Getxoko Udalaren azken osoko bilkuran Udalbatzak auzoetan hainbat hobekuntza egiteko inbertsioak iragarri zituen, baina La Terraza taberna eraikina ustiatzen duen enpresari zigorra "irrigarria" irudi zitzaion oposizioari. Gainera, itxi gura duten Larrañazubi ikastetxearen inguruko eztabaida atzeratzea erabaki zuen gobernu-taldeak. Era berean, 'Irurak Bat' jauregitxoaren auziagatik kargutik kendu zituzten zinegotzien ordezkoen lehen osoko bilkura ere izan zen.

Berangoko EH Bilduk salatu du Goikoerrota baserriari lotutako XVI. mendeko errota eraitsi dutela, Bizkaiko udalerri horretan zutik geratzen ziren bost errota historikoetako bat. Koalizio soberanistaren arabera, eraikina "1588ko ezkontza-kontratu batean" daborduko aipatzen zen, eta ondare-balio handiko elementutzat jotzen zuten bai tokiko katalogazioek, bai erakundeen txostenek.