Ekonomia 2009-05-21 15:18

Sopelako elkarretaratzean ezker abertzalearen, EAren eta Berdeen zinegotziek parte hartu dute

Erabiltzailearen aurpegia Ukberri Beste 70 bat herritarrekin batera, ezker abertzaleko, EAko eta Ezker Batuko zinegotziak ere gerturatu dira, goizeko 10etan, Sopelako udaletxe aurrean egindako elkarretaratzera. "Gora langileen borroka krisiaren aurrean!" leloari heldu nahi izan diote horrela sopeloztarrek. Bitartean, itxita egon dira Sopela eta Larrabasterrako saltoki gehienak, baita La Caixa, Ipar Kutxa, Caja Laboral eta beste hainbat banketxe ere. Udaletxea ere zerratuta zegoen. Bitxikeria bat aipatzearen, Guardia Zibila igaro da plaza aurreko errepidetik, grebaren aldekoak kontzentratuta zeudela. Elkarretaratzea amaituta, gisa katea egin dute Sopelako kaleetan barrena. Arratsalderako, berriz, Urdulizko Mecaner enpresako parkingean daukate jarrita hitzordua, 16:00etan, bi ordu barru Leioan egingo den eskualdeko manifestaziora auto karabanan joateko. Argazkian, La Caixa banketxea itxita, baita inguruko saltokiak ere. Eskualdeko argazki gehiago ikusteko sakatu hemen.
  Ekonomia 2009-05-21 14:46

Itzubaltzetako piketeak jazartzen ibili da Ertzaintza

Erabiltzailearen aurpegia Ukberri Itzubaltzeta / Romon, goizeko bederatzietan jarri dute hitzordua, Kolas plazan, saltokiz saltoki abiatzeko. Hala ere, hasieratik Ertzaintzaren patruila auto bi eta furgoneta bat ibili dira inguruan zelatan. Bitartean, pertsiana ez zabalik, ez itxita, zeukaten denda eta taberna gehienek. Baten batek zera esan dio bezeriari: "itxita daukagu, baina sartu nahiez gero, atea jo lasai". Pinueta aldean bizi izan da lehendabiziko tentsio unea: piketeko kideak --35 lagun inguru- aurrera zihoazela, pare bat ertzain furgonetatik jaitsi eta Amaia kaleko merkatariengana zuzendu dira, arazorik zegoen galdezka. Hala ere, ondoren gertatu da karga saiakera, Kresaltxu kalean. Grebalariak Simply Market supermerkatuko arduradun batekin eztabaidan ari zirela, Ertzaintzaren furgoneta inguratu eta bertatik atera dira agenteak txanoa jarrita eta pilota jaurtigailua eskuan. Piketeko kideak identifikatzeko asmoa ere adierazi dute ertzainek, baina saiakera ustela atera zaie. Grebalariak aurrera jarraitzen zutela, identifikatzeko eskatu dio UKBERRI.NETeko kideetako bati ertzain buruak. Hala ere, kazetaria zela esan eta gero, bertan behera utzi du saiakera. Azken orduko berririk ezean, atxiloturik ez da egon. Argazkian, Ertzainak zelatan piketeko kideak urruntzen diren bitartean. Eskualdeko argazki gehiago ikusteko sakatu hemen.
  Ekonomia 2009-05-21 14:08

Erandion enpresetan izaten ari da greba indar gehien

Erabiltzailearen aurpegia Ukberri Erandion, goizeko 8:30ean jarrita zeukaten hitzordua grebalariek, Altzagako metro geltoki alboan, tabernaz taberna eta dendaz denda joateko. Hala ere, ordurako, zabalik zeuden goizez irekita egon ohi diren kafetegi eta kiosko gehienak. Bitartean, eskolak ematera zihoazen normaltasunez Jado-Compasion ikastetxeko neska-mutilak, oinezkoen pasabidetik igaro daitezen, hiru udaltzainek zainduta. Ertzainik ez da agertu inguruan eta piketea denda guneetara abiatu da, gorabeherarik gabe. Bertan, zabalik zeuden banketxe guztietan gaurko jardunaldiaren gaineko informazioa utzi dute grebalariek; baita kartelak jarri ere, orduagatik oraindik itxita zeuden saltoki eta tabernetako pertsianetan. Gutxienez une horretan, taberna bat ixtea ere lortu dute piketeko kideek. Bitartean, normaltasunez ibili da Altzaga eta Barakaldo lotzen dituen gasolinoa. Ez Axpe industrialdean bezala: bertan itxita zeuden enpresa gehienak. Erandioko Carrefour merkataritza gunean, ordea, grebarekin bat egin ez dezaten, langileek "mehatxuak" jaso dituztela salatu dute tokiko greba batzordeko kideek. "Atzo banan-banan joan zitzaizkien nagusiak, gaur greba egingo duten ala ez galdezka. Langileen egoera ezegonkorra da guztiz eta horretaz baliatzen ari dira beldurra sartzeko", adierazi dutenez. Argazkian, Erandioko herriko etxea itxita. Eskualdeko argazki gehiago ikusteko sakatu hemen.
  Ekonomia 2009-05-20 20:53

