Politika 2008-01-25 16:45

Preso italiarren alde bihar Bilbora joatera deitu du Ez Jaun Ez Jabek

Erabiltzailearen aurpegia Ukberri Uribe Kostako Ez Jaun Ez Jabe talde libertarioak Italiako presoek "L'ergastolo"ren kontra edo bizi arteko espetxe zigorraren aurka darabilten borroka sostengatzera deitu du, bihar, larunbata, Bilboko Unamuno plazan 17.00etan egingo den elkarretaratzea dela medio. Ekimena abenduaren 1ean abiatu zen Italian, non bizi arteko zigorra duten hainbat presok gose greba mugagabea hasi zutenean. Dagoeneko bizi arteko zigorra duten 737 preso eta beste 8.353 senide, lagun, solidario eta zigorra bigunagoak dituzten presoak ekin diote gose grebari. Besteak beste, Bizkaiko Asanblada Libertarioaren taldeek suspertu dute biharko kontzentrazioa. Argazkia: Nanymata.
  Politika 2008-01-25 15:55

Areetako batzokiaren aurka pintura bota dutela salatu du Landak

Erabiltzailearen aurpegia Ukberri Areetako Ondarreta batzokiaren aurka hainbat pertsonek margo gorri eta horia bota dutela bart salatu du Udalbatzan Imanol Landa Getxoko alkateak. Landak galdera eta eskaeren txandan jakinarazi du gertaturikoa, Eusko Abertzale Ekintzak Getxoko ondare historikoari buruz egindako itaunaz baliatuz. Batzokia zikindu izana EAEren "inguruari" leporatu ostean, alderdi ekintzaileri galdetu dio ea ondarea zaintzea babestuta dauden eraikinen aurka margoa botatzea ote den. Landak azaldutakoaren arabera, pintura jaurtiketak atzo gauean egin zituzten, hainbat pertsona manifestazioan Bidebarrieta kaleko egoitzaraino heldu eta jelkideei "torturatzaileak" deitzen dieten esku-orriak bota ondoren. Alkatea batzokiaren barruan zegoen, "bilduta", pintaketak egin zituztenean. Bestalde, Bizkai Buru Batzarrak bart "erasotutako" hainbat batzokiekin bat egin du. Argazkian, 2006ko urriaren 13an ere Areetako batzokiko fatxadara bota zituzten pintura arrautzak.
  Politika 2008-01-25 14:59

Kepa Saratxaga: "Alcala Mecon negoen, kartzelan"

Erabiltzailearen aurpegia Ukberri Espainiako Audientzia Nazionalean Bizkaiko 16 gazteri egiten ari zaizkien epaiketaren atzoko bistaren xehetasunak eman dituzte gaur Gara eta Berria egunkariek. "Non zeunden gertakizunen egunean?" galdera entzunda, "Alcala Mecon (Madril) negoen, kartzelan", erantzun zion Kepa Saratxaga algortarrak bere defentsa abokatuari, aipatu iturrien arabera. Uribe Kostako Amnistiaren Aldeko Mugimenduak salatu duenez, "torturak berriro agerian gelditu dira". "Auzipetuek adierazi bezala Ertzainek egindako tortura eta mehatxuz sinarazitako deklarazioetan oinarritzen dira akusazio guztiak. Saratxagaren kasuan hiru auzipetuk sinatu behar izan zuten gertaera horietan izan zela", gaineratu du errepresioaren aurkako erakundeak. Bestalde, Urtzi Murueta leioaztarra Frantziatik estraditatzeko eskaeran ez zen oraingo sumarioa aipatu eta, horretara, ezin dute horregatik epaitu, AAMk jakinarazi duenez. 2000ko irailaren 16an, Galdakaoko jaiak zirela, hainbat banketxe eraso izana leporatzen diete guztiei. Argazkian, Saratxaga ezkerrean mahaian eserita, herenegun Zazpi Kaleetako Gaztetxe plazan auziperatuek emandako prentsaurrekoan.
  Politika 2008-01-25 12:21

Hileko azken ostiraleko elkarretaratzeetan parte hartzera deitu du Anjel kalera! herri ekimenak

