Getxoko PPk adierazi du ekainaren 19an Bilboko instrukzio-epaitegian egingo diren deklarazioek inflexio-puntua eragin dezaketela 'Irurak Bat' jauregitxoaren eraisketaren inguruko ikerketan. Egun horretan Urko Balciscueta epaitegiak izendatutako perituak eta Amaia De Felipe udal-arkitektoak deklaratuko dute, San Nikolas kaleko 11. zenbakiko eraikinari emandako lizentziaren tramitazioa eta ondorengo eraisketa argitzeko.

Hasi da Ibai Aginaga euskal preso ohiari Berangon ongietorri ekitaldi bat egiteagatik auzipetu dituzten 16 lagunen kontrako epaiketa Espainiako Auzitegi Nazionalean. Atzo, ekainak 8, egin zuten lehenengo saioan ikerketa-lanetan aritu ziren guardia zibilek, Espainiako poliziek eta ertzainek deklaratu zuten. Fiskaltzak bi urte eta bederatzi hilabetera arteko espetxe-zigorrak eskatzen ditu akusatuentzat "terrorismoaren gorazarre" delituak leporatuta, baina defentsak epaiketa bertan behera uzteko eskatu du, akusatuen aurkako froga zehatzik ez dagoelako.