Jendartea 2008-04-14 17:07

Ertzaintzak eta udaltzaingoek abiadura kontrolatzeko kanpaina berri bati ekin diote gaur

Erabiltzailearen aurpegia Ukberri Ertzaintzak eta Araba, Bizkaia eta Gipuzkoako udal garrantzitsuenetako udaltzaingoek, tartean Bilbo, Donostia eta Gasteizkoek, abiadura kontrolatzeko kanpaina berezi bat hasi dute gaur, astelehena. Kanpaina hurrengo bi asteetan zehar egongo da martxan eta hilaren 27an, igandea, bukatuko da. Euskal Autonomia Erkidegoko errepideetan abiadura kontrolatzeko kanpainan gidariek euskal errepideetan daramaten abiadura kontrolatuko dute agenteek, radar mugikor eta finkoen bitartez. Kanpainaren planifikazioan aurreikusitakoaren arabera, Ertzaintzak abiadura kontrolak egingo ditu gauetan. Iaz Herrizaingo Sailak 56.395 salaketa izapidetu zituen hainbat gidarik legeak ezarritako abiadura mugak gainditu zituztelako. Dena den, Herrizaingo Sailaren estatistiken arabera, abiadura mugak errespetatzen dituzten ibilgailuen kopurua gero eta handiagoa da. 2007-2010 Euskadiko Bide Segurtasuneko Plan Estrategikoak islatzen duenez, muga gainditzen dutenen portzentaia %26tik (2003an) %15era (2007an) jaitsi da. Argazkian, Ertzaintzako errepide kontrol bat artxiboko irudi batean.
  Ekonomia 2008-04-14 16:27

Eraikuntzan istripuak gutxitu eta segurtasun-kostuak murrizteko ikerketa aurkeztu dute EHUn

Erabiltzailearen aurpegia Ukberri Eraikuntza-proiektuetan segurtasunaren eta osasunaren kontzeptuak kontuan hartuz, istripuak gutxitu egiten dira eta segurtasun-kostuak murriztu, Juan Pedro Reyes ingeniariak Euskal Herriko Unibertsitatean (EHU) aurkeztu duen tesiak dioenez. Gaur egun, lan-istripuak gizarteari eta ekonomiari eragiten dioten arazo larriak dira. Industria-sektorean, eraikuntzak du istripu-tasarik handiena, lan-istripu guztien %27,34 eragiten baitu. Gainera, Estatu espainiarrak Europako herrialdeen buru egiten du sektore honetako lan-istripuen tasari dagokionez. 1995eko Laneko Arriskuen Prebentzio Legearekin erregularizazio-prozesu bati ekin zitzaion, tasa hori murrizteko eta Europako bataz-bestekoarekin berdintzeko xedearekin. Baina legeak ez du bere helburua lortu: Espainiako Estatistikako Institutu Nazionalak ateratako azken datuen arabera, 2006ko urria eta 2007ko iraila bitartean eraikuntzak jasandako lan-istripuen kopurua %1,4 handitu zen aurreko urteko garai berarekin alderatuta. Argazkian, Juan Pedro Reyes Perez tesiaren egilea / Labein-Tecnalia.
  Politika 2008-04-14 16:05

Sener enpresa helburu zibiletara bideratzea eskatu dute dozenaka txirrindularik

Erabiltzailearen aurpegia Ukberri Pasa den larunbatean, hilak 12, dozenaka lagun batu zitzaizkion Kakitzak eta Kontzientzia Eragozpen Mugimendua (KEM) talde antimilitaristek deitutako industria militarraren aurkako txirrindularitza martxari. Antimilitaristak goizeko 11etan irten ziren Bilboko Kale Nagusian dagoen foru jauregitik, ondoren Areetan egoitza duen Sener eta Barakaldoko Precicast armagintza enpresen ateetaraino hurbiltzeko. Areetan, nazioarteko enpresa ertzain ugarik izan zuen gordeta, baina hori ez zen traba izan txirrindulariek Senerrek darabilen jarduerari bere arbuioa agertzeko eta industria militarraren birmoldaketa aldarrikatzeko, Senerren egoitzak "helburu zibiletarako" erabil daitezen, ingeniaritza militarrean jardun eta Eurofighter europar konbate-hegazkinaren zein KEPD-350 Taurus gurutzaldi-misilen osagaiak egin beharrean. Barakaldon, Precicastek Airbus A400M garraio militarrerako hegazkinaren piezak egiteari utz diezaion eskatu zuten. Argazkian, txirrindulari antimilitaristak Senerren aurrean.
  Kultura 2008-04-14 15:24