Erabiltzailearen aurpegia Ukberri Etxerat elkarteak gaurko, urtarrilak 25, egindako deialdiarekin bat eginez, hileko azken ostiraleko elkarretaratzeetan parte hartzera deitu ditu herritarrak Anjel kalera! herri ekimenak. Preso gaixoen askatasuna aldarrikatzea izango dute ardatz iluntzeko protestek. Kode Penalaren 92. artikulua aplikatuz, gaixotasun larriak dituzten gainontzeko euskal preso politikoak eta Anjel Figueroa algortarra bera ere kalean uztea eskatuko du auzotar ugarik azaroaren 17an abiatutako ekimenak. Horrenbestez, 20:00etan egingo dute kontzentrazioa, Algortako Telletxe plazan. Bestalde, aurreko larunbatean egin bezala, bihar ere Figueroaren aldeko sinadurak batuko dituzte 13:00etatik 14:00etara, musikaz lagunduta. Oraingoan Algortako Tellagorri plazan izango da. Argazkian, azaroaren 9an 200 bat lagun manifestatu ziren Anjel Figueroaren askatasunaren alde.
  Politika 2008-01-25 11:33

Euskal preso gaixoen aldeko zortzi elkarretaratze egingo dituzte iluntzean Uribe Kostan eta Erandion

Erabiltzailearen aurpegia Ukberri Hilero bezala, gaurko, urtarrileko azken ostiralerako, hainbat kontzentrazio deitu du Etxerat euskal preso politikoen senideen elkarteak Euskal Herri osoan. "Gaixoak eta espetxe zigorra bete dituztenak askatu! Euskal Presoak Euskal Herrira, dagozkien eskubideen jabe!" aldarrikapen nagusiaren harira, Uribe Kostan eta Erandion zortzi hitzordu izango dira: 19:30ean, Armintzan, bus geltokiaren aurrean; 20:00etan, berriz, Erandion, metro aurrean; Leioan, Boulevardean; Itzubaltzeta / Romon, Xake plazan; Algortan, Telletxe plazan; Berangon, Gudari enparantzan; Sopelan, udaletxe aurrean eta Urdulizen, BBVAren aurrean. Aipatu protestetan Espainiako Auzitegi Nazionalean epaituak izaten ari diren gazteak ere gogoan edukiko dituzte, Uribe Kostako Amnistiaren Aldeko Mugimenduak adierazi duenez. Arkaitz Goikoetxea ihes eginda dagoela kontuan hartuta, Algortako Urtzi Paul, Endika Lejarzegi, Ekaitz Bilbao, Aimar Hidalgo eta Kepa Saratxaga; Berangoko Martin Etxegarai, Sopelako Gontzal Gonzalez eta Leioako Urtzi Murueta epaitzen dabiltza. Elkarretaratzearen ondoren, ostiralero bezala, taloak egingo dituzte Leioako Kurkudi tabernan.
  Iritzia 2008-01-25 11:00

Koldo Tellitu: "euskal curriculuma, konpromisoak irutziz"

Erabiltzailearen aurpegia Ukberri XXI. mendeko Euskal Herriak iraungo badu, mundu modernoan eguneratuta dauden herri emantzipatuekin homologatu beharra dauka. Horrek eskatzen du, besteak beste, curriculum propioa. Euskal Autonomia Erkidegoko Curriculuma, derrigorrezko eskolaldirakoa, PPk epaitegietara eraman du. Hizkuntza ereduak omen dira gakoa. Gizarte zibilaren ekimen itxura ere eman nahi dio neurriari, A ereduaren aldekoen plataforma abiaraziaz. Litekeena da, gainera, PPren saio honek jarraitzaileak lortzea bere esparru soziologikoaz haratago ere. Beste behin, argi geratzen ari da euskararen aldeko balizko jarrerak frankisten garai bateko konplexuetatik, eta antifrankisten arteko balizko elkartasunetik, jasotako errenta eta maileguak galduz doazela.
  Politika 2008-01-25 09:55