Hamaika mobilizazio egingo dute bihar grebalariek

Erabiltzailearen aurpegia Ukberri Gaur egungo krisialdi ekonomikoa langileek ordain ez dezaten ELA, LAB, ESK, EILAS, EHNE eta Hiru sindikatuek bihar deitutako greba orokorrarekin bat egin eta hainbat deialdi egin dute Uribe Kosta eta Erandioko hamaika langile talde eta eragilek. Besteak beste, hauek dira herrietako greba komiteek biharko goizean deitutako mobilizazioak: 8:30ean, Erandioko Altzaga auzoko metro plazan kalejira; 9:00etan, Algortako Telletxen eta Itzubaltzeta / Romoko Kolas plazan manifestazioak; 10:00etan, elkarretaratzea Sopelako udaletxe plazan; eta 12:00etan, lurralde manifestazioa Bilboko Plaza Eliptikoan. Arratsaldean, berriz, bi hitzordu baino ez ditzute jarri: 16:00etan auto karabana Erandioko polikiroldegitik; 16:30ean auto karabana Urdulizko Mecanica de La Peña enpresa zenaren parkingetik; eta 18:00etan, eskualdeko manifestazioa Leioako Boulevardetik. CNTk, bere aldetik, bi deialdi egin ditu, goizeko 12etan Barakaldoko Bide Onera plazan eta arratsaldeko 19:00etan Bilboko Arriaga plazan.
  Ekonomia 2009-05-20 19:27

Ordezkari sindikal bat kaleratu du Erandioko Sasyma enpresak

Erabiltzailearen aurpegia Ukberri Erandioko Axpe auzoko Sasyma enpresak CCOOko ordezkari sindikal bat kaleratu du berriki. Sare Antifaxistak zabaldu duenez, orain dela hilabete batzuk Errumaniatik etorritako hiru langileek pairatzen zituzten baldintza lotsagarriak salatu zituen kaleratutako ordezkariak. Enpresak gaixoaldi-baja hartzea ukatzen zien, nahiz eta haietako bat lesioak izan, aparteko orduak egiten behartzen zizkieten eta beste langileek baino soldata txikiagoa zuten. Lan Ikuskaritzak esku sartu zuen eta hiru langileen alde jo zuen, tartean enpresari isun handia jarri ziola.Hortaz, metal arloko enpresak ordezkaria kaleratu izana "errepresaliatzat" jo dute antifaxistek. Sasymako lan taldea osatzen duten 40 beharginen gehiengoak CCOOren kidea berriz hartzeko eskatzen duen idazkia sinatu eta bere aldeko elkarretaratzeetan parte hartu du. Bere aldetik, kaleratuak sindikatuaren zuzenbideko zerbitzuen esku jarri du kasua.
  Ekonomia 2009-05-20 19:22

Ohiko zerbitzuen %30a bermatu gura du Metro Bilbaok

Erabiltzailearen aurpegia Ukberri Genma Zabaleta Eusko Jaurlaritzako Lan eta Gizarte gaietarako sailburu berriak agindutakoari jarraituz, biharko greba egunean, "lanegunetako ohiko zerbitzuaren % 30aren baliokideak diren zerbitzuak eta maiztasunak" mantenduko ditu Metro Bilbaok. Horrela, bada, puntako orduetan, hau da, goizeko zazpietatik 9:30era eta arratsaldeko ordu bietatik 16:00etara, batez beste maiztasun hauek bermatuko ditu garraio enpresak: San Inazio eta Etxebarri artean, 7 minutu eta erdi; bi lineetako adarretan, 15 minutu; eta Plentziaraino, ordu bete. Gainerakoan, batez beste, maiztasun hauek bermatuko dituzte: San Inazio eta Etxebarri artean, 10 minutu; bi lineetako adarretan, 20 minutu; eta Plentziaraino, ordu bete. Bitartean, Bizkaibusek ere gutxieneko zerbitzuen (pdf) berri eman du. Besteak beste, Uribe Kosta eta Erandiotik Leioako campusera joan nahi dutenek, Areetatik, Bizkaiko Zubitik ateratzen den autobusa baino ez dute edukiko. Hala ere, biharko greba orokorrerako ezarritako gutxieneko zerbitzuak "gehiegizkotzat" jotzen dituzte sindikatuek eta horregatik EAEko Auzitegi Nagusian helegitea aurkeztu zuten, baina honek ez du errekurtsoa kontuan hartu, Berria.info-k aurreratu duenez. Argazkian, bidaiari bakan batzuk Areetako geltokian aurreko greba batean, metroaren atzerapenei aurre egiten.
  Ekonomia 2009-05-20 19:03

