Joan den eguaztenean, Getxoko Haszten Elkarteak, Athletic Club Fundazioa eta BBK Fundazioarekin elkarlanean, Bizkaiko lehenengo "Powerchair Football" gurpil-aulki elektrikoen taldea aurkeztu zuen. Bilboko BBK Aretoan egindako agerraldian, babesle eta senitartekoen artean, Amaia prestatzaileagaz eta Xabi, Peio eta Ronan taldekideakaz berba egiteko aukera izan genuen. "Kirol berri honen nondik norakoak ikasten ari gara, baina helburua garaipenak lortzea eta mailaz igotzea litzateke" azpimarratu zuten jokalari guztiek.

Basquemotion proiektuak martxoaren 28an egin zuen lehen jaialdia, pala profesionalari ikusgarritasuna eta formatu berritua emateko asmoz. Lortutako arrakastagaz jarraituz, aste-akabu honetan hasiko da Summer Leaguea: formatua errepikatuko duen txapelketa batean, Gaubeka, Madariaga, Madonado edo Gordon bezalako pilotari ezagunek Euskal Herriko zazpi udalerritan jokatuko dute uda osoan, horien artean, uztailaren 22an, Plentzian. Enaitz Olaetak proiektuaren sorrera, lehen jaialdiaren harrera eta hurrengo urratsak azaldu ditu.