Jendartea 2008-02-21 21:00

Bost lagun atxilotu dituzte Astrabuduan aparkatutako hiru kamioietako gasolioa lapurtu dutelakoan

Erabiltzailearen aurpegia Ukberri Erandioko ertzain etxeko agenteek lau gizon eta emakume bat atxilotu zituzten atzo, asteazkena, gaueko ordu txikietan, indarra erabilita lapurreta egitea leporatuta, Eusko Jaurlaritzako Herrizaingo Sailak jakinarazi duenez. Polizia iturriek diotenez, gaueko hamabiak jo baino minutu gutxi lehenago jazo ziren gertaerak, Astrabuduako metro geltokiko aparkalekuan. Hainbat herritarrek ohartarazita, bertartu ziren polizia agenteek hiru kamioiren erregai ontzietako tapoien sarrailak indarrez irekita zeudela egiaztatu zuten. Horrez gain, inguruan, barruan bost pertsona zituen auto baten maletategia erdi-irekita zegoela ikusi zuten agenteek, bertsio horren arabera. Horren barruan, kanpotik soka baten bidez itxita zegoen maletategian, hogeita bosna litroko bost ontzi aurkitu zituzten, dirudienez kamioi horien erregai ontzietatik hartutako gasolioz beteta. Horren guztiaren aurrean, ibilgailuaren barruan zeuden bost pertsona horiek (Burgoseko bizilagunak diren lau gizonezko eta Santurtzin bizi den emakumezko bat dira, eta 17 eta 34 urte artean dituzte) atxilotu zituzten, indarra erabiliz lapurreta delitua egitea leporatuta. Argazkian, hainbat ertzain auto, artxiboko irudi batean.
  Jendartea 2008-02-21 20:38

Trafikoa moztuko dute asteburuan Avanzadan oinezkoen pasabide bat jartzeko

Erabiltzailearen aurpegia Ukberri Leioako Udalak gaur jakinarazi du asteburu honetan trafiko mozketak izango direla Avanzadako errepidean, Bidekurtzioko parkea eta udal euskaltegia eta musika eskola lotuko dituen oinezkoen pasabidea jartzeko. Hori dela eta, larunbatean, 15:00etatik aurrera, Bilbotik etorrita Avanzadatik igarotzen diren ibilgailuek ezin izango dute, Bide-Ona gasolindegitik Mendibileko biribilgune berrian dagoen lurrazpiko itzulbidera heldu nahi izanez gero, itxita egongo delako. Bestetik, larunbateko 21:00etatik igandeko 9:00ak arte ezin izango da alboko bideetatik eta erditik zirkulatu (tunelak barne) Leioa udalerriko bidegune osoan, edozein noranzkotan (Artatzako biribilgunetik Bide-Ona gasolindegietaraino).
  Jendartea 2008-02-20 19:22

Araztegiari buruzko hitzaldia izango da bihar Lamiakon

Erabiltzailearen aurpegia Ukberri Ostegun honetan, otsailak 21, Lamiakon aurreikusitako hondakin uren araztegiaren (HUA) proiektuari buruzko hitzaldia egingo dute aipatu auzo leioaztarrean. Hain zuzen ere, araztegiaren kontrako koordinadorak antolatu du saioa eta Iñaki Antiguedad EHUko Hidrologia irakasleak hitza hartuko du horretan."Lamiakoko araztegiaren kontrako koordinadorak proiektuaren kontra jarraitzen du egiten -obrak urte honetan hastekoak dira- eta bertan, auzokideen elkarteak eta eragile ezberdinak batuta daude", antolatzaileek azaldu dutenez. Biharko hitzaldia Zentro Zibiko zahar etxean izango da, arratsaldeko 8etatik aurrera. Argazkian, pasa den azaroaren 25ean, metro geltoki ondoan, Lamiakoko auzokideen plataformak egindako sinadura bilketaren irudi bat / La depuradora.
  Jendartea 2008-02-15 19:01

