Kirolak 2008-04-16 14:59

"Begiz begi" dokumentala aurkeztuko du Alberto Iñurrategik bihar Algortan

Erabiltzailearen aurpegia Ukberri Bihar, hilak 17, osteguna, Alberto Iñurrategik “Begiz Begi" bere azken dokumentala aurkeztuko du Algortako Getxo Antzokian. Filmean, mendizale gipuzkoarrak gaur egungo eskaladari buruzko gogoeta egin du eta zenbait gaiari heltzen dizkio, espedizio eta bidaien antolatzeari eta mendi-hegaletan bizi diren lagunenekiko harremanak, besteak beste. Proiekzioa euskaraz izango da, gaztelaniazko azpitituluekin. Emanaldia 20:00etan hasiko da eta sarrera doakoa izango da. Filma amaitu eta gero, Alberto Iñurrategi ikusleekin mintzatuko da. “Begiz Begi”k gaur egungo mendi-zaletasunari so egiten dio; mendiaren aurrean gizarteak duen jarrera eta alpinistek beren bidaiak nola antolatzen dituzten aztertzen ditu. Horrezaz gain, Iñurrategik bere gogoetak plazaratzen ditu mendiaren munduaren inguruan, askotan pentsamendu orokorraren aurkakoak direnak. Halaber, mendizaleak bidaiariek espedizioei aurre egiteko orduan dituzten jarrerak salatzen ditu, bere ustez alpinismoari kalte egiten diote eta. Dokumentalak Koldo Izagirreren testuak eta Francisco Garcia Alvarezen musika ditu, eta munduko zenbait gailurretan hartutako irudiak eskaintzen dizkio ikusleari, zuri-beltzeko sekuentziekin uztarturik.
  Politika 2008-04-16 13:58

Anjel Figueroaren egoera larria salatzeko manifestazio eta ekitaldia izango dira ostiralean Algortan

Erabiltzailearen aurpegia Ukberri Anjel Figueroa preso politiko algortarraren osasun egoera larriaz kezkatuta hurrengo egunotarako hainbat ekitaldi izango dira, bere askatasuna aldarrikatzeko. Lehenik eta behin, ostiralero egin ohi duen elkarretaratzeari eutsiko dio Etxerat euskal preso politikoen senideen elkarteak eta horrekin bat egitera deitu ditu herritarrak Anjel kalera! herri ekimenak. Kontzentrazioa 20:00etan izango da Algortako Telletxe plazan. Bertatik abiatuko da ordu erdi beranduago manifestazioa Txiki eta Otaegi plazaraino, bertan ekitaldia egiteko. Azkenik, apirilaren 24an, ostegunarekin, Figueroaren egoeraren inguruko hitzaldia egongo da, 19:30ean, Villamonteko kultur etxean. "Algortarraren askatasuna aldarrikatzeaz gain, gainontzeko zortzi euskal preso politiko gaixoen egoera salatzea izango dute helburu ekitaldiek, horietan mediku, abokatu, senide eta herri ekimeneko kideak parte hartuko dutela", Anjel kalera! herri ekimenak azaldu duenez. Bitartean, Uribe Kostako Askatasunak egindako deialdiari erantzunez, 30 bat lagun elkartu ziren (argazkian) larunbatean Langraizko espetxean (Gasteiz).
  Kultura 2008-04-16 13:19

Liburuaren Eguna ospatzeko hiru egunetan egingo dituzte ekitaldiak Sopelan

Erabiltzailearen aurpegia Ukberri Sopelako Udalak hainbat jarduera antolatu ditu apirilaren 23an ospatu ohi den Liburuaren Egunaren harira. Hiru jardunalditan zehar gazteei eta helduei zuzendutako ekitaldiak izango dira udalerrian. Asteazkenenkoak, ikastetxeetan egingo dira. Halaber, tailerrak eta ipuin kontaketak eskainiko dira. Bide batez, Iberre institutuko ikasleek idazle euskaldun bat ezagutzeko eta honekin egoteko aukera izango dute. Biharamunean, ostegunean, arratsaldeko 19:30etik aurrera Mercedes Martinez Bilbao idazle sopeloztarraren “Requirimientos” olerki liburuaren aurkezpena egingo dute Hall Kulturalean. Ondoren, Martinezen olerkien errezitala eskeiniko da, Esther Gutierrez Bilbao esataria dela. Argazkian, haurrak ipuin kontalariei adi apirilaren 2an Algortan ospatu zen Haurrentzako Liburuaren Egunean.
  Gazteok 2008-04-16 11:41