Erandioko garabi zerbitzuko beharginek lan hitzarmena aldarrikatu dute

Erabiltzailearen aurpegia Ukberri Erandioko garabi zerbitzua kudeatzen duen Dornier SAko langileek protesta egin dute gaur goizean Erandion. Enpresak 2007tik gelditu duen lan hitzarmenaren negoziazioa berriz irekitzea aldarrikatu dute 78 beharginek, udaletxearen aurrean. CCOO, UGT eta ELAren delegatuek azaldu dutenez, Dornier SAren lan taldeko partaide gehienek Barakaldoko TAOn egiten dute lan eta, hortaz, Barakaldoko udal zerbitzuetan azpikontratatuta dauden beste enpresetako eta Dornier SAko beste zentroetako beharginekin lan baldintzak parekatzea eskatzen dute. Gauzak horrela, 35 orduko astea aldarrikatzen dute. Soldatari dagokionez, Araba, Bizkaia eta Gipuzkoa mailan arloan diren bataz besteko soldata eskatzen dute, orain baino %23 gehiago. Igoera hori zatika eskatzen dute, lau urteko epean. Dena den, langileen ustez, enpresak ez luke eskaera horiek bere gain hartzeko arazorik izan behar, kontuan hartuta Ferrovial taldeko enpresa dela eta "Ferrovial etekin ikaragarriak eskuratzen" ari dela.
  Ekonomia 2009-05-20 18:38

Ostiralean egingo dute elkarretaratzea Getxoko udal langileek

Erabiltzailearen aurpegia Ukberri Getxoko Udalean ordezkaritza duten ELA, UGT, CCOO, LAB, SVP eta ErNE sindikatuek ostiral honetarako ere deitu dute elkarretaratzea, udaletxe aurrean. Behin-behinean dauden 150 langileekin "jolasten" ari dela aurpegiratzen diote EAJko Gobernu Taldeari. Langileen ordezkariek azaldu dutenez, pertsona horiei ekainaren 30ean bukatuko zaie kontratua eta erakundeak ez die "inolako erantzunik eman". Argitu dutenez, 150 beharginak ez dira kasu isolatu bat, Udaleko %35eko langileak baino gehiago aldi baterako kontratua dutelako, eta "gehiegikeriatzat" jo dute beharginen egoera. Hori dela eta, astelehenean hasi ziren mobilizazioekin. Maiatzari dagokionez, 22an, 25ean, 27an eta 29an egingo dituzte kontzentrazioak, udaletxe aurrean, 10:00etatik 10:30era bitartean. Azken egun horretan izango da hilabete honetako udal osoko bilkura. Argazkian, Imanol Landa alkatea.
  Ekonomia 2009-05-19 12:36

Kaleratzeen aurkako protesta egin dute gaur Indrako langileek

Erabiltzailearen aurpegia Ukberri Azken kaleratzeak eta langileen artean sortutako ezegonkortasuna salatzeko kontzentrazioa egin dute gaur goizean Indrako langileek. Enpresak Erandioko Axpe industrialdean duen egoitza aurrean burutu dute protesta, goizeko 8etan, eta bertan 100 bat langilek hartu du parte. CCOO, UGT eta ELA sindikatuek salatu dutenez, nahiz eta enpresak "Lana Erregularizatzeko Espedienteak (LEE) egiten ez duenik esan arren, kaleratzeak aurrera eramaten ditu tantaka". Mobilizazioak apirilaren bukaeran abiatu zituzten Barakaldoko Beurkoko lantegian eta Axpekoan izandako kaleratzeak direla eta. Baina, langileek aitortzen dutenez, arazoak ez ziren orduan hasi, 2005eko martxoan baizik. Orduan, Indrak Azertia enpresa erosi zuen eta handik aurrera "Bizkaia lurralderik kaltetuena izan da", sindikatuen ustez: "Azertiako lantaldea 400 profesionalek baino gehiago osatzen zuten eta egun 300era ez da heltzen, Indrak aurretik zituen langileak barne". Urtarriletik enpresak 16 langile bota ditu, haietariko lau azken egunotan. "Demaseko kaleratzeak ekiditeko, enpresak %0ko soldata igoerak eskaini dizkigu, baina horrek ez ditu kaleratze zehatzak baztertzen" adierazi diote UKBERRI.NETi ELAko kideek.
  Ekonomia 2009-05-18 21:46

