Jendartea 2008-05-13 00:03

Egunotan motozikleten kontrolak areagotuko ditu Getxoko Udaltzaingoak

Erabiltzailearen aurpegia Ukberri Maiatzaren 25ra bitartean, motor eta motozikletetan kaskoa eta dokumentazioa erabiltzen den egiaztatu eta zarata aztertzeko kanpaina egingo du Getxoko Udaltzaingoak, 2008ko Euskal Autonomi Erkidegoko Bide Segurtasunerako Plan Estrategikoaren harira. Ausazkoak izango dira kontrolak herrigune osoan, eta bereziki era honetako ibilgailuak gehien dabiltzan kaleetan eta, zarata dela-eta, kexa gehien eragiten duten lekuetan egingo dituzte. "Udaltzainek kaskoa derrigorrez erabiltzera derrigortuko dute, istripuetan segurtasuna bermatzeko ezinbesteko elementua baita. Iibilgailuen ganeko dokumentazioa, gidatzeko baimen eta lizentziak zuzenak diren, eta zarata eta Ibilgailuen Azterketa Teknikoa (IAT) ere kontrolatuko dute", udal iturriek zehaztu dutenez. Horiek guztiak zaintzen ez dituztenak salaketa jazo eta gidabaimena galtzeko arriskuan izango dira. Bestalde, Leioan ere abiatu dute kanpaina, Eusko Jaurlaritzako Herrizaingo Sailak jakinarazitakoaren arabera. Argazkian, Ertzaintzako errepide kontrol bat artxiboko irudi batean.
  Kultura 2008-05-12 23:38

Bi urtetan %17,1 igo ditu eskolaz kanpoko jadueretan euskara bultzatzeko laguntzak Getxoko Udalak

Erabiltzailearen aurpegia Ukberri Maiatzaren 30era bitartean zabalik egongo da eskola-orduz kanpoko jardueretan euskara sustatu, zabaldu edo normalizatzeko 2008-2009ko ikasturterako diru laguntzak eskatzeko epea, Getxoko Udalari. Oraingoan 25.000 euro banatuko ditu tokiko erakundeak, iaz baino 2.000 euro gehiago. 2006an 21.350 euro izan ziren guztira. Hartara, Euskara, Gazteria, Kultur eta Kirol jardueretarako ez bezala, eskolaz kanpoko ekimenentzat urtetik urtera igo du diru partida Udalak. Laguntzak eskuratu ahal izango dituzte udalerrian kokatuta egon eta ikasketa ez-unibertsitarioak eskaintzen dituzten ikastetxe, guraso elkarte eta ikasle, ikasle ohi edota irakasle taldeek; beti ere egiten duten lana Getxon kokatuta dagoen ikastetxe batean bada. Eskaerak udaletxeko erregistro orokorrean eta Algortako, Itzubaltzeta / Romoko eta Getxoko herritarren arretarako bulegoetan aurkeztu ahal izango dira. Argazkian, Koldo Iturbe Euskara zinegotzia, aurreko prentsaurreko batean.
  Kultura 2008-05-12 22:41

Ehunaka lagunek gozatu dute Lamiakoko II Euskal Jaiarekin

Erabiltzailearen aurpegia Ukberri Lamiakoko Maskarada kultur elkarteak antolatutako eta inguruko hainbat elkartek lagundutako Lamiakoko II Euskal Jaiak jende andana batu zuen pasa den larunbat osoan zehar Leioako auzo horretan. Euriari aurre eginez, goizetik ibili zen jendea nekazaritza azokan eta karpapean egin ziren umeen jolas eta tailerretan. Herri bazkarian, 200 bat lagunek gozatu zuten babajanaz. Ondoren, bazkalostekoa ganoraz egiteko Beñat Vidalek eta Arrate Illarok bertso-saioa egin zuten eta dozena bat lagunek Lamiakoko Irrintzi txapelketan parte hartu zuten, Leti Manzidor gaztea nagusitu zela. Horren ostean, Txikiak eta Gure Ohiturak dantza taldeek alardea burutu zuten, giro ederrean. Arazoak, berriz, sokatira lehiaketarekin etorri ziren, elkar-lehia hain izan zen handia eta taldeen oreka hain txarra zer tiratzaileek ondoan zegoen talogileen saltokia lurrera bota zuten. Bestalde, emakumezkoak gizonezkoak baino trebeagoak izan ziren sokatiran. Erromeria tarteko, euskal jaia ordu txikietaraino luzatu zen. Eguneko argazkiak hemen ikus daitezke.
  Kultura 2008-05-12 20:59

