Iritzia 2008-06-05 19:05

Lander Solozabal: "III. Mintza Eguna Getxon"

Erabiltzailearen aurpegia Ukberri Hemen da hirugarrena. Iruñean eta Donostian egin ostean, aurten Getxon izango da Euskal Herriko Mintza Eguna. Hainbat auzo, herri, hiri eta hiriburutatik ehunka etorriko dira jai egun berezi honetara: berbalagunak, mintzalagunak... lagunak. Ondo pasatzera, elkar ezagutzera eta euskaraz hitz egitera. Getxoko Bizarra Lepoan euskara elkarteak orain dela hamar urte baino gehiago jarri zuen martxan berbalaguna proiektua; urte batzuk geroago Egizu elkartea sortu eta horrek hartu zuen lekukoa. 50 lagun hasieran, 170 gaur egun, 27 taldetan banatuta, euskara plazaratzen, txoko eta bazterretan zabaltzen. Euskaldun zaharrak eta euskaldun berriak –euskaldunak– elkarrekin, bakoitza bere mailan eta lotsa etxean utzita, euskaraz; tabernan, plazan, mendian, frontoian, kirolean, hitzaldietan, irteeretan... edonon. Argazkian, Lander Solozabal, ezkerrean, Jose Ramon Bilbao Getxoko EAren alkategaiarekin.
  Iritzia 2008-06-04 20:55

Christian Reinicke: "Gobela ibaia gainezka"

Erabiltzailearen aurpegia Ukberri Gainezka egin du Gobela ibaiak Berangon eta Getxon. Bilbon eta Bizkaiko beste eskualde batzuetan ez bezala, gurean 1983ko eta 1979ko uholdeen parekoa izan da pasa den domekakoa, Gobelaren urak Itzubaltzetatik Abrara zuzen isurtzeko duela 10 urte eraiki zen ubideari esker Romo eta Areeta auzoak oraingoan aparteko kalterik izan ez duten arren. Kalteak pairatu berri dituzten herritarrak laguntza eske ari dira eta aseguru etxeen partzuergotik ezezik, administrazio publikoen aldetik ere erantzun egokia eta baikorra merezi dute. Larrialdi abisua garaiz eta ondo ez ematea larria bada ere, arazo larriena ez da hori. Arazo larriena eta sakonena da Udalak, Foru Aldundiak eta Jaurlaritzak onetsi dituztela lurralde antolaketa eta hirigintza planak eta eman dituztela etxeak eraiki eta bertan bizitzeko baimenak. Duela ehunka urte getxotarrek zerbaitengatik jarri zioten eremu horri Fadura (= Padura) izena. Baina errekak uholde garaian hedatzeko behar duen eremuan, espekulazioak eta erakundeek eraikitzeko lurrak ikusten dituzte. Administrazioen erantzukizuna argia da. Argazkian, uholdeak Algortako Getxo I institutu parean.
  Iritzia 2008-06-04 17:57

Maritxu Teilagorri: "Leioako herriari"

Erabiltzailearen aurpegia Ukberri Maritxu Teilagorri Txosna Batzordeak, jadanik, 10 urte baino gehiago daramatza lanean Leioan, jai herrikoi eta partehartzaileen alde. Auzolan luze honetan herri, kirol eta kultur talde ezberdinak izan dira partaide. Nork bere eremutik, bere ekarpena egin dio guneari eta bereziki jai herrikoien aldeko ahaleginari. Hasieran, txosna bakarra zen, urteekin 3, 5 eta egun 8 txosnek osatzen dute gunea. Burututako lanak, herrian eta herritarren artean zilegitasuna eman digu, egun osatzen dugun jai egitaraua antolatzeko. Jai herrikoi eta partehartzaileen bidean, ekimen eta egitarau ezberdinak osatu ditugu, betiere ahalik eta zabalenen egiten eta herriko jendearekin konpartitzen. Aurtengoan Leioako San Juan jaiak Ekainaren 19tik 24ra ospatuko dira. Sei egun Leioako herriak jaiaz gozatzeko. Jaietan osatzen diren gune eta eskaintza ezberdinetan parte har dezan. Baina Leioako herrian gune guztiak ez dira berdinak Udalarentzat.
  Iritzia 2008-05-30 14:09