Zuhaitzak landatzen ibili dira Gobela ikastolako neska-mutilak

Erabiltzailearen aurpegia Ukberri Gobela ikastolako Lehen Hezkuntzako goi zikloko ikasleek zuhaitzak landatzen eman dute gaurko goiza, Gobela errekaren eskumako ertzean, Leioako etorbidea eta Karmen arteko zatian. Ekimena ibai bazterrak babesteko Uraren Euskal Agentzia aurrera eramaten ari den ekitaldien artean kokatzen da. Landatutako zuhaitzak lizarrak, haltzak eta sahatsak dira. Aldi berean, kaltegarria izaten ari den banbu japoniarra haztea ekiditeko ekintza esperimentala ere burutu dute. Besteak beste, "ibaien egoera hobetzeko bakoitzak konpromiso txikia hartzea eta, horiez gozatzeko, neska-mutilek ingurumena babes dezatela sustatzea" dira ekimenaren bidez lortu nahi izan dituzten helburuetako batzuk, tokiko udal iturrien arabera. Argazkian, mutiko bat zuhaitza landatzen.
  Jendartea 2008-02-15 13:40

Diabetesari buruz berba egingo diete gaur emakumeei Erandion

Erabiltzailearen aurpegia Ukberri Erandioko Udaleko Osasun Publiko eta Kontsumo Sailak Altzagan eta Astrabuduan egingo du kontsumoari buruzko jardunaldien, 13. edizioa. Aurtengo edizioan honako gai hauek jorratuko dituzte: diabetes mellitusa, dieta mediterraneoak emakumearentzat dituen onurak eta ‘digestio arazoen tratamendu dietetikoa. Hitzaldiak Astrabuduako Josu Murueta kultur etxean eta Erandioko Emakumeen Elkarte Soziokulturalaren Altzagako lokal berrietan izango dira, arratsaldeko 17:30etik 19:00etara. HEZI nutrizio zentroko adituak izango dira hitzaldiak emango dituztenak. Egutegiari dagokionez, diabetes mellitas gaixotasunaren inguruko saioa gaur bertan izango ds Altzagan eta hilaren 22an Astrabuduan. Argazkian, Mikel Arieta-Araunabeña alkatea kontsumoari buruzko erakusketan.
  Jendartea 2008-02-15 12:42

Guatemalako hainbat ikastetxe eta emakume lagundu ditu Berangoko Udalak

Erabiltzailearen aurpegia Ukberri Emandako laguntzagatik herritar guztiei eskerrak emateko asmoz, 2007an gauzatutako hainbat lankidetza eta elkartasun egitasmoen laburpentxoa egin du Maria Isabel Landa Berangoko alkateak. Besteak beste, “Berangotik Guatemalara” proiektuaren barruan, bulego-altzariak, bi informatika-ekipo, ikus-entzunezko materiala eta azaroaren 25erako informazioari buruzko eskuorriak igorri zizkioten REDNOVI emakumeenganako indarkeriaren aurkako sareari. Horretaz gain, San Antonio Aguas Calientes udalerriko Hermano Pedro bigarren hezkuntzako herri ikastetxerako 100 idazmahai berri, telebista bat eta DVD aparailu bat eman zituen udal erakundeak. Baita instalazioak hobetzeko materiala ere. Azkenik, Guatemalako herri horretako lehen hezkuntzako Ikastetxe mistora tailerretan erabiltzeko materiala eman zuten. Argazkian, lankide boluntario bat Guatemalan / UNEX.
  Jendartea 2008-02-15 10:04

Iruñeako abortuaren aldeko manifestaziora joatera deitu ditu uribekostarrak Algortako Bilgune Feministak

Erabiltzailearen aurpegia Ukberri Azken aldian izandako prozesu judizialen, kliniken erregistroen, Nafarroako Gobernuak legea ez betetzearen eta beste hainbat gertakarien ondorioz, abortatzeko eskubidearen alde kalera ateratzeko beharra ikusi dute Euskal Herriko mugimendu feministako hainbat taldek. Hori dela eta, larunbat honetan, otsailak 16, manifestazioa egingo dute, 17:30ean, Iruñeako autobus geltoki zaharretik abiatuta. Horrenbestez, Algortako Bilgune Feministak Uribe Kosta eskualdeko herritar guztiak deitu ditu mobilizazioan parte hartzeara, "emakumeon eskubidea den aborturako aukera ozen aldarrikatzeko". Besteak beste, Bilboko San Nikolas elizaren paretik aterako dira autobusak bihar bertan, 15:00etan. Izena emateko 944 155 483 telefono zenbakira deitzea besterik ez dago. Argazkian, azaroaren 25ean, Algortako Bilgune Feministak deituta, emakumeen aurkako indarkeriaren kontra egindako elkarretaratzea.
  Jendartea 2008-02-13 21:27

