Askartza Waterpolok denboraldi historikoa borobildu du. Leioako taldeak Espainiako Lehen Mailarako txartela eskuratu du, Mallorcari 12-9 irabazita, eta datorren denboraldian Leioa WPgaz batera arituko da waterpoloko zilarrezko mailan. Hala, Bizkaiak bi talde izango ditu kategoria horretan.

Getxo Rugbyk beste urrats bat egin du DH Elite mailara igotzeko bidean: horibeltzek CAU Valenciari irabazi zioten domekan, maiatzaren 31n, Faduran jokatutako play-offeko finalerdian (21-14), eta igoeraren azken hitzordua etxean bertan jokatuko dute, aste-akabu honetan, Alcala madrildarraren aurka. Universitario Bilbao Rugbyk, berriz, aukera galdu du azken unean El Fango zelaian (26-28), eta, ondorioz, ez da Bizkaiko finalik izango.