Ekonomia 2005-09-08 22:58

Getxoko udaltzainen aferan "negoziazioak egon badaude", Zarraoaren hitzetan

Erabiltzailearen aurpegia Ukberri Getxoko udaltzainek apiril erdialdetik hona bizi duten lan-gatazka konpondu ahal izateko, udal agintariek "negoziatzeko inolako asmorik ez" dutela adierazi dute, behin eta berriro, ELA, CSI-CSIF, UGT, CCOO eta SVP sindikatuek. Atzo, ordea, salaketa horiek gezurtatu zituen Iñaki Zarraoa alkateak, kazetarien galderei erantzunez. "Negoziazioak egon badaude", aipatu zuen udal agintariak, "duela bi hilabetetik hona" bi eztabaida-leku badirela zehaztuz: "bata Euskadiko Toki eta Foru Administrazioko Langileen Enplegu Baldintzak Arautzen dituen Akordioaren gainekoa eta bestea Getxoko Udalean sortutako arazo zehatzak jorratzen dituen Negoziazio Mahai Orokorra". Ildo horretan, negoziazioak "udaltzainen lan-baldintzez gain, gainontzeko funtzionarienak ere" beregain hartu behar dituela adierazi du berriz Zarraoak. Hala ere, polizi-agenteen eskaerak "gehienbat diru kontuak" direla dio alkateak. (Argazkian, Ereagako igogailua inauguratu zen egun berean egindako protesta).
  Ekonomia 2005-08-30 23:54

Disziplinazko espedienteak "neurrigabe" ezartzea egotzi diote Zarraoari Getxoko udaltzainek

Erabiltzailearen aurpegia Ukberri "Iñaki Zarraoa alkateak Getxoko udaltzainei masiboki ezartzen ari dien disziplinazko espedienteak" argitara ematen hasi dira jada, "abuztuaren 15az geroztik", euren "lan baldintzak hobetzeko" asmoz apirilaren erdialdetik mobilizazioetan dabiltzan ELA, CSI-CSIF, UGT, CCOO eta SVP sindikatuek jakinarazi dutenez. "Bi abokatu eta hiru administrari laguntzaile kontratatu dituzte prozedura hori arintzeko, zenbat diru gastatu kontuan hartu gabe", langile erakundeek prentsa ohar bidez salatutakoaren arabera. Gainera, udaltzainak "birritan zigortzea" egotzi diote tokiko agintariari, "disziplinazko espediente horiek dakartzaten jarduera eta ordainketa-etendurak polizi agenteek libre dituzten edo oporretan dauden egunetan betetzera behartzen ari dituztelako". (Argazkian, Ereagako igogailua inauguratu zen egun berean egindako protesta).
  Ekonomia 2005-07-19 14:35

Disziplinazko espedientea ezarriko diete Getxoko 63 udaltzaini

Erabiltzailearen aurpegia Ukberri ELA, CSI-CSIF, UGT, CCOO eta SVP sindikatuek salatu dutenez, Getxoko 63 udaltzaini disziplinazko espedientea ezartzea agindu du Iñaki Zarraoa alkateak, gaur hiru hilabete baino gehiago bizi duten lan gatazkaren gaineko pegatinak jartzeagatik. "Dagoeneko larria den langileen egoera okerragotu eta enkistatu baino ez du egiten erabaki horrek", sindikatu horietako ordezkariek prentsa ohar baten bidez adierazitakoaren arabera. Udaltzainengan ez ezik, herritarrengan eta trafiko, obra eta ordenantzen arau-hausketen diru bilketan ere eragina izaten ari da gatazka, euren hitzetan, protestan hasi zirenetik "isun bakar bat ere ez" dutelako jarri polizia agenteek.
  Ekonomia 2005-07-13 13:04

