Kultura 2005-02-24 00:11

Kirola, aisialdia eta eskolaz kanpoko jardueren hizkuntz diagnostikoa egingo du Getxoko Udalak

Erabiltzailearen aurpegia Ukberri Euskararen erabilera bultzatzeko neurriak martxan jarri ahal izateko, Getxoko Udalak kirola, aisialdia eta eskola orduz kanpoko jardueretan euskararen erabileraren diagnostikoak osatuko ditu 140 inkesten bidez. Emaitzak datorren udarako edukitzea espero du Imanol Landa Presidentzia arloko zinegotziak. Ikerketa bitan banatzen da: alde batetik, haur eta gazteen eskola orduz kanpoko jardueretan eta aisialdian euskararen erabilera handitzeko diagnostikoa eta plan estrategikoa osatuko dira; beste aldetik, Gehi-Kirola egitasmoa jarriko da martxan, kirol jardueretan euskararen erabilera sustatzeko. (Argazkian, Artea Getxo Rugby taldeko kimuak).
  Kultura 2005-02-23 22:52

'Egunkaria'ren itxiera etetea eskatu dute Europako Parlamentuko 22 diputatuk

Erabiltzailearen aurpegia Ukberri Europako Parlamentuko 22 diputatuk, Josu Ortuondo (EAJ), Ignasi Guardans (CiU), Bernat Joan (ERC) eta Raul Romeva (ICV) tartean, adierazpen bat aurkeztu dute gaur Estrasburgoko Parlamentuan, "Euskaldunon Egunkaria"ren itxiera etetea eskatuz, euskal kazetaren itxieraren bigarren urtemuga betetzen denean. Adierazpenaren sinatzaileen artean Monica Frassoni Berdeen presidenteetako bat eta Graham Watson liberalen presidentea daude, besteak beste. ERCko diputatuak Egunkariaren "itxiera lotsagarria" kritikatu du; bere iritziz, Espainiak ez du iritzi-askatasunaren oinarrizko printzipioa errespetatzen, hau da, "Europako Batasunaren oinarrietako bat".
  Kultura 2005-02-23 22:27

Prest izan diruzorroak Korrikari laguntzatxoa emateko!

Erabiltzailearen aurpegia Ukberri Euskal Herriko kale, auzo eta herri guztietan bezala, Uribe Kosta eskualdean ere otsailaren 24tik 27ra bitartean egingo da Korrika 14ren aldeko diru-bilketa. Bihar Leioako EHUko campusean hasi eta Plentzia, Gorliz, Lemoiz, Barrika, Sopela eta Leioan igande eguerdian bukatu –Itzubaltzeta / Erromo-Areeta (otsailak 25, ostirala) eta Urduliz, Berango eta Algorta (otsailak 26, larunbata)– itsulapikoa eskuan dutela ibiliko dira AEKko irakasle eta ikasleak, laguntzera ingurutzen zaizkien guztiekin batera. Hortaz, prest izan diruzorroak Korrikari laguntzatxoa emateko!
  Kultura 2005-02-23 19:56

Larunbatean izango TxaTxan gazteentzako elkartearen aurkezpen jaia

Erabiltzailearen aurpegia Ukberri Salbuezpen moduan, Sopelako Kultur Etxeko 3. solairuan daukaten egoitzaren ateak zabalduko ditu mundu guztiarentzat, otsailaren 26an, udalerrian sortu berri den TxaTxan gazteentzako elkarteak. Izan ere, larunbat honetan, aurkezpen jaia egingo dute, 17:00etatik aurrera, udal pilotalekuan (egoitza parean). TxaTxan 10 eta 14 urte bitarteko Sopelako gazteei zuzendutako talde berria da, hau da, Lehen Hezkuntzako hirugarren zikloko eta Bigarren Hezkuntzako lehenengo zikloko ikasleak erakartzeko asmoarekin sortu da.
  Kultura 2005-02-22 21:01

Zer da Koska kultur elkartea?

Erabiltzailearen aurpegia Ukberri Euskal kultura eta ohiturak Uribe Kostan bultzatu nahi dituen irrati bat da Koska. Gure eskualdean dagoen edozein kolektibok zein pertsonak parte har dezake bertan, eta bere tartea izan, iritziak zabaldu eta dauden beharrizanak herritarrei jakinarazteko. Helburu horrekin hasi ginen lanean orain dela bost urte, eta denbora horretan irrati bat teknikoki osatzea lortu dugu, bidean agertu diren aldian-aldiko oztopo guztiak modu batean edo bestean gaindituz. Eskualdeko ekimen anitzetan parte hartze aktiboa daukagu: jai batzordeak, euskararen aldeko egunak, txalaparta egunak... Autogestioan oinarritzen gara eta ekintza asko burutu ohi dugu aurrera jarraitu ahal izateko, hala nola, txosnak, kontzertuak, kamisetak, zozketak, CDak… Azken erasoa: otsailaren 14an argitaratutako "Interviu"-n, 1.503. zenbakian, 50. orrialdetik 53. orrialdera, ETA, Batasuna, Y taldeekin.... lotzen gaituzte.
  Kultura 2005-02-22 19:54

