Jendartea 2008-04-17 18:50

Loroñon 350 txalet baino gehiago eraikitzeko egitasmoa "espekulatzaile eta txikitzailetzat" jo du Sopelako Gazte Asanbladak

Erabiltzailearen aurpegia Ukberri Sopelako Loroño kalean, udaletxetik hondartzarako bidean, babes ofizialeko 50 etxebizitza eraikitzearen truke, bizitza bakarreko eta biko 350 txalet baino gehiago altxatzeko baimena eman dutela salatu du tokiko gazte asanbladak. "Nork eraikiko ditu, batzokiak berak edo beraien jauntxoak? Eta batez ere nork erosiko ditu, partzela bakarrik 80 milioitik gora balio duenean?", kritikatu dute; baita landa horien "balio ekologikoa" nabarmendu ere. Aipatu proiektua "espekulatzaile eta txikitzailetzat" jo dute Sopelako Gazte Asanbladako kideek. Hala ere, hori "hasiera besterik ez" dela ohartarazi dute: "egun 12.000 lagun bizi dira Sopelan eta, urte batzuen buruan, kopuru hori 20.000ra heltzea du helburu Lurralde Zati Planak. Hori guztia, Sopelako alkate izandako Ander Urrutia kide duen Bizkaiko Batzar Nagusietako EAJk onartua eta baimendua", adierazi dutenez. Hartara, larunbat honetan, apirilak 19, 12:30ean, "obretara bisitatxoa" egitera deitu dute, "proiektu txikitzailea ezagutzera emateko". Argazkian, etxebizitza eskubidearen aldeko eta espekulazioaren aurkako horma irudi bana Hernanin / Etxebizitza Eskubidea.
  Gazteok 2008-04-17 18:27

Larunbatean Itzubaltzeta / Romoko koadrilek beren egun nagusia ospatuko dute hirugarren urtez

Erabiltzailearen aurpegia Ukberri Erromo eta Pinuetako Jai Batzordeak antolatuta, larunbat honetan, hilak 19, ospatuko da Itzubaltzeta / Romon Koadrila Egunaren III. edizioa. Goizeko 12etatik aurrera, herriko koadrila txiki, gazte zein helduak ondo pasatzeko hainbat jarduera izango dira. Esate baterako, eguerdian hamabietako eta poteoarekin hasiko dira gazte eta nagusiak, ordu laurden geroago txikiek Santa Eugenia plazan umeentzako jolasetan ibiltzeko aukera izango duten bitartean. 14:00etan eguneko pregoia irakurriko da eta ordu bat beranduago herri bazkariaz gozatu ahal izango da. Bazkalostekoa burututa, urtero koadrilek ateratzen duten argazki ofiziala ateratzeko unea helduko da, 18:00etan, ondoren koadrilentzako jolasak izango direla. Gaueko 21:00etan, berriz, kalejira eta poteo musikatua egingo dituzte herrian zehar, eguna Itzubaltzeta gaztetxean ospatuko den jaialdiarekin amaituko dela. Argazkian, koadrilen iazko argazki ofiziala.
  Politika 2008-04-17 16:22

Larunbatean 35 urte beteko dira Eustakio Mendizabal "Txikia" Algortan hil zutenetik

Erabiltzailearen aurpegia Ukberri Larunbat honetan, hilak 19, Eustakio Mendizabal Benito "Txikia" ETA erakundeko kidea, poeta eta euskaltzalea Espainiako Poliziak hainbat tiroz hil zuenetik 35 urte beteko dira, Uribe Kostako Amnistiaren Aldeko Mugimenduak Etengabe bitakoran gogoratu duenez. Itsasondoarrak Algortan Jose Manuel Pagoaga "Peixoto" ETAko kidea ere zenarekin zeukan hitzordura trenez agertu zenean inguru guztiak zituen hartuta Poliziak eta, gainera, bere atzetik trenean ere bazetozen. Bi etakideak korrika hastean tiroka hasi ziren poliziak, dozena bat, eta Pagoaga ihes egiten lortu bazuen ere, Mendizabal larri zauritu zuten eta 20 minututan hil zen. Handik hona, historiaz, prentsaz eta literaturaz gain bi eratan gorde da Mendizabalen izena. Alde batetik, Telesforo Monzonek "Txikia zuen guda izena" idatzitako kantaren bidez eta, beste aldetik, 1980ko maiatzaren 17an Getxoko Udalbatzak poliziek Mendizabal hil zuten plaza Txikia plaza izendapen berria onartuz, EAJ eta HBko botoekin eta PSEren abstentzioarekin.
  Kultura 2008-04-17 16:03

