Ekonomia 2009-05-13 22:33

Behin-behineko 150 langilerekin "jolastea" leporatu diote Getxoko Udalari sindikatuek

Erabiltzailearen aurpegia Ukberri Getxoko Udalean ordezkaritza duten ELA, UGT, CCOO, LAB, SVP eta ErNE sindikatuek behin-behinean dauden 150 langileekin "jolasten" ari dela aurpegiratu diote gaur EAJko Gobernu Taldeari. Langileen ordezkariek azaldu dutenez, pertsona horiei ekainaren 30ean bukatuko zaie kontratua eta erakundeak ez die "inolako erantzunik eman". Argitu dutenez, 150 beharginak ez dira kasu isolatu bat, Udaleko %35eko langileak baino gehiago aldi baterako kontratua dutelako, eta "gehiegikeriatzat" jo dute beharginen egoera. Hori dela eta, mobilizazioak iragarri dituzte. Lehenengoa datorren astelehenean, maiatzak 18, izango da. Ekimenetan lan taldea bere osotasunean mantentzea defendatuko dute "hemen inor ez dagoelako soberan, are gehiago langileak falta dira". Gainera, behin-behineko langile postuetatik zeintzuk izan beharko lirateke behin-betikoak ezagutzeko txosten bat eskatu dio kanpoko enpresa bati Getxoko Udalak, sindikatuek jakinarazi dutenez: "ikerketa hori urtarriletik badu Udalak eta inork ez gehiago. Eta gainera, isilpean erabiltzen ari dira, ezkutu pean lan taldearen murrizketarekin amaituko duen enplegu plangintza burutzeko. Edonork dakienean, aldiz, dagoen lan kargarako lan talde hori urriegia izango dela". Argazkian, Imanol Landa alkatea.
  Ekonomia 2009-05-13 21:14

Leioako Udalak elkartasuna adierazi die Vicrilako langileei

Erabiltzailearen aurpegia Ukberri Leioako Udalbatzak aho batez onartu du, azken osoko bilkuran, Vidriería y Cristalería de Lamiako S.A. (Vicrila) enpresako langileei "elkartasunik zintzoena" helaraztea. Halaber, "egoera ahalik eta lasterren arrakastaz gainditzea" opa diete tokiko erakundeak ordezkaritza daukaten alderdi politiko guztiek. "Salmentak %35 jaitsi" direla argudiatuta, hasieran sei hilabetean, maiatzetik azarora, ixtea pentsatu zuen Lamiakoko Vicrila enpresak. Azkenean, ordea, zortzi hilabeteko enplegua erregulatzeko dosierra aurkeztu du. Berezko lanaldiaren %40ri eragingo dio dosierrak, hau da, orotara 96 lanegun egingo dituzte langileek langabezian. 372 laguni eragiten die neurriak. Ildo berean, ez dute alde baterako beharginik kontratatuko. Orain astebete enpresak berak zabaldutako prentsa oharraren arabera, enpresa batzordeak eta langileen %87k onartu dute enplegua erregulatzeko dosierra. Argazkian, Vicrila barrutik / © Mi historia en Bilbo.
  Ekonomia 2009-05-13 17:34

UKBERRI.NETeko langileek bat egin dute maiatzaren 21eko greba orokorrarekin

Erabiltzailearen aurpegia Ukberri Egunkari digital honetan lan egiten duten beharginek bat egingo dute datorren maiatzaren 21ean Hego Euskal Herriko gehiengo sindikalak deitutako grebarekin. Langileen batzarrean hori adostu ondoren, horrela komunikatu diote UKBERRI.NETen argitaratzailea den UKBERRI Uribe Kostako Komunikabide Euskaldunak elkartearen zuzendaritzari. Beharginen arabera, "behin betiko krisialdian bizitzen den euskarazko prentsaren langileok ongi dakigu zer den behin behinekotasunean bizitzea. Horregatik, ez gaude prest etekin sozialik gabeko etekin ekonomiko hutsaren izenean enpresariek, banku-gizonek, gobernuek, nazioarteko enpresek, politikariek eta enparauek sortutako ezberdintasunak, txirotasuna, asimilazioa, diglosia, krisialdia, etnozidioa ordaintzeko. Euskarak eta langileek ez dute horrelakorik ordaindu behar. Izan ere, krisialdi garaiotan da inoiz baino gehiago lagundu egin behar zaien unea". Horregatik, UKBERRI.NETeko kazetariek datorren maiatzaren 21ean ez dute normaltasunez lan egingo eta greba orokorrari buruzko informazioa baino ez dute emango, komunikabide honetan bertan zein Koska irratiaren eta Grebaorokorra.info sareko ekimenaren bidez. Gure irakurleek ulertuko dutelakoan gaude. UKBERRI.NET
  Ekonomia 2009-05-13 17:00