Eguzki indarra erabiliko du Ibarrabarriko udal eraikinak

Erabiltzailearen aurpegia Ukberri Energiaren Euskal Erakundeak (EEE) 5.780 euroko diru-laguntza eman dio Leioako Udalari, Ibarrabarri enpresa-gunean altxatuko duen eraikinean eguzki-indarra erabiltzeko eta energia fotoboltaiko bihurtzeko. Laguntza hori energia baliabide berriztagarriak ustiatzeko 2007ko programaren barruan kokatzen da, EEE eta Energi Aurrezpen eta Dibertsifikatze Institutuaren arteko hitzarmenetik jaio zena. Udal ekipamendu berriak 4.500 metro koadro baino gehiago edukiko ditu. Bertan, industri-hezkuntzarekin zerikusia duten eskaintza guztiak elkartzea lortu nahi du Leioako Udalak, egun hainbat lokal ezberdinetan baitaude bananduta. Horrela leku berean izango dira Ikaslan LHI, tailer-eskola eta beste udal jarduera batzuk. Argazkian, Ibarrabarri enpresa-gunea.
  Jendartea 2008-02-13 12:07

Ostiralean hasiko dira "debekatutako hiriaren mapa" osatzen

Erabiltzailearen aurpegia Ukberri “Uribe Kostaren etorkizuna: berdintasun eta iraunkortasunerako lurraldea” lelopean Urdulizen azaroaren 9an eta 10ean antolatutako jardunaldien ostean, orain, mapan jaso nahi ditu errealitate guztiak Uribe Kostako Zerbitzu Mankomunitateak. Horrenbestez, tailerrok otsailaren 15ean eta 22an, 17:00etatik 19:00etara egingo dira, Urdulizko kultur etxean, bertoko, Berangoko eta Sopelako emakumeentzat eta otsailaren 16an eta 23an, 10:00etatik 12:00etara, Mankomunitateak Plentzian duen eraikinean (Eleizako plaza 16), Barrika, Gorliz, Lemoiz eta Plentziakoentzat. Parte hartu nahi duten emakume guztiek ahalik eta lasterren adierazi beharko dute. Izena emateko, 946 762 674 telefonora deitu edo e-postara idatzi (agenda21[abildua]uribekosta.org edo berdintasuna[abildua]uribekosta.org) beharko dute andreek. Saio hauetan parte hartzeko, gainera, ez da beharrezkoa azarokoetan parte hartu izana. Bi deialdiak udalerrien ezaugarrien arabera finkatu dira, baina aukera badaukate emakumeek ez dagokien taldean parte hartzeko, bakoitzaren beharrizanak kontutan hartuta.
  Jendartea 2008-02-12 22:28

Arruebarrena alkateak botatako "loreak" gogor kritikatu ditu Leioako ezker abertzaleak

Erabiltzailearen aurpegia Ukberri Avanzadako auziaren kontura Eneko Arruebarrena alkateak joan den asteartean botatako "loreei" erantzun zieten atzo, prentsaurrekoa emanez, Leioako ezker abertzaleko kideek. Besteak beste, tokiko agintariak berak esandakoak jarri zituzten mahai gainean "gezurra edo egia erdia esaten" nor dabilen frogatzeko: "lehenengo eta behin, EHk ezin izan zion ezelako oniritzirik eman proiektuari 1998ko azaroan, udaletxean ez baitzegoen. EH 1999ko ekainean aurkeztu baitzen udal hauteskundeetara lehen eta azken aldiz, espainiarrek geroago ilegalizatu baitzuten. Eta bigarrenik, ezin da esan 'Avanzadaren lurperatzea eta oinezkoentzako pasabidearen eraikitzea bidegabeki lotzen' ari garela, 'ezelako loturarik ez daukatenean'; eta jarraian adierazi '1998ko abenduan udalbatzak aho batez' onartu zuela 'Avanzadaren alboetako bideak asfaltatzea, itxi gabeko zatiak estaltzea eta lur azpiko oinezkoentzako pasabideak gainetiko pasabideekin ordezkatzea'". Argazkian, Leioako ezker abertzaleko kideak udaletxeko eskailera pean prentsaurrekoa ematen / Gaztesarea.
  Jendartea 2008-02-12 20:18