Etxebizitza topaketetan parte hartzera deitu du Euskal Herriko Gazteriaren Kontseiluak

Erabiltzailearen aurpegia Ukberri Datorren maiatzaren 10ean, larunbata, Bilbon ospatuko diren Etxebizitza Eskubidearen Gazte Topaketetara hurbiltzeko gonbitea egin die gazte talde eta gazte guztiei Euskal Herriko Gazteriaren Kontseiluak. EHGK-k zabaldu duenez, "Topaketa hauetan ahalik eta gazte talde gehien bildu nahi dugu, guztion elkarlanaz etxebizitza eskubidearen baitan urrats esanguratsuak eman ditzagun" . Hori dela eta Uribe Kostako eta Euskal Herri osoko gazte taldeengana jo dute "gazteriaren artean topaketetarako deia lau haizetara zabaldu" dezaten. Era berean, maiatzaren 10eko mintegiaren helburuak finkatu dituzte eta topaketen gaineko informazioa eman dute Gazteria Kontseilutik. Argazkian, Bilboko Erriberako etxe okupatuak 2007ko abenduaren 28an hartu zuen itxura hainbat urtez hutsik egon ostean. Eraikina, baina, atzo hustu zuen Ertzaintzak, hainbat gazte epaiketaren zain daudela / Bilboko Okupazio Mugimendua.
  Kirolak 2008-04-15 21:06

Txirrindulazaleen eskubideen aldeko urteroko martxa egingo dute larunbatean Erandion

Erabiltzailearen aurpegia Ukberri Urtetik urtera gero eta gehiago dira, euren eskubideak aldarrikatzeko asmoz, Erandioko Txirrindulazaleen Ibilaldian izena eman nahi duten lagunak. Antolaketa lanak eta segurtasuna kontutan hartuta, parte-hartzaile kopurua 800era mugatzea erabaki du aurten Erandioko Txirrindulari Elkarteak, larunbat honetako (apirilak 19) 16. edizioari begira. Halaber, aurretik izena ematea gomendatu dute: Euskadiko Kutxan 20 euro (15 euro federatuak) ordaindu dutela frogatzen duen ziurtagaria eskuan, aipatu kirol taldeko egoitzara (Erandioko Ciclos Altzaga) jo beharko dute parte hartu nahi duten guztiek. Internet bidez ere egongo da apuntatzeko aukera, azken eguna hilaren 17a dela. Istripu-asegurua ere dago sartuta ordaindu beharrekoan. Halaber, Erandio-Erandio XVI. Txirrindulazale Ibilaldia ospatzen den egun berean izena ematea posible izango da, proba hasi baino lehenago. Hala ere, tokirik egongo danik ez dute ziurtatzen. Ibilbideari dagokionez, aldaketak egin behar izan dituzte aurten, egun berean lehiaketa proba bat dagoela jakinarazi zielako Bizkaiko Federazioak, orain hilabete eskas.
  Gazteok 2008-04-15 20:28

Ostiralean antzerki gazteari ateak irekiko dio Itzubaltzeta gaztetxeak "Soy especial" lanarekin

Erabiltzailearen aurpegia Ukberri Ostiral honetan, hilak 18, gaueko 21:30ean, "Soy especial" Vuela Bonita Korporation konpainiaren antzezlana eskainiko da Getxo udalerriko Itzubaltzeta / Romoko Itzubaltzeta gaztetxean. Nagore Hernaezek sortutako gidoitik eta bere zuzendaritzapean, Leire Olaran eta Jose Angel Escobar aktoreek munduko gizonik sineskorrenaren Ilargirako bidaia kontatuko digute 45 minutuko saioan zehar. Izan ere, gure inozoak Ilargira heltzean, "ni ere berezia naiz, uste dut" esan zuen. "Soy especial" da protagonistaren ametsa. Eta antzezlana bere arimatik egindako sarraldia da, bere desioak bisitatzen dituena, haietariko handiena Ilargira teletransportatzea dela. Bidaia humorearen bitartez egingo dugu, nahiz eta protagonistak ez jakin. Emanaldirako sarrera 2 eurotan erosi ahal izango da gaztetxean bertan. Gaztetxeak hilero antolatzen ditu antzezkizunen bat, herriko oholtza bakarra inguruko artistei eskainiz.
  Jendartea 2008-04-15 20:25