Enpresa txikiei datuak babesten lagundu nahi die Getxoko Udalak

Erabiltzailearen aurpegia Ukberri Getxoko Udalak enpresa kudeaketa hobetzeko hainbat trebakuntza mintegi antolatu ditu datorren asterako. Trebakuntza hau udalerriko enpresa txiki eta ertainei (etee) zuzenduta dago, eta horien artean, bereziki mikroetee-ei. Ekimenak Espainiako Datuen Babeserako Lege Organikoaren (DBLO) berri emateko balio izango du eta Getxo Adaptaren pogramaren barruan kokatzen da, era berean, Europako Gizarte Fondoak diruz lagundutako Valora proiektuaren barruan dagoena. Ikastaro horiek urrian abiatu zituen Getxoko Behargintza Enplegu eta Ekonomia Garapenerako Zentroak. Eskaintza espainolez baino ez zen izan orduan, orain bezala. Horrela, maiatzaren 19an eta 20an, 09:30etatik 13:30era, Algortako Villamonte kultur etxean datuak babesteari buruzko lege organikoaren inguruan mintegia eskainiko da. Horren helburua da datuak babesteari buruz indarrean dagoen araudia eta enpresak lege horri egokitzeko prozedura bertoko mikroenpresen artean ezagutzera ematea.
  Ekonomia 2009-05-11 16:43

Gizonezko bat hil da lan istripuan Algortan

Erabiltzailearen aurpegia Ukberri J.R.L. 58 urteko behargina hil zen pasa den ostegunean Algortako eraikin batean, lan istripu baten ondorioz. Ezbeharra Sarrikobaso kaleko etxe batean jazo zen, goizeko 12:45ak aldera. LAB sindikatuak zabaldu duenez, istripua "ez traumatikoa" izan zen. J.R.L.-k Bilboko Sastec enpresarentzat egiten zuen lan. Sastecen arloak etxetresnak saldu eta konpontzea zein aire girotze sistemen mantenua dira. Sarrikobasoko ezbeharra aurtengo Euskal Herriko 27. lan heriotza da, eskualdeko hirugarrena, gainera. Aurretik, bi leioaztar hil ziren pasa den hilabetean. J.G.R 43 urteko igeltseroa, apirilaren 16an zendu zen Bilboko Barrainkua kaleko obra batean. A.G. soldadorea, berriz, apirilaren 29an hil zen Gurutzetako ospitalean, martxoaren 26an produktu kimiko batzuk eztanda egitean pairatu zuen lan istripu baten ondorioz. Ezbeharra Kantabriako Gajano herrian izan zen. Bi leioaztarrak azpikontraten langileak ziren. Argazkian, A.G.-ren heriotza salatzeko kontzentrazioa / Koska irratia.
  Ekonomia 2009-05-07 20:51

Leioako Udalak krisiari buruzko hitzaldia egiteko lekua ukatu izana salatu du LABek

Erabiltzailearen aurpegia Ukberri Orain egun batzuk, gaur arratsaldean krisiari buruzko hitzaldia emateko baimena eskatu zuten, Leioako udal erregistroan, LAB sindikatuko ordezkariek. Hitzaldia Errekalde plazako nagusien etxean izan behar zen, "hitzaldi eta ekitaldiak antolatzeko, udalerrian dagoen doako azpiegitura publiko bakarrenetarikoa baita", gaur emandako prentsaurrekoan aipatu dutenez. Baina, "bere ohiko jarrera arbitrarioari jarraiki, hitzaldiaren antolatzaileak eta gaiak gustuko ez zituenez", udal azpiegitura erabiltzeko baimena ukatu zuen Eneko Arruebarrena alkateak, Leioako udaletxeko LABek salatu duenez. Hori dela eta, "herritarren iritzi eta parte hartzearen beldur izatea" egotzi diote udal mandatariari. Lan erakunde abertzaleko kideek Arruebarrena alkateari gogoratu diotenez, "Udalhitz hitzarmenaren 149. artikuluak ordezkari sindikaloi gure jarduerarako udal aretoak erabiltzeko eskubidea” aitortu egiten digu, eta beraz, bera alkatea dela, horrek ez dio eskubiderik ematen hitzarmenaren gainetik nahi duena arbitrarioki erabakitzeko". Debekua debeku 19:30ean egingo dute hitzaldia Kurkudi herriko tabernan. Argazkian, udaletxe aurrean eman dute prentsaurrekoa LABeko kideek.
  Ekonomia 2009-05-04 18:10