"Gu ta gutarrak" ikuskizuna eskainiko dute larunbatean Leioan

Erabiltzailearen aurpegia Ukberri Larunbat honetan, apirilak 19, "Gu ta gutarrak" ikuskizuna hartuko du Kultur Leioak. Igor Elortza eta Unai Iturriaga bertsolariek eta Josu Zabala, Aitor Rubio eta Alex Ruiz de Azua musikariek 90 minutuko iraupena duen ikuskizuna eskainiko dute. Bertsoak eta musika ditu oinarri, emanaldian hamar-hamaika bertso sorta musikatuta eta bat-bateko bertso batzuk ere kantatuko baitituzte. Egileen hitzetan, "gutako bakoitzak hamaika gutar ditu bere baitan: gutar ameslaria, gutar axolagabea, gutar zintzoa, gutar eszeptikoa, gutar parrandazalea, gutar gaiztoa, gutar politikoa, gutar lotsatia, gutar sexuala, gutar nagia, gutar eroa...". Saioa 20:00etan izango da eta sarrerak 5 eurotan daude salgai. Biharamunean, berriz, "The horror bus" izenburuko filma edukiko dute 7 urtetik gorako neska-mutilek, 12:00etan eta 17:00etan, 3 euroren truke. Eta 20:00etan "Querida Bamako" pelikula proiektatuko dute (3 euro) entzungelan; baita astelehenean ere. Argazkia: Jabi Zabala.
  Gazteok 2008-04-17 15:23

Larunbatean ospatuko du lehenengo urteurrena Erandioko Gazte Asanbladak

Erabiltzailearen aurpegia Ukberri Erandioko Gazte Asanbladak (EGA) larunbat honetarako, apirilak 19, jarri du lehenengo urteurrena ospatzeko eguna. "Urtean zehar asko izan dira aurrera atera ditugun ekimenak (mus txapelketa, inauteriak, herriko jaiak, Olentzero gaua, etxebizitza duinaren aldekoak ekintzak...). Egindako lanarekin aurrera jarraitzeko gogoz Gazte Asanbladaren 1. urteurrena ospatuko dugu herrian ahalik eta ohiartzun handiena lortzeko", azaldu dute neska-mutil erandioztarrek. Horrenbestez, etzi, umeentzako tailerrek emango diote hasiera 11:00etan ospakizunei eta, ordu bete beranduago, ipuin kontalaria izango dute neska-mutilek. Eguerdi aldera, berriz, triki-bertso txikiteoan abiatuko dira herriko tabernetan barrena gazte erandioztarrek, 14:00etan bazkaria egin artean. Arratsaldean, berriz, Oka erraldoia (17:00) eta kalejira musikatua (19:00) izango dira. Amaitzeko, Materia Gris, 121Krew eta Dj.Bull-ek emango dute kontzertua, 21:00etan. Ekitaldi guztiak metro geltokiko plazan izango dira. Argazkian, iazko aurkezpen egunean, EGAko kideek ongi etorri pankarta jartzen
  Kultura 2008-04-17 15:05

Emakumeak Musikan jaialdia egingo dute asteburuan Areetan

Erabiltzailearen aurpegia Ukberri Apirilaren 18tik 20ra, Emakumeak Musikan VIII. Jaialdia izango da Areetako Andres Isasi musika eskolan, izen bereko elkarteak antolatuta eta Getxoko Kultur Etxeak lagunduta. Aurtengo jaialdiko ardatza bi musikarien jaiotzaren urteurrenaren ospakizuna izango da: Elena Romero musikagile, piano-jole eta orkestra zuzendariaren jaiotzaren mendeurrena eta Mel Bonis artista frantziarraren jaiotzaren ehun eta berrogeita hamargarren urteurrena. Lehenengo bi egunetan kontzertuak 20:00etan hasiko dira; hirugarrenean, berriz, 19:00etan hasiko da saioa. Gonbidapena, doakoa, Algortako kultur etxean (Villamonte) jaso daiteke. Emakumeak Musikan elkarteak errezitaldiak eta hitzaldiak eskaintzen ditu historiako zenbait garaitako emakumeen musika ezagutzera emateko. Horrezaz gain, emakumeek osatutako iraganeko eta gaurko musika ikertu eta katalogatzen ditu, besteak beste. Argazkian, azken egunean arituko den La Veneranda taldea.
  Kultura 2008-04-17 14:46