Elias Amezaga idazle getxoztarra hil da

Erabiltzailearen aurpegia Ukberri Elias Amezaga idazle getxoztarra atzo hil zen Getxon, Uri estratako bere etxean, 86 urte zituela. Sendi hurkoek ohar baten bidez jakinarazi dutenez, heriotza arratsaldeko 2etan heldu zitzaion, bihotzak jota, gaixotasun luze baten azken atal gisa. Elias Amezagaren obra zehazki definitzeak lanak emango lituzke. Izan ere, "Euskal Herriko idazle" edo "Dorre-etxeko idazle" gisa ezaguna, kazetaritzan, antzerkian, saiakeran, historian eta literaturan gazteleraz idatzitako lan mardula utzi zuen atzean Elias Amezagak, tartean 60 liburu baino gehiago eta bere bizitzaren 30 urtez landu zuen "Autores Vascos" entziklopedia, non 10 liburukitan 12.000 idazle euskal herritarren biografiak idatzi zituen. Amezagak bere lana "orokorra eta anizkoia" izatea nahi zuen, "kultur edo literatur genero batean baino gehiagotan inspiratua. Gai edo pertsonaia bat hartu eta bere errealitatean edota fantasian aztertzea. Happening saioa egitea, zatiz askea eta zatiz zuzendua". 1921an Bilbon jaioa, Asturiasen ikasi zuen Zuzenbidea eta ikasle garaitik Euskal Herriko hainbat egunkariren literatur kolaboratzailea izan zen: "Hierro", "Egin", "Deia", "La Gaceta del Norte", "El Correo Español", "Diario Vasco", "Gara", "El Mundo del Pais Vasco" eta abar. 2005ean, bere bizitza osoaren obragatik Manuel Lekuona saria jaso zuen Eusko Ikaskuntzak emana. Senideen aburuz, "lau haizetara bere eusko labelaz harro agertzen diren erakundeek bidegabeki ahaztuta" zendu da Elias Amezaga, "bere independentzia gordetzen uneoro saiatu" zen idazlea.
  Politika 2008-04-13 23:42

Kantuketan kontzertuan Ertzaintzak hainbat pankarta zentsuratu zuela salatu dute

Erabiltzailearen aurpegia Ukberri Getxoko Udaleko Euskara Zerbitzuak pasa den larunbatean, hilak 5, aisialdian euskara sustatzeko asmoz Algortako Portu Zaharrean antolatu zuen kontzertuan, Ertzaintzak "gazteek jarritako aldarrikapen desberdinen inguruko pankartak kentzen aritu" zela salatu dute Gaztesarea gazte komunikabidean. Posta elektronikoz bidalitako oharrean, Lor eta Latzen talde euskaldunen emanaldia baino lehen bere izena eman ez duten gertatutakoaren lekukoek "adierazpen askatasunaren aurkako" ekimentzat jo dute ertzainek erabili zuen jarrera. Era berean, Araba, Bizkaia eta Gipuzkoako Polizia autonomikoa EAJrekiko menpekotasuna leporatu eta ertzainek "Segiren eta eusko gudarien aldeko pankarta bana kendu" zituztela salatu dute gazte komunikabidearen bitartez. 2008ko Kantuketan guztiz arrakastatsua izan zen eta milaka gazte batu ziren gau horretan Latzenen azken kontzertuaz eta Lor taldearen emanaldiaz gozatzeko. Argazkian, bi ertzain pankarta bana patruila-autora eramaten. Lekukoek bidalitako beste argazkiak, berriz, Gaztesarearen argazki galerian ikus daitezke.
  Kultura 2008-04-13 22:57