Behargin leioaztar baten heriotza salatuko dute iluntzean

Erabiltzailearen aurpegia Ukberri "Lan istripu gehiagorik ez!" lelopean, A.G. izeneko behargina zenari azken agurra emango diote gaur 20:00etan Boulevardean auzokide leioaztarrek. Izan ere, langilea pasa den apirilaren 29an hil zen Gurutzetako ospitalean, martxoaren 26an pairatu zuen lan istripu baten ondorioz. Ezbeharra Kantabriako Gajano herrian izan zen, Dynasol enpresan. Bertan, A.G. zein Pontevedrako M.L. beharginek Nervion Montaje y Mantenimiento azpikontrataren bidez egiten zuten lan. Biak produktu kimikoen ontzi bat konpontzen ari ziren, berau soldatuz. Ontziak eztanda egin zuen eta %40 eta %50eko erredurak, ubeldurak eta zauri larriak eragin zizkien. Lehenengo arreta medikoa Santanderreko Valdecilla ospitalean jaso ostean, Gurutzetara bideratu zituzten, behar zituzten ebakuntzak egin eta tratamendua jarraitzeko. Dena den, hori ez zen nahikoa izan A.G.-rentzat, pasa den asteazkenean hil zena. Beste langileak ospitalean darrai. LAB sindikatuak salatu duenez, dagoeneko Euskal Herriko 25 langile hil dira aurten, haietatik bi leioaztarrak. Hori dela eta auzokideek greba orokorreko deiarekin bat egin dute. Argazkian, A.G. hiru astetan hil den bigarren langile leioaztarra da, apirilaren 21ean J.G.R igeltsero leioaztarraren heriotza salatu baitzuten / Koska irratia.
  Ekonomia 2009-04-29 21:28

Hildako beharginak gogoratu ditu LABek Lan Osasunaren Egunean

Erabiltzailearen aurpegia Ukberri Euskal Herrian aurten daramagun hilabeteetan hil diren 21 beharginak izan zituen hizpide atzo eguerdian LAB sindikatuak. Lan Osasunaren Nazioarteko Egunaren karietara, Tamarises eta Igeretxe hotelen artean egindako protestan 62 langile batu ziren "Euren krisia, geure osasunaren kontura" lelo peko elkarretaratzean. Algortan, baina Neguriri begira, lan-jantzi gorria soinean eta hildakoen izena paparrean erakutsi zuten sindikalistek. Izan ere, Iratxe Azkue LABeko kideak salatu zuenez (mp3), behin-behinekotasuna, azpikontratazioa eta oro har lan baldintza "kaxkarrak" eta enpresarien "diru-gosea" dira heriotzen sorburua. Hori dela eta, harreman ekonomikoetan aldaketa sakona eskatu zuen eta baita hori bultzatzeko maiatzaren 21eko greba orokorrerako deia egin ere. Tartean, maiatzaren 4an eta 14an autokarabanak egingo ditu LABek industrialdeetan eta herrietan, hurrenez hurren. Arratsalderako, berriz, Getxoko ezker abertzaleak deitua zuen kontzentrazioa Telletxe plazan. Hainbat lagunek parte hartu zuten protestan. Argazki gehiago ikusteko sakatu hemen.
  Ekonomia 2009-04-27 20:48

Lan Osasunaren Egunaren aldarrikapenekin bat egin du Sopelako Udalak

Erabiltzailearen aurpegia Ukberri Joan den ostiralean egindako osoko bilkuran, apirilaren 28ko Lan Osasunaren Nazioarteko Egunari buruzko proposamena onartu zuen aho batez Sopelako Udalbatzak. Ezker abertzaleak aurkeztutako mozioari onespena eman zioten alderdi politiko guztiek. Egun horretan, hau da, bihar bertan, lan segurtasuna eta osasuna ekarri nahi dira gogora. Langileen segurtasuna bermatzea "oinarrizkotzat" jotzen du Sopelako Udalbatzak eta "segurtasunari bideratutako gastu osoa inbertsioa" dela deritzo, tokiko iturriek aipatu dutenez. Gauzak horrela, "lan osasuna eskubide eta lehentasuntzat" hartzearen alde azaldu ziren. Onartutako adierazpenaren arabera, lan arriskuen prebentziorako legedia betetzen ez duten enpresak ez kontratatzeko konpromisoa hartzen du Sopelako Udalak. Bestalde, lan istripu larria gertatzekotan tokiko erakundeak jarriko ditu hori aztertzeko beharrezkoak diren baliabideak. Azkenik, Udala apirilaren 28an egingo diren deialdiei batuko zaie eta egun horretan aldarrikatu nahi dena gogora ekarriko du. Argazkian, aurreko udal batzar bat Sopelan.
  Ekonomia 2009-04-27 20:26

