Kultura 2008-10-02 23:01

Bizkaian 212 enpresek dute Bai Euskarari Ziurtagiriren bat

Erabiltzailearen aurpegia Ukberri Bizkaian gero eta enpresa gehiagok erabiltzen dute lanean euskara. Arlo sozio-ekonomikoaren euskalduntzean eragiteko lanean dihardu Ziurtagiriaren Elkarteak Bai Euskarari Ziurtagiriaren bidez. Rober Gutierrez Ziurtagiriaren Elkarteko zuzendariak Bizkaiko enpresetan euskararen eta Bai Euskarari Ziurtagiriaren egoera zein den azaldu du berriki. Azaldu duenez, euskarak onura argiak dakarzkio enpresari. Onura horietaz baliatu nahi duten eta euskararen aldeko neurri zehatzak hartzen dituzten entitateak identifikatu eta kreditatzeko erreminta da Bai Euskarari Ziurtagiria, Bizkaian 212 enpresa, saltoki eta era guztietako entitatek eskuratu dutena. Horien artean, Uribe Kostan eta Erandion Eroski, Ecuador Bidaiak, Euskadiko Kutxa, Eroski Bidaiak, Euskal Herriko Surf Federazioa, Arlan, Euskadiko Kutxa, Geinsa, Segema, Leioa Berri Auto edo Vasa aurki daitezke, besteak beste. Argazkian, uztailaren 15ean Gernikako dendariei ziurtagiriak banatzeko egindako ekitaldia / Bai Euskarari Ziurtagiriaren Elkartea.
  Kultura 2008-10-02 21:23

Musikazaleek Nun eta Ken Zazpiren artean aukeratu beharko dute larunbatean

Erabiltzailearen aurpegia Ukberri Uribe Kosta eta Erandioko euskal musikarekin gozatzen duten zaleentzat egun ona izango da larunbatekoa, edo ez. Izan ere, egun horretan, ia ordu berean baina leku ezberdinetan, gustukoak diren bi kontzertuak izan dira. Alde batetik, Udondo gaztetxeak antolatuta, Zea Mays eta Getxo udalerriko Nun talde euskaldunek eskainiko dute emanaldia 20:30ean. Sarrera lau eurotan erosi ahal izango da gaztetxearen atean bertan, dirua erresistentzia kutxa batera joango dela. Beste aldetik, kilometro eskas batzuetara eta ordu erdi beranduago, Ken Zazpik "Argiak" disko berriaren jirako ikuskizuna emango du Erandioko Altzaga auzoko merkatu zaharrean. Gernikarrak entzuteko sarrera zortzi eurotan salduko da tokian bertan zein aurretik BBKko orotariko kutxazain automatikoetan. Argazkian, Ken zazpi taldea "Gelditu denbora" aurreko diskoaren grabazioan / Gaztesarea.
  Kultura 2008-10-02 19:50

Txakolina dastatzen erakutsiko dute urriaren 29an Sopelan

Erabiltzailearen aurpegia Ukberri Urriaren 29an, asteazkenarekin, txakolina dastatzen ikasteko saioa egingo dute Sopelako udaletxeko sarreran, 19:00etatik aurrera. Bi orduko ikastaroak, batetik, mahats barietate desberdinen, elaborazio prozesuen eta bestelakoen gaineko argibideak jasoko dituzte partehartzaileek. Gero, hori guztia praktikara eraman ahal izango dute, enologian aditu baten eskutik. Dastaketa saioan, txakolin desberdinen usain, kolore eta zaporeak bereizteko aukera eduki dute ardozaleek eta enologoak berak argituko ditu sortu dakizkiekeen zalantzak. Beharrezko material eta fitxa guztiak ere emango zaizkie. Antolatzaileek zehaztu dutenez, ikastarorako lekuak mugatuak dira: gehienez, 24 lagunek baino ezin izango dute parte hartu. Hartara, izena emateko epea hilaren 15era arte jarri arren, lehenago bete litezke tokiak. Horretarako, udaletxeko sarrerara hurbildu beharko dira interesa duten guztiak 10:00etatik 14:00etara eta 16:00etatik 21:00etara, astelehenetik ostiralera; 19:00etara arte bakarrik larunbatetan; eta igandetan goizez baino ez. Argazkian, neska bat txakolinaren kolorea ikuskatzen / Egizu Getxo Euskaldun!
  Kultura 2008-10-02 19:18