Inoiz baino parte hartzaile gehiago izan da Sopelako Esaera Zaharren Txapelketan

Erabiltzailearen aurpegia Ukberri Bertsoak eta atsotitzak uztartuz, 26 talde lehiatu ziren atzo Sopelan buruturiko Esaera Zaharren Txapelketako XV edizioan, guztira 100 bat parte-hartzaile eta 200 bat ikusle. Kopuru horrekin 25 taldeko iazko marka gainditu dute Sopelako AEK Nikola euskaltegikoek. Lehiaketari dagokionez, berriro ere sari nagusia Sopelatik kanpora joan zen, Bilbo eta Berangon bizi diren Badok 13 taldekoek eraman baitzuten, enegarren aldiz, asteburuko egonaldia, sopeloztarren esperantza zen Kokoloak taldeari nagusitu ostean. Goizeko kanporaketetan sailkatuta, Ander Deuna ikastolan buruturiko finalaurrekoan Igor Elortza eta Nerea Elustondoren bertsoak ezin ulertuta edo atsotitzak nahikorik ez ikasita, berriz, beste hiru talde geratu ziren kanpo. Hau Pittu, Hau eta Pozoinak ohiko talde finalistak zein Biar izan ziren talde horiek. Esaera Zaharren ibilbidea, baina, ez da Sopelan bukatu eta Mungian maiatzaren 10eko Berba-probetan (argibiderako berbaprobak[abildua]gmail.com posta elektronikora idatzi) zein 31n Bilboko Uribarri auzoko Euskararen Egunean izango da aukera atsotitzen eta bertsoen lehian jarraitzeko. Izan ere, Igor Elortzak Sopelako antolatzaileei ohartu zienez, hobe lukete laster ideia erregistratzea, Kike Amunarrizek patentatu baino lehen. Argazkian, kuboak buruan, beste behin ere Sopelako txapelketan bizi den umore eta giro ona erakutsi zuten bertaratutakoek.
  Gazteok 2008-04-13 21:51

Gazteok Bat Irabaziko Dugu! ekimena aurkeztu dute Itzubaltzetan 350 lagunen aurrean

Erabiltzailearen aurpegia Ukberri Ehunaka lagunek, 350 eta 400 bitartean Itzubaltzeta gaztetxeko iturrien arabera, parte hartu zuen atzo, larunbata, Itzuibaltzeta / Romoko gaztetxean eginiko Gazteok Bat Irabaziko Dugu! plataformaren aurkezpenean. Bertan, "herriko gazte eragile guztiak" ekimena abiatzera eraman zituen arrazoia azaldu zuten Gazteok Bat Irabaziko Dugu!-ren bozeramileek: "gazteon aurkako errepresioa inoiz baino handiagoa da, maila guztietan: atxiloketak, torturak eta bortizkeria, desalojoak, adierazpen ukatzea, eguneroko jarduerak debekatzea...". Gazteak "terroristatzat" hartzen dituztela salatu zuten ere: "nahikoa da kartelak jartzea terrorista izateko". Plataforma berriak egoera horren aurka jardun, gazteriak pairatutako errepresioa salatu eta gazteak laguntzea ditu helburu. Dagoeneko, Itzubaltzeta / Romoko honako gazte erakundeek bere sostengua eman diote: "HNT, Segi, Ikasle Abertzaleak, Ez Jaun Ez Jabe eta Itzubaltzeta gaztetxea".
  Jendartea 2008-04-13 13:32

Auto gidari bat atxilotu dute drogen eraginpean txirrindularia harrapatzea egotzita

