Jendartea 2008-01-24 19:48

Getxoko udal aurrekontuen gaineko proposamena egin dio PPri EAJk

Erabiltzailearen aurpegia Ukberri Imanol Landa Getxoko alkateak gaur goizean aurreratu du Gobernu Taldeak 2008rako Udal Aurrekontuak negoziatzeko proposamena bidali diola PPri. Agintariak adierazi du popularren erantzuna "laster heltzea espero" dutela, "horrela udalerriko kontuetan adostasuna lortzeko elkarrizketa prozesuari ekiteko". Landak azaldutakoaren arabera, aipatu gaia eztabaidatzeko asmoz oposizioko alderdiekin izan zituzten lehenengo hartu emanetan, "PSE-EEk ezetz borobila eman eta PPk onartezina zen promosamena egin zigun. Hortaz, negoziazio prozesua ixtea erabaki genuen. Horren ostean, euren proposamena alde batera utzi eta berriro hartu emanei ekiteko prest zeudela adierazi ziguten". Gauzak horrela, aurrekontuetarako proposamen zehatza aurkeztu dio Marisa Arrue buru duen alderdiari EAJk, "horren gainean eztabaidatzen hasteko". Alkatearen hitzetan, "gu beti agertu gara aurrekontuak negoziatzeko prest". Argazkian, Landa eta Arrue aurrez aurre aurrekoak alkatetza hartu zuen egunean.
  Ekonomia 2008-01-24 19:10

Getxoko udal langileentzako hainbat hobekuntza eztabaidatuko dituzte biharko osoko bilkuran

Erabiltzailearen aurpegia Ukberri Ostiral honetan, urtarrilak 25, egingo den udal batzarrean, Getxoko Udalean ordezkaritza duten sindikatu guztiekin adostutako langileentzako hainbat hobekuntzei oneritzia ematea eskatuko du EAJ buru duen tokiko gobernu taldeak. Imanol Landak alkateak gaurko prentsaurrean jakitera eman duenez, proposamenak udaltzaingoen konplementu espezifikoaren aldaketa (lanari lotutako ezaugarriengatik) eta gaixotasunagatiko bajen ordainketei lotutakoak dira. "PPek eta PSE-EEk antzeko ekimen baten kontra bozkatu zuten abenduko osoko bilkuran, gobernu taldeak 2008rako Udal Aurrekontua aurkeztu ez izana argudiatuta. Espero dugu bihar kontrako jarrera ez agertzea oposizioko alderdiek, horri udal langileak zigortzea litzatekeelako”, adierazi du udal agintariak. Bestalde, aldi baterako ezintasunean laguntza ekonomikoa emateari buruzkoa akordioa adostu du sindikatuekin Getxoko Udalak. Argazkian, udaletxea.
  Politika 2008-01-24 19:07

Aner Mimenza Caceresera eraman dute

Erabiltzailearen aurpegia Ukberri Aner Mimenza (argazkian) Getxoko preso gaztea Caceresko espetxera lekuz aldatu dute, UKBERRI.NETi Mimenzaren senideek jakinarazi dioten arabera. Hilaren 21ean, astelehena, Anerrekin zuten familiako bisera sartzea ukatu zieten senideei, inolako azalpenik eman gabe. Gainera, Mimenza Valdemoroko espetxera eraman eta han izan dute hainbat egun, horretaz familiak ezer jakin barik. Gaur, berriz, preso getxoztarrak berak ondo dagoela baina Caceresera eraman dutela esan die. Aner Mimenza abenduaren 20an isolamendura sartu zuten Espainiako hainbat politikari eta kargudunen aurrean, euren eskubideen aldeko eta sakabanaketaren aurkako bat-bateko protesta batean izateagatik. Aste batzuk beranduago, Espainiako Auzitegi Nazionaleko Espetxe Zaintzarako Epaitegi Nagusiko Fiskaltzak eta epaileak "hertsapen edo mehatxu terroristen delitua" leporatzea aztertzeari ekin zioten. Bestalde, Soto del Realgo euskal preso politikoek hiru presoen "kontrako zigor neurriak kendu eta isolamendutik atera daitezela aldarrikatzeko" borrokaldia hasi zuten.
  Jendartea 2008-01-24 18:44