Islamari buruzko erakusketa zabaldu dute Plentzian

Erabiltzailearen aurpegia Ukberri "Islama, guztion ondarea" erakusketa urriaren 30era arte egongo da zabalik Plentziako Goñi Portal kultur aretoan. Lehen eta Bigarren Hezkuntzako ikasleei zuzendutako eduki pedagogikoa duen kultur egitasmoa da, baina bere informazio izaeragatik jende orori dago zuzenduta. Kultura Islamikoaren Fundazioak eta Alarabetah euskal zentro arabiar-libiarrak antolatu dute eta, astelehenetik ostiralera, 11:00etatik 13:00etara eta 16:30etik 20:00etara bisitatu ahal izango da. Larunbatetan, berriz, 11:00etatik 13:30era eta 17:00etatik 20:00etara. Eta iganderan goizez bakarrik. "Ikusmenaren, ukimenaren, dastamenaren eta usaimenaren bitartez, erakusketa ibiltari honek, hain hedatuta eta aldi berean hain ezazaguna den milaka urteko zibilizazio honen ateak irekiko dizkigu", antolatzaileek adierazi dutenez. Argazkian, apirileko Aniztasunaren aldeko eta Diskriminazioaren aurkako IV. Jardunaldietan ere egon zen ikusgai Algortan, "Islama, guztion ondarea" erakusketa.
  Kultura 2008-10-02 15:59

Euskal Herriko ohiturak plazara aterako dituzte larunbatean Gorlizen

Erabiltzailearen aurpegia Ukberri Uribe Kostako Zerbitzu Mankomunitateko Euskara Zerbitzuaren bitartez, zenbait euskal tradiziori lotuta dagoen jaia antolatu du larunbat honetarako, urriak 4, Gorlizko Udalak. Oraingo honetan, erakustadia eskainiko dute Portalena euskal pilota taldeak (11:30etik 12:30era) eta Aratz dantza taldeak (12:30etik 13:15era). Arratsaldean ere parranda egiteko aukera paregabea egongo da, sagardo festa izango baita arratsaldeko 19:00etatik 21:00etara. Bertan, edaro gozoa dastatzeaz gain, trikitrixaren musika ere egongo da entzungai. Erakustaldiak zein sagardo festa elizako plazan izango dira. Bestalde, astelehenean, urriak 6, egingo dute Berbalagun egitasmoaren aurkezpen publikoa Gorlizen. Saioa 19:30ean izango da, Eloisa Artaza kaleko 3. zenbakiko erakusgelan. Euskaldun zaharrak ikasi berriekin harremanetan jarriz euskararen erabilera bultzatzea da proiektuaren ardatza. Argazkian, mutikoak dantzan.
  Kultura 2008-10-02 15:29

Bilboko Gabonetako kontzertua protagonizatuko du Leioa Kantika Koralak

Erabiltzailearen aurpegia Ukberri Leioa Kantika Koralak Bilboko Euskalduna Jauregian eskainiko du Gabonetako kontzertua datorren abenduaren 20an, larunbata. Bilboko Udaleko Kultura eta Hezkuntza Sailak jakinarazi duenez, Basilio Astulezek zuzendutako neska-mutilek Bilboko Txistulari Udal Bandarekin batera jardungo dute jauregiko A1 aretoan, arratsaldeko 8etan. Kontzertua doakoa da, baina jesarlekuak mugatuta egongo dira. Abesbatza 2001ean sortu zen Leioako Udal Musika Eskolan Basilio Astulez zuzendariaren ekimenez eta egun 10 eta 17 urte bitarteko 45 neska-mutilek osatzen dute. Helburu nagusiak musika hezkuntza sendotzea eta musika koralaz gozatzea bada ere, ematen duten ikuskizuna, berrikuntzak eta haurrentzat idatzitako musika berriagatik erreferente bilakatu dira. Zazpi urte hauetan taldeak hainbatetan jo du atzerrira: Portugal, Islandia, Herrialde Katalanak, Mexiko, Espainia, Eslovenia, Italia eta abar, hainbat sari irabaziz. Era berean, hainbat diska grabatu ditu, tartean "Kantika" (2006) eta "Gabon Kantika!", (2007). Argazkian, Leioako Kantika Korala / La idea del norte.
  Kultura 2008-10-02 13:38

Itzubaltzetak hartuko du aurtengo Bizkaiko Bertsolari Txapelketako azken finalaurrekoa