Azken lanak aurkeztuko dituzte hainbat artistek Arte Ederretan

Erabiltzailearen aurpegia Ukberri Ostiral honetan, apirilak 18, "Hear me with your eyes" (Begiekin entzun nazazu) hitzaldi zikloaren bigarren edizioari hasiera emango diote, Leioa eta Erandioko campuseko Arte Ederren fakultatean, Fernando Sanchez Castilloren eskutik. Ekimenaren bitartez, euren azken lanak aurkeztuko dituzte bertan hainbat artistek. Hain zuzen ere, Genevieve Cadieux-ek 1989an egindako obra baten izena daramate jardunaldiek. "Publikoak artista horiek lanak nola sortu eta burutzen dituzten ikusi ahal izango dute, bai kontzeptu, bai garapen materialaren aldetik", EHUko iturriek azaldu duetenez. Sanchez Castillori dagokionez, Arte Ederretan lizentziatua da Madrilgo Complutense Unibertsitatean. Lanean –batez ere eskultura, marrazki, bideo eta performance-aren bidez– arte eta boterearen arteko harremana ikertzen du. Datorren ostiralean, apirilak 25, Txuspo Poyok parte hartuko du zikloan. Biharko saioa 11:00etan izango da, Arte Ederren gradu aretoan, sarrera dohainik.
  Jendartea 2008-04-17 13:52

Leioako Udalak 233.000 euro bideratuko ditu garapenerako lankidetza egitasmoetarako

Erabiltzailearen aurpegia Ukberri Garapenerako lankidetza egitasmoak aurrera daramatzaten eragileen artean 233.000 euro banatuko ditu aurten Leioako Udalak. "Laguntza hauek jasotzeko erakundeek hainbat baldintza bete behar dituzte, adibidez, egoitza soziala Bizkaian eta Leioan bazkideak izatea. Bestetik elkarteak eta erakundeak irabazi asmo gabekoak izan behar dira eta Hirugarren Munduko garapenerako lanak egin behar izango dituzte", tokiko iturriek zehaztu dutenez. Laguntza eskuratu nahi duten elkarteek apirilaren 20tik (igandea) maiatzaren 20ra bitartean edukiko dute izena emateko aukera. Halarer, kontutan izan beharko dute, beti bezala, hainbat diru partida ezberdin izango direla. "Hau honela partida indibidual bi daude nominatiboak direnak, hau da, dagoeneko esleituta daudenak Dominikar Errepublikan eta Saharan lan egiten duten talde birentzat, herrialde bi hauek Leioarekin baitaude anaituta", azaldu dute udal arduradunek. 62.000 eurokoa da diru laguntza bi horietako bakoitza. Beste partida bat gainontzeko herrietan lan egiten duten taldeentzat izango da, 103.000 eurokoa eta 6.000 euroko azken partida "sentsibilizazio eta kontzientziazio" egitasmoei emango zaie, "gure herrialdetik kanpo egiten den lanaren berri emateko eta jendea laguntza ematearen beharraz ohartarazteko. Argazkian, saharar umeak Leioan.
  Politika 2008-04-16 23:30

Preso Politikoen Nazioarteko Egunaren harira enkartelada izango da bihar Algortan

Erabiltzailearen aurpegia Ukberri Kalera preso politikoen aldeko nazioarteko ekimenak egindako deialdiarekin bat eginez, besteak beste, Euskal Herrian, Herrialde Katalanetan, Grezian, Parisen edo New Yorken egingo dira bihar ekimenak. Donostian PSOEren egoitzaren aurrean burutuko da konzentrazioa. Uribe Kosta eta Erandiori dagokionez, enkartelada egingo dute Algorta, apirilak 17ko Preso Politikoen Nazioarteko Egunean. Hitzordua Telletxen da, 20:00etan. Bestalde, Etxerat euskal preso politikoen senideen elkarteak agerraldia egin du goizez Bilbon, Jose Luis Rodriguez Zapatero Espainiako Gobernuko presidenteak azken lau urteetan aurrera eraman duen espetxe politikaren balantzea egiteko. Besteak beste, Anjel Figueroa preso gaixo algortarraren ama Mari Karmen Fernandezek hartu du hitza aipatu prentsaurrekoan. "Esaten duena esaten duela, badaki egiten dutena legez kanpokoa dela eta beraien legeak betetzea nahi dugu", azaldu du emakumeak, Gara.net agerkari elektronikoak jaso bezala. Argazkian, Figueroaren aldeko elkarretaratzea Algortan.
  Kultura 2008-04-16 22:47