“Gobernu ona” aztertzeko aukeratu dute Getxo

Erabiltzailearen aurpegia Ukberri Getxoko Udala tokiko administrazioen “gobernu ona” ziurtatzeko sistema berri baten aplikaziorako aukeratu dute, udal iturriek jakinarazi dutenez. Ekimena, IWA 4 izenekoa, International Standard Asociation-ek (ISO) bultzatu du. Horrenbestez, otsailaren 11, 12 eta 13an, hiru pertsonako lantalde batek udal arduradun ezberdinak elkarrizketatuko ditu, udalerriaren egoera baloratzeko, IWA4 deritzon sistema honen gutxieneko 39 adierazleak kontutan hartuta. Adierazleok lau multzotan sailkatzen dira, gaiaren arabera: gobernu onerako garapen instituzionala, ekonomi garapen iraunkorra, gizarte garapen eraginkorra eta ingurumen garapen iraunkorra. Imanol Landa alkatea oso pozik agertu da “esperientzia honetan parte hartzeko aukeratuak izan garelako” eta, ekimena, “Udala garatzen ari den kudeaketaren bikaintasuneko ardatz estrategikoarekin bat egiten duela” gehitu du. Argazkian, Iñaki Zarraoa aurreko alkatea zilarrezko Q-a jasotzen, Juan Jose Ibarretxe EAEko lehendakariaren eskutik.
  Politika 2008-01-24 14:32

Gazteak "kriminalizatu" nahi dituztela salatu dute Gurasoek

Erabiltzailearen aurpegia Ukberri Goizeko 10ak aldera, 40 bat lagun elkartu dira Bizkaiko Probintzia Auzitegiaren aurrean, gaur bertan Espainiako Auzitegi Nazionalean hasi den 14 gazteren aurkako epaiketa salatzeko. Gurasoak elkarteko Jesus Gonzalezen hitzetan, Ertzaintzak 2002ko azaroan burututako sarekadaren ondorio da auzi berri hori: "batetik, Arkauten jasandako torturen pean egindako deklarazioetan oinarritu dira epaiketa abiarazteko. Bestalde, dagoeneko (beste auzi batzuengatik) epaituak izan dira gazteetako batzuk, baita kondenatu ere, bizitza osorako kartzela zigorra ezarriz", salatu duenez. Besteak beste, hori litzateke Aimar Hidalgo algortarraren kasua; sarekada horretan atxilotu eta, egun, Sorian preso dagoena zazpi urte eta erdiko zigorra betetzen, 2000ko abuztuaren 11n Algortan autobus bat erretzea leporatuta. "Gauzak zelan egin dituzten" eta orain arteko sententziak "oso gogorrak" izan direla kontutan hartuz, "gazteak kriminalizatu eta bide politikoa zapuztu" nahi dutela salatu dute Gurasoek. Argazkian, "Gazte kriminalizatuak = epaiketa politikoak" irakur zitekeen pankartari eutsi diote Bilbon bildutakoek.
  Politika 2008-01-23 23:35

EHAK eta EAE "orain" legez kanpo uztea "elektoralistatzat" jo du Esperanza Aguirrek

Erabiltzailearen aurpegia Ukberri Jose Luis Rodriguez Zapateroren gobernuak EHAK eta Eusko Abertzale Ekintzaren (EAE) ilegalizazioa hauteskunde kanpainaurrean bete-betean abiatu izana kritikatu du gaur goizean, Getxoko PPk Areetan duen egoitzan, Esperanza Aguirre Madrilgo Erkidegoko presidenteak. "Justizia ministroak behin esan zuen aipatu alderdiak legez kanpo uztea jokaldiaren araberakoa izango zela. Dirudienez, 'elektoralismoa' du izena jokaldiak", adierazi duenez. "Berandu sekula ez" dela aipatu arren, "2006an eskura zegoenean egin izan balute, ETAren zati baino ez den hori hainbat instituzioetan egongo ez" litzatekeela esan du buruzagi popularrak. Gaurko prentsaurrekoan (argazkian) lagun zuen Maria San Gil Euskal Autonomia Erkidegoko PPko presidenteak ere "nolabaiteko hauteskunde kiratsa" igarri dio erabakiari. Azkenik, Ignacio Astarloa Diputatuen Kongresurako popularren Bizkaiko hautagaiak PSOEk 2005etik aurrera egindakoa "engainutzat" jo du, "epaileari orain aurkeztu dizkion agiriak eskura zeuzkala, horiek biltzen ari zela esaten ibili delako". Euskal Enpresaburuen Zirkuluak gonbidatuta egindako bisitan, Antonio Basagoiti Bizkaiko PPko burua eta Marisa Arrue Getxoko popularren bozeramailea ere izan ditu ondoan Aguirrek. Baliteke zinegotzi getxoztarra Diputatuen Kongresurako Bizkaiko zerrendetan bigarren joatea, Madrilgo Erkidegoko presidenteak adierazitakoaren arabera. Bitartean, EAE eta EHAK alderdiak legez kanpo uzteko prozedura ostiralean abiatuko dutela iragarri du Mariano Fernandez Bermejo Justizia ministroak.
  Jendartea 2008-01-23 20:49