Guraso berrientzako hitzaldiak antolatu dituzte Barrikan

Erabiltzailearen aurpegia Ukberri Barrikako Udalak 3 urtetik beherako seme-alabak dituzten aita-amentzako hitzaldiak antolatu ditu. Ana Bacigalupek gidatuta, maiatzean 13an ekainaren 11an izango dira solasaldiak, biak ala biak goizez. "Senitartekoen artean lotura sendoagoak eta osasuntsuak sortzeko asmoz, umeak hazteko moduak ezagutzea eta guraso berriek eduki ditzaketen zalantzak eta kexkak apur bat argitzea" dira ekimenaren helburuak, tokiko arduradunek zehaztu dutenez. "Ume eskola maitasuna, errespetua eta laguntasuna bultzatzeko espazioa da", gaineratu dute. Parte hartzeko Barrikako kultur etxean eman beharko da izena, 946 775 163 telefono zenbakira deituz.
  Jendartea 2008-04-15 19:41

Urduliztar bat atxilotu dute emakumea jo eta ertzainak sukaldeko labanaz mehatxatzea egotzita

Erabiltzailearen aurpegia Ukberri Atzo arratsaldeko lau t'erdiak aldera, Urdulizko baserri batean erasoa gertatzen ari zela ohartarazi zioten Ertzaintzari, Eusko Jaurlaritzako Herrizaingo Sailak jakinarazitakoaren arabera. Antza denez, gizonezko batek ondoko etxebizitzaren jabea, emakumezkoa, jo eta mehatxatu zuen makila batez. Gertakariaren berri izan zuenean, patruila-auto bat bertara abiatu zen, eta, baserrira heltzen ari zela, furgoneta batekin topo egin zuen aurrez aurre. Ibilgailu horrek polizia autoari pasatzen uzten ez zionez, ertzainek larrialdi zerbitzuan zihoazela esan zioten gidariari, eta bidea libre uzteko eskatu zioten, polizia iturriek gaineratu dutenez. Gidariak ezetz esan zien, anbulantzia bat bidean zetorrela eta zauritutako emakumezko bat artatu behar zuela azaldu bazioten ere. Jarrera horren aurrean, ertzainetako bat autotik jaitsi eta, furgonetara hurreratzen ari zela, gidariak sukaldeko labana batez mehatxu egin zion.
  Jendartea 2008-04-15 19:05

Erandioko Udalak darabilen gizarte politika aldatzea eskatu du PPk

Erabiltzailearen aurpegia Ukberri Erandioko Udal Gobernuak gizarte politikaz egiten duen kudeaketa arbuiatu du Javier Ruiz Erandioko PPren bozeramaileak. Ruizek azaldu duenez, Erandioko Udalak ematen dituen gizarte laguntzak –Oinarrizko Errenta eta Gizarte Larrialdi Laguntzak– %70ean igo dira azken bost urteotan, inguruko udalerriek izan duten igoera baino dezente handiagoa. Zehazki, PPren datuek diote laguntza horiek %4 igo direla Barakaldon, %8 Portugaleten, %14 Santurtzin, %20 Basaurin eta %30 Sestaon. Guztira, laguntza horiek emateko 2003tik hona Erandiok 16 bat milioi euro jaso ditu. Javier Ruizen aburuz, "zenbaki hauek kezkagarriak dira oso, Erandion gizarte bazterketan dabiltzan pertsonen kopurua nabarmen igo den adierazlerik onenak baitira eta, gainera, gehikuntza hori Bizkaiko udalerri gehienetakoa baino handiagoa izan delako". PPren ustez, datuek frogatzen dute gizarteratze politikak, eta, batez ere, enplegu politikak "ez dabiltza, gizarte bazterketan bizi diren pertsonak lan merkaturatzeko helburua bete beharrean, pertsona horien kopurua nabarmen zabaldu delako".
  Kultura 2008-04-15 18:15