San Isidro egunean merkeagoa izango da Bizkaiko Zubia bisitatzea

Erabiltzailearen aurpegia Ukberri Getxoko Udalak “Bizkaiko Zubia ezagutu” ekimena abiatu du “getxoztarrok 2006an UNESCOk munduko lehenengo zubi-transbordadorea izateagaitik eta jardueran dagoen bakarra delako Gizadiaren Ondarea izendatu zuen monumentu enblematiko honetara hurbiltzeko”, Josu Loroño Komunikazio zinegotzi getxoztarrak adierazi duenez. Goiko pasabidetik udalerriko ikuspegi panoramikoaz gozatzeko aukera emateko asmoz, Udalak zubia kudeatzen duen enpresarekin akordioa lortu du. Horrela, maiatzaren 15ean, aurten jaieguna Getxon, bisitek 1,5 euroko prezioa izango dute (ezarritako 4 euroen ordez). Horretarako, interesa duten pertsonek DNI txartela baino ez dute aurkeztu beharko udalerriko bizilagunak direla egiaztatzeko. Argazkian, Bizkaiko Zubiko goiko pasabidea / Jabi Zabala.
  Politika 2008-05-12 20:39

Fernando Etxegarai Euskal Herritik atera dute

Erabiltzailearen aurpegia Ukberri Fernando Etxegarai Gaztearena "Pinki" plentziarra maiatzaren 6an atxilotu eta Basauriko espetxera eraman zuten. Ostiralean, ordea, dagoeneko Basaurin ez dagoela eta beste espetxe batera eraman dutela jakin zuten bere familiarrek, nora eraman duten esan ez zieten arren, Uribe Kostako Amnistiaren Aldeko Mugimenduak Etengabe bitakoraren bitartez zabaldu zuenez. Esan bezala, astearte goizean atxilotu zuen Espainiako Poliziak Barakaldon jaio eta Plentzian lekututako euskal preso politikoa. Etxegarai urtarrilaren 4an atera zen Pontevedrako A Lamako espetxetik, zigor osoa beteta. Bada, bi hilabete eta erdi kalean eman ondoren, plentziarra bilatu eta atxilotzeko agindua eman zuen Espainiako Auzitegi Nazionaleko 1. atalak, aske jartzea erabaki zuen sekzio berbera alegia. Etxegarairi Parot doktrina gisa ezagutzen den 197/2006 jurisprudentzia ezarri (zigor murrizketak kontuan ez hartzea), eta beste lau urte eta hiru hilabete preso egin behar dituela jakinarazi zioten. Argazkian, atxiloketaren egun berean 80 bat auzokidek egin zuten manifestazioa Plentzian.
  Jendartea 2008-05-12 20:28

Palestinari buruzko saioa izango da bihar Areetan

Erabiltzailearen aurpegia Ukberri Mundu bat gobernuz kanpoko erakundeak, Getxoko Udaleko Garapenerako Lankidetza Arloak eta Mewando Sareak Palestinako egungo egoerari buruzko saioa antolatu dute astearte honetarako, maiatzak 13, Nafarroako Aurrezki Kutxak Areetako Kale Nagusiko 31 zenbakian duen egoitzan. Ekitaldia 18:30ean hasiko da “Pakearen alde jotake” izenburuko dokumentalaren proiekzioarekin. "Horrek bakearen kulturarekin konpromisoa hartu duten mundu osoko pertsona batzuen iritziak eta esperientziak erakutsiko ditu", azaldu dute kultur iturri getxoztarrek. Ondoren, 19:30ean, Sergio Yahni Jerusalemeko Informazio Alternatibo Zentroaren ordezkariak eta Issam Abdallah Ali Abualhaj Palestinar Gobernuz Kanpoko Erakundeen Sarearen zuzendariak “Palestina, herri bat erresistentzian” izeneko hitzaldia eskainiko dute. Hain zuzen ere, hilaren 14an “Nakba” izenarekin (hondamendia arabieraz) ezagutzen denaren 60. urteurrena ospatuko da, Israelek palestinarren lurrak okupatzen hasi eta bertokoek euren etxeak utzi behar izan zituzten eguna alegia. Argazkian, haur palestinar bat ura eramaten / CeCAC.
  Ekonomia 2008-05-12 20:03