Hogeita hamar gorliztarrek lan egingo dute Sagastikoetxeko Eroskin

Erabiltzailearen aurpegia Ukberri Eroskik Gorlizko hogeita hamar bizilaguni emango die lan Sagastikoetxe auzoan zabalduko duten establezimendu berrian. Merkataritza zentro horrek 2.400 metro koadroko azalera izango du eta aparkalekua eta gasolindegia ere egongo dira bertan. Esan bezala, salmentak gora behera, bertan lan egiteko hogeita hamar lagun beharko direla aurrikusten du Eroskik. Horietatik seik zuzendaritza-postuetan egongo dira –saltokiko nagusia eta bost sailetarako arduradun bana: frutadenda, harategia-urdaitegia, arraindegia, dirukutxa-berriz jartzea eta okindegia–, eta gainontzeko hogeita lau langile soilak. Guztiek Gorlizen erroldatuta egon beharko dute.
  Ekonomia 2005-07-01 14:55

Getxoko udaltzainen aferan, "larderiaz" eta "amorerik eman nahi izan gabe" jokatzea egotzi dio Zarraoari ELAk

Erabiltzailearen aurpegia Ukberri Gizalanek, ELAko Zerbitzu Publikoen Federazioa, gaur kaleratutako prentsa oharraren bidez salatu duenez, "larderiaz" ari da Iñaki Zarraoa alkatea, dagoeneko 77 egun bete dituen Getxoko udaltzainen "lan gatazka" konpòntzeko "amorerik eman nahi ez duelako". Horren harira, udal agintariak "negoziatzeko inolako asmorik ez" izatea kritikatu du sindikatuak. Bere ustez, "egunetik egunetik ilunago dago arazoari irtenbidea ematea". Gatazka "enkistatu" egin dela diote ELAkoek eta Zarraoa jotzen dute horren "errudun". Azkenik, Getxoko udaltzainen %90ari ezarri zaizkion espediente informatiboak bertan behera uztea eskatu dute. (Argazkian, Ereagako igogailua inauguratu zen egun berean egindako protesta).
  Ekonomia 2005-06-29 20:38

Azken urteetan dandarrez zekarren defizita kitatu egin du EHUk

Erabiltzailearen aurpegia Ukberri Gaurko ezohiko Gobernu Kontseiluan, Errektoregoak 2005erako aurkeztutako aurrekontuen aurreproiektua onartu du Euskal Herriko Unibertsitateak, aurkako botorik gabe. Behin onartuta, idatzia proiektua izatera pasatu da, eta "benetan gauza dadin, EHUko Gizarte Kontseiluak onespena ematea bakarrik falta du", unibertsitateko iturriek jakinarazi dutenez. Gizarte Kontseilua uztailaren erdialdera bilduko da. Azken izapide hori betetzen bada, 2000 urteaz geroztik hau izango da lehenengo urtea unibertsitateak aurrekontu bat onartuta daukana, azken ekitaldietan EHUk aurrekontu luzapenekin jardun baita.
  Ekonomia 2005-06-17 11:39

Udaltzaingoaren gatazka dela eta eztabaidan sartu dira Izaronews eta Getxoko alkatea

Erabiltzailearen aurpegia Ukberri Iragan den asteazkenean Juan de Etxano ezizena erabiltzen duen Izaronews digitalaren zutabelariak "Del alcalde ejemplar" ("Alkate eredugarriaz") artikulua argitaratu zuen. Bertan, Getxoko udaltzain batek kolektibo horrek bizi duen gatazka laboralari buruz kontatutakoak eta Areetako lagun batek gai berberaz esandakoa idazten zituen Juan de Etxanok, tartean Iñaki Zarraoaren irudia ez zela oso ondo gelditzen. Artikuluari erantzunez, Iñaki Zarraoak berak "¡Ya vale, Juan de Etxano!" ("Nahikoa da, Juan de Etxano!") gutuna bidali zuen non Juan de Etxano zutabelariari sinesgarritasun gutxi eta arduragabekeria leporatzeaz aparte udaltzainek protestaldietan egindako hainbat ekintza gaitzesten zuen alkateak. Zarraoari erantzunez, minduta, "Alkate eredugarriaz (eta II)" artikulua plazaratu du Juan de Etxanok. Bertan ia gauza guztietan ematen dio arrazoia alkateari baina, era berean, gogoratzen dio sindikatuek udaltzaingoaren gatazkaren inguruan daukaten ikuspegia lehenengo artikuluan aipatzen dena dela.
  Ekonomia 2005-06-15 20:59