Gazta azoka egingo dute asteburuan Algortan

Erabiltzailearen aurpegia Ukberri Otsailaren 25etik 27ra, Gazta Azoka izango da Algortako Telletxe plazan, Bertan, bisitariek jaki aparta horretaz gozatu ahal izango dute. Hainbat mota eta jatorrietako gaztak dastatu eta erosi ahal izango dira, ore biguneko gaztatik Idiazabal gaztara: ahuntz-gazta, ardi-gazta, "tetilla", Erronkarikoa, gazta urdina, gazta freskoa... Guztira, 11 saltoki izango dira, jatorri oso ezberdinetako ekoizlek parte hartuko dutelarik. Ostiraletik igandera, Hego Euskal Herria, Caceres, Galizia, Asturias, Kantabria, Segovia eta Burgoseko ekoizleak euren produktuak eskainiko dituzte honako ordutegietan: goizez, 11:00etatik 15:00etara eta, arratsaldez, 17:00etatik 22:00etara.
  Kultura 2005-02-22 13:57

'Egunkaria'ren itxiera salatuko dute bihar Europako Parlamentuan

Erabiltzailearen aurpegia Ukberri Josu Ortuondo (EAJ) eta Bernat Joan (ERC) eurodiputatuek "Euskaldunon Egunkaria"ren itxieraren bigarren urtemuga salatuko dute asteazken honetan Europako Parlamentuan, gaur jakinarazi dutenez. Ortuondok eta Joanek prentsaurreko bat eskainiko dute Europako Parlamentuaren Estrasburgoko egoitzan, Gorka Knörr (EA) Eusko Legebiltzarreko Mahaiko kidearekin batera. Bertan, "adierazpen-askatasunak Euskal Herrian jasan duen erasoa" kritikatuko dute.
  Kultura 2005-02-22 13:37

Oskar sarietan egongo da Miren Azkarate Ibarretxetarren filmari laguntzeko

Erabiltzailearen aurpegia Ukberri Miren Azkarate eta Gurutz Larrañaga Eusko Jaurlaritzako Kultura sailburua eta sailburuordea, hurrenez hurren, Hollywoodera joango dira Film Labur Onenaren Oskar sarirako hautagaia den "7:35 de la mañana" film laburrari babesa adierazteko. EAEko gobernuaren laguntzarekin, Ibarretxe & Company enpresak ekoiztua izan da, Javier, Esteban, Jose Miguel eta Santiago Ibarretxe anai getxoztarrek sortutakoa zeinean Eduardo Carneros bazkidea den (udalerrikoa ere bai). Nacho Vigalondo kantabriarrak idatzi, protagonizatu eta zuzendu du.
  Kultura 2005-02-21 20:04

Goizetik dago mutu Koska irratia

Erabiltzailearen aurpegia Ukberri Arazo teknikoak direla medio, ordura arte egun osoan ez da aukerarik egon Koska irratiak egunetik egunera eskaintzen duen emisioa entzuteko. Bertatik UKBERRIri adierazi diotenez, oraindik ez dakite irrati-loturarekin arazorik dagoen edota Serantes mendiko antenan dagoen koska. Izan ere, euren ordenagailuan dena ondo dabil. Ordu hauetan, teknikariekin dabiltza harremanetan ahalik eta lazterren matxura konponduta egon dadin. Bitartean, eragozpenak barkatzeko eskatzen diete ohiko entzuleei Koska irratiko arduradunek.
  Kultura 2005-02-21 15:09

Egunkariaren Alde Elkartea sortu dute

Erabiltzailearen aurpegia Ukberri Juan del Olmo epailearen aginduz "Euskaldunon Egunkaria" itxi zutela bi urte bete ziren atzo (otsailak 20). Martin Ugalde Kultur Parkean ekitaldia egin zuten itxiera gogorarazteko. Bestalde, "euskal kulturaren inguruan osatu duten gezur handia eraistea" xede izango duen Egunkariaren Alde Elkartea aurkeztu zuten. Auzipetuek gizartearen laguntza eskatu eta Europara joango direla jakinarazi zuten atzoko ekitaldian. Horretarako, bideoa eta web orria (www.egunkaria.info) prestatu dituzte.
  Kultura 2005-02-21 14:41