Algortara ere helduko da Munduko Gizarte Foroa

Erabiltzailearen aurpegia Ukberri Astelehenean hasi eta larunbatera arte luzatuko den Ekintza Globalerako Astearen (pdf) barruan, elkarretaratzea deitu du ostiral honetarako, urtarrilak 25, Algortako Getxo Antzokian, ELA sindikatuak. Kontzentrazioa 12:00etan egingo dute, "Beste eredu baten alde: gizarte eskubideak, gizarte laguntzak!" lelopean. Aurretik, "Zaindua izateko eskubidea" lelopeko mintegia egingo dute bertan, 10:00etan, zainketak behar dituzten lagunentzako sistema publiko eta unibertsala aldarrikatzeko asmoz. Lan erakunde abertzalearekin batera, besteak beste, CCOO, LAB, EHNE, EILAS, ESK, Bizkaiko emakumeen asanblada, Ekologistak Martxan eta Ikasle Abertzaleek antolatu dute neoliberalismoaren aurkako mobilizazio astea, aurtengo Munduko Gizarte Foroarekin bat eginez. Argazkian, ELAko kideak 2005eko otsailaren 20an erreferendumean bozkatuko zen Europako Batasuneko Itun Konstituzionalari ezetza emateko eskatzen algortarrei.
  Politika 2008-01-23 19:02

Jon Bilbao Mororen askatasuna aldarrikatzeko ekitaldia izango da igandean Astrabuduan

Erabiltzailearen aurpegia Ukberri Jon Bilbao Moro Astrabuduako preso politikoaren askatasuna aldarrikatzeko, ekitaldi politikoa egingo dute igande honetan, urtarrilak 27, bere herrian bertan. Urtarrilaren 15ean 26 urte bete ziren Astrabuduatik eraman zutenetik eta, denbora luze horretan 18 hilabetez bakarrik egon da Euskal Herriko kartzeletan, Uribe Kostako Amnistiaren Aldeko Mugimenduak Etengabe bitakoraren bitartez gogoratu duenez. Egun, 850 kilometrora dagoen Fontcalent (Alacant, Herrialde Katalanak) espetxean "bahiturik" dago, salatu dutenez. Izan ere, 2002an bete zuen kondena, legezko erredentzioak kontutan hartuta. Igandeko ekitaldia 12:30ean izango da Josu Murueta plazan. Argazkian, Jon Bilbao Erandiora plataformaren deialdiari jarraituz, 40 pertsona Fontcalent espetxearen atearen aurrean elkarretaratu ziren hilaren 12an, albokaren eta txalapartaren doinupean, preso politiko astrabuduarraren askatasuna aldarrikatzeko.
  Politika 2008-01-23 18:19

Gurasoek deituta elkarretaratzea izango da bihar Bilbon

Erabiltzailearen aurpegia Ukberri Gurasoak elkarteak elkarretaratzea deitu du ostegun honetarako, urtarrilak 24, egun horretan Espainiako Auzitegi Nazionalean hasiko den 14 gazteren aurkako epaiketa salatzeko. Kontzentrazioa Bilboko Buenos Aires kalean egingo da, Bizkaiko Probintzia Auzitegiaren aurrean, 10:00etatik aurrera. Ostiralean ere mobilizazioak deitu dituzte irakaskuntza zentroetan. Era berean, larunbatean, protesta bana izango da Galdakaon, Zamakoan 13:00etan, eta Algortan, 20:00etan Telletxen, auziperatuek eta senideek deituta. Bestalde, Gazteok Bat plataformak ere larunbatean Algortara joatera deitu du, ordua 13:30ean jarriz, Telletxen. Deialdi horrekin bat egin dute Ikasle Abertzaleek (IA), Herri Norte Taldeak (HNT), Itzubaltzeta gaztetxeak, Ez Jaun Ez Jabe talde libertarioak eta Segi gazte erakundeak. Arkaitz Goikoetxea ihes eginda dagoela kontuan hartuta, Uribe Kostako zortzi lagun epaituko dituzte: Algortako Urtzi Paul, Endika Lejarzegi, Ekaitz Bilbao, Aimar Hidalgo eta Kepa Saratxaga; Berangoko Martin Etxegarai, Sopelako Gontzal Gonzalez eta Leioako Urtzi Murueta. 2000ko irailaren 16an Galdakaon hainbat banketxe eraso izana leporatuta, kalteengatik 3 urteko espetxe zigorra eta desordenak eragiteagatik beste 2 urte eskatu du bakoitzarentzat fiskalak.
  Iritzia 2008-01-23 11:10

Luis Beroiz: "zenbat eta txartoago, orduan eta hobeto?"