Mikel de Gregorio Logroñora eraman dute

Erabiltzailearen aurpegia Ukberri Mikel de Gregorio "Degre" Algortako preso gaztea Madrilgo Soto del Realgo kartzelatik Logroñoko espetxera eraman dutela jakinarazi zuen atzo Uribe Kostako Amnistiaren Aldeko Mugimenduak Etengabe bitakoraren bidez: "Mikel de Gregorio azkenean, Valdemoron egun batzuk egin ondoren, Logroñora eraman dutela konfirmatu dugu. Logroño Getxotik 151 kilometrotara dago". Hortaz, eta azken egunotan Aner Mimenza Caceresera eta Paul Asensio Toledoko Ocaña I espetxera eraman dituztela, Soto del Realen Uribe Kostako bederatzi preso daude: urriaren 16an Algortan, Getxon eta Berangon egindako sarekadan atxilotu zituzten Lander Labajo eta Joseba Elorriaga gazte algortarrak; azaroaren 22an Baltasar Garzon epailearen aurrean aurkeztu ondoren kartzelaratu zituzten Juan Bautista Galdiz "Batis" eta Gorka Oribe; Abenduaren 18an atxilotu zuten Algortan jaio eta Errigoitiko bizilaguna den Marije Fullaondo Batasuneko Mahai Nazionaleko kidea; Urtzi Murueta leioaztarra, Manex Zubiaga algortarra eta Lexuri eta Irantzu Gallastegi ahizpa berangoztarrak. Azken hori, amen moduluan dago, bere alabarekin.
  Iritzia 2008-01-25 09:19

Fredi Paya: "elkartasunaz"

Erabiltzailearen aurpegia Ukberri Kapitalismoak arin ikasi zuen eskuineko gizarte kontzientziatua baino errazago gobernatzen dela desideologizatutako jende multzoa. Pentsatzen duena desadostasunera heldu ohi delako. Bigarren baldintza, legea eta ordena nagusi zitezen, pasibotasuna zen. Gura duzuna pentsatzeko eskubidea, koherenteki ekiten ez duzun artean. Garrantzitsua da ikustea indartsuenaren legean oinarritutako sistema honek eragin digun jokamoldeak, zelan transformatu dituen filosofikoki arrotzak zaizkion, beste gizarte eredu batenak diren, balioak. Adibiderako, solidaritatea. Zure auzokoari etxea erretzen badiote, solidaritatea ez da bere etxea erre izanaren aurka zaudela pentsatzea. Eta ausardia kasurik handienean, esatea. Elkartasuna balde bete ur hartu eta sua itzaltzen ahalegintzea da. Etxea konpontzen laguntzea eta konpontzen duen artean zure etxean lekua eskaintzea. Atzo arte izan ginen nekazari gizartean beti egin izan den modura. Argazkia: Koska irratia.
  Politika 2008-01-24 23:07

“Dagoeneko udaletxea eta bere etxea nahastea” egotzi diote Isabel Zarauza alkateari Plentziako Presoen Lagunek

Erabiltzailearen aurpegia Ukberri Urtarrilaren 20an Fernando Etxegarai Gaztearena “Pinki” preso politikoari ongi etorri bazkaria egiteko, Isabel Zarauza alkateak Jai Alai frontoia erabiltzeko baimena ukatu izana gogor kritikatu dute Plentziako Presoen Lagunek. Lehenik eta behin, eskaera “Udalari zuzentzen zitzaiola, eta ez Plentziako Independenteen taldeari” adierazi diote tokiko agintariari. Izan ere, errepresaliatuen aldeko elkarteak aipatutakoaren arabera, ondokoa izan zen jasotako erantzuna: “Hautesleen talde bat izanda, eta ez alderdi politikoa, inoiz ez dugu ekintza, ekimen edo mozio politikorik onartu, horregatik, gure ibilbidearekin koherente izateko eta ikusita zuen eskaeran zantzu politikoak daudela, adierazi behar dizuet, zoritxarrez, zuen eskaerari ezetza eman behar diodala”. “Berriro ere, beste legealdietan gertatu den bezala, argi ikus dezakegu herriko agintariok aginduak inposatzen dituzuela (alkateari zuzenduta), adostasuna lortzeko saiakerarik egin gabe”, kexatu dira presoen lagunak. Horrenbestez, “dagoeneko udaletxea eta bere etxea nahastea” egotzi diote Zarauzari. Bestalde, Etxegarairi egindako ongi etorriaren bideoa sareratu du Etengabek. Argazkian, Etxegarai, eskuman, auzokide bat agurtzen, joan den igandeko ekitaldian.
  Iritzia 2008-01-24 21:44