Elias Amezaga omentzea aztertzen ari da Getxoko Udala

Erabiltzailearen aurpegia Ukberri Elias Amezagaren lana eta ibilbidea goraipatu eta familiari dolumina agertu dio Getxo Udalak, 60 liburu baino gehiago argitaratu dituen ospe handiko idazle getxoztarraren heriotzagatik. Era berean, Imanol Landa alkateak esan du, Amezagari esker ona adierazteko moduak bilatzen ari direla. Izan ere, "hitzen eta kulturaren zale amorratua" zenaren izena guztion gogoan geratzea nahi du tokiko erakundeak. Idazlearen lanen artean “Autores Vascos” izenburukoa gogoratu du Udalak. Horretan, 10 liburuki zabaletan, 12.000 gizon eta emakume idazleren biografiak zehaztu zituen Amezagak. 30 urte eman zituen hori idazten. Gainera, ehun bat antzerki lan idatzi zituen; baita 1.000 artikulu baino gehiago argitaratu ere. Bestalde, Eusko Ikaskuntzak 2005ean eman zion Manuel de Lekuona saria.
  Kultura 2008-04-15 00:30

Ipar Uribeko bertsolariek eskualdeko txapela jokatuko dute ostiraletik aurrera

Erabiltzailearen aurpegia Ukberri Datorren ostiralean, hilak 18, Ipar Uribeko bertso txapelketaren VII. edizioa abiatuko da, Sopelako Ander Deuna ikastolan egingo den bertso afaria dela medio. Uribe Kosta, Mungialdea, Uribe Butroe eta Txorierriko bertsolarien txapelketa nagusian 20 lagunek parte hartuko dute hiru kanporaketetan, inoiz baino gehiago. Gainera, Algortako Bertsolari Eskola, Taket Mungiako bertso eskola eta Larrabetzuko bertso eskolaz gain, aurten Itzubaltzetako bertso eskolako kideak ere estreinatuko dira. Maiatzaren 17an Areetako Andres Isasi musika eskolan 18:00etan ospatuko den finalean Bizkaiko txapelketarako sei txartel banatuko dituzte lehiaketa honetan. Orain arte, Etxahun Lekue larrabetzuarra eta hiru Paya Ruiztarrak –Fredi, Xabi eta Itxaso– izan dira txapelaren jabe, eta Itxasori egokituko zaio 2006an jasotako txapela defendatzea. Lehenengo kanporaketan, Sopelan, honako bertsolariek abestuko dute: ALBEko Miren Loizaga, Arrate Illaro, Unai Angulo eta Gabi Basañez, Taketen Olatz Ibarluzea eta Itzubaltzetako Oier Iturralde "Atano". Argazkian, Itzubaltzeta eskolako Peio Ruiz de Agirre abesten, Peru Vidal eta Itxaso Payak so dituela, pasa den otsailaren 22an.
  Kirolak 2008-04-14 23:23

Aralar mendilerrora igoz ospatuko ditu hamar urteak Munarrikolanda mendi taldeak

Erabiltzailearen aurpegia Ukberri Sopelako Munarrikolanda mendi taldeak irteera antolatu du igande honetarako, apirilak 20. Oraingoan, Aralar mendilerrotik ibiliko dira eta Txindoki tontorrera (1.346 metro) igoera egingo dute, bere hamargarren urteurrena ospatzeko ekitaldien barruan. Ibilbidea egiteko zazpi ordu beharko dira, gutxi gorabehera, taldeko arduradunek zehaztu dutenez. Autobusa 7:30ean abiatuko da Sopelako San Pedro elizaren parean dagoen autobus geltokitik; Algortatik 7:40an igaroko da Getxo I institutu ondotik. 12 eurokoa izango da salneurria bazkideentzat eta 14 eurokoa bazkide ez direnentzat. Interesatuta daudenek txangoaren xehetasun eta baldintza guztiak 696 731 662 telefono zenbakira deituz galde ditzakete. Izen-emateak ostegunetan egin daitezke, 20:00etatik 21:30era.
  Kirolak 2008-04-14 22:59