Sahararako hiru furgoneta, 20 ordenagailu monitore eta 700 toalla inguru eman ditu Metro Bilbaok

Erabiltzailearen aurpegia Ukberri Saharar errefuxiatuei elkartasuna adierazi nahi izan diete berriro ere metroko langileek. Iazko maiatzean bezala –orduan Ertzaintzak emandako ibilgailuak gidatu zituzten–, oraingoan, bederatzi hilabete geroago, Metro Bilbaok berak emandakoa (hiru furgoneta, 20 ordenagailu monitore eta 700 toalla inguru) eramango dute Alacanteco (Herrialde Katalanak) porturaino garraio konpainiako beharginek. Horrenbestez, bihar 17:00etan abiatuko dira Sopelako tailerretik metroko langileek, larunbatean Zorrotzaurretik (Bilbo) irtengo den Sahararen Aldeko IV. Euskal Karabanarekin bat egin eta Alacanteraino abiatzeko. Handik, itsasontziz bidaiatuko dute premiazko gaiok Afrika aldera; akabuan, Aljeria aldeko kanpamenduetara heltzeko. Metroko langileek egun libreak erabiliko dituzte Bilbo eta Alacanteko portuaren arteko 800 kilometroko joan-etorria egiteko. Metro Bilbaok adierazitakoaren arabera, langileek egun libreak erabiliko dituzte Bilbo eta Alacanteko portuaren arteko 800 kilometroko joan-etorria egiteko. Argazkian, elikagaiak eramateko Euskal Karabanak erabiltzen duen kamioietako bat.
  Jendartea 2008-02-12 18:54

Zarama tasaren gainean bihar onartzen dutena "ez da bete beharrekoa izango"

Erabiltzailearen aurpegia Ukberri Getxoko PPk eta PSE-EEk eskatu bezala, asteazken honetan, otsailak 13, ez ohiko udal batzarra egingo dute, zaramaren tasa %86 murriztea eta famili ugari eta merkatariei hainbat hobari ematea eztabaidatzeko. Alabaina, Imanol Landa alkate jelkideak berak gaurko prentsaurrekoan esandakoaren arabera, "nahiz eta proposamena onartua izan, ez da bete beharrekoa izango, eskaera hori bermatzen duten aurretiko txosten juridikoak eta ekonomikoak falta direlako". Proposamenak mozio izaera izango du, tokiko agintariaren hitzetan; "adierazlea soilik udal idazkariak ulertzen duenaren arabera". “Getxon zein beste edozein udalerritan, aurretiko tramitazioa bete behar dute arautegien aldaketek; eta hori ez da bete. PPk eta PSE-EEk Arautegi Organikoaren proposamenarekin egin zuten bezala, osoko bilkurara zuzenean eramatea erabaki dute, Gobernu Taldeari denbora behar duen aurretiko fase hori egiteko aukerarik eman gabe", azaldu du Landak. Argazkian, Marisa Arrue Getxoko PPko bozeramaileak urtarrilaren 29an aurkeztu zuen udal erregistroan ez ohiko osoko bilkura egiteko eskaera.
  Jendartea 2008-02-12 17:57

Getxoko epaitegiko, ertzain etxeko eta Begoña jauregiko aldaketen berri emateko ordu erdiko saio bana eskaini diete auzotarrei