Ruben S. Bakaikoa: "urtarrilak 26: etxean borrokatuz, bestelako mundu beharrazkoa eraiki"

Erabiltzailearen aurpegia Ukberri Munduko Gizarte Foroak, nazioarteko kontseiluaren bidez, dei egin zuen urtarrilaren 26an "action day" bat (ekimen / ekintza eguna) munduko herriotan bakoitzak ikusten dugun erara antolatu dezagun: Tokian tokian, tokian tokikoa. Globalizazioaren aurkako mugimenduan parte hartu izan dugunok asko eta kolore askotakoak gara, eta ez da arraroa Munduko, Europako zein Euskal Herriko gizarte foroetan iritzi bestelakoak, baita aurkakoak ere topatzea. Etxean ere bai. Finean 'Zer da globalizazioa eta nola ekin bere aurkako mugimenduan' galderei zer erantzun ematen diegun dira askatu beharreko korapiloak. Globalizazioa, Wikipediaren definizio luzearen puxka baten arabera, neoliberalismoak bultzatzen duen "mundu mailako merkatuaren batasuna" da, "gaur egun bizi dugun globalizazioa, (mundializazioa), kapitalismo basatiaren zabalkuntza dela salatzen du globalizazioaren aurkako mugimenduak" ere eransten du. Eta nola zabaltzen da kapitalismo basatia? Nola lortzen du merkatua?
  Jendartea 2008-01-24 21:39

Dagoeneko sahararrentzako jakiak batzen dabiltza Sopelan

Erabiltzailearen aurpegia Ukberri Urtarrilaren 31ra arte, Saharara bidaltzeko jakiak eta konpresak batuko dituzte Nuyum elkarteak eta Sopelako Udalak. Zehazki, konpresez gain, atun oliotan, azukrea, arroza eta dilistak izango dira batuko direnak, basamortuko baldintzetan pisu gutxien eta elikagai gehien dituzten jakiak direlako, era berean erraz kontserbatzen dira ongi. Gauzak horrela, ostegunera arte, 11:00etatik 14:30era eta 16:00etatik 21:00etara, udaletxean eman ahal izango dira aipatutako produktuak. Ekimena Tindufera abiatuko den Sahararen aldeko IV. Euskal Karabanaren "Piztu itxaropena" izeneko kanpainaren barruan kokatzen da, Sahararen Aldeko Euskal Elkarteak antolatuta. Karabana otsailaren 16an abiatuko da. Argazkian, elikagaiak eramateko Euskal Karabanak erabiltzen duen kamioietako bat.
  Gazteok 2008-01-24 21:22

Otsailaren 15etik aurrera egongo da zabalik Sopelsex

Erabiltzailearen aurpegia Ukberri Sopelako Gazte Informazio Bulegoak aurten egingo dituen ekimenen artean, Sopelsex sexu aholkularitza zerbitzua abiatuko dute otsailaren 15ean, udal iturriek jakinarazi dutenez. Neska-mutilen zalantzak eta galderak argitzeko asmoz, sexologo bat egongo da ostiraletan udaletxean, 15 egunean behin, 18:00etatik 20:00etara bitartean. Kontsultak e-postaz (sopelsex[abildua]sopelana.com) zein telefonoz (944 065 519) ere egin ahal izango dira. "Erabiltzaileen nortasunak eta galderak erabat babestuko dira eta zerbitzuaren ardura duen sexologoaren esku baino ez dira egongo", argitu dutenez. Aurrera begira, eta guzti honekin loturik, ume zein gazteekin aritzen diren begirale, zaintzaile, entrenatzaile, irakasle edo arlo horretan dabilen pertsona ororentzako ikastaroak antolatuko dituzte. Argazkia: Alukiss.
  Politika 2008-01-24 20:49