Zabalik dago Lur Barriak sarietarako izena emateko epea

Erabiltzailearen aurpegia Ukberri Bermeoaldea, Erandio, Getxo, Leioa, Uribe Kosta (mankomunitatea), Txorierri eta Mungialdeko Behargintza zentroek Lur Barriak Enpresa Ekimenen Lehiaketaren beste deialdi bat jarri dute martxan, Bizkaiko Foru Aldundiaren, Eudelen eta BBK Gaztelanbidean erakundearen laguntzarekin. Seigarren edizioa beteko duen lehiaketan 2007ko ekainaren 15etik 2008ko uztailaren 14ra bitartean Enpresa-Jardueren Zergarako izena eman duten enpresek har dezakete parte, beti ere, honako bi irizpide hauetako bat betetzen badute: gutxienez ekintzaileetako bat aipatutako udalerri edo eskualde batean erroldatuta egotea edo parte hartzen duten Behargintzeatako batek enpresak sortzeko diseinatutako eta gidatutako ibilbide batean parte hartu izana. Lehenengo saria 6.000 eurokoa da eta eskualdeetako 7 sari gehiago ere izango dira, Behargintza bakoitzak emandako 2.500 euro alegia. Argazkian, Berangoko Karabiazpi kalean dagoen Uribe Kostako Behargintza.
  Politika 2008-05-12 00:03

Preso gaixoen askatasuna aldarrikatu dute 200 bat lagunek Langraizen

Erabiltzailearen aurpegia Ukberri Algorta, Aramaio, Arrasate, Bilbo, Donostia, Gasteiz... 200 lagun inguruk egin dute gaur, Langraizko espetxera martxa, Anjel Figueroa algortarra, Jon Agirre aramaioarra, Josu Uribetxebarria arrasatearra eta bertan dituzten gainontzeko preso gaixoen askatasuna eskatzeko asmoz. Mendian gora joanda, hiru euskal preso politikoak dauden Erizaintzako modulua aurrez aurre izan dute etengabe martxistek. Eurek botatako elkartasun aldarriei, lehendabizi leihora ikurrina ateraz eta ondoren beraiek ere oihukatuz erantzun diete presoek. Nahiz eta fisikoki urrun egon, bertaratutako lagunek argi eta garbi aditu dituzte barrote artetik heldutako "Aurrera bolie!" bezalako oihuek. Horien artean izan dira, besteak beste, Anjel Alcalde preso ohia eta eztarria urratu beharrean oihu egin duen Josepa Arregi Etxerat elkarteko lehendakariak. Bitartean, espedientea zabaldu dio Ertzaintzak Mari Karmen Fernandez Figueroaren amari, kontzentratzeko baimena espetxe aurreko zubiaren bestalderako zela argudiatuta. Komunikatzeko orduan, protesta kartzela inguruetan izango zela adierazi zitzaien Herrizaingo Saileko arduradunei. Argazki gehiago ikusi.
  Kultura 2008-05-09 21:57

Oskorrirekin batera joko du bihar Erandioko Udal Bandak

Erabiltzailearen aurpegia Ukberri Oskorri Banda Band izeneko kontzertuaz gozatzeko aukera izango dute larunbat honetan, maiatzak 10, Erandiora hurbiltzen diren guztiek. Bilboko Udal Musika Bandak aspaldi luzatutako erronka onartuta, Natxo de Felipe buru duen taldeak 35 urtetan sortutako abestien berrikuspenaren emaitza dugu aipatu emanaldia. Hartara, Bilboko bandaren laguntzaz, Arriaga antzokian hiru saio eskainiz ospatu zuen iaz urteurrena Oskorrik. Behin diskoa argitaratuta, proiektu hori leku guztietara eraman nahi du euskal taldeak. Oraingoan, Erandioko Udal Banda izango du bidelagun Oskorrik, biharko kontzertuan. Saioa 19:30ean izango da, Altzagako azoka zaharrean. Errepertorioak 16 kantu barne hartzen ditu, nolabait aro guztietakoak, zaharrenetarik berrienetara. Gonbidapenak Astrabuduko Udal Bulegoan eta Kultura Sailean jaso ahal izango dira. Argazkian, Andoaingo Musika Banda Oskorrirekin entseatzen.
  Kultura 2008-05-09 20:41

