2024an, 20.000 ekitaldi inguru erregistratu ziren Kulturklik atarian, Eusko Jaurlaritzak bultzatutako eta lurraldeko kultur programazioa biltzen duen plataforman. Beste era batera esanda: egunean, batez beste, 55 kultur saio izan ziren EAEko udalerrietan. Hala ere, uzta emankor horren atzean errealitate konplexuago bat dago: kultura ez da berdin iristen txoko guztietara. Ekitaldi ugari izan arren, lurralde-banaketak agerian uzten ditu sarbidean, aniztasunean eta hurbiltasunean eragina duten egiturazko desberdintasunak.

Uribe Kostako kultur eragileek 1.100 ekitaldi baino gehiago antolatu zituzten gurean iaz, 2024an, Eusko Jaurlaritzaren Kulturklik plataformako datuen arabera. Ekitaldi horien % 44,1 gaztelaniaz izan ziren, eta % 33,7 euskaraz –elebidunak barne–. Datu horiek, gainera, udalerrien arteko alde handiak erakusten dituzte, bai kopuruetan, baita kultur eskaintzaren intentsitatean ere.