Hernanin egingo dute txotx berbalagun getxoztarrek

Erabiltzailearen aurpegia Ukberri Lasarteko Ttakun euskara elkartera bisita egin ostean, Hernaniko Oiarbide sagardotegian egingo dute afaria, martxoaren 5ean, Bilbo, Urtuella, Muskiz eta Getxo udalerrietako berbalagunek. "Elkar ezagutzea" da asmoa, Rozio Luces Egizuko arduradunak UKBERRIri azaldutakoaren arabera. Gainera, nahiz eta berbalagunek lehentasuna eduki, egitasmoan oraindik parte hartu ez dutenei ere luzatu diete irteeran izena emateko aukera, taldeak eta berbalagunak nortzuk diren ezagutzeko. Otsailaren 25era arte dago zabalik epea.
  Kultura 2005-02-21 13:57

Martxoaren 15ra arte dago zabalik urteko kultur eta kirol jardueretarako dirua eskatzeko epea

Erabiltzailearen aurpegia Ukberri Euren ohiko jarduera aurrera eraman dezaten, udalerriko kultur eta kirol elkarteei dirulaguntzak emateko deialdia onartu du Getxoko Udalak, eta eskaera epea martxoaren 15ra arte egongo da zabalik. Guztira, 455.000 euro banatuko dituzte: 365.000 kirol elkarteen artean eta gainontzeko 90.000 euroak kultur taldeen artean. 2004an onartu zen subentzio hauek arautzen dituen ordenantza berria eta deialdi irekia eta epez mugatua egiten den lehen urtea da. Iñaki Zarraoa alkateak gogora ekarri duenez, “diru-laguntzak eman aurretik herri administrazioak deialdi bat finkatzera derrigortzen duen Espainiako araudiaren harira, dirulaguntza horiek ematerako orduan kontuan hartu beharreko eduki eta irizpideak ere zehazten ditu”. Esan bezala, elkarteen ohiko jarduerak diruz lagunduko dituzte, ez behin behinekoak.
  Kultura 2005-02-19 19:19

Urrezko Kilometroa Gorliz, Plentzia eta Lemoizen

Erabiltzailearen aurpegia Ukberri Aurton, Gorliz, Plentzia eta Lemoizen, Korrika 14 honetan berrikuntza bat egiteko asmotan gabiltza: “Urrezko Kilometroa”, hots, urtean edo urteetan hauetako herri bakoitzean euskara edo euskal kulturaren alde zerbait garrantzitsua egin duen norbaiti eskainiko zaion kilometroa da, eta Urrezko Kilometroak aukeratutako pertsona edo taldeari omenaldia egiteko izateaz gain Korrikan parte hartu nahi duen edonorentzako bilgunea izango dira.
  Kultura 2005-02-18 20:17

'Hazi eta hezi euskaraz!' kanpainari heldu dio Uribe Kostak

Erabiltzailearen aurpegia Ukberri Otsailaren 14ean zabaldu zen 2 eta 3 urteko neska-mutikoak eskolan aurrematrikulatzeko epea, eta hilaren 25era arte luzatuko da. Beraz, gurasoek laster erabaki beharko dute seme-alabak zein ikastetxeetara eraman eta zein hizkuntza-eredutan eskolaratu. Horren harira, Alkarbide bilguneak koordinatutako "Hazi eta hezi euskaraz!" kanpainarekin bat egin dute Bizkaiko 24 udalerrik eta hiru mankomunitatek, eskualdeko herri guztiak horien artean daudela: Erandio, Getxo, Leioa eta Uribe Kostako Mankomunitatea osatzen duten Barrika, Gorliz, Lemoiz, Plentzia, Sopelana, Urduliz eta Berango, nahiz eta azken hau bere kabuz abiatu duen ekimena. Gurasoei hezkuntza sareko B eta D ereduak dituzten alderdi onen berri ematea da helburua, horiek direlako erakunde publikoen hitzetan eredu euskaldunak, beti ere,
  Kultura 2005-02-18 19:41

Erreferendumari aurrea hartu dio UK aldizkariak bere 75. zenbakian

Erabiltzailearen aurpegia Ukberri Uribe Kostako euskaldunok buzoian daukagu jada Boluntzarreta elkarteak argitaratutako UK aldizkariaren ale berria, 75. zenbakia, alegia. 2004ko (sic) otsailaren 20ko data duen aldizkariaren "Gu Geu" atalean (editoriala ez-ofiziala), UK-ko lantaldea Europa Batasuneko Itun Konstituzionalaren kontra azaldu da euskaldunon hizkuntz eskubideen ikuspegitik.