarrak irabazi du "Bolitas" izenburudun lanarekin. Irabazlea 42 lan artetik izan da aukeratua eta 800 euroko saria jaso du, tokiko iturriek jakinarazi dutenez. Horretaz gain ,epaimahiak aipamen berezia egin dio Markel Matos txikiaren lanari, lehiaketara aurkeztu den ume bakarra delako eta bost finalisten artean kokatu zelako. Bere irudiak jendeak antortxak udaletxera igotzen dituen momentua irudikatzen du. Lehiaketara aurkeztutako lan guztiak Kultur Leioako 5.solariuan izango dira ikusgai. Bestalde, joan den igandean Margolari Gazteen XI Lehiaketa ospatu zen Leioan. Edizio honetako lehen saria Shakti Olaizola leioaztarrarentzat izan zen, bigarrena ere Leioan geratu zen, Raquel Felezek irabazi baitzuen. Azkenik, hirugarrena, Gasteizko Eduardo Alsasuak hartu zuen. Bestetik, herriko margolari onanenaren saria Carlos Torrerentzat izan zen. Leire Ahedok aurtengo sari berriarekin egin zen, hau da, 18 urtetik beherakoentzako sari berezia. Argazkian, Sanjuanetako aurtengo kartela.
  Jendartea 2008-05-14 15:33

Ekainaren 10ean egingo dute guraso berrientzako hurrengo hitzaldia Barrikan

Erabiltzailearen aurpegia Ukberri "Umeskola" izenburupean, atzo egin zen Barrikako udaletxean, Ana Bacigalupek guraso berriei emango dien hitzaldietatik lehena. Euren seme-alabez lagundurik, sei amek (argazkian) esku hartu zuten Kultur Sailak antolatutako ekintzan. Hurrengo saioa ekainaren 10ean, asteartearekin, izando da 10:00etatik 12:00etara, eta hiru gaietan oinarrituko da: umeen elikadura, edoskitzaroa eta titia kentzea. “Hainbat gai eta zalantza sortu dira, horrexegatik proposatu dugu hiru hauetaz mintzatzea soilik. Etorkizunean beste hitzaldiren bat antolatzen bada falta diren gaiaz hitzegingo dugu”, azaldu du Bacigalupek.
  Jendartea 2008-05-14 15:19

Barrikako hondartzako eskaileratan haitzetarako babes hezia jarri dute

Erabiltzailearen aurpegia Ukberri Eusko Jaurlaritzaren laguntzaz, hondartzan erortzen diren haitzetatik babesteko pantaila dinamikoa jarri du Barrikako Udalak. Eskaileren barruko aldean erantsita dago hesia, erortzen diren harriak bertan kateatuta geldi daitezen, tokiko iturriek zehaztu dutenez. Hezia egoera onean dagoela ziurtatzeko, aldian-aldiko ikuskaritzak egingo dira. Behar izanez gero, bertan pilatutako haitzak ere kenduko dira, segurtasunari ez eragiteko. Iazko abuztuan izandako arazoarengatik erabaki dute hori jartzea. Gainera, udari begira, udalerriko hiru hondartzetan (Muriola, Barrika eta Meñakoz) dutxa zerbitzua eta iturriak jarriko dituzte sarbideetan, eta hondartzainek zainduko dituzte hiru eremuok.
  Politika 2008-05-14 12:37

Bihar 33/01 auziari buruz jardungo dute Algortan

Erabiltzailearen aurpegia Ukberri Etxerat, Askatasuna, Senideak, Amnistiaren Aldeko Batzordeak edo Euskal Herriko Giza Eskubideen Behatokia erakundeetan lan egiteagatik 27 euskal herritarrei egiten ari zaizkion epaiketa dela eta, hitzaldia izango da ostegun honetan, maiatzak 15, Algortako Aldai kulturgunean (Itsasgane). 19:30ean abiatuko den saioan, 33/01ean auziperatutako Mitxel Sarasketa getxoztarrak eta Juan Antonio Madariaga bermeotarrak hartuko dute hitza. Jagoba Terrones berangoztarra ere epaitzen ari dira. Bitartean, epaiketak aurrera darrai Madrilen. Hori salatzeko, larunbatean Bilbon egingo den manifestazioan parte hartzeko deia egin dute hainbat eragile eta norbanakok. 17:30ean abiatuko da Aita Donostia plazatik. "Euskal Herriak askatasuna behar du!" izenburuko agiriak, berriz, ia 2.100 pertsonaren sinadurak bildu ditu www.mundurat.net/ezdadelitu helbidean. Argazkian, apirilaren 24an, hainbat lagun elkartu ziren Getxoko udaletxe aurrean, osoko bilkura hasi baino ordu erdi lehenago. Berton, "Isaias Carrascok ez bezala" 33/01eko auzipetuek "helegitea aurkezteko aukera" badutela erantzun zion Mari Espe Fuertes Getxoko ezker abertzaleko bozeramaileari Imanol Landa alkateak.