Erabiltzailearen aurpegia Ukberri Getxoko Udalak 30.000 euroko dirulaguntza eman dio Algortako Bertsolari Eskolari (ALBE), bere ekitaldiak aurrera eramaten laguntzeko. Azpimarratu behar da, ohi bezala, Bizkaiko Txapelketaren hiru finalaurrekoetako azkena udalerrian izango dela abenduaren 7an, 17:30ean hasita. Bertan, puntako bertsolariek parte hartuko dute, kanporaketetatik helduko direnekin batera. Etxahun Lekue, Unai Iturriaga, Igor Elortza eta aurreko edizioko txapeldun Xabier Paya algortarra entzuteko aukera egongo da, besteak beste. Hala ere, oraingoan Algortako Getxo Antzokian izan beharrean, Itzubaltzeta / Romoko Santa Eugenia plazan kokatuko den karpapean izango da, alde batetik "antzokia bera aurrekoetan txiki geratzen zelako eta, gainera, ordurako funtzionamendutik kanpo egotea espero delako", udal iturriek adierazi dutenez. Getxo Antzokia bota eta berria altxatuko dute laster. Argazkian, Bizkaiko Txapelketan sartzeko asmoz, Ipar Uribeko txapelagatik lehiatu ziren ALBE eta Taket bertso eskolako kideak.
  Kultura 2008-10-01 21:38

Kazeta.info, Ipar Euskal Herriko egunkari elektronikoa sarean da

Erabiltzailearen aurpegia Ukberri Iparla elkarteak sustaturiko egitasmoa da www.kazeta.info. Ipar Euskal Herriko barnekaldean izanen du egoitza nagusia, Donibane-Garazin, eta urriaren 1tik goiti egunero-egunero berriak eta iritziak, soinuak eta irudiak zabalduko ditu "inoren lekua hartu baino hutsune bat betetzera datorren komunikabideak". Euskara eta internet uztartuz, hizkuntzaren normalizazioaren bidean bere ekarpena egin nahi du egunkari berriak Bidarteko Izarbel teknopolean Teknologia Berrien Sustapenerako Agentziak (ANTIC) duen egoitzean buruturiko ekitaldian Iparla elkartearen lehendakaria, Agus Hernan, kazeta.inforen editorea, Maite Ubiria, eta egunkari berriaren kazetaria, Gaxuxa Arranbide izan ziren. Bidarteko Izarbel gunera hurbildutako kazetariek www.kazeta.info egunkariaren lehenengo azala ikusteko parada izan zuten. Aldaketa ttipi batzukin gaurdanik euskal irakurle orok, eta bereziki, Xuberoa, Lapurdi eta Nafarroa Behereko biztanleek atxemango duten informazioaren aurrerapena eskuratuz. Argazkian, Kazeta.inforen blogosferaren irudia.
  Kultura 2008-10-01 18:57

Patada en la Papada eta We Are Standard taldeek beren bigarren diskoak aurkeztuko dituzte

Erabiltzailearen aurpegia Ukberri Patada en la Papada Uribe Kostako punk taldeak hilaren 25ean joko du Algortako Getxo Antzokian. Bertan "Carne de matadero" disko berriaren 19 espainierazko kantez zein abesti zaharrez gozatzeko izango dute zaleek. Tartean, bost euroren truke, Discos Suizidas diskoetxearekin kaleratutako CDa eskura dago hainbat tabernatan eta Discos Suizidas-en webgunean. Era berean, hainbat kanta taldeko gunean bertan entzun daiteke doan. Hainbat gora-beheren ondoren, Aitor, Iker, Iban, David eta Ekaitzek osatzen dute ahotsa, baxua, bateria eta bi gitarrak jotzeko taldekideen zerrenda. We Are Standard taldeari dagokionez, ingelesez abesten duen talde algortarrak bigarren diskoa kaleratuko du azaroaren 4an, titulua izenetik hartuta. Hori izango da Standard izena zuen taldeak izen artistiko berriarekin kaleratuko duen lehenengo lana, Gang Of Four post-punk taldeko Andy Gill-ek ekoiztuta. Argazkian, Patada en la Papadako kideak aurtengo Getxoko jaietan, kontzertua hasi baino lehen.
  Kultura 2008-10-01 18:53