Erabiltzailearen aurpegia Ukberri Getxoko Udalak hainbat batzar antolatu ditu, gaur arratsalderako, Hirigintzako Antolaketarako Plangintza Orokorrean (HAPO) behin-behinean onartutako hainbat aldaketen berri emateko. Horrenbestez, saioak udaletxeko batzar areto nagusian egingo dira. Lehenengoa, udal iturrien arabera, "etorkizunean herritarrei gero eta zerbitzu hobeagoa eman ahal izateko", Justizia Jauregia handitzeko lanei buruzkoa izango da, 18:00etan. Bigarrenean, berriz, epai bat bete ahal izateko, Sarri esparruari dagokion ordenantza baten aldaketari buruz arituko dira, 18:30ean. Ordu erdi beranduago, Begoñako gazteluko hotela izango da gaia; eta azkenik, 19:30etik aurrera, ertzain etxea handitzeko lanez jardungo dute. Horietako bakoitzari alegazioak aurkezteko epea otsailaren 29ra arte egongo da zabalik. Bestalde, Tokiko Gobernu Batzak Getxoko arkitektura-elementu adierazgarrien Babeserako Plan Berezia behin-behinean onetsi du. Argazkian, Joseba Arregi Hirigintza, Obra eta Zerbitzu zinegotzia.
  Jendartea 2008-02-11 22:45

Itsas mundua "maitatzen" erakutsi nahi die eskola umeei Getxo Aquariumek

Erabiltzailearen aurpegia Ukberri Getxo Aquariumek bi helburu nagusi jarri dizkio bere buruari 2008rako: alde batetik, itsas-mundua eskola umeei hurbiltzea; eta bestetik, behin-behineko erakusketak antolatzea, akuarioko bisita kopurua handitzeko asmoz. Keltse Eiguren Ingurumen zinegotziak ostiraleko prentsaurrekoan adierazi zuen neska-mutilei itsas hondoak duen garrantziaz kontzientziatzea "oso garrantzitsua" dela: "azken finean, itsas mundua erakutsi nahi diegu eskola umeei, ezagutu eta disfrutatu ondoren maitatzea lortuko dutelako”, gaineratu zuenez. Getxo Aquariumek urte honetan garatuko duen beste helburua hauxe da: bisitarien interesa piztu nahian, behin-behineko erakusketak antolatuko dituzte. Horiei buruz ere mintzatu zen Eiguren: “pertsonen interesa piztu nahi dugu, eta horretarako hauen ezagutza maila handituko dugu”. Argazkian, bost marrazoetako bat / Imanol Landa
  Jendartea 2008-02-11 22:03

Palestinako errefuxiatuen egoerari buruzko argazkiak daude ikusgai Leioako campusean

Erabiltzailearen aurpegia Ukberri Otsailaren 22ra bitartean, Biladi palestinar kultur zentroak antolatutako argazki erakusketa egongo da ikusgai Leioa eta Erandioko campuseko liburutegi nagusian, 11:00etatik 15:00etara. Errefuxiatu palestinarren egoera bizkaitarrei hurbiltzea da ekimenaren helburua, hau da, Bizkaiko herritarrak sentikor bihurtzea Palestinako errefuxiatuen errealitatearekiko eta egin duten ibilbide historikoarekiko. Bestalde, UNRWA (Nazio Batuen Erakundeak Ekialde Hurbilean Palestinako Errefuxiatuentzako duen Agentzia) duela 57 urte baino gehiagotik errefuxiatu palestinarrekin egiten ari den lana eta etorkizunerako dituen asmoak aurkeztu nahi dituzte. Argazkietan ikus daitekeen bezala, 5 lan-ildo jorratzen ditu UNRWAk: hezkuntza, osasungintza, larrialdiak, garapen ekonomikoa eta babes soziala. Biladi hitzak "nire lurra" esan nahi du arabieraz, okupatutako lurraldeetan eta errefuxiatu-eremuetan banatuta dauden 8 milioi palestinarren lurra alegia. “Egoera penagarria bizi dute herritarrek, deserrotze dramatikoa jasan arren, atsekabez eta itxaropenez etorkizun bidezkoagoa lortzeko borrokan dihardute”, azaldu dute elkarteko kideek. Argazkian, urtarrilean Sopelan jarri zuten erakusketa.