Ehunaka argazki jarri ditu sarean ikusgai UKBERRI.NETek

Erabiltzailearen aurpegia Ukberri UKBERRI.NET Uribe Kosta eta Erandioko agerkari digitalak bere irakurleen eskura ipini ditu ehunaka argazki. Izan ere, aurten webguneko diseinuari lotutako hobekuntzetan hainbat urrats eman ditu tokiko albistegiak eta orain eduki grafikoei garrantzi handiago emate aldera argazkiak uribekostar eta erandioztarren esku jarri nahi izan du. "Sarean egonda, guztion esku daude, nahi dutenean ikusteko" esan du Kepa Ugarte UKBERRI.NETeko koordinatzaileak. "Gainera", gogoratu du, "esperientzia txarra daukagu disko gogorretan gelditzen diren argazkiekin, 2006ko irailean era oso susmagarrian lapurtu zizkiguten bezalakoekin. Egon behar diren argazkiak ziurrago daude sarean". Gainera, agerkari digitalak hasieratik darabilen politikari jarraituz eduki guztiak creative commons lizentziapean egongo dira, nahi duenak erabil dezan. Momentuz, Sopelako Esaera Zaharren Txapelketako 110 argazki, Fred Weis Bilbao Basket peñaren aurkezpenean ateratako 23 irudi eta Erandion ospatutako martxoaren 8ko beste 14 argazki dira igo berri direnak. Dena den, material zaharra ere badago eskura eta nobedade berriak eguneratzen joango dira UKBERRI.NETeko kideak.
  Jendartea 2008-04-16 22:25

Hiru gazte atxilotu dituzte Uribe Kostan eta Erandion izandako hainbat atrakuren egileak direlakoan

Erabiltzailearen aurpegia Ukberri Ertzaintzak 19 urteko I.S.J. gaztea eta adin txikiko beste mutil bat atxilotu ditu 13:00ak aldera, besteak beste Sopelako gasolindegi, Erandioko ostalaritza establezimendu eta Plentziako banketxe batean izan diren atrakuetan nahasita daudelakoan. Atzeman dituztenean, susmagarriak lo egiteko atondutako furgoneta batean zeuden, Zorrotza (Bilbo) kanpoaldean, ustez isilpean bizi zirela, Eusko Jaurlaritzako Herrizaingo Sailaren arabera. Gogoratu beharra dago, Bizkaiko hainbat ertzain etxetako agenteek abiatutako ikerketaren ondorioz, 19 urteko M.S.G. ere atxilotu zutela igandean Sestaon. Gainera, taldeko beste bi kide identifikatu zituzten orduan, polizia iturrien arabera. Identifikazio horien bidez, bietako bat urtarrilaren 23an beste delitu batzuengatik Martutenen (Donostia) espetxeratu zuten, eta bestea adingabeen babeserako zentro batean zegoela jakin zuten.
  Kultura 2008-04-16 20:22

Ipar Uribeko bertsolari txapelketako txartelak eskuragai dituzte bertsozaleek

Erabiltzailearen aurpegia Ukberri Ostiral honetan, hilak 18, Ipar Uribeko bertso txapelketaren VII. edizioa abiatuko da, iluntzeko 21:00etan Sopelako Ander Deuna ikastolan egingo den bertso afaria dela medio. Lehenengo kanporaketa horretan, honako bertsolariek abestuko dute: ALBEko Miren Loizaga, Arrate Illaro, Unai Angulo eta Gabi Basañez, Taketeko Olatz Ibarluzea eta Itzubaltzetako Oier Iturralde "Atano". Algortako Bertsolari Eskolak Sopelako saiorako txartelak barra-barra ibili da saltzen eta bi egun baino ez direla falta azkenak banatzeari ekingo dio, tiketak amaitu arte. Izan ere, Sopelako bertso-afariaz gozatu nahi duenak albegetxo[abildua]gmail.com posta elektronikora idatzi edo 605 704 385 telefonora idaztea baino ez du egin behar, txartelak balio dituen 12 euroak oradaintzeaz gain, jakina. Larrabetzuko bigarren kanporaketako sarrerak, berriz, bersoa[abildua]euskalnet.net postara idatziz edo 628 400 409 deituz lor daitezke, 12 eurotan beharginak eta 10 eurotan ikasleak eta langabetuak. Azkenik, Fikan jesarlekua eskuratzeko, taketba[abildua]gmail.com posta elektronikora deitu behar da, bertako Torpedotik pasatu ezean. Argazkian, Ander Deuna ikastola.
  Jendartea 2008-04-16 20:16