Hamalau lan egongo dira ikusgai aurten Getxoko Antzerki Jardunaldietan

Erabiltzailearen aurpegia Ukberri Getxoko XXVI. Antzerki Jardunaldiak urriaren 9tik 19ra bitartean ospatuko dira. Aurten 14 antzezlan eskainiko dituzte beste horrenbeste antzerki taldek. Ohikoa denez, ekitaldi honen helburu nagusiak dira "urtez urte euskal antzerki konpainiek egiten duten ahalegina erakustea eta urteko antzerki ekoizpenaren erakusleiho bilakatzea", antolatzaileek nabarmendu dutenez. "Jende guztiak, adina gora behera, atsegin dituen antzezlanak aurkitzeko aukera izango du. Hori dela eta, jardunaldiek berriro ere euren eskaintza egiten dute, aukeratutako lanen aniztasuna eta kalitatea ezaugarri izanik. Helduentzako eta haurrentzako lanak, genero eta gai ezberdinak, euskara eta gaztelania -espainieraz izango dira lanen bi herenak, gutxi gora behera- sartuko dira ekitaldiko egitarauan. Kaleko antzerkia italiar erara, komediak eta dramak, barrurako antzezpenak, muntaia handiak eta lan garaikideak eskainiko dira jardunaldietan", gaineratu dutenez. Sarrerak salgai daude Algortako kultur etxean, BBKren orotarako kutxazainetan, www.bbk.es webgunean eta 944 310 310 eta 944 914 080 telefono zenbakien bidez. Argazkian, Maskaradaren "Ohean" antzezlanaren irudi bat.
  Kultura 2008-10-01 13:50

Ipuin eta bertsopaper lehiaketak abiatu ditu Erandioko Udal Euskara Zerbitzuak

Erabiltzailearen aurpegia Ukberri Erandioko Udal Euskara Zerbitzuak martxan jarri du ohiko euskarazko ipuinen lehiaketa, dagoneko bere zortzigarren ediziora heldu dena. Era berean, lehenengo aldiz, bertsopaper lehiaketa ere antolatu du Euskara Zerbitzuak. Biak ala biak azaroaren 27a izango dute epemuga eta lanak Udaletxean dagoen Euskara Zerbitzuan bertan eman ahal izango dute Erandioko ikastetxeko ikasleek zein erandioztar guztiek. Guztira, udalerriko saltokietan erosteko 1.530 euroko bonoak banatuko dituzte, kategoria ezberdinetan. Bertsozaleen kasuan, hiru kategoria izango dira: hamabi urtetik berakoena, 13 eta 16 urte bitartekoena eta 17 urte edo gorakoena. Txikienek gutxienez 4 kopla egin beharko dituzte gutxienez, eta gehienez 3 bertso. Bertso kopuru hori izango da 13 1ta 16 urte bitartekoen gutxiengoa eta 8 gehienezkoa. Nagusiek, aldiz, 8 eta 12 bertso artean idatzi beharko dituzte. Gaia eta doinuak libreak izango dira, baina ezinbestekoa izango da sortaren doinua ongi adieraztea. Kategoria bakoitzean saridun bakarra izango da. Argazkian, Getxo udalerrian ALBEk antolatzen duen Balendin Txiki Bertso-Paper Lehiaketaren azken saridunak / Nahikari Ayo - ALBE.
  Kultura 2008-09-30 22:12

Getxoko klubek euskaraz eskaintzen dituzten entrenamenduen berri ematen du Kirola Euskaraz Gidak

Erabiltzailearen aurpegia Ukberri Getxoko Udal Euskara Zerbitzuak 2008/09ko Kirola Euskaraz Gida kaleratu berri du, tokiko erakundeak eta Bizarra Lepoan euskara elkarteak sustatu eta dinamizatzen duten Gehitu Kirolera egitasmoaren barruan. Egitasmo hori Getxoko Udalak herriko gizarte eremu ezberdinetan euskara normalizatzeko martxan daukan Getxo Euskalduntzeko Hitzarmena (GEHI) proiektuaren adarretako bat da. Horren ildotik, iaz 32 kirol elkartek euskara sustatzeko hitzarmenak izenpetu zituzten, gure hizkuntza bakoitza bere neurrian erabiltzeko konpromisoa hartuz. Hain zuzen ere, konpromiso horien berri eta elkarte horiek euskaraz eskaintzen dituzten entrenamenduen berri ematea da Kirola Euskaraz Gidaren helburua. Horrela, elkarte edo talde bakoitzak, hartutako konpromisoaren arabera, euskaraz eskaintzen dituzten zerbitzuak zehazten ditu argitalpenak, tartean ea txartelak elebidun dauden, bazkideentzako eskutitzak zein hizkuntzatan bidaltzen diren edo entrenamenduak euskaraz izateko aukerak. Argazkian, Gehitu Kirolera! hitzarmena sinatu duten hainbat kirol ordezkari Imanol Landa alkatea eta Bizarra Lepoaneko ordezkariekin batera Euskal Kultur Jardunaldietan / Bizarra Lepoan.
  Kultura 2008-09-30 21:04

