Sopelako Udalak prentsa-ohar baten bidez azaldu duenez, Bilboko Zigor Arloko 3. Epaitegiak gizon biren aurkako epai irmoa eman du gaur, orain dela ia hiru urte lau udaltzaini lesioak eragiteagatik eta erresistentziagatik. Sei eta hiru hilabeteko espetxealdi bana eta isuna izan dira epaileak ipinitako zigorrak. Hirugarren auzipetua absolbitu egin dute.

Hasieran, azaroaren 28ko osoko bilkuraren gai-ordenan zegoen 2020rako Sopelako udal-aurrekontuen gaineko eztabaida, baina EH Bilduk osoko zuzenketa aurkeztu zuen, besteak beste aurrekontu-proposamena aztertzeko oso denbora laburra egon dela argudiatuta, eta EAJ buru duen udal-gobernuak gai-ordenatik puntua kentzea erabaki zuen. Abenduko osoko bilkuraren aurretik ere gaia lantzeko denbora nahikorik ez dagoelakoan, eztabaida urtarrilerako uztea adostu dute gaur talde biek.