Erabiltzailearen aurpegia Ukberri Ezbeharra goizeko bederatziak bost gutxiagotan jazo zen atzo, larunbata, Itsasadarreko errepidean (C-6311), Eusko Jaurlaritzako Herrizaingo Sailak jakinarazitakoaren arabera. Txirrindulari batek eta Bilboko matrikula zuen Seat Ibiza auto batek aurrez jo zuten Leioa parean. Elkar jotzearen ondorioz, txirrindularia (F.G.G., 65 urtekoa) larri zauritu zen eta anbulantzia medikalizatu batek Gurutzetako ospitalera eraman behar izan zuen. Ertzainek istripuari buruzko ikerketa izapidetu eta ezbeharrean nahasitako gidaria (G.R.R., 38 urte) atxilotu zuten, trafikoaren segurtasunaren kontrako delitu bat leporatuta. Izan ere, positibo eman zuen gai estupefazienteen azterketan, polizia iturrien arabera.
  Politika 2008-04-12 22:34

Osasun egoera oso larrian aurkitu du amak Anjel Figueroa

Erabiltzailearen aurpegia Ukberri Anjel Figueroa preso gaixo algortarraren ama Langraizko espetxera (Gasteiz) bisitan joan zaio semeari gaur goizean eta horrek egoera oso larrian aurkitu duela jakinarazi du Uribe Kostako Askatasunak. Hartara, euskal jendarteari Langraizera edo Txagorritxuko ospitalera hurbiltzeko deia luzatu diote. Azken asteotan okertu egin da Figueroaren osasun egoera: epilepsia krisialdiak maizago eta gogorragoak izaten ari dira. Martxoaren 20an ospitaleratu behar izan zuten berriro Txagorritxun eta, hurrengo egunean, Langraizko espetxera bueltatu zuten. Aste bete beranduago ere, hilaren 27an, Txagorritxura eraman eta apirilaren 4ra arte eduki zuten bertan. Apirilaren 7ko krisialdia, berriz, oso gogorra izan zen. Hala ere, goizaldean ospitaleratu eta gauean bueltatu zuten Langraizera, sendagiria jasota. Bada, ostegun goizaldean, "sartu eta pixka bat pasatu zitzaionean itzuli egin zuten, urgentziazko tratamendua ematearen ondorioz", Anjel kalera! herri ekimenak salatu zuenez. Argazkian, Figueroaren aldeko elkarretaratzea Algortan.
  Kultura 2008-04-11 22:31

Uribe Kosta eta Erandioko abesbatzek zazpi emanaldi emango dituzte asteburuan zehar

Erabiltzailearen aurpegia Ukberri Bizkaiko Abesbatzen Elkarteak antolatzen dituen Udaberriko Kontzertuen XXIX. edizioaren barruan, gaur eta bihar zazpi emanalditan abestuko dute Uribe Kosta eta Erandioko abesbatzek. Gaur, Algortako Getxo Antzokian bertako Eskuz Esku emakumeen abesbatza hartu ditu Barakaldoko orfeoia eta ONCE Fundazioko Bizkaiko abesbatza, 19:30ean abesten hasi direnak. 20:00etan, berriz, Erandioko Mendibaiarte abesbatza aritzen ari da Bilboko Atxuri auzoko elizan eta 20:30ean Algortako Itxartu abesbatza izango da Bilboko Errekaldeberri auzoko elizan. Bihar, larunbata, berriz, Algortako Trinitarioen elizan Irutasun abesbatzak kantatuko du, Basauriko Soinu Bidea eta Santurtziko Lagun Zaharrak Abots Zuriak taldeekin batera, 20:15ean hasiko den emanaldian. Gainera, Astrabuduako Abots Alai abesbatza Lekeitioko Andra Mari elizan izango da, Sopelako Munarri taldea Sopuertako Baluga auzoko San Pedro elizan eta Plentziako Iraunkor abesbatza Zornotzako San Juan Bataiatzailea elizan. Guztiak arratsaldeko 8etan. Argazkian, Itxartu abesbatzako bi kide iaz kaleratutako diskoa aurkezten, Iñaki Zarraoa orduko Getxoko alkatearekin batera.
  Jendartea 2008-04-11 22:20