Alain Labajo: "Lancre eta bere ondorengoak"

Erabiltzailearen aurpegia Ukberri 2006ko Gabonak. Udaletxera joan behar errolda agiria lortzera. Anaia ere bazetorren. Heldu eta udaletxe atarian udaltzain talde bat; ni aterantz. Geldiarazi eta, gaztelania zuzenean, zertara nindoan galdetu zidan batek. Ni, harritua (herriko etxea baita), baina zertara nindoan azaldu nion, euskaraz, prefosta. Gaztelaniaz egin ezean ez nintzela sartuko erantzun berak, nire harridura haserre bilakatzen zelarik. Azkenean, bost minutuz eztabaidan egon ostean, polizien arteko zirrikitu batetik sartu eta, udaletxeko leihatilan nire hizkuntza arrotza bazen ere, nire agiria lortu nuen. Anaiari berdin gertatu zitzaion. Kanpoaldera gindoazelarik, atarian, gazte talde bat eta udaltzainak bultzaka zebiltzan. Bere garaian Behatokian salatu nituen gertaerak. Argazkian, Alain eta beste bi gazteren aurkako epaiketaren kontra Algortako Gazte Asanbladak eman zuen prentsaurrekoa.
  Iritzia 2008-05-29 21:03

Itzubaltzetako Segi: "hipokresia bagoiak"

Erabiltzailearen aurpegia Ukberri Euskal gizartearen gehiengoak bat egiten du abiadura handiko proiektuarekin. Ez ezerk ez inork ez du eraikitzea ekidingo. Irmotasun horrekin iragarri zuen Mikel Cabieces Espainiako Gobernuaren Bizkaiko ordezkariak Bizkaiko lanen hasiera. Ziurtasunik gabe dabilenaren irmotasunarekin, edo gezurretan ari dela dakienaren irmotasun faltsuarekin. Hamarkada bat daramate gu konbentzitu (engainatu) nahirik, handik edo hemendik proiektuaren onurak azalduz, baina oraindik zalantzak gehiegi dira horren ona omen den proiektu horretan. Izan ere, guk ez dugu denborarik alferrik galdu, urte guzti hauetan geroz eta gehiago dira proiektua geratzeko eskatzen duten ahotsak, publikoki eztabaidatzea eskatzen dutenak, hitza herritarroi ematea eskatzen dutenak. Argazkian, 2007ko abenduaren 15ean Arrasaten 15.000 bat pertsona bildu zituen AHTren aurkako manifestazioak / ahtgelditu.org.
  Iritzia 2008-05-26 16:13

Algortako Gazte Asanblada: "epaiketa fartsarik ez!"

Erabiltzailearen aurpegia Ukberri Maiatzaren 28an Uribe Kostako hiru gazte epaituko dituzte Bilbon; Algortako Mentxakabarri gaztetxearen aldeko kontzentrazio baten ostean gertatutako istiluengatik epaituko dituzte. Gazte hauek ez ziren momentuan identifikatuak izan, herri mugimenduan parte hartzeagatik ezagutuak izan zirelako, inputatu gisa deitu dituzte deklaratzera. Egun horretan gertatu zena hau da: Getxoko Alderdi Popularrak, gazte mugimenduaren eta gaztetxeen aurkako kanpainia aurrera eramateko hautua egin zuen aspaldi. Mentxakabarri gaztetxearen aurrean prentsaurreko bat burutzera joan zirenean, gazteok haien ezezko borobila adierazteko bertara hurbiltzeko deia luzatu zuten. Dei horrek ekarri zuen erantzunagatik prentsaurrekoa udaletxera mugitu zen.
  Iritzia 2008-05-23 21:08

IA: "UPVko hauteskundeen inguruan egiten dugun balorazioa"