Torturek autoinkulpatzera behartu zituztela salatu dute 14 gazteek

Erabiltzailearen aurpegia Ukberri Espainiako Auzitegi Nazionalean epaituak izaten ari diren 14 gazteek leporatzen dizkieten ekintzetan parte hartu izana ukatu dute gaur. Atxilotze unean jasandako torturek eta tratu txarrek autoinkulpatzera behartu zituztela salatu dute guztiek, Garak zabaldu duenez. Horretaz gain, defentsako abokatuek hiru lekuko deitu dituzte, eta beraien adierazpenek bi akusatuen parte hartzea ukatzen zuten. Gaurkoan ere "kalteengatik" 3 urteko espetxe zigorra eta "desordenak eragiteagatik" beste 2 urte eskatu du bakoitzarentzat Vicente Gonzalez fiskalak, 2000ko irailaren 16an Galdakaon hainbat banketxe eraso izana leporatuta. Arkaitz Goikoetxea ihes eginda dagoela kontuan hartuta, Uribe Kostako zortzi lagun epaitzen ari dira: Algortako Urtzi Paul, Endika Lejarzegi, Ekaitz Bilbao, Aimar Hidalgo eta Kepa Saratxaga; Berangoko Martin Etxegarai, Sopelako Gontzal Gonzalez eta Leioako Urtzi Murueta. Hartara, hainbat mobilizazio izango dira egun hauetan eskualdean. Epaiketak bihar jarraituko du. Argazkian, herenegun Zazpi Kaleetako Gaztetxe plazan auziperatuek emandako prentsaurrekoa / cc-by-nc Gaztesarea.
  Gazteok 2008-01-24 20:13

Musikaz lepo egongo dira eskualdeko gaztetxeak asteburu honetan

Erabiltzailearen aurpegia Ukberri Leioako Txakurzulo gazte asanbladak bere burua aurkeztuko du ofizialki bihar, ostirala, iluntzeko 9etan Udondo gaztetxean. Izan ere, Leioako Gazte Asanblada iazko otsailean sortu bazen ere, azken hilabeteetan hainbat aldaketa egitea otu zaie, tartean Astrabuduara doan bideko baserriaren izena eta argazkian agertzen den logotipoa hartzea. Era berean, hilean behin kultur eskaintza alternatiboren bat burutzea da hartutako erabakietariko bat eta bihar lehenengo ekitaldiari ekingo diote, elektrojaia. Bertan, bertso-hop, dj-ak eta hainbat jolas izango dira. Txakurzulokoen esanetan, "beti gabiltzanez musika mota berberagaz, jende ezberdina bereganatzeko eta betiko jendeak ekintza motak aldatzeko" burutuko dute ekimena. Bestalde, etzi, larunbatean, kontzertu bana izango da inguruko beste bi gaztetxeetan, Getxoko Txorimalo eta Itzubaltzeta / Romoko Itzubaltzeta gaztetxeetan. Getxon, Autogestio Eguna ospatuko dute eta 20:30etik aurrera Leihotikan eta Captain Memo musika taldeek joko dute. Itzubaltzetan, berriz, 18:00etan "This is England" filma eman eta 20:00etatik aurrera, Puñalada Trapera, Kinkinela, Taquicardia eta DesOi!bedienzia izango dira hainbat isun ordaintzeko jotzen. Bi kontzertuetan sarrera hiru eurokoa da.
  Jendartea 2008-01-24 20:11

Gobela kiroldegi azpiko aparkalekuak "merkeago" alokatzea aztertzen ari da Getxoko Udala

Erabiltzailearen aurpegia Ukberri Itzubaltzeta / Romoko Gobela kiroldegi azpikoa txandakako aparkaleku bihurtzeko, Getxoko PPk egindako eskaera "bideraezina" dela adierazi du gaur Imanol Landa alkateak. Horretarako, Udalak berak agindutako azterlana izan du eskuan tokiko agintariak. Ikerketaren arabera, "salerosketa guneetan edo lagun askok lan egiten duten tokian baino ez" litzateke "bideragarria" izango txandakako aparkalekua jartzea. Hartara, Gobelakoan "gizarte alokairua" ezartzea aztertzen ari direla aipatu du Landak. Hala ere, Marisa Arrue bozeramaile popularrak emandako datuak ez ditu gezurtatu alkateak, horri buruz aipamenik ere ez baitu egin. Getxoko PPko buruaren hitzetan, "2005eko udaberrian zabaldu zutenetik, 29 toki baino ez dira bete, dauden 286etatik".