Auzolana oinarri grebaorokorra.info ekimena aurkeztu dute

Erabiltzailearen aurpegia Ukberri Komunikazio proiektu ezberdinetako kide eta blogariek grebaorokorra.info ekimena aurkeztu dute, gaur goizean, Bilboko Kalderapeko kulturgunean. Maiatzaren 21eko greba orokorra indartzeko asmoz eta parte hartzea oinarri izanik, Euskal Herriko txoko ezberdinetako bideo, irudi eta kronikak bildu eta zabalduko dituzte ostegun honetan. Tresna ezberdinak baliatuko dituzte horretarako, Twitter, Flickr, Youtube, mugikorren bidez jasotako irudiak zuzenean webgunean emititzeko tresna... baita egunerako espresuki sortutako herri telebista bat ere. Hau dena, beraien hitzetan (mp3), "XXI. mendeko greba orokor bati erantzuteko" asmoz / Gaztesarea.
  Ekonomia 2009-05-14 20:45

Krisialdia eta langileen erresistentziari buruzko hitzaldia emango dute astelehenean Itzubaltzetan

Erabiltzailearen aurpegia Ukberri "Crisis economica y resistencia obrera" hitzaldia antolatu dute datorren astelehenerako, hilak 18, Itzubaltzeta / Romoko gaztetxean. Aipatu ekimena Ekonomi Zientzia eta Autogestioaren Institutuak (EZAI-ICEA) antolatu du, eta arratsaldeko 7:30ean burutuko da. Hizlaria Endika Alabort Bilboko EZAIren partaidea izango da eta gaur egun pairatzen ari garen krisia aztertuko du, horren jatorriak eta ondorioak azalduz, teoria ekonomiko ezberdinak aurkeztuz. Ostean, instituzio sozial ezberdinek emandako erantzunak erakutsiko dira eta amaitzeko, EZAIk egindako proposamenak aurkeztuko dira. Gainera, institutuak argitaratutako koaderno didaktikoen lehenengo zenbakia (pdf) aurkeztuko dute. Liburua, Endika Alabortekin batera, Luis Buendia, Gaspar Fuster, Mario Obispo y Lluis Rodriguez-ek idatzi dute. Bertan nazioarteko krisialdiak zelan eragiten duen Espainian azaltzen dute. Argazkian, 2007ko maiatzaren lehenean Algortan egindako manifestazioa.
  Ekonomia 2009-05-14 20:34

EHUko langileen prestakuntzari buruz ariko dira bihar Leioako campusean

Erabiltzailearen aurpegia Ukberri Administrazio eta Zerbitzuetako Langileen Prestakuntza Plan Nagusia osatzen ari da Euskal Herriko Unibertsitatea. "Planean unibertsitatearen erronka berriei egokitzeko zer prestakuntza mota behar izango duten langileek zehaztuko da", EHUko iturriek adierazi dutenez. Horregatik, ostiral honetan, maiatzak 15, topaketa bat antolatu dute administrazio eta zerbitzuetako langileen prestakuntza beharrez hausnartzeko eta Valentziako Unibertsitate Politekniko, Madrilgo Complutenseko, Sevillako eta Bartzelonako unibertsitateetan garatutako esperientziak ezagutzeko. Jardunaldi hori Zientzia eta Teknologia Fakultateko paraninfoan egingo da, 9:30etatik aurrera. Argazkian, Iñaki Goirizelaia errektoreak zabalduko du batzarra.
  Ekonomia 2009-05-13 22:33

Behin-behineko 150 langilerekin "jolastea" leporatu diote Getxoko Udalari sindikatuek

