Jendartea 2007-11-21 20:54

Auzoen batzordea osatzea eskatu du Erandioko PPk

Erabiltzailearen aurpegia Ukberri "Lutxana, Enekuri, Fano, Gohierri, Asua edota Goikoa auzoetako bizilagunek ere hitza izan dezaten", herritarren parte hartzerako batzordea eratzea proposatu du Erandioko Alderdi Popularrak, hurrengo udal batzarrerako mozioa aurkeztuz. Hain zuzen, Astrabudua eta Altzaga populutsuak ez diren gainontzeko auzuneak "baztertu izana" egotzi dio, EAJko zinegotziek osatzen duten udal gobernuari, Javier Ruiz bozeramaile popularrak (argazkian). "Horren adibide, urteko aurrekontuetan horietara bideratzen duten diru kopuru eskasa", gaineratu duenez. Batzorde horren bitartez, hainbat gairen inguruan iritzia emateko eta poposamenak planteatzeko aukera izango lukete auzotarrek, PPkoen iritziz. "Altzaga eta Astrabuduako bizilagunei ere zabalik egongo litzateke, gainera", Ruizek zehaztu duenez.
  Jendartea 2007-11-21 18:47

Itzubaltzetako Ibar Nagusien Etxea bere XX urteurrena ospatzen dabil

Erabiltzailearen aurpegia Ukberri Itzubaltzeta / Romoko Ibar Nagusien Etxearen 5.000 bat bazkidek badute gaur poztasunerako beste arrazoi bat, askok eta askok "gure etxea" lez daukaten nagusien etxeak hogei urte bete baititu gaur. Goizeko 10:30ean hasi da eguna, hogei urte hauetan hil diren bazkideen omenez herriko San Jose elizan egindako mezaren. Ondoren 11:15ak aldera, prentsarako tartea egin du Jose Luis Irusta nagusien etxearen presidenteak, alboan Imanol Landa Getxoko alkatea eta Elena Coria zinegotzia izan dituela. Ondoren, ospakizunari ekin diote txistulariek. Gainera, aitite-amomek beraiek egindako Nagusien Etxeari buruzko bideoa proiektatu dute, bertako bazkide, langile, irakasle eta zuzendaritza kideen zein politikarien adierazpenak eta bideoaren "making-off" azalduz. Goizeko ekimena luntxarekin amaitu dute, baina arratsaldean 18:00etan dantzaldia izango dute orkestrarekin. Gainera, pintura tailerreko ikasleek erakusketa jarri dute egunotan eta etzi, azaroak 23, Erromoko Kantariak abesbatzak saio bat egingo du Ibarren, 19:30ean. Hilaren 28an, berriz, oraingo eta antzinako zuzendaritza kideei gorazarre bazkaria egingo die Getxoko Udalak. Bitartean, Imanol Landa alkateak nabarmendu du Ibar “zentro aitzindaria dela, udalerrian oso errotuta dagoena, batez ere Romon eta Areetan, eta partaidetzaren eta autogestioaren aldetik eredugarria dena”. Argazkian, Ibarreko hainbat kide bideoari so.
  Jendartea 2007-11-21 18:44

Josepa Cuco Antropologiako katedradunak eskainiko du hitzaldia bihar Leioako campusean

Erabiltzailearen aurpegia Ukberri Ostegun honetan, azaroak 22, “De jóvenes revolucionarios a alternativos maduros: los transitos de un partido de la izquierda revolucionaria” hitzaldia emango du, EHUren Erandio eta Leioako campusean, Josepa Cuco Antropologiako katedraduna Valentziako Unibertsitatean. Ekitaldia Soziologia 2. Saileko “Modelos y areas de investigación en Ciencias Sociales” doktoregotza programaren ekitaldi irekien zati da, unibertsitateko iturriek adierazi dutenez. Hain zuzen, aipatu saileko mintegian izango da solasaldia. Bestalde, bihar, berriro helduko diote "Las matematicas en la vida cotidiana 2007" zikloari, Bilboko Bidebarrieta liburutegian. Oraingo honetan, paper-txorien inguruan jardungo du, 19:30etik aurrera, Jose Ignacio Royo Matematika irakasleak. Argazkian, Gizarte Zientzietako Fakultatean egindako mintegia / EHU.
  Jendartea 2007-11-21 18:20