Botradeko langileek greba egingo dute astelehenetik aurrera

Erabiltzailearen aurpegia Ukberri Berangoko Botrade enpresako langileek txanda bakoitzeko bi orduko lanuzteak egingo dituzte egunero, ekainaren 20tik 28ra bitartean, "2005erako itun soziolaborala negoziatzeko enpresak duen borondate falta" salatzeko asmoz. CCOO sindikatuak prentsa-ohar bidez jakinarazi duenez, enpresaren eskaintza "aho batez" errefusatu dute langileek, eta "mobilizazioak biziagotzeko prest" daudela ohartarazi du.
  Ekonomia 2005-06-09 00:22

Espediente informatiboa ezarriko diete Getxoko hainbat udaltzainei

Erabiltzailearen aurpegia Ukberri Udaltzaingoko hainbat agenteei espedienteak ezartzeko prozedura abian jarri du Getxoko Udalak, Iñaki Zarraoa alkatearen adierazitakoaren arabera, "aginduak betetzen ez badira, ezin delako beste leku batera begira". Hala ere, horiek ez dira disziplinazkoak izango, informatiboak baizik, "udaltzainek gogoeta egin dezaten". Besteak beste, auto eta jantzietan pegatinak, besakoak eta kartelak eraman dituzten polizia agenteak zigortuko dituzte. Baita kamioiak ez gelditzeko agindua bete ez dutenei eta osoko bilkuretako batean gaien zerrenda banatzeko ardura zeukatenei ere. Halaber, Udalak negoziatzera uko egiten dionik gezurtatu du Zarraoak. Hala ere, baldintza ekonomikoei dagokienez, horiek Euskadiko Toki eta Foru Administrazioko Langileen Enplegu Baldintzak Arautzen dituen Akordioaren baitan jorratu behar direla adierazi du Zarraoak, "udaltzainenaz gain, gainontzeko funtzionarien baldintzak hartu behar dituelako beregain negoziazioak".
  Ekonomia 2005-06-08 23:41

Berangoko bizilaguna zauritu da herrian bertan izandako lan-istripuan

Erabiltzailearen aurpegia Ukberri Eguerdiko hamabi t'erdiak aldera gertatu da lan-istripua Berangoko Arene kaleko enpresa batean. Beharrean ari zen makinak zangoa harrapatu ostean, Mutua Vizcaya Industrial erietxera eraman behar izan dute A.G.S. 51 urteko berangoztarra, pronostiko erretserbatuko zauriekin, DYAk jakinarazi duenez.
  Ekonomia 2005-06-08 12:44

Azken arnasa eman du Leioako ospitaleak

Erabiltzailearen aurpegia Ukberri Inoiz erabili ez zen Leioako ospitalearenak egin du. Dagoeneko eraikin zaharra eraisteko lanak bukatu dira eta atzo Karmelo Sainz de la Maza Leioako alkateak jakinarazi zuenez ospitalearen desagerpena "pozteko arrazoia" da. Bertan, Saltuena auzoan, enpresa "ez kutsatzaileak", bulegoak, hotela edo geriatrikoa eta aisialdirako guneak eraikitzea nahi du Udalak. Lanak hasteko epea 2006 izango litzateke dena aurreikusita dagoen bezala joatekotan. Sainz de la Mazak atzo jakinarazi zuenaren arabera, Bizkaiko Foru Aldundiaren sinaduraren zain egon arren gunearen plangintza ia guztiz itxita dago.
  Ekonomia 2005-06-08 10:46