Erabiltzailearen aurpegia Ukberri Getxoko Udalean ordezkaritza duten ELA, UGT, CCOO, LAB, SVP eta ErNE sindikatuek behin-behinean dauden 150 langileekin "jolasten" ari dela aurpegiratu diote gaur EAJko Gobernu Taldeari. Langileen ordezkariek azaldu dutenez, pertsona horiei ekainaren 30ean bukatuko zaie kontratua eta erakundeak ez die "inolako erantzunik eman". Argitu dutenez, 150 beharginak ez dira kasu isolatu bat, Udaleko %35eko langileak baino gehiago aldi baterako kontratua dutelako, eta "gehiegikeriatzat" jo dute beharginen egoera. Hori dela eta, mobilizazioak iragarri dituzte. Lehenengoa datorren astelehenean, maiatzak 18, izango da. Ekimenetan lan taldea bere osotasunean mantentzea defendatuko dute "hemen inor ez dagoelako soberan, are gehiago langileak falta dira". Gainera, behin-behineko langile postuetatik zeintzuk izan beharko lirateke behin-betikoak ezagutzeko txosten bat eskatu dio kanpoko enpresa bati Getxoko Udalak, sindikatuek jakinarazi dutenez: "ikerketa hori urtarriletik badu Udalak eta inork ez gehiago. Eta gainera, isilpean erabiltzen ari dira, ezkutu pean lan taldearen murrizketarekin amaituko duen enplegu plangintza burutzeko. Edonork dakienean, aldiz, dagoen lan kargarako lan talde hori urriegia izango dela". Argazkian, Imanol Landa alkatea.
  Ekonomia 2009-05-13 21:14

Leioako Udalak elkartasuna adierazi die Vicrilako langileei

Erabiltzailearen aurpegia Ukberri Leioako Udalbatzak aho batez onartu du, azken osoko bilkuran, Vidriería y Cristalería de Lamiako S.A. (Vicrila) enpresako langileei "elkartasunik zintzoena" helaraztea. Halaber, "egoera ahalik eta lasterren arrakastaz gainditzea" opa diete tokiko erakundeak ordezkaritza daukaten alderdi politiko guztiek. "Salmentak %35 jaitsi" direla argudiatuta, hasieran sei hilabetean, maiatzetik azarora, ixtea pentsatu zuen Lamiakoko Vicrila enpresak. Azkenean, ordea, zortzi hilabeteko enplegua erregulatzeko dosierra aurkeztu du. Berezko lanaldiaren %40ri eragingo dio dosierrak, hau da, orotara 96 lanegun egingo dituzte langileek langabezian. 372 laguni eragiten die neurriak. Ildo berean, ez dute alde baterako beharginik kontratatuko. Orain astebete enpresak berak zabaldutako prentsa oharraren arabera, enpresa batzordeak eta langileen %87k onartu dute enplegua erregulatzeko dosierra. Argazkian, Vicrila barrutik / © Mi historia en Bilbo.
  Ekonomia 2009-05-13 17:34

UKBERRI.NETeko langileek bat egin dute maiatzaren 21eko greba orokorrarekin

Erabiltzailearen aurpegia Ukberri Egunkari digital honetan lan egiten duten beharginek bat egingo dute datorren maiatzaren 21ean Hego Euskal Herriko gehiengo sindikalak deitutako grebarekin. Langileen batzarrean hori adostu ondoren, horrela komunikatu diote UKBERRI.NETen argitaratzailea den UKBERRI Uribe Kostako Komunikabide Euskaldunak elkartearen zuzendaritzari. Beharginen arabera, "behin betiko krisialdian bizitzen den euskarazko prentsaren langileok ongi dakigu zer den behin behinekotasunean bizitzea. Horregatik, ez gaude prest etekin sozialik gabeko etekin ekonomiko hutsaren izenean enpresariek, banku-gizonek, gobernuek, nazioarteko enpresek, politikariek eta enparauek sortutako ezberdintasunak, txirotasuna, asimilazioa, diglosia, krisialdia, etnozidioa ordaintzeko. Euskarak eta langileek ez dute horrelakorik ordaindu behar. Izan ere, krisialdi garaiotan da inoiz baino gehiago lagundu egin behar zaien unea". Horregatik, UKBERRI.NETeko kazetariek datorren maiatzaren 21ean ez dute normaltasunez lan egingo eta greba orokorrari buruzko informazioa baino ez dute emango, komunikabide honetan bertan zein Koska irratiaren eta Grebaorokorra.info sareko ekimenaren bidez. Gure irakurleek ulertuko dutelakoan gaude. UKBERRI.NET