Blues musikak hartuko du bihar Leioako San Bartolome auzoa

Erabiltzailearen aurpegia Ukberri Auzotarrok kultur Elkarteak antolatuta, bihar Leioa Sanbar Blues Jailadiaren laugarren edizioa egingo da San Bartolomeko Telleria plazan. Hori ospatzeko gurean hainbat kontzertu eta txorizo dastaketa izango da. Jaialdia arratsaldeko 5etan hasiko da txorizo dastaketarekin eta 21:00etatik aurrera musikari egingo zaio lekua, Mike Hammer & The Taxi Drivers laukote barakaldarrak, Valladolideko Bluedays Blues Band-ek eta bere bigarren diskoa aurkeztuko duen Travellin' Brothers boskoteak (argazkian) oholtzaren gainetik abestuko dutela. Barakaldoztarrek 2006an osatu zuten taldea eta dagoeneko eskarmentu handia dute blues jaialdietan, musika hori jazz eta rockarekin uztartzen dutela.
  Politika 2008-05-09 20:33

Langraizera egingo dute martxa igandean

Erabiltzailearen aurpegia Ukberri Anjel Figueroa algortarra, Jon Agirre aramaioarra, Josu Uribetxebarria arrasatearra eta bertan dituzten gainontzeko preso gaixoen askatasuna aldarrikatzeko asmoz, Langraizko espetxera egingo da martxa igande honetan, maiatzak 11. Horrenbestez, etzirako 12:00etan jarri dute hitzordua Gasteiz aldeko Lopidana zerbitzugunean, espetxera 12:30ak aldera heltzeko. Arrasatetik 10:30ean abiatuko da autobusa eta ordu laurden beranduago hartuko ditu aramaioarrak. Algortatik, berriz, 10:45ean irtengo da Kirikiñotik, nahiz eta hasieran 11:00etan Villamontetik izango zela iragarri arren (izena emateko Amnistia tabernan). Horretaz gain, Bilbo, Donostia eta Gasteiz bertatik ere joango da jendea. Izan ere, Anjel kalera! herri ekimenak; Amnistiaren Aldeko Mugimenduak; Etxeratek; Gizabanakoen eta Gizarte Eskubideen Babeserako Elkarteak; Salhaketak eta Anjel Figueroa (Algorta), Jon Agirre (Aramaio) eta Josu Uribetxebarriaren (Arrasate) senide, lagun eta herrikideek bat egin dute ekimenean. Baita Gasteizko Hala Bedi irratiak, Armiarma talde anarkistak, Zapateneo kultur elkarteak eta Gasteizkoak talde antimilitaristak; eta Bilboko Gatazka Guneak ere. Horretaz gain, 107 norbanakok eman diote atxikimendua martxari.
  Kultura 2008-05-09 19:47

Ipar Uribeko VII. Bertsolari Txapelketako finalistak Fikan erabakiko dira iluntzean

Erabiltzailearen aurpegia Ukberri Gaur iluntzeko 8etan jokatuko da Ipar Uribeko VII. Bertsolari Txapelketako hirugarren eta azken kanporaketa, Fikako herriko txokoan, bertso afariaren bidez. Bertan, sei bertsolariek jardungo dute: ALBEko Ekaitz Larrazabal "Katxo", Josu Landeta eta Pello Etxebarria "Bonbero", Itzubaltzetako Pello Ruiz de Agirre eta Taketeko Miren Ibarluzea eta Mikel Goiriena. Miren Ibarluzea eta "Katxo" faboritoak badira ere, kanporaketan beste norbait nagusitzea ezin da baztertu. Argi dagoena da, txapelketan aurrera egiteko Fikako kanporaketakoak beren burua estutu beharko dutela eta Larrabetzun eta Sopelan aritu zutenak baino hobeto egin beharko dutela. Lortu ala ez, finala berdin egingo da maiatzaren 17an Areetako Andres Isasi musika eskolan, 18:00etan. Momentuz, eta Fikako emaitzaren zain, Jone Uria, Peru Vidal, Itxaso Paya, Olatz Ibarluzea, Arrate Illaro eta Miren Loizaga daude sailkapen postuetan.
  Kultura 2008-05-09 16:13