Galdaretxeko lanen legezkotasuna zalantzan jarri du epaileak

Erabiltzailearen aurpegia Ukberri Algortako Ereaga hondartza eta Portu Zaharraren arteko ibilbideko herri lanen aurka, Getxo Biziak aurkeztutako administrazioarekiko auzi helegitea aintzat hartu eta proiektu horren legezkotasuna aztertzera behartu du Getxoko Udala Bilboko Administrazioarekiko 2. Epaitegiak. 2006ko abuztuan obra horien kontrako deuseztasuneko demanda ezarri zuen ezker abertzaleko herri plataformak, egitasmoak "hutsune legal nabarmenak" zituela argudiatuta. Tokiko erakundeak, baina, ez zuen eskabidea onartu, lehenik isiltasun administratiboa erabiliz, eta gero espreski errefusatuz. "Horretarako zera esan zuen, proiektuak prozedura egokiro bete zuela, eta bere legezkotasuna auzitan jar zezakeen elementurik ez zegoela", Getxoko ezker abertzaleak gogoratu duenez. "Orain, Udala deuseztasuneko demanda legearen arabera tramitatzera eta ondorioz proiektuaren legezkotasuna berrikustera behartuta dago. Horretarako, besteak beste, EAEko Aholku Batzorde Juridikoari eskatu beharko dio txostena", azaldu dute. Epaiaren (pdf) arabera, tokiko erakundeak ez zuen hori legearen arabera tramitatu, "auziaren mamia (proiektuaren legezkotasuna) saihestu, eta aurkeztutako argudioek izan zezaketen arrazoia erabat baztertu zituelako, haietara sartu gabe". Ereaga eta Portu Zaharra arteko singera eta harkaitz guneak -Galdaretxe tartean- kaltetuak izango zirelakoan egin zuen proiektuaren aurka Getxo Biziak. Argazkian, beharginak Galdaretxe inguruan lanean / Sotavento.
  Kultura 2008-04-11 21:21

"Alegiazko liburua" antzezlana taularatuko dute igandean Kultur Leioan La Baldufa katalanek

Erabiltzailearen aurpegia Ukberri La Baldufa talde katalanak "Alegiazko liburua" izenburuko antzezlana eskainiko du igande honetan, apirilak 13, 12:00etan hasita, Kultur Leioa aretoan. Saioa euskaraz izango da, eta sarrerak 4 euroko prezioan, BBKren orotarako kutxazainetan, 944 310 310 telefono zenbakian, www.bbk.es webguan eta txarteldegian lortu daitezke, tokiko kultur iturriek adierazi dutenez. Antolatzaileek arabera, "Alegiazko liburua" antzezlana "jende guztiarentzako bidaia da, diziplina askotako ikuskizuna, abentura eta utopiarako deia izan nahi duena". "Muntaiaren protagonistak existentzia monotonoa eta aspergarria dauka. Bulego batean egiten du lan eta egunero zeregin berberak errepikatzen ditu. Orduan, liburu bat helduko zaio eskura, eta liburuaren irakurketak mundu berri baten ateak irekiko dizkio: irudimenaren, abenturaren eta bidaiaren mundua", azaldu dute. Hiru istorio batean biltzen ditu antzezlanak, zeinean gizon eta emakumeen kezkak islatuta aurkezten diren. Luis Zornozaren zuzendaritzapean, Enric Blasi, Emiliano Pardo, Carles Pijuan eta Carles Benseny dira antzezleak. Bestalde, gaur bertan, 20:30ean, Ken Zazpi talde gernikarraren azken diskoaren aurkezpenarekin zuzenean gozatzeko aukera egongo da, 10 euroren truke, Kultur Leioan.
  Gazteok 2008-04-11 20:45