Emakumeenganako indarkeria saihesteko kultur saio didaktikoak antolatu dituzte Berangon

Erabiltzailearen aurpegia Ukberri Azaroaren 25eko Emakumeen Aurkako Indarkeriaren Kontrako Nazioarteko Egunaren harira, hilaren 24, 26 eta 27rako hainbat ekitaldi antolatu du Berangoko Udalak. Larunbat honetan, 19:00etan, “Las insustanciales” antzezlana egongo da ikusgai, Lula Teatro taldearen eskutik. Astelehenean, berriz, haurrentzako ipun kontalaria antolatu dute. “Bost urtetik gorako umeei zuzenduta dago jarduera hau, beraiekin emakumeen aurkako indarkeria, maskulinotasuna eta bestelako kontzeptuak lantzen hasi nahi dugu”, azaldu dute tokiko agintariek. Saioa 18:30ean izango da. Azkenik, asteartean, 19:00etan kontzertu didaktikoa izango da Impromptu taldearen eskutik. Ikusleek musika klasikoa ikasiz gozatuko dute. Ondoren luntxa ere egongo da. Ekitaldi guztiak Berangoetako kultur etxean egingo dituzte eta, aldi berean, ludoteka izango dute txikiek. Argazkian, "Las insustanciales" antzezlana iragartzeko kartelaren irudia / Circulo Cafe Teatro Valencia
  Jendartea 2007-11-20 23:58

Sutea izan da Erandioko enpresa batean

Erabiltzailearen aurpegia Ukberri Erandioko La Auxiliar Naval SA enpresaren eraikineko bigarren solairuan dagoen kartoi biltegian bost metroko su garrak ikusi zituzten atzo, astelehena, arratsaldeko 18:30ak aldera eta larrialdietarako zerbitzuetara deitu zuten arrapaladan. Hasierako alarmaren ostean, eta bost suhiltzaile talderi esker, 20:00etarako sua amatatuta zegoen eta 80 metro koadro baino ez ziren erre, sua beste aretotan zeuden margoak, azetileno eta bestelako material arriskutsuetara heltzerik izan ez zuela. Hori dela eta kalte ekonomikoak ez dira larriak izan eta ez da inolako zauriturik eragin. Lehenengo hipotesien arabera sua arazo elektrikoaren eraginez piztu zen. Asua ibaitik gertu, Lutxana eta Arriaga artean dagoen La Auxiliar Naval SA enpresak inoiz ez du bizi horrelakorik 1961ean sortu zenetik. Guztira, 3.000 metro koadro azalera dauka enpresak eta bertan 50 bat beharginek egiten dute lan. Batez ere, itsasontzientzako leihoak egiten dituzte, kanpo-argipen sistema estankoak eta suaren aurkako unitateak barne. Argazkian, suhiltzaileek Algortako Telletxe kaleko teilatua miatzen pasa den urrian.
  Jendartea 2007-11-20 21:50

Emakumeenganako indarkeriaren kontrako elkarretaratzea egingo dute ostiralean Areetan

Erabiltzailearen aurpegia Ukberri Alboa, Andrak, Bilgune Feminista, Eskuz-Esku, Etxekin, Gizatiar eta Roda emakumeen elkarteek indarkeria-egoerak salatzeko isilezko elkarretaratzea iragarri dute ostiral honetarako, azaroak 23, 19:30ean, Areetako Xake plazan. Imanol Landa alkate getxoztarrak horretan parte hartzeko deia luzatu du eta, aldi berean, "Udalak indarkeria mota horri amaiera emateko lan egiten segitzeko konpromisoa" berretsi du. Horren ildotik, gogoratu du osoko bilkurak tokiko gobernuak aurkeztutako agiria aho batez onartu zuela azken udalbatzan. Ez du aipatu, ordea, hori bozkatu ondoren, PSE-EEk aurkeztutako mozioa ere tokiko erakundean ordezkaritza duten alderdi guztiek onetsi zutela. Bestalde, batez ere nerabeei zuzendutako ekitaldiak izango dira nagusi, aurten, Getxoko Udalak hilaren 25ean izango den Emakumeen Aurkako Indarkeriaren Kontrako Nazioarteko Eguna dela eta, antolatutako kanpainaren barruan. Argazkian, emakumeen aurkako erasoak salatzeko, Getxoko Bilgune Feministak Algortan egindako kontzentrazioetako bat.
  Jendartea 2007-11-20 20:59