Erabiltzailearen aurpegia Ukberri Badira hiru urte azkena bizi behar izan genuela, eta Auzitegi Nazionalak berriro deitu digu Madrilera beste epaiketa baten ildotik. Aitortzen dut zalantzak izan ditudala espazio hau eta zuen astia lapurtzeko unean, gure inguruan ikusten ari garenaren aldean, gurea ia-ia hutsala, euli kakaren parekoa delako. Zeren, eta bakarrik azken bidegabekeriak aipatzearren, zer da ustezko batzuk akusatuen aulkian esertzea bakearen aldeko liderrak espetxean egotearen aldean, edo 18/98 epaiketan emandako erabaki bidegabe eta funsgabearen aldean, edo bere zigorrak betiko bihurtu arte luzatu dizkieten presoen kasuaren aldean, edo segurua baino seguruagoa izango den alderdi zintzoen ilegalizazioaren aldean edo Guardia Zibilaren ziegetan Gorka, Igor eta Mattini emandako tratuaren aldean? Belarriak berotzea baino ez delakoan gaude. Baina ez da hala, ez horixe! Urtarrilaren 24 eta 25ean egingo den agerraldi honetan, eta bere esangura aztertu ostean, nik esango nuke behintzat gertaera bitxiak ikusiko ditugula. Argazkian, atzo Zazpi Kaleetako Gaztetxe plazan emandako prentsaurrekoa.
  Politika 2008-01-23 10:57

Zortzi gazte atxilotu ditu Espainiako Poliziak Lea-Artibain bart

Erabiltzailearen aurpegia Ukberri Kale erasoak leporatuta zortzi gazte atxilotu ditu Espainiako Polizia Nazionalak Ondarroan, Markina-Xemeinen eta Etxebarrin bart. Berria.info digitalak zabaldu duenez, Estebe Gandiaga, Urko eta Ainhoa Pagoaga, Borja Oregi, Iban Etxebarria, Eneko Ostolaza, Zaloa Zenarruzabeitia eta Eneko Etxaburua dira atzeman dituzten gazteak. Zortzi lagunei hogei eraso leporatu dizkiete; besteak beste, Markina-Xemeingo bake epaitegiaren kontra egindakoa eta banketxe batzuen kontrakoak. Atxiloturik gazteenak, Eneko Etxaburua, 18 urte ditu. Nagusiena, ordea, Eneko Ostolaza da, 25 urterekin. Polizia-operazioa Fernando Grande-Marlaska Espainiako Auzitegi Nazionaleko epaileak agindu du, eta 1:30ean hasi eta 8:00etan bukatu dute. Besteak beste, atxilotuen etxebizitzak eta Markina-Xemeingo gaztetxea eta herriko taberna miatu ditu Poliziak. Herritar batzuek operazioa salatzeko mobilizazioa deitu dute gaur 19:30erako.
  Politika 2008-01-22 20:53

Araba, Bizkaia eta Gipuzkoako zerrendak Bilbon aurkeztuko ditu UPDk larunbatean

Erabiltzailearen aurpegia Ukberri Union, Progresismo y Democracia (Batasuna, Aurrerapena eta Demokrazia, UPD) alderdiak martxoaren 9an Espainiako hauteskundeetan lehiatuko diren Araba, Bizkaia eta Gipuzkoako hautagaiak aurkeztuko ditu larunbat honetan Bilboko Arriaga antzokian. Ekitaldia goizeko 12etan burutuko dute eta bertan, besteak beste, Rosa Diez Madrilgo zerrendaburuak, Fernando Savater filosofoak eta Fernando Maura PPko Gasteizko legebiltzarkide ohiak hartuko dute parte. "Espainiako hirugarren indar politikoa" izateko asmoa duen alderdi horrek nabarmendu duenez, "hautagaiak soberan" izan ditu Gipuzkoan zein Bizkaian eta Araban Kongresurako zein Senaturako zerrendak osatzeko. Izan ere, UPyDren iritziz, Euskal Autonomi Erkidegoan "alderdi konstituzionalek zerrendak osatzeko dituzten zailtasunen jabe gara guztiok". Era berean, azpimarratu dute Gipuzkoan hautagaien erdia baino gehiago emakumeak direla, Paritatearen Legea behar izanik gabe. Argazkian, Rosa Diez, hilaren 12an Madrilen emandako mitinean.
  Politika 2008-01-22 19:59