Erabiltzailearen aurpegia Ukberri Hiru dira atzokoaren inguruan esan nahi ditugunak: jazotakoaren balorazioa, salaketa eta hausnarketarako gonbitea: Alde batetik, atzoko hauteskundeak Juan Ignacio Perezek azken urteetan mantendu duen politikaren neurgailu bezala ulertuta, argi gelditu da unibertsitateko komunitatearen iritzia. Alde batetik, irakaslego eta AZPko langileriak, hauteskundeetan Iñakori ezezkoa emateko parte hartzea erabaki dute. Bestetik, eta batez ere, ikasleriak Iñako bere lekuan jarri du %97ko abstentzioarekin. Asteartean eginiko agerraldian errektoregaiak ikasleak bozkatzera deitu zituen “biolentoak” bere lekuan jartzeko. Ikasleriak dei honi erantzun dio, baina ulertu du, unibertsitate honetan bortitzak eta inposatzaileak bere lekuan jartzeko bidea ez zela bozkatzea, abstenitzea baizik.
  Iritzia 2008-04-30 21:45

Iruzurrik ez! Urratsez urrats, Euskal Herri euskalduna eraiki!

Erabiltzailearen aurpegia Ukberri Pasa zen apirilaren 24an, ostegunarekin, Nafarroa Garaiko Euskararen Legea aldatzeko eztabaida hasi zuten foru parlamentuan. 1986tik ukitu gabe izandako legea erreformatzera etorri ziren honela. Ezbaian zegoena, 22 urtez indarrean egondako eremuen banaketa izan zen. Hartutako erabakiekin, euskara hirutan zatitzen duen politikarekin jarraituz, eremu mistora bost herri gehiago batzea ebatzi zuten. Bozka ematean, PSN, NEB eta NaBai izan ziren honen aldeko bozka eman zutenak. EHEtik gogor salatu nahi ditugu euskararen zatiketa eta bazterketa aurrera daroaten politika eta interesak. Zentzu horretan, euskara bigarren postuan mantentzearen alde egiten dutenen jarrera gaitzesten dugu. Oker dabiltza, euskararen lurraldea eta euskara bera bakarra izanik, honen banaketa eragin eta eremuka eskubide batzuk onartu eta beste batzuk deusezten dituztenak; horiek ez dute gure hizkuntza nazionalaren alde egiteko inolako asmorik azaltzen, are eta gehiago, neurri murriztaileak eta sakabanatzaileak bultzatzen dituztenei men egin eta beraien aurrean makurtzen dira, euskararen etorkizuna zalantzan jarriz. Argazkian, "Getxon ere eskolak euskaldundu behar du" lelopean hainbat lagun elkartu ziren udaletxe aurrean, hilaren 24ko osoko bilkura hasi baino ordu erdi lehenago.
  Iritzia 2008-04-25 12:45

Gazteok Bat Irabaziko Dugu!

Erabiltzailearen aurpegia Ukberri Itzubaltzeta / Romon sortu berri den plataforma, salaketak egiten hasi da Artatza-Romo institutuan irakaskuntza dekretuaren kontra. Euskal Herriko gazteria alde guztietatik erasoak jasaten ari da eta Itzubaltzeta / Romon ez da bestelakorik gertatzen. Euskal Herriko gazteriak sufritzen dituen erasoei aurre egiteko, Itzubaltzeta / Romon plataforma bat eratu dugu, Gazteok Bat Irabaziko Dugu! lelopean. Beste behin ere, gazteria errepresioaren jomugan jarri da. Oraingoan Artatza-Romoko institutuaren zuzendaritza izan da ikasleon kontrako erasoa egin duena. Euskal Autonomi Erkidegoan irakaskuntzako dekretu berria jarriko da martxan. Artatza-Romo institutuko zuzendaritzak dekretua ikasleon eskubide eta betebeharren moduan saltzen duen arren, zigorretan oinarritutako dekretua baino ez da eta horren erakusgarri dira azken hilabeteetan ikasleok jasandako erasoak (espedienteak irekitzeko mehatxuak, greba eskubidearen urraketa, eta abar). Argazkian, pasa den apirilaren 12an aurkeztu zen Gazteok Bat Irabaziko Dugu! ekimena.
  Iritzia 2008-04-23 23:50