EHUk bosgarren Tipi-tapa ibilaldia antolatu du apirilaren 27rako

Erabiltzailearen aurpegia Ukberri Euskal Herriko Unibertsitateko (EHU) Bizkaiko campuseko Errektoreordetzak "Unibertsitatea tipi-tapa osasunez" ibilaldiaren bosgarren edizioa antolatu du apirilaren 27rako, igandea. "Ez da lehiaketa izango eta mundu guztiari irekita dago, helburua EHU jendartera hurbiltzea baita", unibertsitateko iturrien adierazi dutenez. Martxa (15 kilometrokoa luzea eta 6,5ekoa laburra, hamar urtetik beherako umeentzat) Basurtuko ospitalean (Bilbo) hasi eta Leioa eta Erandioko campuseko kiroldegian bukatuko da. "EHUk Bizkaian dituen ikastegiak lotuko ditu, bertako ingurunea ezagutaraziz", azaldu dutenez. Izen-ematea doakoa eta ezinbestekoa da eta apirilaren 25era arte egin daiteke Leioa eta Erandioko campuseko Kirol Zerbitzuko bulegoetan (946 015 894 edo 946 013 162, 9:00etatik 13:00etara eta 15:00etatik 16:30era, edo rovdepor[abildua]lg.ehu.es helbide elektronikoan). Ibilbide osoa egingo duten EHUko ikasleek aukera askeko kreditu bat lortu ahal izango dute. Iazko Tipi-tapan 1.600 pertsonek hartu zuten parte, EHUko iturrien arabera. Argazkian, 2006ko edizioko irudia / Komunika.
  Politika 2008-04-14 22:42

Dozenaka lagunek eman diote azken agurra Javier Larreategi "Atxulo" ETAko kide historikoari

Erabiltzailearen aurpegia Ukberri Dozenaka senide, lagun eta herritar bildu ziren joan den larunbatean, apirilak 12, Gorlizko Astondo hondartza inguruetan, hiru egun lehenago minbiziak jota Bilbon hil zen Javier Larreategi Cuadra "Atxulo" ETAko kide historikoari azken agurra emateko. Ekitaldia xumea izan zen herenegun eguerdikoa: etxekoek hitza hartu eta Itzubaltzetako Bertso Eskolako lagunek egin zuten kantu ondoren; azkenean Larreategiren errautsak Kantauri itsasora botatzeko. Ezker abertzaleko aurpegi ezagunik ez zen falta izan ekitaldian. Bertan izan ziren Xabier Zubizarreta Arrasateko alkate izandakoa eta Koldo Gorostiaga eurodiputatu ohia, besteak beste. Parot doktrina aplikatu ostean, bilatu eta atxilotzeko agindua emanda duen Fernando Etxegarai "Pinki" auzokide eta preso ohi plentziarra ere bertan zen. Argazkian, Javier Larreategi “Atxulo” aulkian eserita, Fernando Etxegarai lagun minaren ondoan, honen ongi-etorrian, Barakaldon, urtarrilaren 6an / Etengabe.
  Politika 2008-04-14 20:29

Mimenza Valdemorora eraman eta Labajori "miaketa oso bortitza" egin diote

Erabiltzailearen aurpegia Ukberri Aner Mimenza preso politiko getxoztarra larunbatean eraman zuten Cacereseko espetxetik Valdemorora (Madril), etxekoek UKBERRI.NETi jakinarazi diotenez. Dirudienez, diligentzietarako eraman dute, abenduaren 20an Soto del Real kartzela madrildarrean egindako sakabanaketaren aurkako protestaren harira. "Hala ere, ezin da ezer ziurtatu oraingoz, berari ez diotelako ezer azaldu", adierazi dutenez. Bestela ere, etxekoak bisita egitera bidean zihoazela enteratu ziren espetxe aldaketaz eta etxera bueltatu behar izan zuten asteburu horretako bisita galduta. Bestalde, egun Aranjuezen duten Lander Labajo gazte algortarrari martxoaren 27an "miaketa oso bortitza" egin ziotela salatu du Askatasunak. "Estatuek presoekin fisikoki amaitzeko egindako apustuaren baitan" kokatu ditu azken asteotako gertaera horiek errepresioaren aurkako erakundeak. Fleury Merogis (Paris), Soto del Real (Madril), Valladolid, Darocako (Zaragoza) espetxeetan gertatzen ari dira horrelakoak Askatasunaren arabera. Argazkian, Euskal Presoak Euskal Herriratzearen alde agerraldia egin zuten orain bi asteburu Getxoko Txorimalo gaztetxearen bigarren urteurrenean.