Areetan izango da bihar Esperanza Aguirre

Erabiltzailearen aurpegia Ukberri Asteazken honetan, urtarrilak 23, Euskal Autonomia Erkidegora (EAE) egingo du bisita Esperanza Aguirre Madrilgo Erkidegoko presidenteak, EAEko Alderdi Popularraren iturriek jakinarazi dutenez. Horrenbestez, goizean, prentsaurrekoa eskainiko du Getxoko PPk Areetako Zugatzarte etorbideko 8. zenbakian daukan egoitzan. Topaketa hedabideekin 12:00etan izango da. Bestalde, Euskal Enpresaburuen Zirkuluaren ordezkariekin bazkalduko du buruzagi popularrak. Azkenik, iluntzean, ekitaldi publikoa egingo du Gasteizko Ciudad hotelean; 19:00etan hain zuzen. Uneoro Maria San Gil PPko EAEko presidentea izango du lagun Aguirrek. Argazkian, Getxoko PPren egoitza, Areetan.
  Politika 2008-01-22 19:47

Igor Porturen torturak ikertzea eskatu zutenei Bizkaiko 19 gazteen auzia iker dezaten eskatu die Askatasunak

Erabiltzailearen aurpegia Ukberri Etzi eta etzidamu Uribe Kostako zortzi gazteren eta beste sei lagun bizkaitarren aurka Madrilen egingo duten epaiketaren harira, "Ertzaintzak buruturiko polizia operazio hau torturetan oinarritua dagoela" salatu du Askatasunak. Era berean, errepresioaren aurkako erakunde ilegalizatuak "Igor Porturekin gertatu denaren gaineko ikerketa eskatzen ibili diren" Ertzaintzaren "arduradun politikoei" zuzendu zaie hainbat eskaera egiteko: Galdakaoko auziagatik atxilotutako gazteen tortura salaketen gainean ikerketa irekitzea, eta handik eratorriko diren erantzukizunak eta erantzuleak argitu eta zigortzea; Ertzaintzak "torturapean oinarrituriko gazte hauen aurkako akusazioak" bertan behera uztea; eta Ertzaintzaren esku egondako beste 270 pertsonek salatutako torturak ere ikertu ditzaten. Bestalde, Uribe Kostako AAMk "Atxiloketak-Torturak Uribe Kostan. 2002-10-24" (pdf) txostena kaleratu du, Arkaitz Goikoetxea, Kepa Saratxaga, Urtzi Paul, Orkatz Gallastegi, Endika Lejarzegi eta Ekaitz Bilbaok jasotakoak biltzen dituena. Argazkian, txostenaren azalean agertzen den Arkaitz Goikoetxearen irudi bat, atxilotuta.
  Kultura 2008-01-22 19:28

Otsailean festarik festa ibiliko dira Sopelan

Erabiltzailearen aurpegia Ukberri Zirkua oinarritzat hartuz, mozorro eta kalejirek hartuko dituzte otsailaren 1etik 5era Sopelako kaleak. Ostiraletik asteartera ez da magia, globoflexia, zirku tailer, pailazo eta, nola ez, mozorroen desfilerik faltako. Otsailaren 3an, igandearekin, izango da azken hori, udal pilotalekuan. Santa Agedako koplek ere tokia izango dute mozorro artean. Otsailaren 4an, astelehena, lehiaketan izena emanda dauden taldeek herrian zehar abestuko dute, ohiko jantziekin. Larrabasterrako Urgitxieta plazan batuko dira 13:00etan eta, handik, udaletxera bidean abiatuko dira. Irubide, Gurea, Sertutxa eta Brendan´s Isle tabernetan ere entzungo dira euren kantak egun osoan. Azkenik, otsailaren 14an, San Valentin egunean, amodiozko eskutitzen lehiaketaren sari banaketa egingo dute, 19:00etan Hall Kulturalean. Nahi adina eskutitz bidaltzeko aukera dago otsailaren 10a baino lehen, betiere amodioarekin edota desamodioarekin lotuta badaude. Argazkian, Nikola AEK euskaltegiko lagunak udaletxe plazan kantu kantari.