Gure ama hizkuntza

Erabiltzailearen aurpegia Ukberri UNESCOk dioenaren arabera, pertsona guztiek dute ikasketak ama hizkuntzan egiteko eskubidea. Esan horri eutsiz adierazten du bere ezinegona “plataforma por la libertad de eleccion linguistica” delako elkarteak. Ezinegona eta sumindura omen dute, antza ikasketak euskaraz egitean euren ama hizkuntzari muzin egiten zaiolako, gaztelerari hain zuzen ere. Idazki honetan ama hizkuntzaz hitz egin gura nuke. Izan ere, orain dela milaka urtetatik euskaldunok euskara izan dugu ama hizkuntza, eta milaka urtetan euskaldunok euskara erabili dugu geure harremanetarako, geure jolasetarako, geure emozioak adierazteko... Bitartean geure herria hain leku estrategikoan kokatuta egonik, urteotan hainbat herri eta tribu pasatu eta pausatu dira eta bakoitzak bere eragina izan du gugan, batzuetan aberasgarria besteetan kaltegarria. Kaltegarria, bai, ezen kanpotik etorritako hainbatek gure kulturaren asimilazio prozesuari ekin baitio era bortitz eta narrasean. Eta horiek ez dira “aspaldiko kontuak”, oraindik ere gure kultura eta hizkuntza zapaltzeko metodo horiek berton gogoan baititugu: euskaraz hitz egiten debekatzea, eskoletan euskararen erabilera zigortzea, euskaraz baino ez zekiten horiek artaburu atzeratutzat hartzea… Argazkian, biharko udal batzarrera begira, Getxo udalerriko Euskal Herrian Euskarazek (Gu EHE) zabaldutako kartela.
  Iritzia 2008-04-18 20:11

Iñigo Fernandez de Martikorena: "eskubide urraketez (gehiago) betetzen ari da Euskal Herria"

Erabiltzailearen aurpegia Ukberri Txiroek, emakumeek, euskaldunek, homosexualek, euskalduntzen ez duten hezkuntz ereduen ikasleek, ezgaitasun fisiko edota psikikoak dituztenek eta baztertutako beste sektore guztiek pairatzen dituzten eskubide urraketez gain, azken asteotan inoiz baino ageriago geratzen ari da "euskal gatazka" deritzotenari lotutako eskubideen urraketak gero eta jende gehiagorengana heltzen direla. Gaur goizean, eta aurreko hilabeteetan dozenaka lagun eraman dituztela, 13 gazte atxilotu ditu Espainiako Poliziak Oiartzunen, Oreretan eta Arrasaten, haietako hamarri kale indarkeria eragitea egotzita eta beste hiruri berriz Poliziari aurre egitea leporatuta. Itzubaltzeta / Romoko Segik "muntaia polizial-judiziala" salatu egin du, gogoratuz atxilotuei orain arte Segiko kideak izatea baino ez dietela egotzi. Gainera, aurreko sarekadetan nabarmenak izan dira torturaren lekukotasunak eta baita aztarnak ere. Atzo, berriz, amorrua PSE-EEk dituen herriko etxeetara eta ertzain-etxeetara heldu zen, Bilboko Abusu auzoko PSE-EEren egoitzan ustez ETAk jarritako lehergailua dela medio, zeinak zazpi ertzain zauritu zituen eta dagoeneko dozenaka "arbuio eta gaitzespen" adierazpenak eragin dituena. Konponbideak jarri ezean gaurko zein atzoko egoerak maiz errepikatzeko arriskua dagoela jakiteko ez da oso azkarra izan behar. Argazkian, gaurko atxiloketak salatzen dituen kartel bat, Algortan.
  Iritzia 2008-04-11 15:21

Alaitz, Eider eta Pello Ruiz de Agirre Larreategi: "maite zaitugu, Jabi!"

Erabiltzailearen aurpegia Ukberri Amorruz hartu genuen, Jabi, zure gaixotasunaren berri. Madarikatzen dugu heriotza ate-joka bat-batean etortzen denean. Baina borrokalaria izan zara, borrokalari handia, eta duintasunez eutsi diezu enbataren azken erauntsiei, tinko, heriotzari aurrez aurre begiratuz, azkeneko hatsa lehenago eman izan bazenu bezala. Gaixotasunak astiro itzali zaitu, zuk maite zenituenak banan-banan agurtu zenituen bitartean, zure erara, bizitzako azken momentuak zurekin konpartitzeko aukera eskainiz. Heriotzak gure albotik eraman zaitu, itsasoaren muturrera, eguzkia udako ilunabarretan ezkutatzen den lekura, gu iritsiko ez garen tokira. Eta gogorra da agur esatea, gero arte batez ordezkaezin bihurtzen denean; gero arte batekin agurtuko gara beraz, negarra begietan, baina harro. Zure hutsuneak eragindako malkoek orria bustiko dute, baina egon zaitez lasai, bihotzean ditugu idatziak maitasunez beteriko lerroak, malkoen gaziak ezabatu ezin dituen tokian.
  Iritzia 2008-04-07 16:48

