Aurtengo Euskara Literatura Saria Unai Elorriaga idazlearentzat izan da, Francesco Pasqualeneren bosgarren arima (Susa) eleberriagatik. Sariak berarentzat zer suposatzen duen galdetu diogu Algortako idazleari; gainera, euskarazko literatura eta hizkuntza bera nola ikusten dituen ere azaldu digu. Durangoko Azokarako prestatu dituen berritasunak ere aurreratu dizkigu.

Azken hilabeteotan euskararen kontra iritsi diren epaiek administrazioetako hizkuntza politiketan "eragin zuzena" izaten ari direla ohartarazi dute hainbat eragilek. Getxon, berbarako, Udalak berak ere "ziurtasun juridikoa" aitzakiatzat hartuta, euskara-eskakizunak murrizteko bidea hartu duela salatu dute. Hori dela eta, eguenean, azaroak 27, elkarretaratzea egingo dute Getxoko udaletxearen aurrean, 10:30ean, administrazio publikoetan atzerapausorik onartuko ez dutela aldarrikatzeko eta euskaraz lan eta bizitzeko eskubidea defendatzeko.