Nerea Zarragaren semea 2 urteko gelan hasi da aurten Plentziako eskolan. Ikasturte berriak, ordea, espero ez zuten arazo bat ekarri dio familiari: umea beganoa da eta eskolako jantokiak ez du %100 begetala den menurik eskaintzen. Etxetik janaria eramateko aukera ere ukatu dietela dio Zarragak; beraz, egunero 12:15ean jaso beharko dute umea. Ez da euren kasua bakarrik, eta egoera berean dauden hainbat familia antolatzen hasi dira Eusko Jaurlaritzari irtenbide bat eskatzeko. 

Klima-aldaketaz gehiago ikasi, Uribe Kostako hegaztiak ezagutu edo Gorlizko duna petrifikatuak gertutik ikusi. Horiek dira Gorlizek "Asteklima, Euskadiko Klimaren eta Energiaren Astea", ospatzeko prestatu dituen proposamenetako batzuk. Urriaren 16tik 25era bitartean, adin guztietako herritarrei zuzendutako jarduerak izango dira, ingurumena zaintzearen garrantziaz hausnartzeko eta egunerokoan ohitura jasangarriagoak sustatzeko.