Gaur lanuztea egingo dute Autobuses de Lujuako grebalariek

Erabiltzailearen aurpegia Ukberri Autobuses de Lujua garraio enpresako langileek 24 orduko lanuztea egingo dute gaur, Bizkaibusen aritzen diren beste langileekiko berdintasuna aldarrikatzeko. Era berean, UGT sindikatuak jakinarazi duenez, autobus gidariak martxan abiatuko dira Loiutik Bilbora. Langileen arabera, Bizkaiko Foru Aldundiak "iruzurra" egin die. Izan ere, maiatzaren bukaeran besteak beste Areeta-Larrabetzu linearen zerbitzua ematen duen Loiuko enpresako kideek ekainaren hasierarako aurreikusita zeuzkaten lanuzteak bertan behera utzi zituzten, Eusebio Melero Garraio sailburua bitartekari lanak egin ostean. Langileek herenegun Batzar Nagusietan Bizkaiko Foru Aldundiko Gobernu Taldea osatzen duten EAJ eta EAk lan baldintzak berdintzea jasotzen zuen PSE-EEren proposamena atzera bota izana kritikatu dute.
  Ekonomia 2005-06-07 23:43

Asteazken honetan ekingo diete berriro protestaldiei Getxoko udaltzainek

Erabiltzailearen aurpegia Ukberri "Lan-baldintzak hobetzeko emandako epean, aurrerapausorik eman ez denez", asteazken honetan ekingo diete berriro ere protestaldiei Getxoko udaltzainek, ELA, CSI-CSIF, UGT, CCOO eta SVP sindikatuek iragarri eta Europa Press albiste agentziak jakinarazi duenez. Ekainaren 2an izandako batzarrean hartu zuten erabakia, negoziaziorako bideak eta "distentsioa" ahalbidetzeko asmoz, "erreibindikazio ekintzarik gabeko" astea bete zen egunean hain justu. Beti ere aipatu berri agentziak adierazitakoaren arabera, distentsio eperako finkatutako baldintzak "zintzoki" bete dituztela nabarmendu dute kaleratutako idatzian sindikatuek; baita gatazkari irtenbidea aurkitzeko mota guztietako pausuak eman dituztela.
  Ekonomia 2005-06-07 21:20

Langile bat zauritu da Algortako obra batean lanean ari zela eskorga bat burura erori zaionean

Erabiltzailearen aurpegia Ukberri Muskizko 38 urteko auzokide bat zauritu da gaur goizean Algortako Errebitarte kaleko eraikuntza-obra batean lanean ari zela eskorga bat burura erori zaionean, Ertzaintzaren iturriek jakinarazi dutenez. Lan-istripua 9:30etan gertatu da, eta zaurituak, JM.S.A. gizonezkoak, ebaki bat izan du buruan kolpearen ondorioz. Hori dela eta, DYAren anbulantzia batek Fremap mutuara eraman du.
  Ekonomia 2005-06-06 23:30

Getxoko Udaltzaingoak bi lagun atxilotu ditu arropa marka ezagunak faltsikatzen zituztelakoan

Erabiltzailearen aurpegia Ukberri Getxoko Udaltzaingoak bi pertsona atxilotu zituen joan den larunbatean Algortan, industri-jabegoaren kontrako delitua egitearen akusaziopean, herri horretako merkatu batean Nike, Dolce Gabana, Carolina Herrera, Versace eta Adidas marketako jantziak saltzeagatik. Gaur Getxoko Udalak prentsa ohar batean jakinarazitakoaren arabera, merkatal marka batzuen ordezkari legal batek salaketa idatzia jarri ondoren, udaltzainek gaia ikertu eta 220 jantzi atzeman zituzten. Udaltzaingoaren arabera, "jantzi batzuen faltsifikazioa ez zegoen ondo bukatuta, beren marka ez zetorrelako bat barruko etiketarekin". Burgosen bizi den F B. B. R. 27 urteko gaztea eta Bilbon bizi den E. J. C. 36 urtekoa dira atxilotutako saltzaileak.