Lan Osasunaren Nazioarteko Eguna dela eta, bi elkarretaratze izango dira bihar Algortan

Erabiltzailearen aurpegia Ukberri Astearte honetan, apirilaren 28an, den Lan Osasunaren Nazioarteko Egunaren harira, Txorierri, Mungialdea eta Uribe Kostako langileak mobilizatzera deitu ditu LAB sindikatuak. Gauzak horrela, eguerdiko 12:30ean, Ereagako kaian, Tamarises eta Igeretxe hotelen ondoan egingo dute elkarretaratzea, "Euren krisia gure osasunaren kontura!" lelopean. Arratsalderako, berriz, Getxoko ezker abertzaleak jarri du hitzordua, 19:30ean, Telletxe plazan. Horretaz gain, gaur izan den udal batzarrerako, mozioa aurkeztu dute hautetsi independentistek. "Apartheid politikoaren ondorioz,
proposamena osoko bilkuraren ondorengo galde eskeak egiteko txandan egin dugu", salatu dutenez. Argazkian, apirilaren 21ean J.G.R igeltsero leioaztarraren heriotza salatzeko elkarretaratzea egin zuten Leioako Boulevardean. Horren zuzeneko jarraipena (mp3) egin zuen Koska irratiko "Koskaberri albistegia"k. / Koska irratia.
  Ekonomia 2009-04-23 20:43

Haur eskola eraikitzeko udalerriko langabetuak kontratatu nahi ditu Plentziako Udalak

Erabiltzailearen aurpegia Ukberri Espainiako Gobernuari eskatutako 720.000 euroak itsas hiribilduan haur eskola eraikitzeko erabiliko ditu Plentziako Udalak. Zerbitzu berria Lehen Hezkuntzako ikastetxe publikoan jarri nahi dute, eraikin berri bat altxatuz. Bada, Madrilgo exekutiboak onartutako tokiko inbertsiorako estatuko fondoak "langabezia arintzeko helburua" ere badaukanez, proiektua agintzen zaion enpresari bertoko biztanleak kontratatzea eskatuko dio tokiko erakundeak. Hala ere, udal iturriek zehaztu dutenez, "Plentziako Uri Udalak interesdunen datuak emango dizkio adjudikaturiko enpresari. Enpresaren erantzukizuna izango da aurkeztutako interesdunen aukeraketa eta kontratazioa, Plentziako Uri Udalak informazioa hartu-eman besterik ezin du egin". Eskaerak aurkezteko epea maiatzaren 25era arte egongo da zabalik. Interesdunek udal webgunean (www.plentzia.org/Informazio Instituzionala/Inprimakiak eta Zerbitzuak) dute eskuragarri eskaera orria. Hori bete eta udaletxean aurkeztu beharko dute hurrengo agiriekin batera: DNIaren fotokopia, INEMen txartelaren fotokopia, Lan Bizitza, eta curriculuma (aukerakoa). Argazkian, Plentziako udaletxea.
  Ekonomia 2009-04-20 20:20

Ostegunean lan istripuan hildako leioztarraren heriotza salatuko dute bihar

Erabiltzailearen aurpegia Ukberri Pasa den ostegunean, apirilak 16, 43 urteko J.G.R igeltseroa hil egin zen lan istripu baten ondorioz. Leioaztarra Construcciones Balzola enpresaren langilea zen eta Promociones Arenal Grupo Suquia SL enpresa sustatzailearen eraikinean ziharduen. Berarekin 21 langile dira jada 2009 urtean Euskal Herrian hil egin direnak. LAB sindikatuak heriotza horiek eta horiek eragin dituzten azpikontratazioa eta behin-behinekotasuna salatuko ditu bihar Leioako Boulevard-ean, arratsaldeko 8etan, "Lan istripu gehiagorik ez!" lelopean. Gaur ere, bi elkarretaratze egin ditu sindikatu abertzaleak. Lehenengoa, Bilboko Barrainkua kalean egin dute goizean, ostegunean J.G.R. hil zen obraren aurrean. Bigarrena, arratsaldean burutu dute beste gizarte erakundeekin batera, "Aski da! Eredu ekonomikoa aldatzera goaz! Lan baldintzek hil egiten dute! Erantzuteko garaia da. Lan istripurik ez!" leloen pean. Argazkian, 2007ko apirilaren 27an egindako lanuztea dela eta, LABek Algortan egindako elkarretaratzea / Koska irratia.
  Ekonomia 2009-03-31 14:32