Saharar umeak udan ekartzeko familien bila dabiltza Sopelan

Erabiltzailearen aurpegia Ukberri Sopelako Nuyum elkarteak Oporrak Bakean kanpainarekin bat egin du beste urte batez, Udalaren laguntzarekin. Laugarren ekitaldi honetan, saharar errefuxiatuen kanpamenduetan bizi diren umeei uztaila eta abuztuan familia sopeloztar batekin bizitzeko aukera eskaini nahi diete berriro. Beraz, “egitasmo honekin ume saharar bat etxean hartzera animatu nahi ditugu herriko familiak. Horrela kanpamenduetan jasaten dituzten egoera gogor eta ankerretik bolada baterako aldentzeko aukera ematen diegu”, azaldu dute Nuyum elkarteko bozeramaileek. 2007an bost neska-mutil heldu ziren Sopelara. Eskaera aintzat hartu nahi dutenek, Nuyum elkartera deituz egin dezakete eskaera, 695 788 185 telefono zenbakian, apirilaren 30a baino lehen. Argazkian, kanpainarako aurtengo kartela.
  Kultura 2008-04-16 19:55

Txapel Reggae jaialdirako kartel eta kamiseta lehiaketak deitu dituzte

Erabiltzailearen aurpegia Ukberri Uztailaren 19an egingo dute aurten Txapel Reggae musika jaialdia Armintzan. Oraingoan, gainera, herritarron parte hartzea eskatu dute antolatzaileek, kartelen eta kamiseten diseinua egiteko. Horrenbestez, "Txapel Reggae Armintza 2008" leloa agertu beharko da lehiaketetara aurkeztutako lanetan. Kartelerako diseinu bat eta kamisetarako beste bat aurkeztu behar dira (banatuta puntuatuko dira), tokiko iturriek zehaztu dutenez. Egindako lanak posta elektronikoz (armintzajb[abildua]hotmail.com), posta arruntez (Lemoizko Kultur Etxea. Portubidea, 5-48620 Armintza) edo aipatu kultur aretoan zuzenean entregatu ahal izango dira; izena eta harremanetan jartzeko telefono zenbakia jarriz. Kartel zein kamiseta lehiaketako irabazleak 100 euro jasoko ditu bakoitzak. Bestalde, ostegun honetan, apirilak 17, abiatuko dira Urdulizko jai batzordearen bilerak. Batzarra udaletxean izango da 20:00etan. Zalantzak edo galderak argitzeko kultura[abildua]urduliz.net posta elektronikora jo daiteke. Argazkian, kontzertua joan den urteko Txapel Reggae jaialdian.
  Gazteok 2008-04-16 18:33

Aurten ere udaleku irekiak egingo ditu uztaila eta abuztuan Sopelako Udalak

Erabiltzailearen aurpegia Ukberri Egitasmoa 4 eta 12 urte bitarteko (biak barne) Sopelan erroldatutako umeei zuzendurik dago soilik, udal iturriek zehaztu dutenez. Uztaileko lehenengo txandan 125 neska-mutilek parte hartzeko aukera izango dute, bigarrenean, berriz, 100. Bestalde, abuztuko lehenengo txandan 50 lagunentzako egongo da lekua eta bigarrenean 30entzako. "Eskainitako plaza kopuruaren %5 ezintasun fisikoa, psikologikoa edo zentzu ezintasuna duten umeentzat gordeko da. Kasu hauetan ume bakoitzeko begirale bat egongo da", gaineratu dutenez. Izena emateko epea maiatzaren 30era arte egongo da zabalik. Txanda bakoitzeko prezioa 80 eurokoa izango da (10 euroko seinalea eta 70 euroko matrikula). Inskripzio orria udal web orrialdean eskura daiteke. Argazkian, hainbat ume udalekuez gozatzen / Pinpoil.