Gazteok Bat ekimena aurkeztuko dute bihar Itzubaltzetan

Erabiltzailearen aurpegia Ukberri "Gazteok Bat irabaziko dugu!" lelopean, bihar, larunbata, Itzubaltzeta / Romoko Itzubaltzeta gaztetxean aurkeztuko dute hainbat gazte talderen babesa duen Gazteok Bat ekimena. Itzubaltzeta / Romoko HNT, Segi, Ikasle Abertzaleak, Ez Jaun Ez Jabe eta gaztetxeak jakinarazi dutenez, begi onez ikusi dute "gazteriak pairatutako errepresioa salatzeko eta haiei laguntzeko" ekimen hori. Antolatzaileek arratsaldeko 8etan jarri dute hitzordua, kontzertu batekin osatu dutena. Izan ere, bertan izango da Itzubaltzetako Ovarios Varios punk bertsioak egiten dituen emakume gazteen taldea, El Trono de Judas Iruñeko punk-rock talde ezaguna eta Los 4 elementos banda sarturtziarra entzuteko aukera hiru euroren truke. Kontzertuan aterako den dirua, Barakaldoko Dorretxea gaztetxearen desalojoaren harira jarritako isunakordaintzeko bideratuko dituzte, antolatzaileek zehaztu dutenez. Argazkian, orain arte Gazteok Bat plataformak egindako ekimen publiko bakarra pasa den urtarrilaren 26an Algortan burutu zen "Gazte eta aske, irabazi arte!" lelopeko manifestaziora luzatutako deialdia izan da.
  Jendartea 2008-04-11 15:39

Arratsaldean hasiko da Kukutzan Emakume Gazteen Asanblada

Erabiltzailearen aurpegia Ukberri Emakume Gazte Feministek antolatuta, gaur arratsaldeko 16:30ean Bilboko Errekalde auzoko Kukutza gaztetxean abiatuko den Euskal Herriko emakume gazteen asanbladan parte hartzera deitu du antolakuntzak, neska eta emakume gazte guztiak beren burua gonbidatua ikus dezaten eta bilkurara hurbiltzen anima daitezen. Bilkuraren aurkezpenean zehaztu zutenez, hitzordua ezinbestekoa jotzen dute, egungo gazte mugimenduko emakumeak "berdintasunaren garaian hezituak izan gara eta horren ondorioz askotan emakume gazteak feminismoarekin dugun atxikimendua oso txikia da" eta horretaz ", kontzientzia hartzea eta egoera horri aurre egiteko antolatu eta borrokatzea ezinbestekoa dugu. Horretarako elkartuko gara ostiralean". Era berean, larunbat eta igandean ospatuko diren Euskal Herriko IV. Jardunaldi Feministetarako ere deitu egin dute, "bertan mugimendu feministak bere egoera aztertu eta borrokaren norabideaz hausnartzeko aukera izango" baitu. Argazkian, Emakume Gazte Feministek martxoaren 15ean egindako aurkezpena / Gazte feministak.
  Iritzia 2008-04-11 15:21

Alaitz, Eider eta Pello Ruiz de Agirre Larreategi: "maite zaitugu, Jabi!"

Erabiltzailearen aurpegia Ukberri Amorruz hartu genuen, Jabi, zure gaixotasunaren berri. Madarikatzen dugu heriotza ate-joka bat-batean etortzen denean. Baina borrokalaria izan zara, borrokalari handia, eta duintasunez eutsi diezu enbataren azken erauntsiei, tinko, heriotzari aurrez aurre begiratuz, azkeneko hatsa lehenago eman izan bazenu bezala. Gaixotasunak astiro itzali zaitu, zuk maite zenituenak banan-banan agurtu zenituen bitartean, zure erara, bizitzako azken momentuak zurekin konpartitzeko aukera eskainiz. Heriotzak gure albotik eraman zaitu, itsasoaren muturrera, eguzkia udako ilunabarretan ezkutatzen den lekura, gu iritsiko ez garen tokira. Eta gogorra da agur esatea, gero arte batez ordezkaezin bihurtzen denean; gero arte batekin agurtuko gara beraz, negarra begietan, baina harro. Zure hutsuneak eragindako malkoek orria bustiko dute, baina egon zaitez lasai, bihotzean ditugu idatziak maitasunez beteriko lerroak, malkoen gaziak ezabatu ezin dituen tokian.