Maiatzaren 21erako greba orokorra deitu dute Hego Euskal Herrian

Erabiltzailearen aurpegia Ukberri ELA, LAB, ESK, EILAS, EHNE eta HIRU sindikatuek maiatzaren 21ean, osteguna, Hego Euskal Herrian greba orokorra egiteko deialdia egin dute gaur, Bilboko hotel batean emandako prentsaurrekoan. Krisi ekonomikoa dela eta "enplegu suntsiketa, patronalaren xantaia, gizarte eta aurrekontu politikarik eza eta krisiari aurre egiteko Euskal Herri mailako tresnak" dira deialdiko arrazoi nagusiak, jakinarazi dutenez. Euren hitzetan, "lan munduak erabateko erantzuna eman behar dio krisiari, langileak baitira biktima nagusiak, egoera sozial eta ekonomiko horren sortzaileak izan gabe". Sindikatuen ustez, "patronala krisiaz baliatu da, eta lantaldeen egituretan doikuntza zorrotza egin gura dute, etekinak orain eta gero ziurtatzearren. Horrela, lantaldeak txikiagoak izango dira, atomizatuagoak eta babesgabeagoak". Argazkian, LABek deituta 50 bat lagunek egin zuten kontzentrazioa, abenduaren 12an, Espainiako INEM erakundearen Areetako bulego aurrean / Koska irratia.
  Ekonomia 2009-03-18 16:06

Lorezaintzari buruzko hitzaldiak eskainiko ditu Getxoko Behargintzak

Erabiltzailearen aurpegia Ukberri Getxoko Udaleko Enplegu eta Ekonomia Garapenerako Zentroak Enplegu Topagunea egitasmoa abiatuko du, udalerriko langabetuei lorezaintza sektoreari buruzko informazioa emateko asmoz. Izan ere, lorezaintzan udaberrian eta udan izaten da langile eskaera handiena, tokiko iturriek zehaztu dutenez. Horrenbestez, lau hitzaldi emango dituzte, lorezaintzaren sektorean lan egin nahi duten getxoztarrei informazioa emateko eta nolako lanpostuak dauden, enpresek eskatzen dituzten profilei edo lan baldintzei buruz hitz egiteko. Gainera, pertsona horien lan eskaerak bilduko dituzte bertan. Helburu nagusia, langileen eta enpresen arteko harremanak erraztea da. Solasaldi horiek Algortako kultur etxean egingo dira, Villamonten, martxoaren 31n eta apirilaren 1ean, 10:00etan eta 12:00etan. Interesa duten pertsona guztiek izena eman dezakete eta informazioa eska dezakete Behargintzan, Algortako San Martin kaleko 17. zenbakian. Argazkian, Getxoko Behargintza.
  Ekonomia 2009-03-10 18:10

ELAren hitzetan Ipar Uribeko ehunaka langile jasaten ari da krisiaren ondorio latzak

Erabiltzailearen aurpegia Ukberri Uribe Kosta, Txorierri eta Mungialdean azken hilabeteetan ehunaka lanpostu suntsitu direla salatu du Eskumaldeko ELAk, gaur goizean, Espainiako INEM erakundearen Areetako bulego aurrean egindako prentsaurrekoan. Besteak beste, Getxo udalerrian %21 hazi da langabezia, 2008ko otsailetik hona. Leioan, berriz, %28 egin du gora langabetuen kopuruak. Eta Erandion %44. Horren aurrean, ELAko delegatu eta afiliatuak ez dira isilduko. Ohartarazi dutenez, "gure eskubideak aldarrikatuko ditugu, gure lanpostuak defendatuz eta baldintza duinak eskatuz. Krisi hau, ez baitugu geuk sortu; enpresarien irabazi nahi neurri gabeek eta erakundeen utzikeria eta diruzalekeriak baizik". Ildo horretan, "Gobiernos y patronal van de la mano. Aberastasuna banatu!" lelopeko kanpaina abian du ELAk. Besteak beste, martxoaren 25ean, delegatuen asanblada egingo dute Zamudioko Parke Teknologikoan, eskualdeko egoeraren balantzea egin eta euren aldarrikapenak manifestazioan ezagutzera emateko. Argazkian, inguruko hainbat delegatu lagun zituztela, Eskumaldeko ELAko Deiane Arrietak eta Dario Ugaldegurenek eman dute prentsaurrekoa.