Leioako VIII. Pop-Rock lehiaketaren finalak jokatuko dira gaur gauean eta bihar

Erabiltzailearen aurpegia Ukberri Gaur, ostirala, eta larunbatean izango dira aurtengo Leioako VIII. Pop-Rock lehiaketaren finalak. Edizio honetan 116 musika taldek, tartean 11 talde leioaztar, aurkeztu dituzte beren lanak. Kanpoko parte hartze handiari buruz, "gure herriko mugak irekita egon dira, gure partaide zerrendara jatorri ezberdinak gehituz", adierazi dute antolatzaileek. Urtero legez modalitate ezberdin bi egon dira, 38 metal talde eta 78 pop-rock talde aurkeztu direla. Leioaztarrei dagokienez, gehiengoak, 9, pop-rockera bideratu da. Finala gaur eta bihar 21:30tik aurrera Aldapa auditorioan jokatuko bada ere, dagoeneko bi sari iragarri eta eman ditu antolakuntzak: Euskara Saria, Etxebarriko Niketz metal taldeko "Irakurri ezinezko hitzak" abestiari emana eta Leioako talderik onenari, kasu horretan Nasti de Plasti taldeak eskuratu duela. Argazkian, leioztarrak pasa den apirilaren 26an Barakaldoko Edaska aretoan emandako kontzertuan / Nasti de Plasti.
  Jendartea 2008-05-09 15:33

Neska gazte bat bortxatu egin dute Getxon

Erabiltzailearen aurpegia Ukberri Getxoko neska gazte batek bortxaketa pairatu izana salatu egin du, eta hortaz "kasua egon badago", baieztatu diote UKBERRI.NETi Ertzaintzaren Prentsa Bulegoko langileek. Izan ere, azken egunotan bolo-bolo ibili da Getxon bertako neskato bat bortxatu dutela eta horren berri eman diote agerkari digital honi hainbat irakurlek. Baina, aipatutako deklarazio xumeaz landa Ertzaintzak nahiago izan du kasuaren inguruko daturik ez ematea, "kontu handiz ibiltzeko gaia delako" eta oraingoz ikerketa bere hastapenetan baino ez delako. Mugimendu feministako kideek aitortu dutenez, "egoera larria da, aspaldi honetan Algortan horrelako hainbat ekintza nazkagarri gertatu baitira eta azkenean, bortxaketa bat". Argazkian, azaroaren 25ean, Algortako Bilgune Feministak deituta, emakumeen aurkako indarkeriaren kontra egindako elkarretaratzea.
  Politika 2008-05-09 14:16

ETA: "1978an bezala, 'ez' esaten diogu itun autonomiko berri bat inposatzeari"

Erabiltzailearen aurpegia Ukberri Euskadi Ta Askatasunak (ETA) lau atentatu bere gain hartu eta "Moncloako estatutua berritzeko" saiakeren aurrean kokatuko dela esan du zabaldutako testuan. Izan ere, ETA (m)-k komunikatu bat helarazi dio gaur goizean "Gara" egunkariari eta bertan kalte materialak sortu zituzten lau atentatu erreibindikatu ditu: Azpeitiako eta Lapoblaciongo telebista hedagailu banaren aurkakoak, martxoaren 30ean eta apirilaren 12an; eta PSE-EEko egoitzen aurka Abusun eta Elgoibarren apirilaren 17an eta 20an. Horretaz gain, ETAk PSOE eta EAJren azken ekimenetan "gure herriari itun autonomiko berri bat inposatzeko" zantzuak ikusi dituela dio, eta horrek "Euskal Herriaren asimilazioan sakontzea besterik" ekarriko ez lukeelakoan, "Euskal Herriaren askatasun osoa nahi dugunok 78an Espainiako Konstituzioari ez! esan genion bezala, egun ere ez! esaten diogu" dio ETAk.