"Emakumea: zientzian elementu berritzailea" jardunaldiak bihar amaituko dira campusean

Erabiltzailearen aurpegia Ukberri Egunotan EHUko Leioa eta Erandioko campuseko Zientzia eta Teknologia Fakultateko Paraninfoak hartzen dituen "Emakumea: zientzian elementu berritzailea" jardunaldiak bere amaierara helduko dira bihar mahai-inguru bat dela medio. Bihar, asteazkena, 16:00etatik aurrera, jardunaldien azken saioan "Investigacion, ciencia y mujer" mahai-ingurua egingo da. Moderatzailea Mertxe Larrañaga, EHUko Berdintasunerako zuzendaria izango da, eta eztabaidan izango dira Jose María Martin Senovilla, EHUko fisikaria, Blanca Martinez, EHUko geologoa; Irene Polo, Kantabriako Unibertsitateko matematikaria eta Teresa Nuño, EHUko kimikaria. Jardunaldiek alde batetik, goren mailako zientzian emakumeen presentzia urria aztertzen dute, eta bestetik, emakume zientzialariek egiten dituzten goi mailako ikerketak nabarmentzen dituzte. Irudian, Izaskun Saez Velasco ikasleak egindako logotipo horrekin irabazi zuen Berdintasunerako Zuzendaritzari irudia emateko abiatutako lehiaketa, 2.000 euro eskuratuz.
  Jendartea 2007-11-20 20:27

Hiru atxilotu eta bi eraso izan dira pasa den igandean Uribe Kostan

Erabiltzailearen aurpegia Ukberri Pasa den igandean, hilak 18, bi pertsona atxilotu zituen Ertzaintzak Getxon eta Leioan, alkoholaren eraginpean gidatzen zutelakoan. Era berean, DYA elkarteak bi irteera egin zituen egun berean, bi erasoren biktimak artatzeko. Lehenengo kasuan senarrak eskailerak behera bota zuen andra, 45 urteko getxoztarra, Sopelako geltokian. Andra Gurutzeta ospitalera eraman zuten pronostiko erreserbatua zuela, eta W.G.S. 41 urteko senarra Ertzaintzak eraman zuen atxilotuta. Bestalde, goizeko 6:30ean DYAko bolondresek F.C.A. 31 urteko getxoztarra artatu zuten Algortako metro geltokian jazotako erasoaren ostean. Gaztea Gurutzetan ingresatu zuten pronostiko erreserbatua zuela.
  Jendartea 2007-11-20 19:34

Emakumeenganako indarkeriaren aurkako erakusketa paratu dute Sopelan

Erabiltzailearen aurpegia Ukberri Emakumeen Aurkako Indarkeriaren Kontrako Nazioarteko Egunaren inguruan, erakusketa bat antolatu dute Sopelako Udalak eta Uribe Kostako Mankomunitateak. Irudi eta testuen bitartez, herritarrak gai honen inguruan kontzientzatzea eta sentsibilizatzea bilatzen dute, tokiko arduradunek adierazi dutenez. Erakusketa hilabetea bukatu arte egongo da ikusgai, udaletxe sopeloztarreko erakusketa aretoan. Astelehenetik igandera gainera, 10:00etatik 14:00etara, goizez, eta 16:00etatik 19:00etara, arratsaldez. Bestalde, Berdinsareak, Berdintasunaren alde eta Emakumeen aurkako Indarkeriaren kontrako Euskal Udalerrien Sareak antolatutako kanpainarekin bat egin du Sopelako udal web orrialdea (www.sopelana.net). Banner batek bitartez “Maitasuna ez da mando batez kontrolatu daitekeen jokoa. Txo! Kontrolatzen?" lelopeko kanpaina ezagutzeko aukera ematen du. Argazkian, erakusketa iragartzeko kartela.
  Jendartea 2007-11-20 19:01