Pinuetako kultur etxe berria aurkeztu du Leioako Udalak

Erabiltzailearen aurpegia Ukberri Cervantes plazaren aurrean, Maiatzaren Bata eta Nafarroa kaleen izkinan dagoen Leioako Pinuetako kultur etxe berria "dagoneko martxan" dagoela jakinarazi du gaur Eneko Arruebarrena alkateak. Bertako lokala erosten, atontzen eta altzariak jartzen 360.000 euroko inbertsioa egin du tokiko gobernuak. 110 metro koadroko areto berrian orain arte Lapurdi kalean zeuden ludoteka, txikientzako ikasketa gela eta ikas-laguntza eta helduen eskulanetarako tailerrez gain, interneterako eta informazio guneak, erabilera anitzeko gela eta biltegiaz ere gozatu ahal izango dute auzokideek. Izan ere, kultur etxe berria Leioako Udalak Lapurdi kalean jarraitzen duen Pinuetako nagusien etxea handitzeko urrats baita. Nagusien etxean dagoeneko lanak hasi dira eta orain arte kulturari eskainitako aretoak aitite-amamentzako azpiegiturak ordezkatuko dituzte. Dena den, udal bulego deszentralizatua, hitzaldi aretoa eta areto nagusia nagusien etxean jarraituko dute, elkarte eta auzokide guztientzat irekita.
  Kultura 2008-09-30 17:49

Euskal dantza ikastaroa antolatu dute Erandion

Erabiltzailearen aurpegia Ukberri Gautxoriak kultur elkarte erandioztarrak "Euskal plaza dantzak" izeneko ikastaria antolatu du, 16 urtetik gorako lagunentzat. Gauzak horrela, urritik abendura (hiru hilabete), astelehenero emango dituzte eskolak, Altzagako antzinako udal azokan. Ordutegia, berriz, 19:30etik 21:00etara izango da. Izena eman nahi duten guztiak Gautxoriak taldeak San Jeronimo kaleko 22. zenbakian daukan egoitzara hurbildu beharko dira, arratsaldeko 7etan, edo bestela 679 353 690 telefono zenbakira deitu. Bitartean, oraindik geratzen dira tokiak Kilometroak 2008 jaira joateko, Berbots Erandion Euskaraz! elkarteak antolatutako autobusean. Osteguna, urriak 2, izango da izena emateko azken eguna. Horretarako La Plaza tabernara jo beharko dute aurten Iruran ospatuko den Gipuzkoako ikastolen aldeko festan parte hartu nahi dutenek, edo bestela 635 720 579 telefono zenbakira. 5 euro ordaindu beharko dira. Autobusa goizeko 9etan abiatuko dira Altzagako ontziralekutik, Gipuzkoa aldetik 19:30ean bueltan etortzeko. Argazkian, ume eta helduak batera dantzan.
  Kultura 2008-09-29 21:58

Kilometroak jaialdira joateko autobusa antolatu du Berbotsek

Erabiltzailearen aurpegia Ukberri Iruran ospatuko da igande honetan, urriak 5, Gipuzkoako ikastolen aldeko aurtengo jaia, "Eraikitzen" lematzat hartuz. Gauzak horrela, autobusa antolatu dute Berbots Erandion Euskaraz! elkartekoek, bertan parte hartu nahi duten guztientzat. Horrenbestez, goizeko 9etan abiatuko dira Altzagako ontziralekutik, Gipuzkoa aldetik 19:30ean bueltan etortzeko. Izena emateko, 5 euro ordaindu beharko dira, horretarako La Plaza tabernara hurbilduz. Osteguna, hilak 2, izango da azken eguna. Bitartean, Iruran egitaraua prest dute jada Kilometroak 2008 festarako. Ohikoak diren musika kontzertu edo bertsolari ekitaldiez gain badira berrikuntza aipagarriak. Edoskitze eta bluetooth guneak, edo zeliakoentzat menu bereziak, esaterako. Aurtengoan kale animazioak garrantzi berezia izango du gainera, perkusio taldeekin eta txarangekin, besteak beste. Argazkian, Erandion zein Erandiotik kanpo hainbat ekitaldi antolatzen ditu Berbotsek, tartean ekainaren 15ean udalerriko kaleak alaitu zituen Kantaguneak.