Gotzon Egia, Mikel Iturbe eta Arkaitz Zubiaga: "Euskarazko Wikipediak 25.000 artikulu"

Erabiltzailearen aurpegia Ukberri Euskarazko Wikipediak, sarean den euskal entziklopedia aske handienak, 25.000 artikuluen muga gainditu du. Wikipedia entziklopedia eleanitza da, eduki askeduna eta doanekoa, edonork eraiki eta ekarpenak egiteko aukera ematen duena. Entziklopedia tradizionaletan ez bezala, Wikipediak bere komunitatearen ahaleginean uzten du artikuluak sortzea, gainbegiratzea edota zuzentzea. Komunitate horren partaideei wikilari edota lankide deritze. Ez dago artikuluak berrikusten dituen lantalde profesionalik, wikilarien eskuetan geratzen da dena. Ez dago agintzen duen inor, erabakiak wikilari guztien arteko bozketa bidez ematen baitira, ahal den adostasun handiena bilatuta betiere. Proiektu asko sortu izan dira historian zehar Euskal Herrian auzolanaren bidez. Ez dugu inolako dirurik edo ondasun materialik jasotzen eginiko lanagatik. Hala ere, ikasten den guztia, gisa honetako proiektu baten partaide izatea edota Argia Sarien bitartez izandako aitorpena, hori dena ordainezina da.
  Iritzia 2008-04-04 14:46

Fredi Paya: "Zitarrosa"

Erabiltzailearen aurpegia Ukberri Ez nuen espero Montevideoko antzoki nagusia goraino beteta ikusterik bertsolariei entzuteko. Baina hala izan zen, Brasil, Uruguai eta Argentinako payadoreen laguntzarekin. Lau biztanletik batek euskal arbasoak dituen errepublikako hiriburuan. Euskal Herriko inprobisazio moldea eta ariketa motak azaldu genituen pasartean, izugarria zen bertsotik bertsora sentitzen zen isiltasun eta tentsioa. Entzuleak, hizkuntza ezagutu ez arren, nahiz eta baziren zenbait salbuespen, inprobisazioaren mekanika ulertu eta zailtasunak bere egin zituen. Itzulpenen ostean txalo zaparradak. Inprobisazio hegoamerikar lirikoagoaren aurrean gure estetika narratiboak komunikazio izugarria lortzen zuen jendearengan. Argazkia: Koska irratia.
  Iritzia 2008-03-30 19:04

Algortako Gazte Asanblada: "gerra deklaratzen diegu"

Erabiltzailearen aurpegia Ukberri Aurrera jarraitu behar dugu! Gure eskuetan daukagu etorkizuna! Gaur egungo sistema honek iluntasun eta diruaren esklaboak izatera kondenatzen gaitu. Gazteok erabiltzen gaituzte motor kapitalista hau elikatzeko, beti ere, beraien negozio zikinen mesedetara. Komunikabideen manipulazio bortitza jasotzen dugu, lan baldintza txarrak eta prekarietatea areagotu besterik ez dira egiten ari, eta babes ofizialeko etxeak eraikiz isilarazi nahi gaituzte gazteok! Gure Amalurrak, bere zainetan ari da sufritzen gizarte honen arduragabekeri gordina, eta hori ordainduko dutenak gu gara: gazteok! Diseinatzen duten gizarte eredu honek, orain arte, mendeetan zehar herriak ereindako bizi-harreman eta ohitura zaharrekin apurtu nahi du. Guk argi daukagu, ez dugula haien menpe bizi nahi, sistema honi uko egiten diogula, sistema hau suntsituko dugula, beste errealitate bat merezi dugulako, bai guk eta baita ondorengoek ere.