Abenduaren 2an Plentziako itsasadarra garbitzera deitu du Matrako mendi taldeak

Erabiltzailearen aurpegia Ukberri Plentziako Udala eta Proa ur-kirol elkartearen laguntzaz, itsasadarra garbitzen arituko dira, abenduaren 2an, Matrako mendi taldeko kideek; eta jardueran parte hartzera deitu dituzte nahi duten herritar guztiak. Hitzordua goizeko 10etan jarri dute, zubi berriaren alboan dagoen turismo informazio gunean. Hori bai, parte hartu nahi dutenek aurretik eman beharko dute izena, azaroaren 28a baino lehen, Goñi Portal kultur etxean. Garbitu ondoren, hamaiketakoa edukiko dute guztiek Plentzia Gorri ta Zuri Athletic-en lagunartearen egoitzan. Bestalde, larunbat honetarako, azaroak 24, ingurumena zaintzeari buruzko jardunaldia antolatu dute Sopelako Peñatxuri surf taldeak eta Euskal Herriko Surf Federazioak (EHSF). Besteak beste, Gaztelugatxeko Doniene (Bermeo) inguruko itsasbazter eta labarretako zaborrak garbitzen arituko dira, 11:00etatik aurrera. Argazkian, Plentziako itsasadarraren babesari buruzko ekitaldiak ugaritu egin dira azkenaldian; besteak beste, urriaren 6an, bertoko dragatze lanen aurka azaldu ziren surflariak / Sordos Surf Waves
  Jendartea 2007-11-19 20:07

Gizonezko bat atxilotu dute Sopelan emaztea eskailerak behera bota duelakoan

Erabiltzailearen aurpegia Ukberri Emakume bat ospitaleratu zuten atzo Sopelan, "senarrak bultzada eman ondoren Sopelako metro geltokiko eskaileretan behera jausi delako", Herrizaingo Sailak emandako informazioaren arabera. Gertakizuna goizeko 2:30ak aldera jazo ziren eta, Ertzaintzak topatutako lekukoen arabera, bikotea eztabaidan eta elkarri joka zegoen. Emakumeak kolpea zuen buruan eta aurpegia odolez zuen, eta ondorioz, osasun-etxe batera eraman zuten. W.G.S. 41 urteko gizonezkoa atxilotu egin zuten, genero-indarkeria ustezko delitua leporatuta. Testu-inguru horretan, Sopelako Itzartu emakumeen kultur elkarteak hainbat ekitaldi antolatu du igandean izango den Emakumeen Aurkako Bortxakeriaren Kontrako Nazioarteko Eguna dela eta. Hasteko, larunbatean, hilak 24, Itzartu antzez taldeak Enrique Suarez de Deza-ren "Aquellas mujeres" izeneko lana taularatuko du kultur etxean, 19:00etan. Igandean, berriz, udaletxeko sarreran manifestu bat irakurriko dute 19:00etan. Ondoren, puxikak askatu eta emakumeen aurkako bortxakeriaren inguruko filmaren bat proiektatuko dute. Argazkian, emakumeen aurkako erasoak salatzeko, Getxoko Bilgune Feministak Algortan egindako kontzentrazioetako bat.
  Jendartea 2007-11-19 17:23

Plentzian bi gazte atxilotu dituzte metroan bi graffiti handi margotzea leporatuta

Erabiltzailearen aurpegia Ukberri Getxoko ertzain-etxeko agenteek bi gazte atxilotu zituzten atzo arratsaldean Plentzian, metro bagoi batean bi pintada egitea egotzita. Eusko Jaurlaritzako Herrizaingo Sailak zabaldutako oharraren arabera, udalerri horretako geltokian bertan izan zen gertaera, 16:20ak aldera, trena bertan geldirik zegoela. Treneko gidariak bi gazte ikusi omen zituen, bagoi baten ezkerraldean pintadak egiten. "Egiten ari zirena aurpegiratu zien orduan, eta, ikusi zituztela konturatzean, ihes egin zuten", diote polizia iturriek. Metroko arduradunek Ertzaintzari gertakariaren berri eman zioten eta bi susmagarriak bilatzeari ekin zioten. Pixka bat geroago, lekukoek emandako deskribapenarekin bat zetozen bi gazte aurkitu zituen patruila auto batek, geltokitik gertu, inguru basotsu batean. Argazkian, graffitia metro unitate batean / Olakoena.
  Jendartea 2007-11-16 02:54

Lamiakoko hezegunea babestea eta araztegia jartzea bateragarri ikusten du PPk

Erabiltzailearen aurpegia Ukberri Ostiral honetan, azaroak 16, Lamiakoko ibarraren etorkizunari buruz arituko dira, Bizkaiko Batzar Nagusietako Nekazaritza eta Ingurumen Batzordean. Izan ere, gaur bertan eztabaidatuko dute, eremu hori babestutako hezegune izendatu dezatela eskatuz, Arturo Ignacio Aldekoa batzarkide popularrak irailaren 20an aurkeztutako arauz besteko proposamena. Bertan hondakin uren araztegia (HUA) jartzea "aukera ezin hobetzat" jotzen du Talde Popularrak, "aspaldi lehortutako padura (zenbateraino ze, hegazkinen lurreratze lekua edo futbol-zelaiak egon zirela han) babesteari dagokionak egiten hasteko". Orotara, 91.600 bat metro koadroko azalera edukiko duen azpiegitura eraikitzeak ez bide die kalterik eragingo bertoko fauna eta landareei, batez ere, padura igaroleku eta atsedenleku daukaten hegazti migratzailei. Bestalde, urriaren 18an, araztegian lur azpiko aparkalekua egin dezatela eskatzeko arauz besteko proposamena aurkeztu zuen PPko kide ere den Jesus Isasik eta, oraindik, erabakitzeke dago noiz eztabaidatuko duten. Aralar ere egitasmo horrekin bat dator. Argazkian, iItsasadarraren inguruan dena da industriala, baina oraindik kontraste polita egiten du Leioako nekazal inguruak, gero eta urrunago, txikiago... (Jabi Zabala) / Bilbao.Bi
  Jendartea 2007-11-15 14:56

Erandioko Andra Mari eliza ONCEren bost milioi kupoietan azalduko da

Erabiltzailearen aurpegia Ukberri Bere garaian Areetako itsas pasealekuarekin egin bezala, ONCE Espainiako Itsuen Erakunde Nazionalak Erandio udalerriko irudi bat erabili du bere zozketa txarteletan. Gaur zortzi, datorren ostegunean, azaroak 22, zozketatuko den ONCEren bost milioi kupoik eramango dituzte Erandioko Andra Mari elizaren irudia eta udalerriko armarria, elizatearen betiko ikurrak. Joseba Goikouria jarduneko alkateak (argazkian, ezkerrean) eta Bizkaian eta Araban ONCEren ordezkaria den Felix Najerak gaur goizean aurkeztu dute kupoiaren plantxa. Ekitaldian, kupoiaren irudia "keinu solidariotzat" jo dute eta gogora ekarri dute kaleak berriztatzean Erandiok hainbat oztopo arkitektoniko kendu duela eta Udalak urritasunak dituzten pertsonekin bilerak antolatu dituela bide horretan jarraitzeko. Era berean, ONCEren Fundazioak kupoien salmentaren %3 gorputz-urritu kolektibo ezberdinak laguntzera bideratzen duela gogoratu dute.
  Jendartea 2007-11-14 22:52

Algortako Etxe Arrosan dauden Getxoko udal sailak Itzubaltzetara eramango dituzte

Erabiltzailearen aurpegia Ukberri Algortako Etxe Arrosan Getxoko Udalak dituen Sailen bulegoak bihar, osteguna, Itzubaltzeta / Romora lekuz aldatuko dituzte. Izan ere, Algortako Etxe Arrosa zaharberritzeko egiten ari diren lanak direla eta, Kalitate, Kontratazio, Erosketak, Ondasuna eta Etxebizitza Udal Sailetako bulegoak Itzubaltzeta / Romoko Gobela Kiroldegira eramango dituzte Etxe Arrosaren lanak iraun bitartean. Hurrengo egunetik aurrera, ostiraletik, azaroak 16, aipatutako sailek beren zerbitzu guztiak toki horretatik eskainiko dituzte, ohiko ordutegian. Udalak sor daitezkeen eragozpenengatik barkamena eskatu du. Argazkian, Gobela polikiroldegiak hartuko ditu behin-behinean bost sailen bulegoak.